Buraambi 9
9
Khushuusibwa khwa Saulo
(Buraambi 22.6-16; 26.12-18)
1Ne Saulo aba nga ashiloosela khukhwaambaasa bye khuriisariisa ni khukhwiira baleekelwa b'Omukasya Watsya isi umusaayi ufuura bukhulu, 2ari amuwe buurone bwe khuyila mu ntsu tsye khukhwisaayilamo i Damasiko, nio bari nga wanyooleleyo babaandu be Ntsila, basaani namwe bakhasi anyale khubawaamba abareere i Yerusalemu nga babowe.
3Aryo n'aba nga atsya, nga ali aambi khukhwoola i Damasiko, khaangukho buwaanga bwaarura mwikulu bwamumulikha tsimbeka tsoosi. 4Waakwa aasi wawulila likono nga limuloma liri, “Saulo! Saulo, lwashiina iwe ungubyeenga ise?”
5Kila Saulo waamureeba ari, “Iwe naanu, Umukasya?”
Likono lyamwiilamo liri, “Ise Yesu isi iwe ukubyeenga. 6Ne ari ni winyukhe utsye mu shiriimba, isi kane bakhuboolele bibikhwakhila iwe khukhola nga ni bili.”
7Ne basaani babaaba bakyeenda ni Saulo beema, nga beyaanga busa. Lwekhuuba baawulila likono, n'enga sibabonakho umuundu yeesi ta. 8Aryo Saulo wenyukha aasi, wakhakakho khumoka tsimoni tseewe, ne walekha khunyala khubonakho shishiindu shoosi ta. Baryo bamuwaamba kumukhono bamureera i Damasiko. 9Wamala bifukhu bitaru nga s'abona naluundi nga s'alya namwe nga s'anywakho shishiindu shoosi ta.
10Ne mu Damasiko mwabamo umuleekelwa mutweela ulaangiwa Ananiya. Umukasya waamulaanga mu khubonekhelwa, waamuloma ari, “Ananiya.”
Naye Ananiya waamwiilamo ari, “Ise niy'oyu, Umukasya.”
11Umukasya waamuloma ari, “Yinyukha utsye khu mukhoosi kwe shiriimba kukulaangibwa Kumukolole, mu ntsu ya Yuda, ureebe bakhwokyese umuundu ulaangibwa Saulo uwe Taruso. Ari uli khuloomba. 12Mu khubonekhelwa khweewe waboone umuundu ulaangibwa Ananiya nga enjila is'ali, amurekho kamakhono keewe, nio anyale khubona luundi.”
13Ananiya welamo ari, “Umukasya, babaandu bakali bayimboolela bibiindu bibiwaamba khu musaani yuno, ni bukosi bweesi akholatsakile khu bakhosefu boowo mu Yerusalemu. 14Ni na ano wetsile ni bunyala khukhwaama isi basaayi bakhulu khuwaamba ibo boosi babaakhwisaaya iwe.”
15Ne Umukasya waloma Ananiya ari, “N'utsye, lwekhuuba umusaani yuno ise samweene naamuroboole khuyila lisiina lyase isi Banaambo, n'isi bayiinga baabwe, naluundi n'isi babaandu ba Isiraeli. 16Nase samweene indimwokesanisa bikali bibilimwakhila khutaambisibwa lwe lisiina lyase.”
17Ananiya aryo waatsya, wenjila mu ntsu mweesi Saulo aba, waamurakho kamakhono, waamuloma ari, “Uwe buulebe Saulo, Umukasya Yesu umweene, uwakhubonekhela khu ntsila nga uli khukhwiitsa ino, waandumile ise bari nio ubimbukhe tsimoni ubone, luundi witsusiwe n'Umwoyo Umukhosefu.” 18Khaangukho bibiindu bibifwaana nga kamabaambu byaakwa khukhwaama khu moni tsa Saulo, waabona luundi. Aryo wenyukha waabatisibwa. 19Ne lwanyuma nga waamalile khuulyakho biilyo, wiilamo kamaani.
Saulo aboolela Kamakhuuwa Kamalayi mu Damasiko
Saulo waamala bifukhu bikalikho nga ali ni baleekelwa be mu Damasiko. 20Khaangukho watsya mu ntsu tsye khukhwisaayilamo nga aboola ari, “Yesu ali Umwaana wa Wele.”
21Ne boosi babamuwulila nga aloma beyaanga busa nga baloma bari, “Oyu s'ali niye umusaani uwabiyila babaandu babesaaya Yesu mu Yerusalemu? Naluundi abe sishili isho nisho shishamureera ino khubawaamba, abayile nga babowe isi basaayi bakhulu?”
