LOS HECHOS 1
1
Dios appekkeneykekxa appeywa yakwayam ewak Espíritu Santo
1-2Eyáxeg Teófilo,#Lc 1.1-4. ektáxésesek axta exchep ekyókxoho aksok apkelané axta Jesús, tén han ma'a ektémakxa axta apkelxekmóso sekxo' aptamheykencha'a, ekwokmoho nahan ma'a apmeyákxo axta néten, cham'a émha amonye sektáxéseso axta exchep weykcha'áhak. Apmések axta apkeltamhókxa etnehek apkelxekmóso amonye apxega Jesús ma'a énxet'ák seykha amya'a ektaha axta apkelyéseykha, eñama m'a Espíritu Santo. 3Apxekmowásamákpekxók axta nahan natámen apketsapma, apxekmowásawók agko' axta aptaha memassegwayam. Cuarenta ekhem axta weykmohok apxekmowásamákpekxoho xa énxet'ák nak, apkeltennáseykha axta nahan ma'a aptémakxa nak Wese' apwányam Dios.
4Apkeltennásek axta apkeltámeséyak megkeyméxko elántépok ma'a Jerusalén, cham'a aphamakxa axta makham Jesús nepyeseksa. Aptahak axta apkeláneya s'e:
—Kólleyx sat sekxo' katnehek ma'a apxeyenma axta egkések kéxegke Táta,#Lc 24.49. cham'a seltennasa axta kéxegke. 5Nakso' axta apyakpásáseykegko yegmen énxet Juan, kaxwo' sat eyke kólyakpásesagkok kéxegke yetlo Espíritu Santo.#Mt 3.11; Mr 1.8; Lc 3.16; Jn 1.33.
Jesús apmeyeykekxa néten
6Aptahak axta apkelmaxneyeyncha'a énxet'ák ektaha axta apkelxegexma'a Jesús se'e:
—Wese', ¿peya etekkesásekxohok makham xép énxet'ák Israel ma'a ektémakxa axta apkeláneykencha'a apheykegkaxa tén han ma'a mók yókxexma nak?
7Aptahak axta apchátegmowágko Jesús se'e:
—Megkapayhawok kéxegke kólya'asagkohok ekwánxa ekhem yakwánxa nak elának Táta m'a aksok aptaha nak apwánxa apagko' apmopwána elána'. 8Wánxa agkok, apwa'ak sat agkok Espíritu Santo kélnepyeseksa kéxegke, kólxawak sat kélmowána, kólxog sat nahan cha'a yakwayam kólxének sekwesey ko'o, Jerusalén, tén han kólmahagkok ma'a ekyókxoho yókxexma Judea, tén han ma'a Samaria, kawomhok sat nahan kélmaheyak ma'a eyátépexa nak.#Mt 28.19; Mr 16.15; Lc 24.47-48.
9Kélya'ásekxeyk axta néten Jesús natámen apteme appeywa xa, cham'a neyseksa apkelanyo axta apkeltámeséyak, xama yaphopé axta chápak, massék axta anhan apwet'a xa apkeltámeséyak nak.#Mr 16.19; Lc 24.50-51. 10Apkelwet'ak axta apxekmowáseykpoho apkánet énxet apkeleñama néten apkelmopé axta apkelántaxno, cham'a neyseksa aptakmelchesamo axta apkelenmexmo néten apkelwet'a apwegkepákxo Jesús. 11Aptahak axta apkeláneya s'e:
—Enxet apkeleñama nak Galilea, ¿Yaksak ektaha kélenmexo nak néten? Cháxa Jesús apha axta kélnepyeseksa kéxegke xa kélya'áseykxo nak néten, sat nahan katnehek apkexyekmo sat xa ektahakxa nak kélwet'a apmeyákxo m'a néten.
