LUKA 24
24
Deira i angthau teang nai
(Mt 28.1–10; Mk 16.1–8; Jh 20.1–10)
1Naibaly nichi ly Anawn Kani y leu pei nai kamta anawn bo, na i py kani saryhrei angchei i kani khutawi y kyh rai khala y nichi ly atiti rimui sa rym naichi ly syn iy, angawm y chei bo. 2Naibaly angawm i lengseaung ly pali vui nai niu u iy, kun i Isu i veu ly niu y pasi lawh. 3Naibaly hina nai ne, nichi ly huna nai y dawn tamang tyh nai thym khala y ly khen cham, 4Khumi leaung nyhrei, kanih kangvang alaukau nanai akhiu iy, nichi ahawi y angdo; 5naibaly jei nai mymychi i meimai khaileaung y byh nai thym khala y, nini my ly nichi teng y, “Ati mana nai khumi kadei theung y khumi kangheng ai hau u lawh? 6Mymy ly hi y by y leang bo, angthau teang bo. Kalili pri y awm nai khala y nangchi teng y leu ang thui pi nai ly pany u ali ba:#Mt 16.21, 17.22–23, 20.18–19; Mk 8.31, 9.31, 10.33–34; Lk 9.22, 18.31–33 7Khumi i Chapo ai ly khumi kamngochi i kiu y patiu hai iy kraws tleaung y tahen ai i, kani thomrei kani y ly angthau teang ai nai tla, nanai ly,” napi. 8Naibaly nichi ly huni leu adawn vau bi i, angawm i dengdairei vawi teang iy, 9Holai hareichi hawi khumi takhra bawibawichi teng y py huni atitichi bawibawi ly thui pi. 10(Nichi ly Mari Makdalini hawi, Joanna hawi, Jakob i amhm Mari hawi ne; naibaly mymychi teng y neampachy takhrachi py amtaw thau naichi teng y ly huni satang thui pi teang.) 11Na i py nichi ly huni leu ai ly leu rumrang nai palawn i ym pi y. 12Na i py Petera ly angthau iy angawm mang y angpreng nai meung iy bih i, kanih mai ka-synchi awm takhra nai niu; hunaibaly atiti awm nai sai ly rengrang tlai ly napi naimy yhm y vawi ali teang.
Emmau avang y khuleaung chei nai
(Mk 16.12–13)
13Naibaly khen cham, huni kani y mychi theung i khumi leaung nyhrei ly avang harei, Emmau napi naira y chei hawi: huni avang ly Jerusalem i dengdairei hlau vui tariurei palo. 14Naibaly nini ly atiti tym nai bawibawi ly arum hawi prei. 15Naibaly hina nai ne, nini ly arum nai adeng hawi thym khala y Isu ly nini teng y tapai i, vanrei tako teang bo. 16Na i py mymy ai ma thai y ai nai nini i mei pali hai veng. 17Naibaly mymy ly nini teng y, “Nangni tako nai tarawi y arum hawi nai ly ati leu mo?” napi. Naibaly nini ly meimai takhui sui naimy angdo hawi bo.
18Naibaly amyn Kleopa napi nai my ly ni teng y, “Vai dymkhawn ly Jerusalem y nangmy tlairei awm khyh nai sai a? Vai dymkhawn i hu y atiti awm nai pany y nai keung nang ne a? nanai pathang. 19Naibaly ni my ly nini teng y, “Ati satang mo?” napi. Naibaly nini ly ni teng y, “Nazaret Isu i satang; mymy ly Tameuh hawi khumi bawibawi i mei ka-niu y leu y hawi atiti sa naira y py amo amyn amthang parai nai ne; 20naibaly pathyp pi nai keung kalenchi hawi, kaichi i meiteaung kehchi py ni ai padei ai nai leu pei nai pahawi nai ly, kraws tleaung y tahen. 21Na i py ni ly Israelachi ai lawi hai ai nai keung ne ai nai kaichi ly athang khai parai na iy. Ne, huni khyh ny y i, huni atiti tym nai ly vaini kani pa-thom awm bo. 22Huni ny y nai py kaichi i kamkawm neampachy amichi mo khawn angthodyh angawm y chei iy kaichi ai paleung khup hai: 23ni i veu niu y naimy Tameuh i kani pri i amtaw thau naichi amteng nai niu i, nichi my ly, ‘Ni ly heng teang bo,’ nanai thui, napi. 24Naibaly kaichi i kamkawm phyreichi ly angawm y chei i, neampachychi i thui nai kamta khyp my niu, na i py mymy ai ly niu y,” napi.
