Mk 5
5
Yeso nyaʼa vɨ̀ mbaŋə̀ nɨ ɨzwî rɨbɔ̀ŋ nyaʼa ɨŋga məd
(Mt 8.28-34; Lk 8.26-39)
1Yeso mbɨ mbi mə̀mə̀ə̀nɨ̀-ɨnû nyaʼa wò pè ɨnjin ə sà ze rɨ ə Galiliî, əne yɨ ɨŋga əbà əbeŋ ze rɨ ə Gèrasenès. 2Ənɨ Yeso nyaʼa jwɨ rɨŋga əbaŋ ɨgyɨ̀ ze, mbaŋə̀ mɔʼɔ nɨ əzwî rɨbɔ̀ŋ nyaʼa ɨŋga məd nyaʼa jwɨ̀ rɨŋga ɨtu ɨ̀sì nɨ mbɨ nyaʼa chəb ɨŋga ɨwɔ̌ wò kumnɨ əməd. 3Mbaŋə̀ ze nyaʼə chub ɨŋga mɨ̀sì mbe. Chəi wə̀d mɔʼɔ nɨ tɨ̀ wɨ̀ nyaʼa kod əməd, ka àbei ənɨ mɨ̀kàrə̀, 4ɨmbə̀ʼ ɨghəm nɨ mbɨ nyaʼə mɨ̀ə̀ kod əməd ənɨ ə ndəŋ bə̀ fɔrɨ ənɨ mɨ̀kàrə̀, àyɨə wɨ̀ nyaʼə tənə mɨ̀kàrə̀ mbe bə̀ təndɨə ndəŋ te tɨkə rɨkə. Chəi wə̀d mɔʼɔ nɨ nyaʼa berɨ ɨka nɨ ghɨ̀ ni wɨ̀ nyeʼ chubɨ. 5Ɨ wɨə nyaʼa kɨə yèn əkaʼ mɨ̀sì mbe bə̀ yèn ɨgwɨ rɨwum. Ɨ wɨə nyaʼə ghɨ̀ əne ɨzimɨ mbɨ ɨziə. Ɨ wɨə nyaʼə yènə̀ kyeŋə rɨkǎ bə̀ pɔ̀ndɨ̀ i ɨnyod ənɨ əti.
6Ənɨ wɨ̀ nyaʼa zə ə Yeso rɨ əsa əgha, wɨ̀ nyaʼa nòrə̀ wò chìndɨ̀ ɨtu ɨnywɨ ɨfě ɨ bɔ, 7kyeŋ ənɨ ə gɨ̂ nɨ kǎ ghà ni, “Yeso, Wan Ŋwìə̀ Ə̀chè-ɨsɨg, à berɨ ənû ə ye nɨ ghɨ̀ mbɨ num ə? Mə buʼ ɨbɔ ɨ ne ənɨ ɨkum Ŋwiə̀ ni tɨrə̀ chə e əmɨ!” 8Wɨ̀ nyaʼa ghà əne ɨmbə̀ʼ ɨghəm nɨ Yeso nyaʼa be gha ɨ bɔ ni, “Àwɔ̀ əzwî rɨbɔ̀ŋ, jwɨ e rɨŋga mbaŋə̀ zɔ̂!”
9Yeso nyaʼa biirɨ ɨ bɔ ni, “E ɨkum kɨə we?”
Mbaŋə̀ ze nyaʼa wììrɨ̀ ni, “Mɨ ɨkum yɨ Ɨnɔ̂n, ɨmbə̀ʼ ɨghəm nɨ tɨ̀ ə kàŋ nɔʼ.” 10Ɨzwî rɨbɔ̀ŋ mbe nyaʼa jeŋgɨ buʼ ɨbɔ əmbɨ Yeso yì buʼ ni tɨ wɨ̀ chɨ i əwən rɨŋga əbà əbeŋ ze.
