Buraambi 10
10
Petero ni Koruneliyo
1Aabawo umuundu ulaangiwa Koruneliyo abe umenya i Kayisaliya, uwaba umuraangilisi uwe liye lililaangibwa lye ba Itali. 2Umusaani yuno aaba umuundu umwilama nga niye ni be mu ntsu yeewe boosi baaba besaaya Wele. Aaba nga ayeeta Bayudaaya nga abakabila bibiindu bya busa, naluundi abe abuya nga aloomba Wele. 3Lutweela khu nyaanga nga syeenda tse angoloobe, wabonela ilala bulayi bubweene shifwaani sha malayika wa Wele nga enjila mu ntsu naluundi nga amulaanga lisiina ari, “Koruneliyo.” 4Koruneliyo walolelela malayika ni khuurya khukali, kila amureeba ari “Umukasya, shiina?” Malayika naye waamwiilamo ari, “Khuuloomba khwoowo ni buyeeti bwoowo bweesi uwaanayo isi babaandu byaniinile naluundi byafukiilisibwile ni Wele. 5Ni aluno ari rumana babaandu batsye i Yopa, batsye balaange Simoni ulaangiwa Petero, 6umenya wa Simoni, uwala kamahaafu, intsu yeewe ili aambi ni nyaantsa.” 7Ne malayika uwamukanikhayo n'amala khuutsya, Koruneliyo walaanga babili khu baraambi beewe, n'umusilikhale umwiyikinwa uwisaaya Wele uli mutweela yenyene khukhwaama muubo abe babamuraambila. 8Aryo waababoolela byoosi bibyaba byabeelewo, waabarumana i Yopa.
9Khu shifukhu shisheelakho, ni baaba nga bali khu lukyeendo lwaabwe nga bembiiyisile shiriimba isho, Petero waaniina khu ntsu khu ngaaki khuutsya khuloomba. Tsisaawa tsaba nga tsisesaba tse kumuusi. 10Nga ali khubweenekhwo intsala yamulya, wewotooma ari khali aliilekho khakhaandu. Ne ni baaba nga bashirengakharengekha she khuulya, wafwaana nga uroora. 11Waabona likulu nga lyaabimbukhile, ni shishiindu shaamamo nga shiikha is'ali nga shifwaana nga isuukha ingali, yaba yikhisibwa khu shiibala nga yawaambibwiile khu mbeka tsoosi tsine. 12Mu suukha yino mwabamo bisolo bya buli shikuuka shoosi, ni nebyo bibyalaamila aasi, ni binywiinywi bye mu ngaaki. 13Kila awulila likono limuloma liri, “Petero, yinyukha usale, ulye.”
14Ne Petero waaloma ari, “Umukasya, senyala nashikhola taawe. Lwekhuuba ise ishiili khulyatsakakho shishiindu shoosi she kumusilo namwe shikhali shipyeluuse ta.” 15Petero wawulila likono ifuunda ye khabili nga limuloma liri, “Byeesi Wele amala khuŋoonaŋoona, iwe ukhabilaanga khuuba bye kumusilo ta.” 16Shishiindu she suukha shino sheyokyesanisa kimiluundi nga kitaru, lwanyuma shenyusibwa khaangu shelayo mwikulu.
17Aryo Petero n'aba nga ashikanakana mu mwoyo kweewe khulwe shifwaani ari manya makhulu shiina kakashiilimo, khaangukho babaandu beesi Koruneliyo arumana boola, beema khu mulyaango. Abe bamalile khaale khureebelesa babokesele intsu ya Simoni. 18Balaanga babaaliyo nga bakana bamanye oba nga Simoni Petero abe amenya abweene awo.
19Ne Petero aaba nga ashambaasa khu biindu bibibonekhele, Umwoyo waamuloma ari, “Bona iliwo babaandu bataru babaali khukhuweentsa. 20Yinyukha wiikhe aasi, naluundi utsye ni nabo, akhali khumala imbuka ta, lwekhuuba ise niye ubarumanile.”
21Petero weekha aasi isi babaandu bano babaama isi Koruneliyo waabaloma ari, “Iseese niyooyu isi mulikho mukana. Lomo shiina ibareerire?”
22Nabo baaloma bari, “Koruneliyo umuraangilisi we basilikhale, niye ali umuundu umulayi naluundi ali umuundu urya Wele, isi babaandu be linaambo lye Bayudaaya basiima. Malayika Umukhosefu amuboolele ari akhurumanise iwe utsye mu ntsu yeewe, umuboolele byeesi uli ni nabyo.” 23Aryo Petero wabakaanila wabenjisa mu ntsu, wabawa bukono antsye bushe nio batsye.
