Oyinyima 3
3
Ọnọrụ ọnịrị Ọnẹẹ ệ mẹ ịvị
1 #
Ẹtẹ 12.9; 20.2 Ịnị avaba uye ịnị avị ọnị Ẹnẹyịmavara Ohomorihi tụ́, ẹ́wụ́ ọ vị ọnọbọ hu kere-kere nị. Ẹkụhị ọnya o vẹ tù ọnẹẹ ọnọọ dị ọ họ̀ ọ ka: Ho, aanị ka ẹ yị nyị ẹtụtụ ọchị ọnị Ohomorihi zẹẹ ka ẹ̀ẹ rị ịnị ẹtụtụ ene hi ini ụbazị ọnọnị aanị? 2Dị ọnẹẹ ọnọọ tụ́ ẹ́wụ́ ohi dị ọ ka: ẹnị ê re oze rị ẹtụtụ ọchị ene hi ịnị ụbazị aanị, 3ama Ohomorihi ka ẹnị ẹ yị nyayịnẹ rị ẹtụtụ ọchị ana yà ịnị akakana ụbazị avọọ, ọ ka asị ẹnị hyakụ sị ụvọ kanyị ọ, ka ẹnị ve su. 4Dị ẹ́wụ́ ọnọọ kà a yị ọnẹẹ ọnọọ dị ọ ka, “Sị ọọ yị, wẹ yị hyakụ ee sú vụrụ-vụrụ.” 5Ọ kà agụvị ka Ohomorihi ộ yẹ ka ẹ̀ẹ rị ọ vi eyi ẹnịnị ee hweyi nị, dị ẹ kụkụ yà anka Ohomorihi mẹ̀ yà. Ọ kà dị ẹ sị ịsa ozoza ọnịrị ịsa odivi yẹ. 6Ịzẹyịza ọnẹẹ ọnọọ ô re ka ẹtụtụ ọchị ọnọọ ọ rụra rị. Ô re ka ộ ngụ ọza eyi, o re ka ọ zụ mẹ ka eyi ọza ò hweyi ọ mẹ ka o zee e eyi hu avọọ ọ sị ẹtụtụ anị dị ọ rị ọ nị. Dị ọ rẹ sị ịnị anị yị ọva anị nị dị ọnị rẹ rị ọ nị. 7Ẹ mẹ̀ yị rị ọ kẹnẹ eyi ẹnịnị ẹ si hweyi, di e re ka ịnị ahwaahụ ẹnị yà nị. Dị ẹ na dị ẹ na jị avị, dị ẹ gẹ ẹ di e si kú ẹngụ nị. Ịrẹha ọchị ọnọọ ọ rị itena, dị a rẹẹ hị́ ọ ihwigi nị. 8Ọyị mẹ̀ sị rọ ịhị ọnọọ, dị ẹ wụ́ ka Ẹnẹyịmavara Ohomorihi aa vẹ ịnị ụbazị nị. Dị ọnọrụ ọnọọ ọnịrị ose anị si zwe na tẹ̀ ịnị ọchị ẹnẹẹ nị ka asị Ẹnẹyịmavara Ohomorihi re ẹnị. 9Di Ẹnẹyịmavara Ohomorihi hị́ ọnọrụ ọnọọ dị ọ ka, “Ịzị ụ yà nịnị?” 10Di ọnọrụ ọnọọ ka: ọnị ọ wụ́ ọ maa zị ụsẹ ịnị ụbazị, di angwa ee hí ọnị agụvị ka ahwaahụ ọnị vị nị. Agụvị avọọ dị ọnị na tẹ̀ nị. 11Di Ohomorihi kà: Ẹ̀nị ẹ kà a yọ ka ahwaahụ ọ vi nị? Dị Ohomorihi họ̀ ọ ka ọ́ọ́ na rị ẹtụtụ ọchị ọnị ọnị kà a ka asị ọ rị ịhị ọnọọ rị nị? 12Dị ọnọrụ ọnọọ ka: Aaa vị ọnẹẹ ọnị ọ sị ve pe ọnị tụ́ ịzẹnị ọ sị ẹtụtụ ọchị ọnọọ yị ọnị dị ọnị va rị ọ. 13#2 Ịkọ 11.3; 1 Itim 2.14Di Ẹnẹyịmavara Ohomorihi va họ̀ ọnẹẹ ọnọọ use ka: Sị ọ mẹ aanị? Dị ọnẹẹ ọnọọ ọnị rẹ ka, Ẹ́wụ́ o vene ọnị dị ọnị va na rị ọ nị.