22Ne Saulo niye welooselela ilala khuuba ni kamaani nga awandalasa Bayudaaya babamenyatsaka mu Damasiko ari, Yesu niye Kristo. 23#2 Kor 11.32,33Nga bifukhu bikalikho byabirirewo, Bayudaaya baboolanila bonyene bari bamwiire. 24Ne Saulo wamanya byeesi baateesa. Baryo baliindatsakila khu milyango kye shiriimba shiilo ni kumuusi bari manya bamuwaambilise bamwiire. 25Ne shiilo shitweela, baleekelwa beewe baamuyila, bamurusila mu mwanya kwe khwitikiiyi, bamwikhisilamo nga bamureere mu muyayi.
Saulo nga ali mu Yerusalemu
26Ne Saulo nga wolele mu Yerusalemu, wakhakakho ari etubaase ni baleekelwa, ne nibo boosi bamurya, nga sibafukiilisa bari naye ali umuleekelwa ta. 27Ne Balunaba waamuyila, waamureera isi baarume. Aryo waabanoonosela ilala ari Saulo aabona Umukasya khu mukhoosi kwe Damasiko, luundi ari Umukasya aakanikha ni naye. Naluundi waabanoonosela nga Saulo n'aboolela Kamakhuuwa Kamalayi mu lisiina lya Yesu ni kamaani mu Damasiko, nga s'alikho ni khuurya ta. 28Aryo Saulo wakyeendatsakila atweela ni nabo mu Yerusalemu, nga akanikha khu lisiina ly'Omukasya ni liefu likali. 29Naluundi wakanikha ni kamaani kamakali, nga akhaandisana ni Bayudaaya babakanikha Luyonaani, ne nibo bakhakakho khumwiira. 30Ne be buulebe ni bashimanyakho baryo, bamwikhisa i Kayisaliya, bamurumana i Taruso.
31Ulwo babaandu babaafukiilila mu Yesu babaaba mu Yuda mwoosi ni mu Galilaaya, ni mu Samariya, baafunakho mbuka iye lukoosi. Beloosela khuuba bakali, nga bakyeendela mu khwisamo Umukasya shiriifwa ni mu khwikhoyesebwa khw'Omwoyo Umukhosefu, bafukiilisi beloosela khuuba bakali.
Petero nga ali mu Lida ni Yopa
32Petero n'aba nga akyeendakyeenda buli andu, lutweela waatsya wakyeniyilakho babaandu bakhosefu ba Wele abe babaamenya mu Lida. 33Ibweeneyo waanyoolayo umusaani ulaangiwa bari Ayinasi uwakataala nga abe waamala khu bulili kimiiko shinaane. 34Petero waamuloma ari, “Ayinasi, Yesu Kristo akhuwonesa. Yinyukha wiyalile bulili bwoowo.” Lubaluba Ayinasi wenyukha. 35Babaandu boosi babaamenya mu bifwo bibilaangibwa Lida ni Saloni ni bamubona, bashuukha bafukiilisa mu Mukasya.
36Ne mu Yopa mwabamo umuleekelwa umukhasi lisiina lyeewe bari Tabisa, lilimanyisa liri Dorukasi, uwawanatsakayo imbuka yeewe khukhola bilayi ni khuyeeta bataambi. 37Mu bifukhu ibyo, bulwaale bwamuwaamba waafwa. Ne ni baamala khusiinga kumulaambo kweewe, bakwalisa mu shiseenge she khungaaki. 38Ne lwekhuuba Lida shaba aambi ni Yopa, baryo baleekelwa ni baawulila bari Petero ali mu Lida, bamurumanila babaandu babili baatsya khumwikontselela bari, “Yuubakho, wiitse isi khuli.” 39Petero wenyukha watsya ni nabo. Ne nga woleleyo, baamuyila mu shiseenge tsana she khungaaki. Banamulekhwa boosi bemikha bamwibotokhelela nga balila, nga bamwokesa tsingubo ni bikwaaro bibiindi byeesi Dorukasi aruungatsaka nga ashiili mulamu ni nabo.
40Petero waabarusa boosi ibulafu, waafukhama aasi, waaloomba, lwanyuma waashuukha waalomela kumulaambo ari, “Tabisa yinyukha.” Aryo Tabisa wenyusa tsimoni waamoka, ne n'abona Petero wenyukha wekhala. 41Petero waayila kumukhono kweewe, waamwinyusa weema. Lwanyuma Petero walaanga babaandu bakhosefu ba Wele, ni banamulekhwa, waabamwakaanisa nga umulamu. 42Shino shamanyikhana mu Yopa mwoosi, ni babaandu bakali bafukiilila mu Mukasya. 43Aryo Petero wamenyayo bifukhu bikali mu Yopa, mu ntsu ya Simoni abe uwala kamahaafu.
Одоогоор Сонгогдсон:
Buraambi 9: LPE
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
The Bible in Lumasaaba © Bible Society of Uganda, 2016.
