LUKA 20
20
Isu i sa thai naira ai deng chumchi nai
(Mt 21.23–27; Mk 11.27–33)
1Naibaly kanirei nai ly hina nai ne, mymy ly achura yhm kalen pui y khumichi ai patiu nai hawi, Satang Kahawi thui pi nai khala y pathyp pi nai keung kalenchi hawi Reita patiu nai keungchi ly miteaung kehchi hawi mymy teng y tym miu; naibaly nichi ly mymy teng y, 2“Hini nang i atitichi sa nai ly ami i leu y sa nai mo? Ami my leu ang pei nai mo? Thuipi,” napi. 3Naibaly mymy ly nichi teng y,
“Kai py leu sairei kang deng teang ai:
kai ai thui pi teang ba;
4Johan i baptis sa nai ly kani pri mang i nai a, khumi i nai a?” nanai pathang. 5Naibaly nichi ly adawn u i, “Kani pri mang i nai,’ napi baly ‘Ati mana nai y mymy i leu ym u y lawh?’ ang napi ai. 6Naibaly ‘Khumi i nai,’ napi baly khumi bawibawichi my kaichi ai lengseaung y aphi ai; Johan ai ly amo ne, nanai ym vui nai y,” napi. 7Hunaibaly nichi ly, “Ma mang i nai mo kaichi pany y,” nanai pathang. 8Naibaly Isu my nichi teng y, “Kai py hini kai i atitichi sa nai ly ami i leu y sa nai mo, nanai kang thui pi y leang,” napi.
Kreip akho kry nai keungchi hawi pata nai leu
(Mt 21.33–46; Mk 12.1–12)
9Naibaly mymy ly khumichi teng y hini pata nai leu thui amteaung i, “Ami mo kreip akho sa i kry nai keungchi teng y hlau ai nai vang pei iy, kra rawm ai nai pri takhra y chei vui.#Is 5.1 10Naibaly neng khala y ly kreip akho i athai ly mymy i vui pei ai nai kry nai keungchi teng y miseaung leaungrei ai pato; na i py kry nai keungchi my ly ni ai pakhau iy, kiu ka-keu my ali hai teang veng. 11Naibaly mymy ly miseaung takhra ai pato bi i, nichi ly ni ai py pakhau i, angji ngailai pa-rei my sa iy kiu ka-keu my ali hai teang bo. 12Naibaly pa-thom pato taleang bi i huni ai py nichi ly tamo pei iy aphi vui bi. 13Naibaly kreip akho keung my ly, ‘Mana sa hawi mo hi ly? Kai i chapo ngai keh nai ai pato ai khyh bo; ni ai ly tahm khai ai ngaw khyh,’ napi. 14Na i py kry nai keungchi my ni ai niu baly, ‘Hini ly yhmtheaung kamtym ne: achi ly ni i yhmtheaung amtym thai ai nai padei u sina,’ nanai arum u. 15Hunaibaly nichi ly kreip akho i dengdairei ni ai patheu praw i, padei vui bo. Hunaibaly kreip akho keung my ly nichi i tlang tleaung y mana mana sa ai mo? 16Mymy ly jeu ai i, huni akho kry nai keungchi ai ly tama hai vui iy, kreip akho ly khumi takhrachi teng y au ai,” napi. Naibaly nichi ly huna nai thai iy, “Huna tanrei kaau ly tym moh sy,” napi. 17Na i py mymy ly nichi ai khen iy,#Sam 118.22
“Tumbaly hini leu tajiu nai ly ati mo?
‘Yhm sa nai keungchi i lengseaung ngai y nai ly,
Huni kypkyp ly taki i lengseaung
avo keh nai palawn bo,’ nanai ly.
18Ami py huni lengseaung tleaung y atlym nai ngierei ly kawi phiu ai i, ami ai py ti krup ipsaly dei piupa ai,” napi.
Akeu pei nai molam deng chumchi nai
(Mt 22.15–22; Mk 12.13–17)
19Naibaly huni neng khyp khala y ly reita patiu nai keungchi hawi, pathyp pi nai keung kalenchi my ni ai patiu ai nai sai hau u; na i py khumi mipuichi ai jei, huni pata nai leu ly mymychi ai padeang’ nai leu ne, nanai pany. 20Naibaly mymy ai ly aripeng i tara chih naira y hawi, aly peang naira y au thai ai nai, mymy i leu thui tamang naira amo jo ai nai, khen paryp nai khumi, khumi kahawi kamta awm hyp veng naichi ai py pato. 21Nichi my ly mymy teng y, “Sara, nang ly leu meitang khyp naimy thui py thui, patiu py patiu, ami ai py patle takhra lawh y naimy, Tameuh i lam y py leu meitang khyp naimy patiu reng, nanai kaichi pany. 22Kaichi ly Kaisara teng y akeu pei nai ly pei ngau a pei ngau y a?” nanai deng. 23Na i py mymy ly nichi i deng tapawp nai sai pany i nichi teng y, 24“Pia vui pangrei nai tangka cho kai ai patei u cham. 25Hini i myn hawi amyn ly ami i mo?” napi. Naibaly nichi my ly, “Kaisara i,” napi. Naibaly ni my ly nichi teng y, “Ne nabaly, Kaisara i atitichi ly Kaisara teng y pei u ly, Tameuh i atitichi ly Tameuh teng y pei u bei,” napi. 26Hunaibaly nichi ly khumi mipuichi i mo y ni i leu thui tamang naira y patiu ai nai ngo y iy, ni i pathang nai ly lyh parai i sai py katheu y.
Deira i angthau teang nai molam deng chumchi nai
(Mt 22.23–33; Mk 12.18–27)
27Naibaly angthau bi ai nai by y, nanai Saddukaichi theung i amichi mo ly mymy teng y chei u i ni teng y,#Ataw 23.8 28“Sara awi, Mosi my, ‘Ami py ni i amjo amnau my aju la i chanau so y naimy dei sy, ni i amjo amnau i aju tavau ai la iy, ni i amjo amnau i vui ti ampreng pi ai nai tla,’ nanai tajiu nai awm.#Leu 25.5 29Naibaly amjo amnau leaung saryhrei awm i chalu ly aju la iy chanau so y naimy dei vui. 30Pa-nyh nai my ly ni ai la; pa-thom nai my py la ryp bi; 31hunai kamta teang leaung saryhrei ly ha py chanau so y naimy dei bebe. 32Huni bo y ly huni neampachy py dei. 33Hunaibaly angthau bi nai kha y ly nichi theung y mani i aju lawn ai mo? Nichi leaung saryhreichi ly ni ai pom be bo,” napi.
34Naibaly Isu my nichi teng y, “Vai deung kangthauchi ly apom py apom, apom ai nai py deaung paseng: 35na i py huni pri y hawi, kadeichi theung i nai angthau bi naira y abawi ai ataing ai naichi ly apom py apom y, apom ai nai py deaung paseng y; 36nichi ly dei py dei ali thai y leang bo; nichi ly kani pri i amtaw thau naichi kamta tanrei awm; nichi ly angthau bi nai chanau lawn nai deaungkho y Tameuh i chanauchi ne. 37Na i py khumi kadeichi ai pathau bi ai, nanai Mosi my py Areng ai ly, ‘Abraham i Tameuh, Isaka i Tameuh, Jakob i Tameuh,’ nanai amyn pathi nai khala y lymlo kangpho y pany hai khyp.#Theu 3.6 38Mymy ly kadeichi i Tameuh ny y leang, kanghengchi i Tameuh teu; mymy deaungkho y bawibawichi ly heng bebe veng,” napi. 39Naibaly Reita patiu nai keung amichi mo ly, “Sara, nang i thui nai teng khyp mang,” nanai pathang. 40Naibaly nichi ly leu takhra deng ali ai nai vam y bo.
Messia i molam deng chumchi nai
(Mt 22.41–46; Mk 12.35–37)
41Naibaly mymy ly nichi teng y, “Krista ly Davida i chapo ne, nanai ly ati mana nai thui nai sai mo? 42Sam cha-iu y ly Davida kypkyp my ly,
‘Areng ly kai i Areng teng y,#Sam 110.1
43Nang i paleung ka-echi ai ly
nang i kheu khai naira kapalawn y ryrei ly
Kai i lamtang mang y ateh napi be, napi.
44Hunaibaly Davida my ly ni ai Areng napi lawh baly, mana nai ni i chapo ne thai ai mo?” napi.
Isu my Reita patiu nai keungchi molam amkym hai nai
(Mt 23.1–36; Mk 12.38–40)
45Naibaly khumi bawibawichi i ka-thai y mymy ly abangnaichi teng y, “Reita patiu nai keungchi teng y ly amkym u; nichi ly baichu kangjiu pachiu iy pavai nai ngai lawh, 46seng meingtym y nichi ai chiu nai hawi, achura yhm y tahm asang keh nai atehra hawi, pawi sa naira y tahm asang keh nai meingtym py ngai parai lawh. 47Nichi ly neampachy lumaichi i yhmtheaung cha pi, naibaly tapawp ai nai tau nai kra parai pa-rei my chiu sa u lawh: hunichi ai ly pasum nai tleaung y pasumra ai,” napi.
Одоогоор Сонгогдсон:
LUKA 20: KCL02
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Khumi Common Language Bible © Bible Society of Myanmar, 2005.