Shifukhu shishelakho, Petero wenyukha watsya ni nabo, atweela ni be buulebe babaandi babaama i Yopa nabo batsya ni naye. 24Ni khu shifukhu shisheelakho, boola mu shiriimba Kayisaliya. Abe Koruneliyo waabaliindiliile khukhwoola, naluundi aba waabuusanisile baalebe ni basaale beewe atweela. 25Petero n'enjila mu ntsu, Koruneliyo wamwakaanila wakwa aasi mu bikyele byeewe nga amwisaaya. 26Ne Petero wamwinyusa khu ngaaki nga aloma ari, “Yinyukha khu ngaaki, akhaba nase indi umuundu busa nga iwe.” 27Baryo Petero ni Koruneliyo baatsya nga bakanikha, ne ni benjila mu ntsu, banyoola babaandu bakali babusaane. 28Petero waabaloma ari, “Inywe mweesi mwamanyila ilala muri, shifuniaaka likaambila singa Umuyudaaya akholakana namwe wakyeniyila umuundu yeesi uli umunaambo. Ne Wele wantsokesanisile ari, sinandyakhiile khuloma umuundu yeesi ndi ali uwe mbikho namwe umubi ta. 29Nashiryo nga ni munaangile, ise sindobile khukhwiitsa ta. Ari imbareeba ndi shiina shishikilile mwaanaanga?”
30Koruneliyo waaloma ari, “Bifukhu byabirire bine khukhwaama nga bino nibyakholikha: tsaba tsinyaanga nga syeenda tse angoloobe nga ndi mu ntsu yase indi mu khuloomba, khaangukho nabona umuundu nga ali mu bikwaaro bibimelamela nga wantsimile ibweeni. 31Wanoma ari, ‘Koruneliyo, Wele wawuliile khuloomba khwoowo ni bubweela bwoowo isi babaandu, lweesho Wele wakhukhebuliile. 32Nashiryo rumanisa i Yopa, bakhulaangile Simoni ulaangiwa Petero etse. Amenya mu ntsu ya Simoni uli aambi ni nyaantsa, nga ali uwala kamahaafu.’ 33Nase lubaluba nakhurumanisa, ni nawe wakholile bulayi khukhwiitsa. Nashiryo fweesi khuli ano mu moni tsa Wele khurekeerese byoosi byeesi Umukasya akhulakiile iwe khuloma.”
Inganikha ya Petero
34 #
Maka 10.17
Petero waarakikha khukanikha nga aloma ari, “Mu ŋali ari ise naboone ndi Wele s'aromboosa mu baandu ta. 35Ne mu buli linaambo lyoosi ibo boosi babamurya naluundi babaakhola bilayi, Wele abafukiilila. 36Wele asiindikha shilomo sheewe isi babaandu ba Isiraeli nga abakaanisa kamakhuuwa kamalayi ke lukoosi khuubirira mu Yesu Kristo uli Umukasya wa boosi. 37Ise sinaakha khubakhebusa bilomo bibyakholikhile mu Yuda mwoosi khurakikhila i Galilaaya, lwanyuma lwe khubatisibwa khweesi Yokana alaangilila ta. 38Mwamanya isaambo yeesi Wele arobolamo Yesu uwe Nazareesi n'Umwoyo Umukhosefu atweela ni kamaani. Isaambo isi akyeenda nga akhola bilayi, naluundi nga awonisa abo boosi abe beesi Sitaani aminilisa, lwekhuuba abe Wele ali ni naye. 39Ifwe khuli bajulisi be bibiindu ibyo byoosi byeesi akhola mu shibala she Bayudaaya ni mu Yerusalemu. Bamwiira nga bamutsaangilila khu musalaba kwe kusaala. 40Ne Wele waamulamusa khukhwaama mu bafu khu shifukhu she khataru, naluundi waamwokesanisa mu lubuula. 41Ne sishaba isi babaandu boosi ta, ne isi ifwe beesi Wele aarobola khaale khuuba bajulisi. Ifwe khwalya naluundi khwanywa ni naye nga waamalile khulamukha khukhwaama mu bafu. 42Niye uwakhulakila ifwe khuutsya khuboole Kamakhuuwa Kamalayi isi babaandu, ni khuwayo bujulisi khuri uyo niye isi Wele arobola khuuba umukayi we balamu ni baafu. 43Uyo niye isi baŋoosi boosi baweelakho bujulisi bari, khuubirira mu lisiina lyeewe, buli mutweela umufukiilila alifuna shishiyakhilo she bibyoonako.”
Banaambo bafuna Umwoyo Umukhosefu
44Aryo Petero n'aba nga ashikanikha, Umwoyo Umukhosefu weekha khu boosi babaaba bamurekeeresa. 45Bafukiilisi mu Kristo babaaba Bayudaaya babeetsa ni Petero ni baabona shino beyaanga, khubona bari shiwaanwa sh'Omwoyo Umukhosefu shaweebwile akhaba isi Banaambo nabo. 46Lwekhuuba bawulila Banaambo bano nga bakanikha mu nimi tsitsiindi, naluundi nga baruuya shiriifwa sha Wele. Kila Petero abareeba ari, 47“Iliyo umuundu yeesi unyala khukhwimana khubatisibwa khwe kameetsi isi babaandu bano babamalile khufuna Umwoyo Umukhosefu nga ifwe ni khwafuna?” 48Aryo Petero walakila ari babatisiwe mu lisiina lya Yesu Kristo. Lwanyuma bamuloomba bari amenyekho ni nabo bifukhu bikyeekhe biri.
Одоогоор Сонгогдсон:
Buraambi 10: LPE
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
The Bible in Lumasaaba © Bible Society of Uganda, 2016.
