Luk 23

Juda tamo kokba naŋgi na Yesus osi gilsib Pailat aqa ulatamuq di tigelteb

1Juda tamo kokba naŋgi degsib marsibqa tigelosib Yesus osi gilsib Rom naŋgo tamo koba Pailat aqa ulatamuq dia tigelteb. 2Tigeltosib Pailat minjeb, “Iga Yesus uneqnum, a na Juda tamo uŋgasari naŋgi kumbra uge uge yqajqa deqa areqalo tigeltetnjreqnu. A na naŋgi mandor koba Sisar takis yqajqa saidnjroqnsiqa minjreqnu, ‘E segi nuŋgo Mandor Koba. E segi Kristus.’” Naŋgi degsib gisaŋosib Yesus aqa jejamuq di anjam qameteb. 3Onaqa Pailat a naŋgo anjam di qusiqa Yesus nenemyej, “Ni Juda naŋgo Mandor Koba e?” Onaqa Yesus na minjej, “Od. Anjam agi ni na maronum di kere.” 4Onaqa Pailat na atra tamo kokba ti tamo uŋgasari kalil naŋgi ti minjrej, “E segi are qalonum, Yesus aqa jejamuq di une bei saiqoji.” 5Degsi minjrnaqa naŋgi na kamba minjeb, “Yesus a na tamo uŋgasari naŋgi kumbra uge uge yqajqa deqa areqalo tigeltetnjreqnu. Agi a Galili sawaq dia aqa wau utru atsiqa dena Judia sawaq gilsiq qure qure kalilq dia walweloqnsiqa tamo uŋgasari naŋgi kumbra uge uge yqajqa deqa areqalo tigeltetnjreqnu. Dena bosiq gago qure endia dego kumbra degyeqnu.”

Pailat na Yesus qariŋyonaqa Herot aqaq gilej

6Onaqa Pailat a naŋgo anjam di qusiqa nenemnjrej, “Yesus a Galili qaji tamo e?” 7Degsi nenemnjrnaqa naŋgi na minjeb, “Od, a Galili qaji tamo.” Onaqa Pailat a naŋgo anjam di qusiqa minjrej, “Herot a Galili sawa taqatejunu. Bini a Jerusalem endi unu. Deqa e Yesus Herot aqaq qariŋyitqa a kamba Yesus aqa anjam quqwas.” Degsi minjrsiqa Yesus qariŋyonaqa Herot aqaq gilej.

8Herot a nami anjam endegsi quoqnej, “Yesus a maŋwa gargekoba babteqnu.” Deqa a Yesus itqajqa are qaloqnej. Yesus a bosim Herot aqa ulatamuq dia maŋwa bei yim unqajqa deqa are qaloqnej. Deqa Pailat na Yesus qariŋyonaqa Herot aqaq gilnaqa Yesus aqa ulatamu unsiqa tulaŋ areboleboleiyej. 9Onaqa Herot na Yesus anjam gargekoba nenemyoqnej. Nenemyeqnaqa Yesus a kamba anjam bei marosai. A torei kiriesoqnej. 10Deqa atra tamo kokba ti dal anjam qalie tamo naŋgi ti bosib Herot aqa ulatamuq dia tigelosib gisaŋosib Yesus aqa jejamuq di anjam gargekoba qameleŋoqneb. 11Onaqa Herot a naŋgo anjam di qusiqa aqa qaja tamo qudei naŋgi minjrnaqa bosib Yesus tulaŋ ugeugeiyosib misiliŋyoqneb. Yesus a segi Mandor Koba degsi maroqnej deqa naŋgi gara jugo olekoba mandor kokba naŋgi gaigai jigeqnub deqaji bei osib jigetosib qariŋyonab olo Pailat aqaq aiej. 12Bati deqa Herot wo Pailat wo naŋgi jeu turyeb. Nami naŋgi ombla jeu soqneb.