25Naibaly ni my ly nini teng y, “Khumi cheng y naichi awi! Amochi i leu thui nai bawibawi ym naira y kapawpchi awi! 26Krista ly huna nai atiti patang iy nang parai naira y kun ai nai angchi ny y a?” napi. 27Naibaly Mosi hawi amochi i tajiu nai bawibawi amteaung iy, Tameuh i cha-iu bawibawi y amymy isatang tajiu nai ngierei ly nini ai thui pi pachai bo.
28Naibaly nini i chei ai nai avang y ly tym vi bo i, mymy ly kamlo kyh y chei ai tau nai ka-tawm sa. 29Naibaly nini my ni ai kam i, “Kaini teng y ango ba; kani py pathyp bo, kani py avah ai bo,” napi. Naibaly mymy ly nini teng y anga ai nai kun bo. 30Naibaly hina nai ne: mymy ly nini hawi biu o nai ateh i tako la iy, kawn nai leu thui i theng baw iy nini teng y pei. 31Naibaly myni i mei ang vang i ni ai ma ryp bo; naibaly ni ly tama pi ryp veng. 32Naibaly nini ly “Lam y ani hawi arum nai hawi, Tameuh i cha-iu leu ang thui pi pachai nai thym khala y ly, ani paleung pran ti y a?” na hawi. 33Naibaly hunai thym khala y ly nini angthau i Jerusalem y ali teang, naibaly holai hareichi hawi nichi i ahawichi ly, 34“Areng ly angthau bi khypkhyp bo; Simon teng y py amteng bo,” napi nai arum achu nai niu. 35Naibaly nini my py lam y atiti tym nai hawi, tako theng baw iy ni ai ma tatang nai sai py thui pi teang.
Isu ly abangnaichi teng y amteng pi nai
(Mt 28.16–20; Mk 16.14–18; Jh 20.19–23; Ataw 1.6–8)
36Naibaly huna nai leu thui thym khala ly mymy kypkyp my nichi theung y angdo iy, “Nangchi teng y paleung awmnem naira awm sy,” napi. 37Na i py nichi ly khrikhri pa-rei ka-jei awm nai palawn iy jei parai i, phailo ai niu nai dawn. 38Naibaly ni my ly nichi teng y “Ati mana nai paleung bi u mo? Ati mana nai nangchi paleung y dawn nai awm u lawh? 39Kai i kiu kheuchi khen u, kaimy kypkyp chy bo he; kai ai panem ly, khen u cham; nangchi my niu nai kamta phailo ly ngan hawi hiu by y leang,” napi. 40Naibaly huna nai thui pajau iy ni i kiu kheuchi nichi teng y patei. 41Naibaly nichi kawn ala nai ym y asai rai, rengrang tlai napi nai thym khala y mymy ly nichi teng y, “Hi y atiti cha ai nai awm a?” napi. 42Naibaly ngo pangai nai beangrei pei. 43Naibaly mymy ly la i nichi i mei ka-niu y cha bo.
44Naibaly mymy ly nichi teng y, “Hini ly kai i leu na a. Mosi i Reita hawi, amochi i cha-iu hawi, sam cha-iu y ly kai i satang tajiu nai ngierei tym ai nai sai, nangchi teng y kai awm nai khala kang thui pi reng ly,” napi. 45Naibaly Tameuh i cha-iu leu sai pany thai ai nai mychi i paleung cheng hai bo. 46Naibaly mychi teng y, “Krista ly patang ai i, kani thomrei kani y ly kadeichi theung i nai angthau bi ai nai tla; 47naibaly mymy i amyn y uikhei ai nai leu hawi, kamngo pahen ai nai leu py Jerusalem y pateaung iy, cheng cheaungkhangchi teng y thui pi ai nai tla, nanai tajiu nai awm. 48Nangchi ly huna nai bawibawi pany nai keungchi ne. 49Naibaly khen cham, Ngaai i adeu nai ly nangchi teng y kang pato ai; na i py salo mang i dengdairei nangchi ai atiti sa thai naira y amthyp hai y ryrei ly avang y ajeng u jo rai ba,” napi.#Ataw 1.4
Kani mang y lyn kalau nai
(Mk 16.19–20; Ataw 1.9–11)
50Naibaly mymy ly Bethani ahawi y tym pa-rei nichi ai hawi:naibaly mymy i kiu pheu iy nichi ai amtheung hai.#Ataw 1.9–11 51Naibaly hina nai ne, amtheaung hai nai thym khala y nichi hawi amprei i, ni ai ly kani pri mangy pahawi kalau veng bo. 52Naibaly ni ai chiu i, khri pa-rei amo theu parai naimy Jerusalem y ali teang bo; 53naibaly nichi ly achura yhm kalen pui y Tameuh ai palo u jojo.
Одоогоор Сонгогдсон:
LUKA 24: KCL02
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Khumi Common Language Bible © Bible Society of Myanmar, 2005.
