Luka 13
13
Mweyolobye mulehe ebyonoono by'eeng'we, ataali ao muchia ohufwa
1Esiha syeene esyo, baliwo abaandu baandi ababoolera Yesu ebidiira hu Bagalilaaya ba Pilato yasasaania amabaanga kaabwe neende ebiyaanwa byaabwe bi bali bayirira Nasaae. 2Nae Yesu yakobolamo ati, “Mubaasa muti Abagalilaaya bano bali abahola-mbi ohuhiraho Abagalilaaya baandi hu beemeo basaandisibwe batyo? 3Mbaboolera endi, Haba daawe; nae ohutusaho nimuteyolobya, mwesi muchia ohusihirira mutyo. 4Oba, abaandu ehumi-na-bataanu-na-badatu ba omunara kwe Siloamu kwakwaaho mani kweeta, mubaasa muti bali abahola-mbi muno ohuhiraho abaandu baandi boosi abali bamenya mu Yerusalemu? 5Mbaboolera endi, Haba daawe; nae nimuteeyolobya, mwesi muchia ohusihirira mutyo.”
Olukaado ludiira hu mutuli kutaamaho ebyaamo
6Mani Yesu yeecha yabakaadira olukaado luno ati, “Waliwo omusaacha wuundi owataaka omusaala kw'enduli mu ndalo yae; olwoola omusaacha oyo yeecha nakoonyaho ebyaamo, nae yahaya ohwakaanaho esyaamo syoosi. 7Mani omusaacha oyo yalaanga omulimi w'endaalo eyo, yamuboolera ati, ‘Bone, ndaheecha ano emyaaka kidatu kino kyoosi ningoonyaanga hu mutuli kuno esyaamo, nae haba sinyolaangaho esiindu syoosi. Mani bulaanu kuteme kukwe aasi; olwohuba simbona esikera nikuchiiririra ohunyaasa eloba lino?’ 8Nae omulimi oyo yamukobolamo n'amuboolera ati, ‘Omuhuluundu, kulehe kubeeo omwaaka kuno kwosi, ngwaakeho mu sisina kweebodoohanie, male kuteeho embolera. 9Mani nikwiichuhana kwaamaho omwaaka kwiicha, siba sinaba esilai; nae nikuhaya ohwaamaho, bulaanu onyala ohukutema kwaakwa aasi.’ ”
Yesu awonia omuhasi mulema hu ludaalo lwa Sabbaato
10Olwoola, Yesu yali niyeekesa mu sinagoogi yiindi hu ludaalo lwa Sabbaato. 11Mani mu bweene omwo, mwalimo omuhasi wuundi owali aliho esihyeeno syamulemya hulw'embaka y'emyaaka ehumi-na-kitaanu-na-kidatu; yali niyefuumbamo omukoongo, n'atanyala kata ohweema n'akololoohe. 12Yesu niyamubona ati, yamulaanga mani n'amuboolera ati, “Muhasiing'ene, omalire ohuwonisibwa obulema bwao.” 13Yesu yamwiisaho amahono kae, mani abweene-na-bweene ao, omuhasi oyo yaakololoha, mani yachaaka ohufumia Nasaae. 14#Hut 20:9,10; Amal 5:13,14. Nae omwimirisi wa sinagoogi eyo, yeechula etima liingi olwohuba Yesu yali awoniisye hu ludaalo lwa Sabbaato, yaboolera abaandu ati, “Aliwo endaalo chisaasaba echihoyere ohuholerwaho emirimo; mani mwiicheenge hu ndaalo echo muwonisibwa, nae mutechaanga hu ludaalo lwa Sabbaato.” 15Nae Omwaami yamukobolamo ati, “Abebachirisi eng'we! Mweeng'we mweesi, naanu otaboololaanga endaawu yae kata esuhiri yae hu ludaalo lwa Sabbaato ayitusa mu sidwooli, mani ayiyira ohung'wa? 16Nae omuhasi wuno, omuhaana wa Abburahamu, yi Sitaani yaboya hulwa embaka ye myaka ehumi-na-chitaanu-na-chidatu, haba s'ahoyera ohuboololwa obuboye buno, hu ludaalo lwa Sabbaato?” 17Yesu niyalomaloma sino, abasuku bae boosi esoni chabadiira muno; nae abaandu baliwo boosi bachaaka ohwehoya hulw'ebiindu by'oluyaali byoosi bi Yesu yali n'aholere.
