Mark i̱ Holisso 6
6
Chapta Hannali (6)
Nazareth Alhíha yat Jesus Oklah Ikholítobloh
1Jesus at yamma̱ ákanallih mat tamáhah kanímáko̱ attat assanottók mat falámat iyattók, hihma̱ iyákayya alhíha yat ta̱kla ilhkólittók. 2Hitoko̱ Nittak Holittópa nittak (Sabbath) at onahma̱ Jew im áyittanáha ma̱ (synagogue) nán o̱t im ábáchittók. Hihma̱ oklah la̱wa kat haklottók hicha oklah noklhaka̱chattók. Hihmat yappa̱ oklah itti̱ponaklohmat, “Hattak pat nán ábachi yakómi ka̱ katímma ayikkana tokó? Hikma̱, katah ósh isht áhopóyoksa (wisdom) ilappa̱ anokfokki toko̱? Hikmat katah ósh nána kat yohmáhi ik ahóbo yómi ka̱ mihchá hi̱nah ka̱ isht lha̱ko imma toko̱? 3Hattak pat pí chokka ikbi, Mary oshi mak kiyoho̱? Hikmat James, Joseph, Judas hicha Simon áyína ka̱ ittayípishi kiyoho̱? I̱tík alhíha yat hapi̱ tamáhah yappa̱ hapitakla ma̱ya kiyoho̱?” oklah áchittók. Hihátokósh oklah alhíha yat Jesus at ná míchi ka̱ oklah ik achokmahnottók.
4Yohmi kiya Jesus at i̱makáchihmat, “Hopayyi holittópa ya̱ kanah mákósh oklah holítoblih, hikásh i̱tamáhah, i̱kanomi alhíha, hicha i̱chokka achaffa alhíha akilla kato oklah holítoblih kiyoh ókih,” áchittók. 5-6Oklah alhíha yat ná yimmi oklah ikimikshoka̱, Jesus at noklhaka̱chattók. Hitokósh yamma̱ Jesus at nána kat yohmahi ik ahoboka̱ la̱wa ka̱ yamihchá híkiyottók. Abíka kaniyómi kak illaho̱ ibbak o̱bohlit masálichittók. Hihmat yamma̱ ákanallih mat, Jesus at tamáhah osi yómi ka̱ nán im ábachit a̱yat folótattók.
Jesus at Awahtoklo Alhíha ya̱ Pít Yolhlhi
7Hihmat im apostle awahtoklo (12) alhíha yash ma̱ i̱pa̱yat ittahoblit tahlittók. Hicha toklot iyaho̱ kanimma pit yolhlhihmat, shilombish okpolo alhíha kochawihláchi̱ka̱ nán isht lha̱ko̱ imattók. 8Jesus at i̱makáchihmat, “Tabi (walking staff) i̱sht hash íya hi̱nah, hihókakósh illi̱pa hicha bahta (bag) hicha iskali nána kiya i̱sht hash iyannah. 9Sholosh hash holá hi̱nah, hihókakósh náfokka i̱la kano i̱sht hash iyannah. 10Tamáhah hash ónakmat kanah ósh chi̱ka̱na cha i̱chokka ya̱ abóha mi̱tih chim áchikma̱ chokka maki̱niho̱ hash a̱ttá chikih. Hikmat tamáhah ma̱ hash a̱ttah alhlhi kat chokka maki̱niho̱ hash a̱ttá chikih. 11Hihókakósh tamáhah ma̱ya alhíha kat oklah ik hachi bannoh hicha hachi haklo ik banno hokma̱, tamáhah ma̱ hash ákanallá chiki. Hikmat chiyyi átokma̱ tokchobi hash tahtoláshkíh. Yappa̱ hash mihchi kat Chihówa im anno̱pa ya̱ oklah ik happonaklo toka̱ hayákachih ókih,” im áchittók.
12Hihma̱ Jesus im apostle alhíha yat ilhkólih cha, oklah alhíhayat Chihówa i̱folotáta cha iyakayyáchi̱ho̱ im ano̱lit oklah nówattók. 13Hicha apostle shilombish okpolo alhíha kocháwihlih hicha abíka la̱wa ka̱ olive bila yammichit masálichittók.
John Baptist Noshkobo Tapah
14Hitoko̱, Mi̱ko Herod akkiya Jesus isht imma haklottók, kanah mákósh Jesus a̱ oklah isht anópolih átoko̱. Oklah kaniyómi kato oklah áchihmat, “John Baptist, akósh illitok ósh falámat tanitok ókih. Makatokósh nána kat yohmáhi ik ahobo ka̱ mihchi hókih,” oklah áchittók. 15Kaniyómi kato áchihmat, “Elijah ókih,” oklah áchittók. Hikma̱ i̱lakato áchihmat, “Jesus at hopayyi holittópah ókih, pí hopayyi holíttopa hopáki ma̱yah chásh ák ohmih ókih,” áchittók. 16Hihma̱ Herod at yamma̱ haklohmat áchikat, “John Baptist makókat a̱lhihcha. A̱ tashka alhíha im ahnili ná inoshkobo oklah tablih chásh. Illittókat falámat tánicha alah ókih,” áchittók.
17-19Herod at yot anokfillittók, nána kat yakohmittóko̱: Herodias at Herod ittiyápishi Philip a̱ itikchi átok, hihókako̱, Herod at i̱ho̱kopat ittawáyattók. Hitoko̱ John Baptist at Herod i̱makáchihmat, “Ná alhpisa kiyoh ókih, chittiyápishi ittikchi ya̱ isht ittawáyakat,” im áha̱chittók. Yohmi hatoko̱ Herodias at nokówa fihnattók hicha John a̱ abih bannattók. Yohmi má Herod at Herodias a̱ imachokmalih bannah átokósh John Baptist a̱ yokáchi cha átallakchi fokkittók. 20Herod at ikkánattók John Baptist at hattak áyalhpísa hikmat hattak holittópa oka̱, hihátokósh, nána kat ik ákanihmo kiya ahnittók. John Baptist at nána makáha̱chika̱, Herod at isht ataklamah ohmákósh haklo kat áchokma ahnittók. Yohmi hatoko̱ Herodias at John Baptist a̱ kanihchá híkiyottók.
21Herod at im afammi nittak a̱ i̱pa chito apísattók. Makohma̱ Herodias at John Baptist abá hi̱naka̱ pola̱ka o̱t isht áyalhpísatok. Mi̱ko alhiha, tashka i̱ noshkobóka alhíha, hicha Galilee ma̱ya tikba hiyohli yómi kat o̱t iba i̱páchi̱ ho̱ im anólittók.
22I̱pa chito ma̱, Herodias oshítik at o̱t chokkowa cha Herod hicha apiha binohma̱yatok yamma̱ tikba hilhattók. Hilha kat achokmali ka̱ Herod hicha oklah apíha yash at ná yokpattók. Hihma̱ Herod at i̱makáchihmat, “Nánaho̱ ish ponakloh okmat chishno áhi̱nah,” im áchittók. 23Hihmat, Herod at ná mihchi kat isht aya̱lháchi̱ kat allatík ma̱, i̱makáchihmat, “Am ápihlichíka (kingdom) iklanna ka̱ chinnah okma̱ chimála hi̱nah ókih,” im áchittók.
24Allatík mat kanalli cha ishki ya̱ o̱t i̱ ponaklohmat, “Nátaho̱ sanna kat im anólilih?” im áchittók. Hihma̱ ishki yat, “John Baptist inoshkobo mako̱ chinna kat ish i̱ ponakláchikih,” im áchittók.
25Hihma̱ allatík mat ashshali̱t falámat íyacha Herod o̱t i̱makáchihmat, “John Baptist inoshkobo ya̱ a̱pata chito (platter) apaknaka itto̱laho̱ sannah himak aki̱li ka̱,” im áchittók.
26Hihma̱, Herod at yamma̱ hakloh mat nokha̱kloh fihnattók. Hihókakósh apíhat binohma̱ya alhíha ya̱ tikba ná makáchikash ma̱ kobaffi ik bannottók. 27Hitokósh i̱ tashka alhíha achaffa ka̱ átallakchi íya cha John Baptist inoshkobo o̱t tablit isht alá hi̱nah im ahni ná mihchittók. 28Hihma̱ (John Baptist) inoshkobo ya̱ a̱pata chito apaknaka o̱bohlih cha allatík ma̱ o̱t imattók. Hina allatík mat ishki imattók. 29John Baptist iyákayya alhíha yat John at illitok a̱ oklah ikkanahmat ihaknip a̱ o̱t íshi cha illi abohli, tali chilok, oklah fokkittók.
Jesus Tahlípa Achaffa I̱pachih
30Jesus im apostle alhíha yásh mat falámat Jesus a̱ oklah im ayónahmat, nánaho̱ mihchittók hicha oklah alhíha ya̱ nána im ábáchittók at oklah anólittók. 31Hihókako̱, la̱wa kat áyalat, ilhkólit yómi ka̱ Jesus hicha iyákayya alhíha yat i̱pa híkiyottók. Hihma̱ Jesus at áchihmat, “Hapishnák bánoh ósh kani kililhkóli hikmato hapishnák illah ósh oklah í máya hi̱nah hikmat oklah ífoha hi̱nah,” im áchittók. 32Hihma̱ oka píni oklah chokkowacha kanimmáko̱ ilap akillah ósh ma̱ya hi̱nak mat ilhkólittók. 33Hihókako̱ oklah la̱wa kat Jesus hicha iyákayya alhíha yat kanálli ka̱ pi̱sattók. Hihmat tamáhah má apakfo̱pa máya alhíha yat balílit ti̱kba oklah ayónattók. 34Jesus at oka píni ma̱ ákohchah mat oklah lawa fihna ka̱ pisattók. Oklah alhíha yakómikat chokfalhpowa (sheep) pihlichi yat ikimikshoh akohmih ósh ma̱yattók. Hihátoko̱ Jesus at oklah alhíha ya i̱nokha̱klottók hihmat ná la̱wa ka̱ im ábachit isht ikít iyattók.
35Okítiyá ho̱sit tahahma̱, Jesus iyákayya alhíha yat Jesus imónacha i̱máchihmat, “Yakni pat yakni shila akohmih ókih, hikma̱ hashi kanalli yat o̱t iyat tahah. 36Oklah lawa alhíha yat tamáhah osi hicha osápa (field) bili̱ka okla áma̱ya talohma̱ya ka̱ ilhkólicha i̱pa o̱t oklah cho̱pá hi̱nah ka̱ oklah im anólih,” oklim áchittók.
37Hihma̱ Jesus at oklah i̱makáchihmat, “Hachishnak ósh hash i̱pachikma̱,” oklim áchittók. Hihma̱ Jesus iyákayya alhíha yat áchihmat, “Hashi o̱tohchina (8 months) o̱naho̱ oklah íto̱ksalih okmákósh illi̱pa cho̱pat oklah alhíha yappa̱ ili̱pachá hi̱nah kiyoho̱,” áchittók.
38Hihma̱ Jesus at áchihmat, “Pallaska katohmiho̱ hash i̱shiho? Iyacha o̱t pisah,” áchittók. Hihma̱ iyákayya alhíha yat oklah ikkanah mat yappa̱ i̱makáchihmat, “Pallaska osi talhlhápih (5) hicha nani tokloh (2) oklah ili̱shih,” im áchittók.
39Jesus at iyákayya alhíha ya̱ i̱makáchihmat, “Oklah alhíha ya̱ hashshok okchamáli (green) apaknaka ma̱ binohláchi̱ ka̱ im anólih,” im áchittók. 40Hihma̱ lokóli (groups of) ittibá binohlit iyakat talhípa achaffat (100) iyakma̱, anóti lokóli kaniyómikato pokkóli talhlhápit (50) iyah ósh binohmáyattók. 41Hihma̱, Jesus at pallaska osi talhlhápih (5) ma̱ hicha nani tokloh (2) ma̱ íshicha aba yakni pit písa cha illi̱pa ma̱ Chihówa i̱ yakókittók. Hihmat iyákayya alhíha yat oklah alhíha ya̱ pallaska ma̱ imáchi̱ho̱ toshtólicha iyákayya alhíha imattók. Hihmat nani toklo kásh ma̱ kanah mákósh apáchi̱ ka̱ i̱ kashablit tahlittók. 42Hihma̱ oklah móma kat i̱pa oklah im alhpísattók. 43Hihma̱, Jesus iyákayya alhíha yat taposhshik chito awahtokloh o̱ (12) pallaska hicha nani a̱ta̱pa ma̱ ittahoblit alótalittók. 44Hattak nakni alhíha talhípa sipokni talhlhapih (5000) ósh illi̱pa ya̱ oklah apattók. (Ohóyo hicha alla alhiha ayína kato ik holhpino.)
Jesus at Oka Apaknaka Ánowah
45Oklah imalhtahah aki̱nika̱, Jesus at iyákayya alhíha yat oka píni pit alhtocha falámat okhata awánablit Bethsaida tamáhah oklah ilhkóláchi̱ho̱ i̱makáchittók. Hihmat ilap ato oklah alhíha ya̱ i̱chokka pit yolhlhit tahláchi̱h ósh maki̱nih a̱ttattók. 46Hitokósh oklah alhíha pit yolhlhit tahlihmat iyat nanih cháha pit aboyya cha anno̱pa ilbashsha asilhhattók.
47Hihma̱ ninak ma̱, Jesus at yakni ma̱ ilap akillah ósh a̱tta mómattók. Hihma oka píni ato okhata iklanna a̱yattók. 48Hihma̱ Jesus iyákayya alhíha im oka píni o̱ mahlit kaniya ka̱, tikba ilhkólá híkiyoh ósh kánit ahnih ósh takohma̱ya ka̱, Jesus at pi̱sattók. Onnáho̱sihma̱ (hashi kanalli tohchína hicha hannali itti̱ta̱kla) Jesus at oka apaknaka ánówah ósh, iyákayya alhíha foká iyah ósh a̱yattók. Hicha oka píni ma̱ nówat o̱t iyáchi̱h ósh a̱yattók. 49Hihókako̱, iyákayya alhíha yat Jesus at oka apaknaka ya̱ ánówah ósh a̱ya ná oklah pisahmat shilop oklah imahówattók. Hihmat oklah taklholat hikít ilhkólittók. 50Móma kat oklah písacha oklah nokshópah fihnattók. Hihókako̱ Jesus at makfokálika̱ áshshali̱t i̱makáchihmat, “Isht hachi ataklammannah! Jesus siyah ókih. Hachi nokshopannah,” im áchittók. 51Hihmat oka píni ma̱ Jesus at o̱t ibá chokkowa aki̱ni ka̱ mahlit issattók. Hihma̱ iyákayya alhíha yat oklah noklhaka̱chah fihnattók. 52Oklah at im anokfila yat alhkama átokósh, Jesus kanah óka̱ oklah ikkana kiyoh mómattók hihakósh pallaska talhlhapi íshi cha kanit oklah lawa alhíha ma̱ i̱páchitoka̱ oklah im akostini̱chá híkiyottók.
Jesus at Abika Alhíha Masáláchih
53Jesus hicha iyákayya alhíha yat okhata o̱t awanablihmat, Gennesaret yakni oklah áyalattók hicha okhata lapálika ma̱ oka píni isht onat takchit hilíchittók. 54Oka píni ya̱ oklah akkowah aki̱ni ka̱ yamma ma̱ya alhíha yat Jesus oklah pisahmat kanah oka̱ ikkánattók. 55Yamma ma̱ya alhíha mat, yakni apakfo̱pa mómaka̱ pit oklah balílih cha Jesus at alatoka̱ kanah máko̱ im anólit oklah nówattók. Hitoko̱, oklah alhíha yat kanah ósh abíka alhíha okma̱, áyo̱nosi osi oklah o̱bohlicha, Jesus at kanímáko̱ a̱tta ka̱ oklah ha̱klotokmat oklah isht imónattók. 56Tamáhah chito kiyokmat tamáhah osi kiyokmat kanímáko̱ Jesus at iyatokma̱, oklah alhíha yat abíka alhíha ya̱ áyittatóba yamma̱ Jesus oklah isht imónattók. Hihma̱ oklah alhíha yat Jesus a̱ imasilhhattók i̱nafokka faláya isht akkala ya̱ potolá hi̱nak mat. Hihma̱ kana mákósh i̱nafokka ma potólihmat oklah masálittók.
Одоогоор Сонгогдсон:
Mark i̱ Holisso 6: CHTW
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Choctaw Mark and Genesis Portions © American Bible Society, 2005.