LUKA 22
22
Isu ai padei ai tau nai
(Mt 26.1–5; Mk 14.1–2; Jh 11.45–53)
1Naibaly tako angbo abawi y nai, Katlen Vui nai pawi napi nai ly kasa bo.#Theu 12.1–27 2Naibaly pathyp pi nai keung kalenchi hawi, Reita patiu nai keungchi my ly khumi mipuichi ai jei nai deaungkho y mymy ai padei ai nai sai hau ryry.
Juda ly Isu ai padei ai paran nai
(Mt 26.14–16; Mk 14.10–11)
3Naibaly Setan my holai nyhreichi theung y abawi nai Juda, Iskariota napi nai i taku theung y kun iy, 4ni ly chei i nichi teng y mymy ai patiu hai thai ai nai pathyp pi nai keung kalenchi hawi, tavaimi luchi hawi ka-vo arum. 5Hunaibaly nichi ly khri pa-rei kawn i tangka pei ai nai adeu. 6Naibaly ni ly avo napi iy, khumi mipuichi by y nai sala y mymy ai patiu hai ai nai sai ka-vo hau ryry.
Katlen Vui nai Pawi cha ai nai sa rym nai
(Mt 26.17–25; Mk 14.12–21; Jh 13.21–30)
7Naibaly tako angbo abawi y nai kani, Katlen Vui nai pawi y beram cho apathyp ai nai kani ly tym i, 8Isu my Petera hawi Johan ai ly, “Achi ly Katlen Vui nai pawi cha thai ai nai pawi ba,” nanai pato. 9Naibaly nini my ly ni teng y, “Ma mang y pawi ai nai ngai mo?” napi. 10Naibaly mymy ly nini teng y, “Khen cham, nangni ly avang y kun hawi iy, neampacho leaungrei kacheang y tui apu nai avum hawi ai mang, ni i kun nai yhm y phai abang ly, kun hawi ba. 11Naibaly yhmkeung teng y ly, ‘Sara my, Kai teng y abangnaichi hawi Katlen Vui nai pawi kacha ai nai angvyn i awm naira sambeu ly ma mang y mo? ang napi,’ tapi ba. 12Hunaibaly mymy ly salo i sambeu kau parai nai, vawn awm angchi nai ang patei ai mang; hu y pawi hawi rym,” napi. 13Naibaly nini ly chei hawi i myni teng y thui nai ka-tawm khyp my niu hawi, naibaly Katlen Vui nai pawi pawi hawi rym.
Areng i biu
(Mt 26.26–30; Mk 14.22–26; 1 Kor 11.23–25)
14Naibaly neng khala y ly mymy ly biu o i abangnaichi py o hai teang. 15Naibaly mymy ly abangnaichi teng y, “Kai ly atiti patang y rai khala y hini Katlen Vui nai pawi kang cha hai ai nai khrikhri pa-rei ngai bo. 16Kang thui pi, hini ly Tameuh i peang naira y angym y ryrei ly kai cho ali y leang bo,” napi. 17Naibaly mymy ly khau la iy kawn nai leu thui pajau baly, “Hini lo u ly, amji u; kang thui pi, 18Tameuh i peang nai tym y ryrei ly vai i dengdairei kreip angjyn athai hang ly kanei ali y leang bo,” napi. 19Naibaly mymy ly tako la iy kawn nai leu thui pajau baly theng baw theng baw iy nichi teng y pei i, “Hini ly kai i ngan, nangchi i vui pei nai ly: kai ai pany jo ai nai hini ly so u jojo,” napi. 20Naibaly dym biu cha pajau nai bo y hunai kamta teang khau la iy, “Hini khau ly kai i thi y leu maikawm kangtha ne, nangchi i vui theu nai ly.#Jer 31.31–34 21Na i py khen cham, kai ai patiu hai ai nai keung i kiu ly kai i ahawi y sabawi tleaung y awm.#Sam 41.9 22Thui yb nai kamta Khumi i Chapo ly chei takengkei ai, na i py ni ai patiu hai ai nai keung ly taham si!” napi. 23Naibaly nichi my, “Kaichi theung y huna nai sa ai nai ly ami mo?” nanai adeng u.
