Mk 4
4
Ənû ə mɨgɨ ɨmbə̀ʼ wə̀d nɨə fàʼə̀ mbeŋ
(Mt 13.1-9; Lk 8.4-8)
1Yeso nyaʼa yì kɔ chwi ɨnû ɨban ə sà ze rɨ ə Galiliî. Ɨnɔ̂n bə̂d nɨ nyaʼa kwàʼ wɨ kyeŋ nyaʼa wò fetɨ kad əməd. Əze ə nyaʼa ghɨ̀ ni wɨ̀ nyɨ chub ɨŋga əbaŋ ɨgyɨ̀ ɨgun ə sà ze. Ɨnɔ̂n bə̂d we jìm nyaʼa sɨ chub əŋgo ə sà ze. 2Wɨ̀ nyaʼa kɔ chwi ɨnû nɔnɔʼ əmbɨ mɨ̀mə̌d ənɨ ɨnû mɨgɨ. Wɨ̀ nyaʼa ghà ni,
3“Mbə zwetɨ! Mbaŋə̀ mɔʼɔ nɨə fàʼə̀ mbeŋ nyaʼa wò kon mbi ɨghɨ ŋgwèd. 4Ənɨ wɨ̀ nyaʼə ŋwì ɨghɨ mbe, tɨtam mɔʼɔ nyaʼa feŋ ɨgun ɨnə̂njɨ̀, əne tɨnən nyaʼa wò kud. 5Tɨ mɔʼɔ nyaʼa feŋ ɨgun ɨwɔ̌ nɨ si nyaʼa àmei rɨpiî. Tɨtam te nyaʼa zambɨ gwed ɨchî nɨ si nyaʼa mei ənambɨ ənambɨ̀. 6Ənɨ əchwî ə nyaʼa te kàànɨ̀, zɨə nyaʼa zuʼ ɨghɨ mbe mbɨ nə̀ŋə̀ kwɨ, ɨmbə̀ʼ ɨghəm nɨ chəi ɨghaŋ ɨghɨ mbe nyaʼa nyɨ ə si. 7Tɨ mɔʼɔ nyaʼa feŋ ɨŋga ɨ̀jə̀ŋɨ̀. Ɨ̀jə̀ŋɨ̀ we nyaʼa kwi nib ɨghɨ mbe, chəi tɨ nyaʼa kɔ rɨtam. 8Tɨ mɔʼɔ nyaʼa feŋ ɨŋga si chɔ̀m. Tɨ nyaʼa kwi bə̀ kɔ rɨtam nɔnɔʼ. Tɨ mɔʼɔ nyaʼa kɔ rɨtam ɨwum ɨtad, tɨ mɔʼɔ kɔ ɨwum rɨ̀fuə, tɨ mɔʼɔ kɔ ɨkɨ fibɨ̀.”
9Yeso nyaʼa sɨ nwìə̀ ghà ni, “Wə̀d we nɨ tɨ̀ wɨ̀ zu ənû, wɨ̀ zu!”
Əton nɨ Yeso nyaʼa nɨŋ ɨnû mɨgɨ ghà ɨnû
(Mt 13.10-17; Lk 8.9-10)
10Ənɨ Yeso nyaʼa i tə̀zìʼ wi, bə̂d mbe nɨ nyaʼa kad əməd mbɨ mə̀mə̀ə̀nɨ̀-ɨnû mbe wum chɔ̀b rɨ̀be nyaʼa biirɨ ɨŋgam ɨ bɔ ɨmbə̀ʼ ɨnû mɨgɨ mbe. 11Wɨ̀ nyaʼa wììrɨ̀ əmbɨ mɨ̀mə̌d ni, “Ŋwìə̀ fə nàʼ ɨwe ɨ nən ni mbə̀ kyerɨ ɨnû mbe nɨ yeʼ ənə̀mə ɨmbə̀ʼ ənû ɨfɔ̀n əməd. Àyɨə mbɨ bɨrɨ ghà ɨnû jìm əmbɨ ə bə̂d mbe nɨ chəi əkaʼ nən ənɨ ɨnû mɨgɨ, 12ɨmbə̀ʼ ə,
'Mbɨ bɨrɨ kaŋ nèŋ,
àyɨə chəi mbɨ bɨrɨ zə.