Olukaado lw'olumwo lw'omutuumba
(Mat 13:31-32; Mrk 4:30-32)
18Yesu yaboola ati, “Obwaami bwa Nasaae bufwaanana neende siina? Haandi ndabukerananie hu siina syeene? 19Bufwaanana neende olumwo lw'omutuumba lu muundu wuundi yabukula yacha yataaka mu ndalo yae; mani lweechula lwahula, lweehola omusaala muhoongo, mani amayoni kabburuha keecha koombaha ebiyu mu masaga kakwo.”
Olukaado ludiira hu mamera
(Mat 13:33)
20Yesu haandi yaboola ati, “Siina syeene sindaakeraanieho obwaami bwa Nasaae? 21Bufwaanana neende amamera ka omuhasi wuundi yabukula mani yaacha yasaasa mu lita amahumi kane ech'obusye, ohwoola lu bwoosi bwebbaaha bwafwiimba bulai.”
Omulyaango mudiiyu
(Mat 7:13-14,21-23)
22Yesu yakeenda naabitira mu biko neende mu ngoongo, niyeekesaanga, haandi naali hu lukeendo naachia Yerusalemu. 23Mani omuundu wuundi yeecha yamuboolera ati, “Omwaami, abaandu bachia ohuwonisibwa bahabe sa abayeraanu?” Yesu yababoolera ati, 24“Muteemeho muno ohwiingirira mu mulyaango mudiiyu; olwohuba mbaboolera endi, abaandu baangi bachia ohuteemaho ohwiingira nae haba sibachia hunyala. 25Mani omwenengo niyahasiingire, mani yekalawo olwiiki, muchia ohweema erwaanyi muchaake ohuhong'oonda hu lwiiki nimuboola muti, ‘Omwaami, twiikulireo.’ Nae achia ohubakobolamo ati, ‘Ese haba siimanyire yi mutula daawe.’ 26Nae mwahachaake ohuboola muti, ‘Efwe hwalichaanga haandi hwang'wechaanga mu moni wao, haandi weekesaanga mu makira keefwe.’ 27#Sab 6:8.Nae achia ohuboola ati, ‘Mbaboolera endi, ese haba siimanyire yi mutula daawe; mumbweere-eyi, eng'we mweesi abahola-mbi!’ 28#Mat 22:13; 25:30.#Mat 8:11,12. Eyo niyo yi muchia ohulirira nimweesia ameeno, nimubona Abburahamu neende Yisaka neende Yakobbo neende banabbi boosi mu Bwaami bwa Nasaae nae eng'we abeene nimusukuunwe erwaanyi. 29Mani abaandu bahatule ebukwe neende emuumbo, haandi neende emukulu neende emwaalo, mani beehala hu meesa mu Bwaami bwa Nasaae. 30#Mat 19:30; 20:16; Mrk 10:31. Mani bone, aliwo abaandu bamaliirihayo bulaanu abachia ohutaangiramo, haandi aliwo abataangiramo bulaanu, abachia ohumaliirihayo.”
Ohuheera hu Yesu yaheereramo Yerusalemu
(Mat 23:37-39)
31Esiha syeene esyo, Abafarisaayo baandi beecha, mani baboolera Yesu bati, “Tula ano oweeo, olwohuba Herode adaha ohuhwiita.” 32Nae Yesu yababoolera ati, “Muchie muboolere ebbwe elyo muti, ‘Bona, ese njirusa emisaambwa haandi monia abaandu enyaanga yino neende muchuli, nae oludaalo lwohudatu maliirisa omulimo kwaange. 33Nae kata katyo ndi neende ohuchiiririra neende biindi ohuhola, enyaanga yino neende muchuli, neende oludaalo luloondaho; olwohuba sisinyalihana ohuba mbwe, omunabbi afwiira erwaanyi w'esiko sya Yerusalemu.’ 34Eee eng'we abe Yerusalemu, ohwiitaanga banabbi neende ohuhuyaanga amakina abo ababa nibabatumiirwe! Nga ndekoomba ohubuusa alala abaana beeng'we koti lu ngoho yibuusanga obumwiinyu bwayo mu mbaya chayo, nae haba simunyaliha daawe! 35#Sab 118:26. Bone, enyuumba yeng'we yebwabirwe. Haandi mbaboolera endi simuchia ohumbonaho, ohwoola lu mwahaboolere muti, ‘Ali neende ehabi oyo owiicha mu liita ly'Omwaami!’ ”
Одоогоор Сонгогдсон:
Luka 13: SAMIA
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
©Bible Society of Kenya, 2019
©Bible Society of Uganda, 2019