Pailat a Yesus ŋamburbasq di qamqajqa marej

13-14Onaqa Pailat na atra tamo kokba ti Juda gate kokba ti tamo uŋgasari kalil naŋgi ti metnjrnaqa aqa areq bosib koroonabqa endegsi minjrej, “Niŋgi Yesus osib ijo areq di tigeltosib merbonub, ‘Tamo endena tamo uŋgasari naŋgi kumbra uge uge yqajqa deqa areqalo tigeltetnjreqnu.’ Ariya niŋgi quiye. Yesus a segi ijo areq di tigelesonaqa aqa kumbra deqa e na geregere nenemyonumqa niŋgi quonub. Ariya anjam kalil niŋgi aqa jejamuq di qameqnub qaji di e quonum ugeibqo. E aqa jejamuq di une bei itosai. 15Herot a dego Yesus aqa jejamuq di une bei itosai. Deqa a na Yesus olo qariŋyqoqa ijoq bqo. Deqa niŋgi quiye. Niŋgi Yesus aqa une kobaquja bei babtosai. Deqa e na Yesus laŋa moiotqa keresai. 16-17Deqa e na ijo qaja tamo qudei naŋgi minjrit naŋgi bu toqoŋ na Yesus kumbaiŋyosib a uratib olo gilqas.”

18Onaqa tamo uŋgasari kalil naŋgi Pailat aqa anjam di qusibqa naŋgi tulaŋ koba murqumyosib minjeb, “Ni Yesus urataim. Ni a moiotime. Osim Barabas oqeq atsim iga ege.” 19Barabas a nami tamo qudei naŋgi joqsiqa Rom naŋgi ti qotsib tamo qudei ñumnab moreŋeb. Deqa naŋgi Barabas osib tonto talq di waiyeb. 20Ariya Pailat a Yesus uratim oqedqajqa areqalo soqnej. Deqa a na tamo uŋgasari naŋgi olo nenemnjrej, “Niŋgi maribqa e Yesus uratit gilqas.” 21Onaqa naŋgi olo tulaŋ koba murqumyosib waiŋyosib minjoqneb, “Ni Yesus urataim. Ni ŋamburbasq di qame! Ni ŋamburbasq di qame!” 22Onaqa olo minjrej, “Kiyaqa Yesus qalit moiqas? A une kie yqo deqa a ŋamburbasq di qamqai? Niŋgi Yesus aqa une kobaquja bei babtosai. Deqa e Yesus laŋa moiotqa keresai. Deqa e na ijo qaja tamo naŋgi minjrit naŋgi bu toqoŋ na Yesus kumbaiŋyosib a uratib olo gilqas.” 23-24Onaqa tamo uŋgasari naŋgi olo tulaŋ koba murqumyoqnsib siŋgila na Pailat saidyoqnsibqa waiŋyosib minjoqneb, “Ni Yesus ŋamburbasq di qame!” Degsib siŋgila na Pailat minjoqnsib naŋgo anjam dena Pailat aqa anjam qalotoqneb. Deqa Pailat a naŋgo anjam di dauryosiqa minjrej, “Di kere. Uŋgum. E na ijo qaja tamo naŋgi minjrit Yesus osi gilsib ŋamburbasq di qamib moiqas.” 25Degsi minjrsiqa Barabas tonto talq dena oqeq atsiqa naŋgi enjrej. Enjrsiqa tamo uŋgasari naŋgo areqalo dauryosiqa olo Yesus osiqa qaja tamo naŋgo baŋq di atnaqa naŋgi na osib aqa qawarq di aqa segi ŋamburbas atetosib a osi gileb.

Naŋgi na Yesus osib ŋamburbasq di qameb

26A osi giloqnsibqa gamq dia tamo bei walwelosiq Jerusalem qureq aieqnaqa a turosib ojsib Yesus aqa qawarq dena ŋamburbas yaiyosib tamo di yonabqa a kamba qoboiyosiqa Yesus gam na dauryosiq giloqnej. Tamo di aqa ñam Saimon. A Sairini qure qaji.