Mbɨ bɨrɨ kaŋ zwetɨ,
àyɨə chəi mbɨ bɨrɨ kyerɨ;
njɨ mbɨ bɨrɨ beŋ tə fîŋ,
Ŋwìə̀ waʼ ɨnû rɨbɔ̀ŋ mɨ̀mə̌d.'”
Əton ənɨ ənû ə mɨgɨ ze ɨmbə̀ʼ wə̀d nɨə fàʼə̀ mbeŋ
(Mt 13.18-23; Lk 8.11-15)
13Yeso nyaʼa biirɨ əmbɨ mɨ̀mə̌d ni, “Chəi mbə̀ kyerɨ əton ənɨ ənû ə mɨgɨ zɔ̂ ə? Mbə̀ kɨə wo chè rɨ ye bɔŋ kyerɨ əton ənɨ ɨnû mɨgɨ jìm ə? 14Wə̀d nɨə fàʼə̀ mbeŋ we wɨə kon ɨŋgam Ŋwiə̀. 15Bə̂d mɔʼɔ yɨ ɨghabɨ ɨghɨ ŋgwèd mbe nɨ nyaʼa feŋ ɨgun ɨnə̂njɨ̀. Mbɨ mɨ zu ɨŋgam Ŋwiə̀, Satàn wò chɨ̀ ɨŋgam we nɨ mbɨ kon ɨŋga mɨ̀mə̌d kwàʼ àmei əwu əwən. 16Bə̂d mɔʼɔ yɨ ɨghabɨ ɨghɨ mbe nɨ nyaʼa feŋ ɨgun ɨwɔ̌. Mbɨ mɨ zu ɨŋgam we nɨŋ ənɨ ɨghaʼi əwu əwən. 17Àyɨə chəi ɨŋgam we jeŋgɨ nyɨ ɨŋga fîŋ tɨ mɨ̀mə̌d. Wɨ chub àmei ənɨ ɨkə nyumə̀. Ənɨ ŋgəʼ yeʼe kɨ̀ ənɨ mbɨə nwèndɨ̀ tɨkyerɨ-ɨwu mɨ̀mə̌d ɨmbə̀ʼ ɨŋgam we, mbɨ ton ɨŋgam we àmei əwu əwən. 18Bə̂d cherə yɨ ɨghabɨ ɨghɨ mbe nɨ nyaʼa feŋ ɨŋga ɨ̀jə̀ŋɨ̀. Mbɔ̂ yɨ mbe nɨ mbɨ mɨ zu ɨŋgam we, 19ənû nɨ nwiʼ ɨnyod ɨmbə̀ʼ ɨghɨ rɨŋga ɨsɨg, ənû nɨ berɨ mbɔ̂n, fɔrɨ ənû nɨ feenɨ ɨghɨ nɔnɔʼ, mbɨ fumnɨ ɨŋgam we, chəi wɨ kɔ rɨtam. 20Bə̂d mɔʼɔ yɨ ɨghabɨ ɨghɨ ŋgwèd mbe nɨ mbɨ nyaʼa ŋwi ɨgun ə si chɔ̀m. Mbɨ zu ɨŋgam we, benɨ əne kɔ rɨtam. Mbɨ mɔʼɔ kɔ rɨtam ɨwum ɨtad, mbɨ mɔʼɔ ɨwum rɨ̀fuə, mbɨ mɔʼɔ ɨkɨ fibɨ̀.”