Ami len keh mo, nanai aei u nai
24Naibaly mymychi theung y len keh naira y ami ai khai ai mo, nanai aei naira theu bo.#Mt 18.1; Mk 9.34; Lk 9.46 25Naibaly mymy ly nichi teng y, “Cheng Takhrachi i samrangchi ly mymychi i tlang tleaung y areng lawh; mychi tleaung y aly peang nai keungchi ly Amhm Ampo napi lawh.#Mt 20.25–27; Mk 10.42–44 26Na i py nangchi ly hunai kamta ny y leang; nangchi theung y len kyh nai khumi ly deaungdi kyh nai kamta awm sy: areng keh nai khumi ly kalop amsi nai keung kamta awm lawh sy.#Mt 23.11; Mk 9.35 27Ami len keh mo? Biu o nai keung a, kalop amsi nai keung a? Biu o nai keung ny y lawh a? Na i py kai ly nangchi theung y kalop amsi nai keung kamta awm ly.#Jh 13.12–15 28Kai ly parawi naira avum nai sala ryrei ly kai ai awm hai nai keung nangchi ne; 29hunaibaly kai i peang naira y kai i sabawi y nangchi cha nei thai ai nai, 30Ngaai my kai ai peang naira ang sa pi rym nai kamta, peang naira kang sa pi rym mang:hunaibaly Israela cheng holai nyhreichi ai tara chih pi nai areng atehra y nangchi ateh ai.#Mt 19.28
Petera aph ai nai Isu my thui pi yb nai
(Mt 26.31–35; Mk 14.27–31; Jh 13.36–38)
31“Simon, Simon, khen cham, setan my choh alai nai kamta alai thai ai nai nangchi ai ang hnei na a; 32na i py nang i ym naira phra y ai nai chiu kang sa pi bo; nang ly hi ali teang nai khala y ly nangmy i amjo amnauchi ai khaw hai ba,” napi. 33Naibaly ni my ly mymy teng y, “Areng, nang teng y ly theaung y hawi, dei naira y py chei teang ai nai kavam na a,” napi. 34Naibaly mymy ly, “Petera, kang thui pi, nang ly kai ai pany y, nanai kai ai tlen thomrei apha y ryrei ly vaini a kheaung ai ny y,” napi.
Tangka yh, jibo hawi haisau
35Naibaly mymy ly nichi teng y, “Tangka yh hawi, jibo hawi, phainai hawi syn y naimy kang pato nai khala y ly atiti avaw u a?” napi. Nichi my ly, “Avaw y leang,” napi.#Mt 10.9–10; Mk 6.8–9; Lk 9.3, 10.4 36Naibaly mymy ly nichi teng y, “Na i py vai ly ami py tangka yh hawi jibo hawi awm baly syn sy, ami py haisau by y baly kanih jo iy van sy. 37Kang thui pi, ‘Ni ai ly khumi kamngochi theung y kati tabawi bo,’ nanai tajiu nai ly kai i tlang tleaung y tym ai nai tla: kai i satang ly angym be ai bo,” napi.#Is 53.12 38Naibaly nichi my ly, “Khen cham Areng, hi y haisau nyhrei awm,” napi. Ni my ly, “Hawi bo,” napi.
Isu ly Olive mawi y chiu sa nai
(Mt 26.36–46; Mk 14.32–42)
39Naibaly mymy ly theu iy mymy i reita kamta Olive mawi y chei i abangnaichi py abang teang. 40Naibaly mymy ly huni meingtym y tym baly, “Parawi naira y kun u y ai nai chiu so u,” napi. 41Naibaly mymy ly lengseaung aphi nai ka-pho ryrei mo ra y chei takhra i, 42kheukhu di iy chiu sa i, “Ngaai, nangmy avo nabaly hini khau ly kai teng i nai tasyh pi kyh ba; na i py kaimy ngaingai ny y naimy, nangmy ngaingai phai ne sy,” napi. 43Naibaly kani pri mang i dengairei kani pri i amtaw thau nai leaungrei ly ni ai amcheng hai ai nai mymy teng y amteng. 44Naibaly mymy ly khrikhri pa-rei phailo seaung i, chiu sa patyp bi, naibaly mymy i ka-ui ly thi amai len parai nai kamta khaileaung y leaung. 45Naibaly mymy ly chiu sa pajau iy angthau i abangnaichi teng y chei: nichi ly paleung mawn nai deaungkho y i ngym nai niu i mymychi teng y, 46“Ati mana nai i ngym lawh? Nangchi parawi naira y kun u y ai nai angthau u ly, chiu so u,” napi.