27Tamo uŋgasari tulaŋ gargekoba naŋgi Yesus gam na dauryosib giloqneb. Giloqnsibqa naŋgo ambleq dia uŋa qudei naŋgi are tulaŋ ugeinjrnaqa Yesus qa akamoqnsib lou ti giloqneb. 28Gileqnabqa Yesus a qusiqa bulosiqa naŋgi minjrej, “O Jerusalem uŋgasari, niŋgi e qa akamaib. Niŋgi nuŋgo aŋgro naŋgi qa ti niŋgi segi qa ti are qalsib akamoiye. 29Niŋgi quiye. Bati bei brantimqa tamo naŋgi endegsib marqab, ‘Uŋa naŋgo miligi ugeej qaji naŋgi areboleboleinjreme. Uŋa nami aŋgrotosaioqneb qaji naŋgi areboleboleinjreme. Uŋa aŋgro muŋgum anainjrosaieqnub qaji naŋgi dego areboleboleinjreme.’ Naŋgi degsib marqab. 30Bati deqa naŋgi na mana endegsib minjrqab, ‘Niŋgi bosib iga kabutgosib ulitgiye.’ 31Bini naŋgi ŋam gesgi kumbra degyeqnub. Ariya naŋgi ŋam moio kumbra kieryqab?”

32Ariya qaja tamo naŋgi na Yesus osi giloqnsibqa bajiŋ tamo aiyel naŋgi dego ŋamburbasq di ñumib moreŋqajqa deqa koba na joqsib giloqneb. 33Naŋgi gilsib sawa agu kiñala bei aqa ñam Tamo Gate Tanu di brantosib dia Yesus ŋamburbasq di gaintsib qameb. Qamsib bajiŋ tamo aiyel naŋgi dego ŋamburbasq di gaintnjrsib ñumeb. Bei Yesus aqa baŋ woq di qameb. Bei Yesus aqa baŋ qonaŋq di qameb. 34Yesus a ŋamburbas goge di sosiqa a endegsi Qotei pailyej, “O Abu, ni na naŋgo une di kobotime. Naŋgi une yonub di naŋgi qaliesai.” Ariya qaja tamo naŋgi Yesus aqa gara eleŋqa marsib gilteleŋeb. Osib meniŋ silali alaŋeb. Tamo yai aqa meniŋ na buŋnjrqas a na gara oqas. Degsib marsib meniŋ silali alaŋosib gara eleŋeb.

35Ariya tamo uŋgasari kalil naŋgi tigelesosib Yesus koqyeqnabqa Juda gate kokba naŋgi na Yesus misiliŋyosib maroqneb, “A na tamo uŋgasari naŋgi aqaryainjroqnej. Ariya a na aqa segi jejamu aqaryaiyqa keresai. A segi Kristus boleamqa a na aqa segi jejamu aqaryaiyosim ŋamburbas uratosim mandamq aiem.” 36-37Qaja tamo naŋgi dego Yesus degsib misiliŋyeb. Osib aqa areq gilsib wain isa koba anaiyosib misiliŋyosib minjeb, “Ni Juda naŋgo Mandor Koba boleamqa ni na ino segi jejamu aqaryaiyosim ŋamburbas urat.” 38Onaqa qaja tamo naŋgi ŋam sarqei bei osib quraq di anjam endegsib neŋgreŋyeb, “Tamo endi a Juda naŋgo Mandor Koba.” Degsib neŋgreŋyosib ŋam sarqei di osib Yesus aqa ŋamburbas mutu gogeq di qameb.

39Onaqa bajiŋ tamo bei ŋamburbasq di gainteb qaji a na Yesus misiliŋyosiqa minjej, “Ni Kristus boleamqa ni ino segi jejamu aqaryaiyosim aqo aiyel dego aqaryaige.” 40Onaqa bajiŋ tamo bei na aqa anjam di qusiqa olo ŋiriŋtosiq minjej, “Ni dego gulube qujai endi onum. Deqa ni kiyaqa Qotei ulaiyosai? 41Aqo aiyel une tamo. Deqa iga kere moreŋqom. Ariya Yesus aqa jejamuq di une bei saiqoji.” 42A degsi marsiqa Yesus minjej, “O Yesus, mondoŋ ni olo bosim Mandor Koba sosimqa ni e qa are qalsim e ame.” 43Onaqa Yesus na minjej, “Ni que. Bini qujai ni e ombla laŋ qureq di sqom.”