Ọkarẹyị ịvị yị ẹwụ ọnịrị ọza.
14Di Ẹnẹyịmavara Ohomorihi va kà a yị ẹ́wụ́ ọnọọ dị ọ ka: ebira ọnị ọ mẹ aanị ọnị aanị vee divii hu bemi ịnị avaba uye nịnị nị. Ọ kà ịrẹka o veneē sii tùraa zị nị, di ahịka ezi ọ vaa baa rị pooro ịnị ẹhẹ anị nị. 15#Ẹtẹ 12.17Ohomorihi ka ọnị vaa mẹ ka ẹwụ ọnịrị ọnẹẹ ọnọọ ọ̀ vị ọnịvị ẹngụ. Ọ kà Irima ezi anị ọnịrị irima ezi ẹwụ vị ana vaa vị ọnịvị ẹngụ. Ẹnị vị ana vaa chaka wụ ịrẹsụ, dị ẹwaa dà a ibezyahụ rị. 16Di Ohomorihi kà a yị ọnẹẹ ọnọọ ka, “Ọnị vaa sị eyi anị re ịrẹyị ẹtẹẹtẹrẹ àa ma ozi. Vị ọ vaa zị ọ ẹnẹmẹhị nị. Ama vi o vee yii sì ka ọnị ọ̀ yà ịda ọva anị nị, di ahịka ọnị aa mẹ ọdaa tụra a nị”. 17#Ihib 6.8Di Ohomorihi kà a yị Adamị dị ọ ka, “Ịrẹyị ose anị ọ na sị mẹ̀ ụkọrọ, dị ọ na rị ẹtụtụ ọchị ọnị ọnị ka ọ yị nyayịnẹ rị nị Ọ kà avọọ, ọnị ọ raà hụ agụvị anị chì hi ẹtẹ. Ọ kà pooro ịnị avaba ẹhẹ anị vị ọ vaa rị ụya nị”. 18Ọ kà ikeyi ọnịrị ịrarẹ ẹzụ ikeyi ó vee hi nị. Di ahịka vi o vee re osiye dị ọ̀ va rị ịsa nị. 19Ọ kà dị ọ ve re ịsa rị, ọ vaa sị ụvọọ ka ẹhịị mi. Ọ rẹ ka avọọ ọ mẹ vaa mẹ pooro dị ọ̀ varẹma nọ ịnị eteesu nị, agụvị ka ezi a sị mẹ ẹ nị. Ezi ọnọọ ọ rẹ vaa vàa nọ ịnị anị nị. 20Adamị ộ sị ịrẹha yị ose anị ka ọnị ọ rị Iivi (Ọnyọza) nị, agụvị ka ọnị ọ vaa vị ọnyị avaba ọza nị. 21Di Ẹnẹyịmavara Ohomorihi sị ịtụmpaha uye dị ọ sị jị ịta di o si kú Adamị ọnịrị ose anị ẹngụ nị.
Ohomorihi ộ dị ụ wa hụụnị ụbazị.
22 #
Ẹtẹ 22.14
Di Ẹnẹyịmavara Ohomorihi ka: wéē re, ọnọrụ ọnọnị vị ana kụkụ yà anka ọnya ịnị ẹngụ ayị, ọ sị ịsa ozoza ọnịrị odivi yẹ. Ọ kà ọ nyayịnẹ na sị ẹtụtụ ọchị anaā mẹ ka ọza ọ̀ yàra dị ọ rị ọ, dị asị ọ kuku sú. 23Di Ẹnẹyịmavara Ohomorihi dụ ọ jịnẹ hụụnị ụbazị Edẹnị nị, ka ọ̀ naa dà aarẹ tụ́ ịnị ẹtẹ ana dà a di a sị mẹ̀ ẹ. 24Dị ọ vavọọ dụ ọnọrụ ọnọọ jịnẹ nị, dị ọ kụ́ ịsa ana nyị ụhwẹ ana aā hị́ icherubi nịnị, dị ọ kụ́ wa hi eyi ọnị ọyịị̄ zịị vẹ ịnị ụbazị Edẹnị nị. Dị ọ rẹ kụ ụhwọ ọbanyị ịrịịra hi ịzọọ ene ee jesii zị agụvị asị a nyị ọza ana kụkụ zụ ngụ ịzọọ ne tù ọchị ana zụ mẹ ka ọza ọ̀ yàra pooro.
Одоогоор Сонгогдсон:
Oyinyima 3: EBTP
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Ebira First Bible © Bible Society of Nigeria, 2014.
