Oyinyima 4
4
Ịrẹyị Ikeeni ọnịrị Ẹba beri Ịsẹtị
1Ẹkụhị ọnya Adamị ộ nọ ịda ose anị. Ịnị ụmẹ chee di ose anị ee zyẹẹ nị. Ộ ma ozi ọnọọ ọnọrụ. Di Iivi ka: Ẹnẹyịmavara Ohomorihi ọ raà mẹ ọgụvọ yị ọnị ka ọnị ọ̀ ma ozi ọnọrụ ọnya. Dị ọ ka agụvị avọọ ozi ọnọọ ọ rị Ikeeni nị. 2Ọ rẹ ma ozi ọnọrụ ọsa ana aā hị́ Ẹba. Ẹba, ọ mẹ sị vịra dị aā pá atẹmẹ ọnịrị ẹvụ nị, di Ikeeni ọnị aa kụ́ ịrịkụ nị. 3Ẹkụhị ọnya di Ikeeni sị ịsa ịnị aarẹ anị ka ọnị ọ̀ sị na mẹ̀ ịsọvọ yị Ẹnẹyịmavara nị. 4#Ihib 11.4Di Ẹba ọnị rẹ sị atẹmẹ ịpaapa ana atẹmẹ anị ma, dị ọ wụ̀ ọ, dị ọ sị ene zoza ịnị anị hu, dị ọ sị mẹ̀ ịsọvọ yị Ẹnẹyịmavara nị. Ebira Ẹba ọnịrị ịsọvọ ọnị ọ mẹ ộ ngụ Ohomorihi eyi. 5Ama ebira Ikeeni ọnịrị ịsọvọ ọnị ọ mẹ e yi zee Ohomorihi eyi. Agụvị avọọ dị ayị Ikeeni aa dà ọ̀va, dị ọ sụ́ eyi anị nganganga nị. 6Di Ẹnẹyịmavara va họ̀ Ikeeni dị ọ ka, “Sị ẹ vẹ dị ayị anị maanị aa da ọva dị o sị eyi anị sụ́ nganganga? 7Ọ kà ọọ yaanị mẹ̀ ebira ana vọrọ, ịnẹ anị yaanị ee hine aanị. Ọ rẹ ka ọ̀ yị mẹ̀ ebira ana vọrọ, ịvị ọ sị gụrị ọ ee sì ka ọnị ọ̀ nyị ehuna anị Ọ kà ama ọ̀ sị vụrị di ò re ka ọnị ô huna a.”
8 #
Imt 23.35; Irk 11.51; 1 Ịjọ 3.12 Ẹkụhị ọnya Ikeeni ô pè Ẹba ọyịnyara anị kà ịrẹyị. E mè hi ịnị aarẹ, di Ikeeni za Ẹba dị ọ wụ̀ ọ nị. 9Ọ mẹ sị ọ wụ di Ẹnẹyịmavara va hị́ Ikeeni dị ọ ka: Ịzị Ẹba ọyịnyara anị yà? Di Ikeeni ka. Ọnị ọ yị yẹ ịzị ọ yà, oo! Ọ kà vị ọnị vee sere ọyịnyara anị nị? 10#Ihib 12.24Di Ẹnẹyịmavara kà: “Sị ọ mẹ aanị? Ọ kà ọ sị ọyịnyara anị wụ. Ọ rẹ ka anya anị ana và hi eteesu ee nowu, ọnị maa wụ́; 11avọọ e si chì hi ọ. Ọ̀ọ kụ ịrịkụ, ẹtẹ ọ yị kụkụ vaa mẹ̀ ịsa yị ọ agụvị ka ọ sị ọyịnyara anị wụ̀ dị ọ dọ va hi ẹtẹ nị; vị ẹtẹ há irenu, dị ọ dọ anị nị. 12A sị ọ dụ hụụnị ẹtẹ ozoza ọnọọ ọ yị kụkụ vaa nyị ịzị ọ vaa ra, vị ọ vanaa doodo ngụ ẹhẹẹ zi pooro nị.” 13Di Ikeeni kà a yị Ẹnẹyịmavara dị ọ ka, “Tee, ụya anị ọnọnị ọ sị banyị, ọnị ọ yị zụ za a. 14Ọ kà ọ sị ọnị dụ hụụnị ẹtẹ ọnọnị, ọ sị ọnị dụ hụụ ịda anị, di ahịka vị ọnị kụkụ aa ngụ ẹhẹẹ zị doodo nị. Ọza ene èe re ọnị kẹnẹ, vị aa wụ ọnị nọ.” 15Di Ẹnẹyịmavara va kà a yọ ka: àa vị avọọ ọ mẹ̀ vị. Ọza ana àa wụ̀ ọ, di a sị ụya anị rị ọ oze ịhịmba. Di Ẹnẹyịmavara mẹ apọtẹrẹwa tụ́ Ikeeni ẹngụ nị ka èe re e a va wụ̀ ọ. Ihiburu ka di e si ọ atọ oze ịhịmba ọnị ọ vị ka avaba ụya ana a vọrọ ka ọ̀ rị, a vaa sị rị ọ nị. 16Di Ikeeni sị hụụ ịda Ẹnẹyịmavara, dị ọ nọ eyi ịzị ọyịị̄ zịị vẹ Edẹnị, dị ọ na yà ịnị ẹtẹ ana aā hị́ Inodi. Iruvo Inodi vị ọ̀yị ngụ ọ zịịzị nị.
