Nikamowina 107
107
nanāskomihk kā‑tipēyihcikēt
1“nanāskomihk kā‑tipēyihcikēt, ayisk miywātisiw;
kākikē sākihiwēw.”
2kā‑kīhtwām wīhtamok ōhi pīkiskwēwina ē‑mamihcimāyēk kā‑tipēyihcikēt,
kiyawāw kahkiyaw kā‑kī-pimācihikoyēk.
kikī-paspīhikowāw nayēhtāwipayiwinihk ohci
3ēkwa kāwi kikī-pēsīkowāw pāh‑pītos askīhk ohci,
māmihk ohci mīna natimihk ohci,
nātakām ohci mīna sāwanohk ohci.
4ātiht kī‑papāmācihowak pakwataskīhk.
ēkwa namwāc ohci-miskamwak
ōtēnaw ita kita-wīkicik.
5kī‑nōhtēhkatēwak mīna kī‑nōhtēyāpākwēwak,
ēkosi kī‑pakitēyimisowak.
6ēkwa ē‑nayēhtāwīcik kī‑tēpwātēwak kā‑tipēyihcikēyit,
ēkosi kī‑pimācihēw okakwātakihtāwiniwāhk ohci.
7kī‑itohtahēw ē‑kwayaskwamoyik mēskanāhk,
ē‑itamoyik ōtēnāhk ita kita-wīkicik.
8mahti ta‑nanāskomācik kā‑tipēyihcikēyit osākihiwēwin ēkāya wīhkāc kā‑kīsipipayik ohci
ēkwa anihi mamāhtāwi-kīkwaya kā‑kī-tōtamākocik ohci.
9ayisk tēpi-minahēw anihi kā‑nōhtēyāpākwēyit,
mīna kīspōhēw anihi kā‑nōhtēhkatēyit.
10ātiht kī‑kitimākapiwak mīna wanitipiskapiwak,
ōki kipahwākanak ē‑sakahpisocik pīwāpiskwēyāpiya ohci,
11ayisk ē‑kī-nōtinahkik otitasiwēwiniyiw kisē-manitowa kā‑māwaci-sōhkātisiyit
mīna kī‑asēnamwak okiskinohamākēwiniyiw.
12ēwako ohci kī‑nēstosiwak iyikohk ē‑sōhki-atoskahihcik;
ē‑pahkisihkik māna ēkwa ēkāya awiya kita-wīcihikocik.
13ēkwa ē‑nayēhtāwīcik kī‑tēpwātēwak kā‑tipēyihcikēyit,
ēkosi kī‑pimācihēw okakwātakihtāwiniwāhk ohci.
14kī‑paspīhikwak kā‑kitimākapicik mīna owanitipiskisiwiniwāhk ohci
mīna kī‑pīkonamiyiwa pīwāpiskwēyāpiya.
15mahti ta‑nanāskomēwak kā‑tipēyihcikēyit
osākihiwēwin ēkāya wīhkāc kā‑kīsipipayik ohci
ēkwa anihi mamāhtāwi-kīkwaya kā‑kī-tōtamākocik ohci.
16pīkwatahamiyiwa iskwāhtēma ē‑osāwāpiskowiyiki
mīna sikwatahamiyiwa micimāpiskwahikana.
17ātiht kī‑mōhcowiwak,
kī‑kakwātakihāwak omaci-tōtamowiniwāwa ēkwa omacātisiwiniwāwa ohci.
18namwāc ohci-kaskihtāwak kita-mīcisocik
ēkwa kī‑nēsowātisiwak.
19ēkwa ē‑nayēhtāwīcik kī‑tēpwātēwak kā‑tipēyihcikēyit,
ēkosi kī‑pimācihēw okakwātakihtāwiniwāhk ohci.
20kī‑iyinīhkahēw otitasiwēwinihk ohci
mīna kī‑pimācihēw īkwahāskānihk ohci.
21mahti ta‑nanāskomēwak kā‑tipēyihcikēyit
osākihiwēwinihk ēkāya wīhkāc kā‑kīsipipayik ohci,
ēkwa anihi mamāhtāwi-kīkwaya kā‑kī-tōtamākocik ohci.
22mahti ta‑nanāskomēwak ē‑pakitināsocik,
kamāciwahikan ē‑nikamocik ē‑wīhtahkik kahkiyaw kā‑kī-tōtamākocik.