Isu ai patiu nai
(Mt 26.47–56; Mk 14.43–50; Jh 18.3–11)
47Naibaly mymy ly thui nai thym khala y khen cham, khumi mipuichi ang jeu i, holai nyhreichi theung i Juda napi nai ly mo mang y tako; naibaly pachawm ai tau nai tapai. 48Na i py Isu my ly ni teng y, “Juda, Khumi i Chapo ai ly pachawm iy patiu hai ai nai lo-oh?” napi. 49Naibaly mymy ahawi i khumi my ly atiti tym ai nai ly pany i, “Areng, kaichi ly haisau hawi ateng ai a?” napi. 50Naibaly nichi theung y ami my mo pathyp pi nai keung kalen keh i miseaung ai ly ateng i, lamtang mang i kano sei thlau vui. 51Isu my pathang i, “Tuna tanrei hawi bo,” napi iy, ni i kano y nam iy hawihai teang bo. 52Naibaly Isu ly mymy teng y jeu nai pathyp pi nai keung kalenchi hawi, achura yhm kalen pui tavaimi luchi hawi, miteaung kehchi teng y py, “Haisauchi hawi thengbeangchi hawi syn iy, damra ai patiu ai nai ka-tawm theu u nai lo-oh? 53Kai ly nangchi teng y achura yhm kalen pui y kani tleirei awm nai khala y ly kai ai patiu ai nai tau u y pui be: na i py vai ly nangchi i neng py ne, kaveng my aly peang nai i neng py ne teang,” napi.#Lk 19.47, 21.37
Petera my Isu ai apha nai
(Mt 26.57–58, 69–75; Mk 14.53–54, 66–72; Jh 18.12–18, 25–27)
54Naibaly ni ai patiu iy pahawi i, pathyp pi nai keung kalen keh i yhm y pakun; na i py Petera ly kamlo dengdairei hui pajyh. 55Naibaly nichi ly lyum y mai liu iy ateh achu i, Petera py nichi theung y ateh teang. 56Naibaly ni ly mai kangvang y ateh nai thym khala y anglo ami mo ni ai niu i khen ryry iy, “Hini khumi py mymy teng y awm nai teang na a hi ly,” napi. 57Na i py mymy ly, “Lo awi, kai ly ni ai ly pany y leang,” nanai apha. 58Naibaly tanarei kha y ly khumi takhra my ni ai niu bi i, “Nang py nichi theung i khumi teang na a tu ly,” napi. Petera my ly, “Nai awi, kai ny y leang,” napi. 59Naibaly nari harei mo khala y khumi takhra my, “Hini py mymy teng y awm nai khyp bo: Kalili pri i khumi teang ly,” napi akhikan. 60Petera my, “Nai awi, nang i leu thui nai ly kai pany y ly,” napi. Naibaly tlenrei khyh my ni ly leu katheu thym khyp khala y a kheaung ryp bo. 61Naibaly Areng ly amhi iy Petera ai khen. Naibaly Areng my ni teng y, “Vaini ly a kheaung y rai kha y nangmy kai ai tlen thomrei apha ai,” napi nai leu ly Petera my adawn vau ryp bo. 62Naibaly ni ly theu iy vo ryry.
Isu ai panui hai nai hawi pakhau nai
(Mt 26.67–68; Mk 14.65)
63Naibaly Isu ai patawn nai keungchi ly mymy ai panui py panui hai, pakhau py pakhau. 64Naibaly mymy i mei y ly bam iy, “Nang ai ami my pakhau mo? Thuipi!” nanai deng u lawh. 65Leu takhra neangneang py thui tamawn iy jo u.
Isu ai tara chih naira y tym hai nai
(Mt 26.59–66; Mk 14.55–64; Jh 18.19–24)
66Naibaly khutawi bo nabaly mipuichi i miteaung kehchi, pathyp pi nai keung kalenchi hawi Reita patiu nai keungchi py achu; naibaly mymy ai nichi i tara chih nai keungchi teng y pahawi i, 67“Nang Krista ne khyp baly kaichi ai thui pi,” napi. 68Naibaly mymy ly nichi teng y, “Kangthuipi i py nangchi ym ai ny y leang:deng i py nangchi pathang ai ny y leang. 69Na i py vai i dengdairei Khumi i Chapo ly Tameuh i atiti sa thai naira i lamtang mang y ateh ai bo,” napi. 70Naibaly nichi bawibawi my ly, “Nang ly Tameuh i Chapo ne khypkhyp a?” napi. 71Mymy ly nichi teng y, “Nangchi my ne khyp, nanai pathi bo,” napi. Naibaly mymychi ly, “Pany ai naira takhra ati ngai jau mo? Mymy i labeaung i theu nai achi my pany khyp veng jau chy bo,” napi.
Одоогоор Сонгогдсон:
LUKA 22: KCL02
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Khumi Common Language Bible © Bible Society of Myanmar, 2005.