Ənû ə mɨgɨ ɨmbə̀ʼ ənam
(Lk 8.16-18)
21Yeso nyaʼa biirɨ əmbɨ ə bə̂d mbe ni, “Ɨ mbɨə wa nɨŋ ənam nyɨ ə nəb ɨmbə̀ʼ kubrɨ əton fɨkuʼù kɨ̀ ɨmbə̀ʼ chà əton əbàʼ ə? Ɨmbə̀ʼ ɨ mbɨə nùŋə̀ yeʼ ɨgun əsɨ nɨ mbɨə te ənam ə? 22Chəi ənû ə mɔʼɔ ənə̀mə nɨ chəi mbɨ bɨrɨ toʼ əsaŋ. Chəi bəi ɨsə mɔʼɔ nɨ chəi zɨə bɨrɨ jwɨ əsaŋ. 23Wə̀d we nɨ tɨ̀ wɨ̀ zu ənû, wɨ̀ zu!”
24Wɨ̀ nyaʼa bə̀ yì ghà əmbɨ mɨ̀mə̌d ni, “Mbə̀ zɨ ətu ənɨ ɨnû mbe nɨ mbə̀ zu. Ɨchî nɨ mbə̀ə saʼə bə̂d cherə yɨə bə ɨchî nɨ mbɨ bɨrɨ saʼ əwən. Àyɨə mbɨ bɨrɨ saʼ əwən chè ɨchî nɨ mbɨ bɨrɨ saʼ bə̂d cherə. 25Wə̀d we nɨ berɨ ɨghɨ, mbɨ bɨrɨ naʼ mbɨ cherə ɨ bɔ, wɨ̀ sɨ berɨ mbɨ nɔʼ. Àyɨə we nɨ chəi wɨ̀ berɨ əghɨ, ka àbei ɨkə we nɨ wɨ̀ berɨ, mbɨ bɨrɨ nɨŋ rɨ bɔ.”
Ənû ə mɨgɨ ɨmbə̀ʼ ɨghɨ ŋgwèd nɨə kwiə
26Yeso nyaʼa wò ɨmbì ghà ni, “Ənû ɨfɔ̀n ə Ŋwiə̀ ə zɨ ɨghabɨ ɨchî nɨ wə̀d nɨŋ ɨghɨ ŋgwèd ɨ wò ŋwì əkaʼ mbi ɨbən. 27Ɨzimɨ mbɨ əziə, kɨ̀ wɨ̀ kɨə gwenə kɨ̀ ɨ wɨ̀ rətiə, ɨghɨ mbe bɨrɨ gwed, kwi, àyɨə chəi wɨ̀ kyerɨ ɨchî nɨ ɨghɨ mbe chè bɔŋ sɨə kwiə. 28Si zɨə ghɨ̀ ni ɨghɨ mbe kwi ziə. Ɨghɨ mbe bɨrɨ be zɨ rɨfuʼ, beenɨ fo bɔŋ sɨə kɔ rɨtam. 29Àyɨə ɨghɨ mbe nɨə tənə, mbaŋə̀ ze bɨrɨ nɨŋ fi ɨbi mbeŋ wò kwə̀ŋ ɨghɨ mbe, ɨmbə̀ʼ ɨghəm nɨ nyùmə̀ nɨ kwəŋ ɨghɨ fə kùʼ.”
Ənû ə mɨgɨ ɨmbə̀ʼ sǎm ə̀wɔ̀mɨ
(Mt 13.31-32, 34; Lk 13.18-19)
30Yeso nyaʼa biirɨ ni, “Tɨ̀ kɨə wo mɨg ənû ɨfɔ̀n ə Ŋwìə̀ ənɨ ə ye ə? Ənû ə mɨgɨ nɨ tɨ̀ rɨ̀ nɨŋ toʼrɨ əngu kɨ əzi ə? 31Ənû ɨfɔ̀n ə Ŋwiə̀ yɨ ɨghabɨ ə sǎm ə̀wɔ̀mɨ. Wə̀d mɔʼɔ nyaʼa nɨŋ sǎm ze wò kon ə si. Sǎm ə̀wɔ̀mɨ ə kə chè sǎm rɨjìm ɨgwɨ ə si. 32Àyɨə ənɨ mbɨ konɨ, zɨ̀ bɨrɨ kwi faŋ chè ɨzed jìm. Zɨ̀ bɨrɨ zɨ rɨtəb kyeŋ nɨ tɨnən bɨrɨ kod tə kàn ɨŋga.”