Matías kélyéseykha
12Egkexe ekwesey Olivos axta apkelenyektak énxet'ák seykha amya'a apkelmeyákxo m'a Jerusalén. Un kilómetro axta m'a. Hawók axta m'a eltémókxa axta segánamakxa kawomhok cha'a nenxega ekhem nellókasamakxa negyampé. 13Xama axta apkelwákxo m'a nepyeseksa tegma apwányam, apkelchenátweykxeyk axta tegma netno', cham'a aphágkaxa axta. Pedro axta m'a, Juan axta anhan, Santiago axta anhan, tén han Andrés, Felipe, Tomás, Bartolomé, Mateo, axta nahan ma'a Santiago aptaha axta Alfeo apketche, Simón axta anhan ma'a kéltéma axta Celote, Judas axta anhan ma'a, aptaha axta Santiago apketche.#Mt 10.2-4; Mr 3.16-19; Lc 6.14-16. 14Yaknekxohok axta cha'a apyókxoho m'a, yakwayam etnahagkok nempeywa nelmaxnagko yetlo mók xam'a kelán'ák, María axta m'a Jesús egken, Jesús apkelyáxeg'a axta anhan ma'a.
15Yáma wenaktémok axta, keñe axta apkeltennáseyncha'a Pedro apnámokkok ektaha axta melya'áseyam xamo', ciento veinte axta apyókxoho énxet. Aptahak axta apkeláneya s'e: 16“Elyáxeg, máheyok axta katnehek ma'a ekyetnama nak eknaktáxésamaxche Espíritu Santo axta appeywa, cham'a apkeltenneykencha'a axta David apxeyenma Judas, cham'a Judas ektaha axta apnaklo sẽlpextétamo yakwayam emok Jesús. 17hakte Judas axta negko'o nenxegexma, apkeláneyak axta anhan ektémakxa nak negko'o nentamheykha. 18(Aptegya'ak axta xapop ma'a selyakye kélyanmagkaseso axta eñama aptamheykha ekmaso; apyenhak axta apkátek xóp apyaknena, pakxeyk axta anhan apkátek, kelántekkek axta anhan támpagkok. 19Xama axta apkelleg'a amya'a énxet'ák ektaha axta apheykha Jerusalén, apkeltemék axta ekwesey Hacéldama apkelpeywa apagko' xa yókxexma nak, nentéma nak negko'o nempeywa: ‘Yókxexma ekyetnamakxa éma’).#Mt 27.3-8. 20Xeyenmék eyke eknaktáxésamaxche Salmo s'e:
‘Meykexa énxet sat katnekxak
yókxexma apagkok,
méko sat nahan kaxek ma'a.’#Sal 69.25.
Xeyenmék nahan eknaktáxésamaxche:
‘Pók énxet sat nahan eyakmagkasek ma'a
ektémakxa nak aptamheykha.’#Sal 109.8.
21“Apháha nahan negyeseksa énxet'ák sempasmoma axta cha'a nentamheykha, cham'a aphamakxa axta Jesús negyeseksa negko'o, 22eyeynókxa m'a apyakpásesama axta yegmen Juan#Mt 3.16; Mr 1.9; Lc 3.21. Jesús, ekwokmoho nahan ma'a apmeyákxo axta néten.#Mr 16.19; Lc 24.51. Kéméxchek negko'o hempaxkak xama xa énxet'ák nak, yakwayam enxoho eltennaha xamo' negko'o m'a apxátekhágweykmo axta Jesús.”
23“Keñe axta apkelxénákpo apkánet énxet yakwayam kólyésha xama: José axta m'a apkeltamhomakpo axta Barsabás, apkeltamhomakpo axta anhan Justo, Matías axta anhan ma'a. 24Aptahak axta aptamhágko nempeywa nelmaxnagko énxet'ák se'e: “Wese', Xép aptaha apya'áseykegkoho elchetamso egwáxok negyókxoho nak, henxekmos negko'o xama s'e apkánet nak, cham'a, ektahakxa enxoho apkelyéseykha exchep, 25yakwayam enxoho emok aptamheykha seykha amya'a cham'a apyensakmo axta Judas eñama mey'asáxma, cham'a apmahágko axta ekpayhókxa axta emhagkok.”
26Keñe axta aptawásegko xama aksok yakwayam enxoho étak ma'a ektaha axta kélyéseykha, Matías axta pehewokmok ma'a, keñe axta appaxka'a m'a once seykha amya'a nak.
Одоогоор Сонгогдсон:
LOS HECHOS 1: LEGN
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Lengua Sur (Enxet) New Testament © United Bible Societies, 1992.