11Ɨnɔ̂n mɨ̀kuŋə nɨ nyaʼa kwàʼ wɨ̀ kyeŋ nyaʼə jɨg ɨbom ɨwum əsɨ ze. 12Ɨzwî rɨbɔ̀ŋ mbe nyaʼa buʼ ɨbɔ ɨ bɔ ghà ni, “Cha əwa ɨŋga mɨ̀kuŋə mbə.” 13Wɨ̀ nyaʼa benɨ. Əne ɨzwî rɨbɔ̀ŋ mbe nyaʼa jwɨ̀ wò nyɨ ɨŋga mɨ̀kuŋə mbe. Ɨnɔ̂n mɨ̀kuŋə we, nɨ nyaʼa ɨghabɨ ə chuʼ rɨ̀be, nyaʼa sù ɨbom bam wò feŋ ɨŋga ə sà ze, koŋ.
14Bə̂d mbe nɨ nyaʼə nə̀ŋgɨ mɨ̀kuŋə mbe nyaʼa nòrə̀ wò ghà ənû ze əmbɨ ə bə̂d mbe rɨŋga əsɨ ze bə̀ ghà əmbɨ mbe nɨ nyaʼa ɨban əsɨ ze. Bə̂d nyaʼa jwɨ̀ rɨŋga ɨsɨ mbe wò zə ənû ze nɨ nyaʼa ghɨ̌. 15Mbɨ nyaʼa wò əsɨ Yeso pè zə mbaŋə̀ ze nɨ ɨ̀nyɔrɨ̀ ɨzwî rɨbɔ̀ŋ mbe nyaʼa ɨŋga məd. Mbaŋə̀ ze nyaʼa chub i əŋgu mbɨ ə ngywɨ ɨbom. Ətu əməd ə nyaʼa fə zeŋ i. Mbɨ nyaʼa zə əne bɔ. 16Bə̂d mbe nɨ nyaʼa zə ənû ze nyaʼa ghà ənû nɨ nyaʼa ghɨ̌ ənɨ ə mbaŋə̀ ze bə̀ fɔrɨ ənɨ mɨ̀kuŋə mbe əmbɨ mbe nɨ nyaʼa yeʼe.
17Ənɨ bə̂d mbe nyaʼa zu əne, mbɨ nyaʼa buʼ ɨbɔ əmbɨ Yeso ni wɨ̀ saŋ ə əbà əbeŋ.
18Ənɨ Yeso nyaʼə nyɨ ɨŋga əbaŋ ɨgyɨ̀, mbaŋə̀ ze nɨ ɨzwî rɨbɔ̀ŋ mbe nyaʼa ɨŋga məd nyaʼa buʼ ɨbɔ ɨ bɔ ni wɨ̀ benɨ tə̀ beenɨ əbɔʼ məd.
19Chəi Yeso nyaʼa benɨ, àyɨə wɨ̀ nyaʼa ghà ɨ bɔ ni, “Wo əwe ɨnuʼ əsɨ mbe bə̂d, pè ghà ənû ə kyeŋ ze nɨ Ə̀nùŋɨ̀sɨg ghɨ̌ ənɨ ə ne, bə̀ ghà ɨchî nɨ wɨ̀ diirɨ əwe.”
20Mbaŋə̀ ze nyaʼa nɔ̀ʼ wò ɨŋga əbà əbeŋ ze nɨ mbɨ nyaʼə tɔŋ ənɨ Dèkapolìs. #5.20Dèkapolìs yɨ ni, “ɨsɨ wum.” Wɨ̀ nyaʼa pè əŋgu kɔ saʼ ənû ə kyeŋ ze nɨ Yeso ghɨ̌ ənɨ məd. Bə̂d mɨ̀jìm mbe nɨ nyaʼa zu ənû ze nyaʼa yiirɨ kwàʼ rɨŋgəʼ.