Ezi Ikeeni
17Ikeeni ộ nọ ịda ose anị, di o zyẹẹ nị. Ộ ma ozi ọnọọ ọnọrụ, ana aā hị́ Enọkị. Dị ọ dà ẹkụra ọnya di aa sị ịrẹha Enọkị ozi anịị hị́ ẹkụra ọnọọ nị. 18Ose Enọkị ọnị ọ rẹ ma ozi ọnọrụ ọnya yọ, dị ọ hị́ ọ Iradi nị. Iradi ọnọọ ọ vị ada Imehujeri nị. Di Imehujeri ọnị vị ada Imetuseri nị. Imetuseri ọnị rẹ vị ada Irameki. 19Irameki ọnọọ ọnị ộ nyị ọnẹẹ ẹẹva. Ọnya ọ rị Ada dị ọsa ọnị rị Izira nị. 20Ada ọ ma Ijabari nị. Ijabari ọnọọ ọ vị ọnịpaapa ana ra ịnị ajẹngụ, dị ọ pá imaaru nị. 21Ọyịnyara Ijabari ọ rị Ijubari nị. Ọnị ọ vị ọnịpaapa eneē hú àgidibò ọnịrị okokoro nị. 22Izira ọnị ộ ma Itubari Ikeeni. Itubari Ikeeni vị anaā mẹ ụ̄hị́, di aa sị enyusẹ tụ́ ịsa irenyi-irenyi. Ọyịnyara Itubari Ikeeni ana vị ọnẹẹ ọ rị Inaama nị.
23Ẹkụhị ọnya di Irameki hị́ ese anị dị ọ ka, “Ada ọnịrị Izira, ọ wụ́ ịrẹyị anị ọ ka, ẹwụ nini ese emi, mị ka we batọ ịrẹyị amị nịnị. Ọ kà â nyị ọza ana tụ̀ ọnị ụnava, dị ọnị wụ̀ ọ nị, ozwọọmụha ọnya mẹ̀ nya ọnị ịsa vị ọnị hyakụ rẹ wụ̀ ọ nị 24Ọ kà aa vị ka â sị ụya oze ẹchẹhị rị ọza ana wụ Ikeeni, ọnị ọ yẹ kaakara ka ọza ọ̀ọ kanyị ọnị ụya ene huna avọọ oze ẹchẹhị ọ vaa rị nị.” 25Adamị ọ rẹ nọ ịda ose anị, dị ọ ma ozi ọnọrụ nị. Dị ọ hị́ ọ Ịsẹtị nị, ọnị ọ vị ka Ohomorihi ọ raà sị ozi ọnọrụ ọsa dọ Ẹba ịrẹsụ mị. Ikeeni mẹ̀ sị Ẹba wụ. 26Ose Ịsẹtị ọnị ọ rẹ ma ozi ọnọrụ ọnya yọ, dị ọ yị ọ nị. Ụmẹ ọnọọ aza nyima dị ẹ yaa mẹ̀ aduwa hi Ẹnẹyịmavara nị.
Одоогоор Сонгогдсон:
Oyinyima 4: EBTP
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Ebira First Bible © Bible Society of Nigeria, 2014.