Yesus a moiej

44-45Onaqa qanam jige seŋ bati 12 onaqa sawa kalil tulaŋ ambruosi sonaq sonaq gilsiq seŋ bati 3 onaq bilaqtej. Bati qujai deqa gara kobaquja atra tal miligiq di gaiŋesoqnej qaji a goge na braŋosiq aisiq poaiyelej.

46Onaqa Yesus a tulaŋ koba leleŋosiqa marej, “O Abu, e na ijo qunuŋ osim ino baŋq di atonum.” Degsi marsiqa mondor titosiq moiej.

47Onaqa qaja tamo naŋgo gate koba a Yesus degsi mondor titosiq moiej di unsiqa a Qotei aqa ñam soqtosiqa marej, “Bole, Yesus aqa jejamuq di une bei saiqoji.”

48Onaqa tamo uŋgasari kalil Yesus unqa beleŋeb qaji naŋgi dego Yesus degsi moiej di unsibqa a qa tulaŋ are ugeinjrnaqa are soqoŋyeb. Osib jaraiosib naŋgo segi segi talq gileleŋeb.

49Onaqa tamo qudei nami Yesus dauryosib laqneb qaji naŋgi ti uŋgasari qudei nami Yesus dauryosib Galili sawa uratosib Jerusalem beleŋeb qaji naŋgi ti isaq di tigelesosibqa Yesus a ŋamburbasq di gaiŋosiq moinaq koqyoqneb.

Josep na Yesus aqa jejamu osiq sub bei nami meniŋ miligiq di gereiyeb qaji dia atej

50Tamo bei aqa ñam Josep a dego tigelosiqa Yesus a ŋamburbasq di gaiŋosiq moinaq unej. Josep a Juda naŋgo gate bei. A Arimatea qure qaji. Arimatea qure a Judia sawaq di unu. Josep a tamo bolequja. Aqa kumbra tulaŋ boledamu. 51Juda gate kokba naŋgi Yesus qalib moiqajqa maroqneb bati deqa Josep a naŋgi koba na marosaioqneb. A uratoqnej. A endegsi are qaloqnej, “Mondoŋ Qotei a bosim gago Mandor Koba sosim iga taqatgwas.” A degsi are qaloqnsiq bati di brantqajqa deqa tariŋoqnsiq soqnej. 52Ariya Josep a Pailat aqa areq bosiq nenemyej, “Ni e odbimqa e Yesus aqa jejamu osiy subq atqa kere e?” 53Degsi nenemyonaqa Pailat na odyonaqa gilsiq Yesus aqa jejamu ŋamburbasq dena osiq gara qat na dalaosiq osi gilsiq sub bei nami meniŋ miligiq di gereiyeb qaji dia atej. Sub di bunuj. Tamo bei nami sub dia atosaisoqneb. 54Bati di Juda naŋgo yori bati brantqa laqnej deqa yori bati aqa iŋgi iŋgi kalil gereiyosib atnab soqnej.

55Ariya bati di uŋgasari qudei nami Yesus dauryosib Galili sawaq dena beleŋeb qaji naŋgi Josep koba na subq gileb. Gilsib Josep na Yesus atej qaji sub di uneb. 56Unsib olo puluosib naŋgo talq aisib ŋam so aqa ya quleq tulaŋ boledamu di gereiysib atnab soqnej. Ŋam so aqa ya di Yesus aqa jejamuq di liyqajqa marsib deqa gereiyeb. Onaqa yori bati brantonaqa naŋgi Qotei aqa dal anjam dauryosib wau getentosib aqaratosib soqneb.

നിലവിൽ തിരഞ്ഞെടുത്തിരിക്കുന്നു:

Luk 23: bojNT

ഹൈലൈറ്റ് ചെയ്യുക

പങ്ക് വെക്കു

പകർത്തുക