Yeso nyaʼa zwemnɨ wan əyi Jairùs, bə̀ vɨ̀ əyi nɨ nyaʼə wɔ̀n ɨtuʼ
(Mt 9.18-26; Lk 8.40-56)
21Ənɨ Yeso nyaʼa wɨrɨ yì baanɨ ə sà ze ɨŋga əbaŋ ɨgyɨ̀, ɨnɔ̂n bə̂d kwàʼ wɨ kyeŋ nyaʼa wò fetɨ kad əməd ənɨ wɨ̀ nyaʼa kɨrɨ i əŋgo ə sà ze. 22Wə̀d kyeŋ mɔʼɔ rɨ əbɔʼ mbe nɨ nyaʼə chà nəb ə̀kàtɨ̀, nɨ ɨkum məd nyaʼa ə Jairùs, nyaʼa zə əməd wò gù ə si ɨban ɨwu məd, 23buʼ ɨbɔ ɨ bɔ ənɨ i fîŋ jìm ghà ni, “Mɨ wan əyi kwa wɨə wɔ̀nə̀. Ɨ wɨə sɨə wo kwɨ. Mə buʼ ɨbɔ ni à yeʼe zab mbe ɨbɔ ɨgwɨ məd, ɨmbə̀ʼ wɨ̀ bɔtɨ wɨrɨ chub ɨkǎ.”
24Ənɨ Yeso nyaʼa zu əne, wɨ̀ nyaʼa nɔ̀ʼ kɔ wo mbɨ məd. Ɨnɔ̂n bə̂d kwàʼ wɨ kyeŋ nyaʼa beenɨ əbɔʼ məd. Mbɨ nyaʼə yènə̀ fatɨ əməd.
25Əyi mɔʼɔ nyaʼa əbɔʼ mɨ̀mə̌d nɨ nyaʼə wɔ̀n ɨtuʼ. Wɨ̀ nyaʼa fə wɔ̀n ɨghəm ɨwu wum chɔ̀b rɨ̀be. 26Wɨ̀ nyaʼa fə kàŋ zə ŋgəʼ ɨŋga tɨkyerɨ-ɨbɔ bə̂d ɨfuʼ nɔnɔʼ. Wɨ̀ nyaʼa bə̀ chə̀kɨ̀ i ɨkab jìm, àyɨə chəi wɨ̀ nyaʼa bɔtɨ. Əwɔn əməd ze ə nyaʼa rəbə wò i wo ɨmbì. 27Wɨ̀ nyaʼa fə zu ɨŋgam ɨmbə̀ʼ ə Yeso. Əne wɨ̀ nyaʼa wò ənjìm məd ənɨ wɨ̀ nyaʼa əkaʼ ə bə̂d mɨ̀nɔnɔʼ mbe, əne bètɨ̀ ngywɨ̌ məd. 28Wɨ̀ nyaʼa ghà ɨŋga i fîŋ ni, “Mə mɨ bètɨ̀ ka àbei ngywɨ̌ məd, mɨ əwɔn ə bɨrɨ bɔtɨ.”
29Ənɨ wɨ̀ nyaʼa betɨ, ɨtuʼ we nyaʼa sob àmei əwu əwən. Wɨ̀ nyaʼa zu ɨŋga i nyamnyod ni tə fə bɔtɨ rɨ ənɨ əwɔn ze nɨ nyaʼə chə əwi. 30Yeso nyaʼa kyerɨ ɨŋga i nyamnyod àmei əwu əwən ni ɨka fə jwɨ̀ rɨ ənɨ ə ni. Əne wɨ̀ nyaʼa bèŋ əkaʼ ə bə̂d mɨ̀nɔnɔʼ mbe biirɨ ni, “À kɨə we betɨ mɨ ngywɨ̌ ə?”
31Mə̀mə̀ə̀nɨ̀-ɨnû ɨməd nyaʼa ghà ɨ bɔ ni, “À zə ɨchî nɨ bə̂d mɨ̀nɔnɔʼ mbɔ̂ ə nyèŋ ɨnyod ənɨ ə ne, əne à kɨrɨ wɨrɨ biirɨ ni, 'À kɨə we betɨ əmɨ ə?'”
32Yeso nyaʼa nèŋ ɨsɨ ghab ɨmbə̀ʼ zə wə̀d we nɨ betɨ əməd. 33Əyi we nyaʼa kyerɨ ənû ze nɨ nyaʼa ghɨ̌ ənɨ məd, əne wɨ̀ nyaʼa wò mbɨ ɨbɔɔ yènə̀ bindɨə, pè chìndɨ̀ ɨtu ɨnywɨ ɨfě Yeso, ghà rəsìʼ jìm ɨ bɔ. 34Yeso nyaʼa zu əne ghà ɨ bɔ ni, “Wân, e ɨbenɨ fə ghɨ̀ ni à bɔtɨ e. Ndə̀ əwe ənɨ əbɔrəbɔd, e əwɔn ə fə mì i.”
