Jon 11
11
Lasarus a makobaiyosiq moiej
1Tamo bei aqa ñam Lasarus a maiyej. Lasarus aqa qure utru Betani. Qure di Maria aqa nawi Marta wo naŋgo qure utru. 2Maria agi Tamo Koba Yesus aqa siŋgaq di goreŋ bilentosiq aqa gate baŋga na nuntej qaji agi a. Aqa nawi Lasarus a maiyej. 3Deqa Maria wo Marta wo naŋgi na tamo qudei qariŋnjrnab Yesus aqaq gilsib minjeb, “O Tamo Koba, tamo ni tulaŋ qalaqalaiyeqnum qaji a maiyqo.” 4Onaqa Yesus a naŋgo anjam di qusiqa minjrej, “Ma di tamo moiqajqa ma sai. Tamo uŋgasari naŋgi Qotei aqa siŋgila unsib aqa ñam soqtqajqa deqa a ma di oqo. Gam dena e Qotei aqa Ŋiri e dego ñam koba oqai.”
5Yesus a Marta na aqa nawi Maria na Lasarus na naŋgi qalub tulaŋ qalaqalainjroqnej. 6Lasarus a maiyej anjam di qusiqa quosaibulosiqa sawa a soqnej qaji dia bati aiyel olo soqnej. 7Osiqa aqa aŋgro naŋgi minjrej, “Iga olo Judia sawaq aiqom.” 8Onaqa naŋgi na Yesus minjeb, “O Qalie Tamo Koba, nami yala Juda naŋgi meniŋ na ni lumqa mareb. Di ni olo deq aiqam e?” 9Onaqa Yesus na kamba minjrej, “Seŋ oqsiq qanamqo sawa suwaŋqo. Deqa tamo naŋgi sawa unsib walwelqa kere. Maŋgalqasai. 10Ariya seŋ aisiq qoloqo sawa ambruqo. Deqa tamo naŋgi walwelqa keresai. Maŋgalqab.”
11Yesus a anjam degsi marsiqa olo minjrej, “Gago was Lasarus a ŋeiejunu. E aisiy dudumyqai.” 12Onaqa Yesus aqa aŋgro naŋgi aqa anjam di qusibqa minjeb, “O Tamo Koba, a ŋeiejunu degam aqa ma saiqas.” 13Naŋgi Lasarus a bole ŋeiejunu edegeb. Di sai. A bole moiej. Yesus a Lasarus aqa moio qa sigitosiqa ŋeio qa marej. 14Deqa a na olo ubtosiqa minjrej, “Lasarus a bole moiqo. 15Niŋgi ijo siŋgila unsib e qa nuŋgo areqalo siŋgilatqajqa deqa e aqaq aiosaisonam a moiqo. Deqa e ijo kumbra deqa areboleboleibqo. Niŋgi tigelab iga Lasarus aqaq aiqom.”
16Onaqa Tomas aqa ñam bei Didimus a na Yesus aqa aŋgro qudei naŋgi minjrej, “Uŋgum. Iga kalil aisim Yesus a ti moiqom.”
Yesus a marej, “E segi subq na tigelo qa utru. E segi ŋambile gaigai sqajqa utru.”
17Onaqa Yesus a naŋgi ti aisibqa Betani qure jojomyeb. Osib anjam endegsi queb, Lasarus a nami moiej subq ateb. Bati qolqe koboej. 18Betani qure di Jerusalem qure jojom. 3 kilomita dego. 19Deqa Juda tamo uŋgasari gargekoba Betani qureq bosib Marta wo Maria wo naŋgo jaja moiej deqa are latetnjrqajqa koroosib soqneb.
20Onaqa Marta a anjam endegsi quej, “Yesus a beqnu.” A degsi qusiqa walwelosiqa gamq di turqajqa gilej. Maria a talq di awesoqnej. 21Marta a gilsiq Yesus gamq di turosiq minjej, “O Tamo Koba, ni nami endi so qamu ijo jaja a moiosai qamu. 22Ariya bini e qalieonum, ni iