Baroma 5
5
Khuuba Bakwalaafu isi Wele
1Nashiryo khukhwaama nga khuufukiilila ni khukhukalusa ifwe khuuba bakwalaafu, ari khuli ni lukoosi isi Wele, khuubirira mu Mukasya weefwe Yesu Kristo. 2Khwaafuna kumukhoosi khuubirira mu Kristo, kukukhwoolisa ifwe khu bweela bwa Wele, mweesi khwiimile aluno ari. Naluundi khusangaalila mu khwiyikina khweesi khuli ni nakhwo, khulwe khukabananila atweela khu shiriifwa sha Wele. 3Ne ishili isho shonyene ta. Ni shishindi shili khusangaalila mu khutaambisibwa khweefwe, khulwekhuuba khutaambisibwa khureera khukhwikhalilikha. 4Nga ni khumanyile, khukhwikhalilikha khureera bunyindaalifu. Ni bunyindaalifu bureera khukhwiyikina. 5Khukhwiyikina khuno sikhukhumalamo ifwe kamaani ta, khulwekhuuba Wele waatsukha khuukana khweewe mu myoyo kyeefwe, khuubirira mu Mwoyo Umukhosefu isi aakhuwa ifwe.
6Khulwekhuuba ifwe fwabeene ni khwaba nga sikhuli ni buyeeti ta, imbuka isi Wele aakhalawo yoola, Kristo waafwa khulwe baboonaki. 7Shili shishiindu shihangafu umuundu khuufwa khulw'omuundu ukuundi, akhaba nga ali umukwalaafu. Khurusakho ndi nga abe umuundu ali umulayi, winyoola ukuundi anyala wehaanayo khuufwa khulweewe. 8Ne Wele akhwokesanisa ifwe nga n'akhukana. Khulwekhuuba ifwe ni khwaba nga khushiili babonaki, Kristo wafwa khulweefwe. 9Nashiryo khukhwaama ni khubalibwa khuri khuli bakwalaafu khulwe kamafuki keewe, khuminyisilawo ilala alikhuwonesa ifwe khukhwaama isi lirima lya Wele. 10Khulwekhuuba ni khwaba nga khuli basiku isi Wele, umweene wakhukalusa ifwe khuuba basaale beewe, khuubirira mu khufwa khw'Omwaana weewe. Ne noola ari khuli basaale ba Wele, khuliwonesebwa khuubirira mu bulamu bwa Kristo. 11Ne seshili isho shonyene ta. Naluundi khusangaalila mu Wele khulw'Omukasya weefwe Yesu Kristo, uwakhukalusa ifwe khuuba basaale ba Wele.
Adamu ni Kristo
12 #
Rak 3.6
Nga khukhwoneka ni khweetsa mu shiibala khulw'omuundu mutweela, ni khufwa nakhwo khweetsa khulwe khukhwoneka. Nashiryo khuufwa nakhwo khwaamalatana khu baandu boosi, khulwekhubeela babaandu boosi boonaka. 13Ilala khukhwooneka khwaba mu shiibala nga khushiili khuweebwa Kamakaambila ta, ne imbaawo abe ubalikha ari wakholile shishonako ta. 14Ne shitweela busa, khukhwaama khu bifukhu bya Adamu khukhwoolisila ilala khu bifukhu bya Musa, khufwa khwawula babaandu boosi, akhaba ni naabo boosi babaakhonaka nga Adamu n'oneka ta. Adamu aba abe afwaana nga umuundu uyo abe wutsya khwiitsa.
15Ne byoombi sibifwaanana ta. Shiwaanwa sha Wele sheesi akaba busa seshifwaanana ni khukhwoneka khwa Adamu ta. Ne noola shili sha ŋali shiri babaandu bakali baafwa khulwe khukhwoneka khw'omuundu mutweela, shiba ni sha ŋali khuminyisawo shiri bubweela bwa Wele bubufuura, nga bubirira mu muundu mutweela nga niye Yesu Kristo, bweetsa isi babaandu mu bukali nga shiwaanwa sha busa. 16Naluundi, shiwaanwa sha Wele sha busa seshifwaanana ni shishonako sh'omuundu mutweela tsana ta. Khulwekhuuba lwanyuma lwe shishonako shitweela, abawo khukhala kumusaango, khukhwaloma khuri, “Kumusaango kwakhufuurire.” Ne lwanyuma lwe bibyoonako bikali, etsawo shiwaanwa sha busa shishikila khwabalibwa nga bakwalaafu. 17Shili shituufu shili khulwe khukhwoneka khw'omuundu mutweela, khuufwa khwaamalatana khulw'omuundu mutweela uyo. Ne bibyaama mwisho, nga bikholebwa n'umuundu mutweela nga niye Yesu Kristo, biminyisakho awo. Abo boosi babaafuna bubweela bwa Wele bukali nga shiwaanwa baabalibwa khuuba bakwalaafu, baliba bawuli mu bulamu bwoosi khulwe khuubirira mu Kristo.
18Nashiryo khukhwaama nga khukhwoneka khw'omuundu mutweela ni khwareerera babaandu boosi khubakhalila kumusaango, buryo nabwo buraambi bw'omuundu mutweela bwareera bukhosefu, shireerera babaandu boosi khurusibwakho kumusaango, shabareerera khuuba ni bulamu. 19Nga ni shili khulwe bumiinyi bw'omuundu mutweela bakali bekyela babonaki, nasho shiba ndi khulwekhuuba umuundu mutweela s'aba ni bumiinyi ta, shakila bakali bashuusibwa khuuba bakwalaafu.
20Baareerawo kamakaambila bari nio khukhola bibyoonako khwiloosele. Ne khukhwoneka ni khweloosela, bubweela bwa Wele nabwo bweloosela ni khuminyisawo. 21Nashiryo nga bye bubwoonaki ni byaba ni kamaani ke buwuli khuubirira mu khufwa, bubweela bwa Wele nabwo bwaba ni buwuli khuubirira mu bukwalaafu, nga bukhuyila ifwe mu bulamu bubukhawawo ta, khulwa Yesu Kristo, Umukasya weefwe.
Одоогоор Сонгогдсон:
Baroma 5: LPE
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
The Bible in Lumasaaba © Bible Society of Uganda, 2016.