35Ənɨ wɨ̀ nyaʼə kɨrɨ ghàmə̀, bə̂d mɔʼɔ rɨŋga nəb wə̀d kyeŋ we nɨ nyaʼə chà nəb ə̀kàtɨ̀ nyaʼa wò pè ghà ni, “E wan əyi we fə kwɨ i. À kɨə wɨrɨə chə əchwiə̀-ɨnû ɨmbə̀ʼ ə yè ə?”
36Yeso nyaʼa zu ənû ze, àyɨə chəi wɨ̀ nyaʼa tɔŋ ənɨ ənû. Wɨ̀ nyaʼa ghà əmbɨ wə̀d kyeŋ we nɨ nyaʼə chà nəb ə̀kàtɨ̀ ni, “Tɨrə̀ bɔ e. Ənû àmei ni à benɨ.” 37Chəi Yeso nyaʼa ben ni wə̀d cherə beenɨ əbɔʼ ni chè rɨ ənɨ Pità mbɨ Jems fɔrɨ ə Jɔ̌n nɨ nyaʼə aŋgɔb Jems. 38Ənɨ mbɨ nyaʼa wo pè əkwɨ wə̀d kyeŋ we nɨ nyaʼə chà nəb ə̀kàtɨ̀, Yeso nyaʼa zə bə̂d bə̀ zu ɨchî nɨ bə̂d nyaʼə jùʼə̀, dìə̀ bə̀ tɔ̀ndɨ̀ əwob. 39Ənɨ wɨ̀ nyaʼa nyɨ ə nəb, wɨ̀ nyaʼa ghà əmbɨ ə bə̂d mbe nɨ nyaʼa əŋgu ni, “Mbə kɨə jùʼə̀ bə̀ dì ɨmbə̀ʼ ə yè ə? Chəi wan wɔ̂ kɨrɨ kwɨ. Ɨ wɨə gwen i gwenɨ.”
40Ənɨ wɨ̀ nyaʼa ghà əne, bə̂d mbe nyaʼa kɔ chəʼ əməd. Àyɨə wɨ̀ nyaʼa chà bə̂d mbe mɨ̀jìm ɨsɨg, nɨŋ mbǎʼ wan we mbɨ ɨŋgɔb məd bə̀ nɨŋ mə̀mə̀ə̀nɨ̀-ɨnû mbe nɨ nyaʼa mbɨ məd, mbɨ wò nyɨ ɨŋga ətu ə nəb ze nɨ wan we nyaʼa ɨŋga. 41Ənɨ mbɨ nyaʼa nyɨ, wɨ̀ nyaʼa yim əbɔ ə wan əyi we ghà ɨ bɔ ni, “Talità kumi” əne yɨ ni, “Wan əyi kwa, mə ghà ɨ ne ni nɔʼ rətiə!”
42Àmei əwu əwən, wan əyi we, nɨ nyaʼa ɨghəm ɨwu wum chɔ̀b rɨ̀be, nyaʼa nɔ̀ʼ kɔ yenɨ. Bə̂d mbe nɨ nyaʼa əŋgu nyaʼa zə ənû ze, yiirɨ kwàʼ rɨŋgəʼ. 43Yeso nyaʼa sɨ jeŋgɨ patɨ mɨ̀mə̌d ni tɨ mbɨ tɔ gha əwən ənû ze əmbɨ wə̀d mɔʼɔ. Wɨ̀ nyaʼa bə̀ yì ghà əmbɨ mɨ̀mə̌d ni mbɨ naʼ əghɨ ə mɔʼɔ əmbɨ wan əyi we ni wɨ̀ jɨg.
Одоогоор Сонгогдсон:
Mk 5: mgo
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2013, Cameroon Association for Bible Translation and Literacy