33Yeso nyaʼə ghà ɨŋgam Ŋwiə̀ əmbɨ ə bə̂d ənɨ ɨnû mɨgɨ nɔnɔʼ ɨghabɨ mbɔ̂. Wɨ̀ nyaʼə ghà ənɨ ɨnə̂njɨ̀ nɨ tɨ̀ bə̂d zu kyerɨ. 34Chəi wɨ̀ nyaʼa gha ənû ə mɔʼɔ əmbɨ ə bə̂d nɨ chəi wɨ̀ zɨ ənû ə mɨgɨ əbɔʼ. Àyɨə ənɨ wɨ̀ nyaʼa chub i tə̀zìʼ wi mbɨ mbi mə̀mə̀ə̀nɨ̀-ɨnû, wɨ̀ nyaʼa tòʼrɨ̀ ɨnû jìm əmbɨ mɨ̀mə̌d.
Yeso nyaʼa təmnɨ əfim
(Mt 8.23-27; Lk 8.22-25)
35À nyaʼa ɨkwirɨ kwirɨ əni ze, Yeso nyaʼa ghà əmbɨ mbi mə̀mə̀ə̀nɨ̀-ɨnû ni, “Tɨ̀ baanɨ wò ɨnjin wə.” 36Mə̀mə̀ə̀nɨ̀-ɨnû mbe nyaʼa nɔ̀ʼ sàŋ bə̂d mɨ̀nɔnɔʼ mbe, əne nɨŋ əməd mbɨ wò ɨŋga əbaŋ ze nɨ wɨ̀ kɨə kəʼ ɨŋga. Ɨbaŋ ɨgyɨ̀ cherə nyaʼa bə̀ əŋgu. 37Əfim ə kǎ kǎ ə nyaʼa sàʼ kɔ chě. Mɨnib nɨə nɔ̀ʼə̀ swiʼə nyaʼə nyɨ ɨŋga əbaŋ ze, əne ghɨ̀ mɨnib kəb swi ɨŋga əbaŋ ze. 38Yeso wɨə nyaʼa gwen i ɨgun ə pirə ənjìm əbaŋ ze. Mbɨ nyaʼa nɔ̀ əməd ghà ɨ bɔ ni, “Əchwiə̀-ɨnû, chəi à zə ni tɨ̀ yɨ əni ɨchù ɨvɨ ə?”
39Wɨ̀ nyaʼa nɔ̀ʼ, ghàm əbɔʼ əfim ze əne ghà əmbɨ mɨnib mbe nɨ nyaʼə nɔ̀ʼə̀ swiʼə ni, “Kəm rəziə! Tɨrə̀ bə̀ jùʼ e!” Ənɨ wɨ̀ nyaʼa ghà əne, əfim ze ə nyaʼa sobə, ɨsɨ bɔd rɨ gwèèd. 40Yeso nyaʼa sɨ ghà əmbɨ mə̀mə̀ə̀nɨ̀-ɨnû mbe ni, “Mbə̀ kɨə bɔ ɨmbə̀ʼ ə yè ə? Chəi mbə̀ kɨrɨ berɨ ɨbenɨ ə?”
41Ɨfeŋ nyaʼa yim mɨ̀mə̌d, əne mbɨ ghà mbənə mbənə ni, “Wɔ̂ kɨə kaŋ əwe, nɨ ka àbei əfim mbɨ mɨnib nɨə nɔ̀ʼə̀ swiʼə ə zuunɨ əməd ə?”
Одоогоор Сонгогдсон:
Mk 4: mgo
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
© 2013, Cameroon Association for Bible Translation and Literacy