23ātiht kī‑pōsiwak nāpihkwānihk kihcikamīhk isi,
ēkota ē‑ohtācihocik.
24kī‑wāpahtamwak tānisi kā‑tipēyihcikēt ē‑kaskihtāt kita-tōtahk,
omamāhtāwi-tōtamowina kihcikamīhk.
25kī‑itasiwātam ēkosi kī‑māci-misi-yōtin,
mīna kī‑mamāhkāskāw.
26nāpihhkwāna kī‑ispāhkotēwa, mīna kī‑kōsāpēkotēwa timīhk isi.
ē‑kostātēyihtākwahk aniki nāpēwak kī‑pakitēyimisowak;
27kī‑pahkisinwak mīna kī‑ayahpipayiwak tāpiskōc ē‑kīskwēpēcik --
namōya nānitaw ohci itāpacihikwak ē‑nakacihtācik āta.
28ēkwa ē‑nayēhtāwīcik kī‑tēpwātēwak kā‑tipēyihcikēyit,
ēkosi kī‑pimācihēw okakwātakihtāwiniwāhk ohci.
29kī‑āstē-māyi-kīsikanihtāyiwa,
ēkwa kī‑pōni-mamāhkāskāyiw.
30kī‑miywēyihtamwak ē‑kāmwāci-kīsikāyik,
ēkwa kī‑pēsīkwak kapāwinihk isi kā‑kī-nitawēyihtahkik.
31mahti ta‑nanāskomēwak kā‑tipēyihcikēt
osākihiwēwin ēkāya wīhkāc kā‑kīsipipayik
ēkwa anihi mamāhtāwi-kīkwaya kā‑kī-tōtamākocik ohci.
32mahti kita-wīhtamwak okihcēyihtākosiwiniyiw ita ē‑māmawopayiyit ayisiyiniwa
ēkwa kita-mamihcimācik ita ē‑ayāyit onīkānīwa.
33kā‑tipēyihcikēt kī‑kwēskinam sīpiya kita-pāstēyiki mitoni
mīna kī‑nakinam mōhkiciwanipēkwa kita-pōni-pimiciwaniyiki.
34kī‑kwēskinam ē‑miywāsiniyik askiy kita-sīwīhtākanīwiyik ēkāya nānitaw ta‑itāpataniyik,
ayisk ohci ē‑macātisiyit ēkota kā‑wīkiyit.
35kī‑kwēskinam pakwataskiya kita-sākahikanīwiyiki
ēkwa ita ē‑pāstēyik askiy kī‑mōhkiciwanipēkowiw.
36ēkota kī‑pakitinēw onōhtēhkatēwa kita-wīkiyit,
ēkwa kihci-ōtēnawa kī‑osīhtāwak ēkota.
37kī‑kistikēwak ēkota ē‑ohpikihtācik mīnisāpō-kistikān,
mīna kī‑miyokihcikēwak.
38kī‑sawēyimēw otiyinīma, ēkwa kī‑mihcētōsēyiwa;
kī‑miyikowisiwak omostosomiwāwa kita-āhkami-mihcētiyit.
39ēkwa ispīhk kisē-manitow otiyinīma ē‑sākōcihihcik mīna ē‑pīwēyimihcik
kī‑kitimahāwak mīna kī‑kakwātakihāwak,
40kī‑māyēyihtamawēw anihi kā‑kitimahtāsoyit
mīna kī‑tōtamōhēw kita-papāmācihoyit pakwataskīhk.
41māka kī‑paspīhēw anihi kā‑kitimākisiyit otāyimisiwiniyihk ohci,
ēkwa kī‑itakimēw ōhi kita-yahkīmoyit tāpiskōc māyatihkwa.
42kā‑kwayask-itātisicik wāpahtamwak ōma mīna miywēyihtamwak,
māka omacātisak kipotonēhwāwak.
43awiyak kā‑iyinīsit kiyām kita-māmitonēyihtam ōhi kīkwaya
ēkwa ta‑nākatēyihtam kā‑tipēyihcikēyit kākikē osākihiwēwiniyiw ēkāya wīhkāc kā‑kīsipipayik.
Одоогоор Сонгогдсон:
Nikamowina 107: PCSBR
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Plains Cree Ruth © 2004 Canadian Bible Society
Plains Cree Psalms (collection) © 2013 Canadian Bible Society
Plains Cree James © 2014 Canadian Bible Society
Plains Cree Gospels and Acts © 2018 Canadian Bible Society