Israelfɔ Ɩlʋ 31
31
Ɔtanʋkpa Kpikpli
Dawid kanfʋ-ɩlʋ ha ɩlʋ osunapʋ.
1Nana Bulu, fʋ nasrɩ tanʋ.
Máha pɛlɩ ɩkɩta mɩ ɛkɛkɛɛkɛ.
Yile ɔbwɛpʋ fʋgyi, sʋ hɔ mɩ.
2Yaa asʋ ha mɩ, afʋwa ɔsa lɛ mɩ!
Bwɛ mɩ ɩbʋta ánɩ́ nɛ́srɩ tanʋ.
Oŋainkpa kpikpliá ɩbɔ́hɔ mɩ nkpa.
3Fʋgyi mɩ ɩbʋta pʋ́ mɩ oŋainkpa kpikpli.
Fʋ ɩda sʋ gya mɩ nkpa, afʋkpa mɩ.
4Lɛ mɩ lɛ yibiá bafɩnɩ mɩtɔ,
tsufɛ fʋgyi mɩ ɔtanʋkpa.
5Napʋ mɩ ɔŋɛ wa fʋ ɩbɩtɔ.
Oo! Nana Bulu, Bulu Ɔnɔkwalɩpʋ, fahɔ mɩ.
6Ntekisi ɩkpɩ atswɛpʋ.
Mɩ mʋ́ ntɔpʋ ansɩ dɩnka fʋ Nana Bulusʋ.
7Fʋ ɔdwɛá ɩma ɔka sʋ
ɩwɩ bɛ́sankɩ mɩ, nénya ansigyi.
Tsufɛ fawun mɩ ɩkplantɔ, fabɩ mɩ asʋn wunhɛ.
8Fʋmɔkʋsi mɩ wa mɩ alupʋ ɩbɩtɔ.
Mboun fapʋ mɩ lɩɩ ɔtɛɩkpa.
9Ao Nana Bulu, wun mɩ nwɛ, tsufɛ mbʋ ɩkplantɔ.
Nasu punya ansibi,
ɔŋɛ lata mɩ.
10Isu lagyi mɩ nkpasʋ.
Nawa nwɛ mɩ nkpatɔ fɛ́ɛ́.
Mɩ lakpan sʋ ɔŋɛ lata mɩ, awútɔ labwiebwie mɩ.
11Mɩ alupʋ sʋ namli tɔá ɩbʋ nyanya.
Nabwɛ ɔfɔɔ mɩ aba ansɩtɔ.
Aha bowun mɩ brɔnʋsʋ bʋsrɩ.
12Batan mɩsʋ fɛ ɔha wuhɛ.
Namli fɛ planfɔ.
13Nanu mɩ ɩwɩ afunu tsɔtsɔɔtsɔá aha bʋdɛwa.
Tɔá ɩbʋ ifu labomli mɩ.
Bakan mɩsʋ ánɩ́ bɛ́ka mɩ nkpa itin.
14Tamɛ mɩ mʋ́ a, Oo Nana Bulu, fʋsʋ mɩ ansɩ dɩn.
Ndɛblɩ mbɛɛ, “Fʋgyi mɩ Bulu.”
15Mɩ nkpa bʋ fʋ ɩbɩtɔ.
Lɛ mɩ tsu mɩ alupʋ pʋ́ aha ánɩ́ bʋdɩn mɩsʋ ɩbɩtɔ.
16Wa awɩtɔlɛ ha mɩ, fʋ osumbi.
Pʋ fʋ ɔdwɛá ɩma ɔka hɔ mɩ.
17Nana Bulu, máha pɛlɩ ɩkɩta mɩ.
Tsufɛ fʋ ndekpoli.
Pɛlɩ ɩkɩta aha lalahɛ, abʋkpa ɔnɔ bun yɔ afulitɔ.
18Bʋtotsu ɩwɩ, bʋtɔtɔɩ aha yilesʋ, nya amʋ́ nyanya.
Mʋ́ sʋ kpa amʋ́ ɔnɔ bun.
19Atɔ wanklaan ánɩ́ fapʋyaɩ fʋ ifu anyapʋ lɔkʋkʋ moni o.
Fapʋha fʋ atanʋpʋ aha ansɩtɔ.
20Féŋain amʋ́ fʋ wa si aha ánɩ́ basusu amʋ́sʋ,
lɛ amʋ́ lɛ ɩla alɛpʋ ɔnɔ.
21Ɩkanfʋ ɩbwɛ Nana Bulu klɛ,
tsufɛ ɔlɛhɩɛ lɛ mʋ ɔdwɛá ɩma ɔka suna mɩ
brɛá adʋn bɛkafia mɩ wulu, mma tɔtɔ bwɛtɔ.
22Ɩnʋ opuni letsii mɩ nɛblɩ mbɛɛ,
“Alasi mɩ wa ɔkpa”,
tamɛ brɛá nosu kpoli mʋ a, olonu mɩ ɔmɛ.
23Aha ánɩ́ mlɩtamakpa Nana Bulu ɔma fɛ́ɛ́, mlɩdwɛ mʋ.
Bulu tɛkpakpa ɔnɔkwalɩpʋ ɩwɩsʋ ipi,
tamɛ ɔtɛhɩɛ bɩtɩ ɩwɩ atsupʋ ɩsʋ.
24Mlɩ aha ánɩ́ mlɩdɛ Nana Bulu ɔkpa kɩ fɛ́ɛ́,
mlɩwa ɩwɩ ɔwʋnlɩn, mlɩtomi, amlɩwa ɩklʋn.
Одоогоор Сонгогдсон:
Israelfɔ Ɩlʋ 31: nko
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation