LUKA 19
19
Isu hawi Zakai
1Naibaly Isu ly Jeriko avang y kun i tako prei. Naibaly khen cham, 2Zakai napi nai khumi leaungrei awm; huni khumi ly akeu cheaung naichi theung y khumi kalen leaungrei ne; mymy ly khri pa-rei nang na. 3Naibaly Isu ai ly mana mana awm mo, nanai khen ai nai tau; na i py khumi mipui awm nai deaungkho y mymy khy anem parai i niu thai y. 4Naibaly mo mang y angpreng kalym vui iy mymy ai khen ai nai thaidu keung y lyn Isu ly huni lam tako ai nai tla khyp. 5Naibaly Isu ly huni meingtym tym iy angdeang kalau i ni teng y, “Zakai awi, avum jau; kai ly vaini nang i yhm y anga ai nai tla he,” napi. 6Naibaly mymy ly avum kaliki i, kawn parai naimy anga hai bo. 7Naibaly huna nai niu baly nichi bawibawi my, “Khumi kamngo teng y anga ai nai kun bo ho,” nanai josei u. 8Naibaly Zakai ly angdo i Areng teng y, “Khen cham Areng, kai i yhmtheaung ka-hyhrei kamawnchi teng y kapei ai; naibaly ami teng i py atiti um paviu teu i py pyh palyhrei kaheung teang ai,” napi. 9Naibaly Isu ly ni teng y, “Vaini ly hini yhm y paheng naira tym bo, mymy py Abraham i chapo leaungrei ne teang. 10Khumi i Chapo ly tama naichi ai hau ai nai hawi paheng ai nai py ang jeu nai ne,” nanai thui.#Mt 18.11
Muku chang hawi pata nai
(Mt 25.14–30)
11Naibaly nichi ly huni leu tangai nai thym khala y mymy ly Jerusalem y tym kasa nai deaungkho y hawi, nichi ly Tameuh i peang nai ly amteng ryp ai nai ym nai deaungkho y py pata nai leu thui pi tabawi. 12Hunaibaly mymy ly hini leu thui i, “Khumi kanang ami mo pri peang ai nai leu la iy ali bi ai nai, pri kamlo paraira y chei. 13Naibaly mymy i miseaungchi leaung horei ai palau i mychi teng y muku tangka horei pei i nichi teng y, ‘Kai kang tym ali y ryrei ly hini hawi ka-pai so u,’ napi. 14Na i py mymy i khumichi ly ni ai niu ngai y i, ‘Hini khumi ai ly kaichi ai peang ai nai ngai y,’ napi ai nai kangkhym y savai pato.
15“Naibaly hina nai ne; mymy ly pri peang ai nai nga iy ali teang baly, my i miseaung tangka pei naichi ai kangpeung majirei nga mo, nanai pany ai nai palau hai. 16Naibaly kangman keh nai ly jeu i, ‘Areng, nang i muku tangka ly horei peung na a,’ napi. 17Naibaly mymy ly ni teng y, ‘Miseaung kahawi, nang i sa nai hawi mang; maiden chy naira y ka-ym awm nai deaungkho y avang horei y peang,’ napi. 18Naibaly huni bo i leaungrei ang jeu iy, ‘Areng, nang i muku tangka ly pangrei peung na a,’ napi. 19Naibaly mymy ly ni ai py, ‘Nang py avang pangrei y peang,’ napi.
20Naibaly khumi takhra ang jeu bi i, ‘Areng khen cham, hini nang i muku tangka ly kai nihdan y tapau jojo na a; nang khumi ngang ngang pui nai deaungkho y kang jei; 21nang i khai y naira y py nang la lawh reng i, nang i tiu y naira y py nang tyn lawh reng,’ napi. 22Naibaly ni my ly mymy teng y, ‘Miseaung kahawi ny y nai, nangmy i labeaung theu nai leu y my kang pasum ai. Kai ly khumi ngang ngang pui i, kai khai y naira y py la reng nai, kai i tiu y naira y py tyn reng nai nang pany lo-oh? 23Huna nabaly ati mana nai y kai i tangka ly ka-pai sa naichi i yhm y khai y lawh? Hunaibalykaimy vawi iy, kangpeung hawi kanga ai nai tla,’ napi. 24Naibaly mymy ahawi i angdo naichi teng y, ‘Ni i muku tangka ly lo pi ly, muku tangka horei awm nai khumi teng y pei,’ napi. 25(Nichi my ly mymy teng y, ‘Areng ni ly muku tangka horei awm ly,’ napi.) 26‘Kang thui pi, awm nai khumi ngierei teng y ly pei panawi ai i, by y nai khumi teng y ly mymy i awm angchi nai py la pi ai.#Mt 13.12; Mk 4.25; Lk 8.18 27Na i py hini kai ai tiu nai keungchi, mychi ai peang ai nai kai ai ngai y nai khumichi ai ly pahawi u ly, kai i mo y padei u,’ nanai,” napi.
Eaung naimy Jerusalem y kun nai
(Mt 21.1–11; Mk 11.1–11; Jh 12.12–19)
28Naibaly huna nai leu thui pajau khala y ly Jerusalem mang y chei kalau nai mymy ly mo mang y tako. 29Naibaly hina nai ne, mymy ly Olive mawi napi naira y Bethphaki hawi Bethani avang ahawi y tym iy, abangnaichi theung i leaung nyhrei ai pato i, 30“Nangni i mo kataw i avang y chei hawi ly, hu y nangni kun hawi angchei nai kha y keaungngo kano kasau cho pakheng nai, ami py atang vai y nai niu hawi ai mang; huni ai su hawi ly, pahawi hawi. 31Naibaly ami py, ‘Tuni ly ati sa ai nai su hawi vui mo?’ nanai ang deng baly, ‘Areng my aly awm,’ tapi,” napi. 32Naibaly pato nai nini ly chei hawi i, myni teng y thui naikamta khypkhyp niu hawi. 33Naibaly nini ly keaungngo kano kasau ai su nai thym khala y yhmkeung my ly nini teng y, “Keaungngo kano kasau ly ati mana ai nai su hawi vui lawh mo?” napi. 34Naibaly nini my ly, “Areng my aly awm,” napi. 35Naibaly Isu teng y pahawi hawi i, keaungngo kano kasau tlang tleaung y myni i kanih bai iy, Isu ai atang hai. 36Naibaly mymy i chei ai nai lam y mychi i kanih bai u prei.
37Naibaly mymy ly tym ai kasa nai kha y Oliv mawi lem ai nai khala y ly, abangnaichi khumi mipui neang neang my ly ati rengrang sa nai bawibawi niu nai deaungkho y kawn i, tao pajeng parai pa-rei, 38“Areng i amyn y jeu nai Samrang ly taham hawi; kani pri mang y aly nai leu tym sy, salo kangteng y ly nang parai nai awm sy,” nanai Tameuh ai palo bo.#Sam 118.26 39Naibaly khumi mipuichi theung y Pharisai phyreichi ly mymy teng y, “Sara awi, nang teng y abangnaichi ai ly parip ba,” napi. 40Naibaly ni my ly, “Kang thui pi hinichi my thui y baly lengseaungchi my aeu ai,” nanai pathang.
Jerusalem ai vo hai nai
41Naibaly tym ai nai takengkei khala ly avang niu i vo hai i, 42“Aw nang ly, vai hini sala y awmnem ai nai leu ly pany tanga i khyly! Na i py vai ly nang niu y ai nai heu pi veng bo. 43Nang ai tiu naichi ly nang ahawi y apai sa iy ang katanmeuh ai i, nangchi theu thai y ai nai ang awm pi khyp ai. 44Nang theung i nang i chanauchi hawi nangmy ai py khaileaung y athorei my aphi ai i, nang theung i lengseaung tleangleang nai ha py ang khai ai ny y; nang ly ang de nai neng khala nang pany y nai deaungkho y; huna nai kani ly nang i tlang tleaung y ang tym ai,” napi.
45Naibaly achura yhm kalen pui y kun iy atiti jo nai keungchi ai patheu amteaung i nichi teng y, 46“Kai i yhm ly chiu sa nai yhm ne ai, nanai tajiu nai awm, na i py nangchi my ly damrachi i tapiu y palawn u lawh,” napi.#Is 56.7; Jer 7.11
47Naibaly mymy ly kani tleirei achura yhm kalen pui y patiu reng. Naibaly pathyp pi nai keung kalenchi hawi, Reita patiu nai keungchi hawi, khumi mipuichi theung i miteaung kehchi ly mymy ai tama hai ai nai sai hau u.#Lk 21.37 48Na i py khumi mipuichi my ly mymy i leu hawihai tangai nai deaungkho y sa ai nai sai ngo u y.
Одоогоор Сонгогдсон:
LUKA 19: KCL02
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Khumi Common Language Bible © Bible Society of Myanmar, 2005.
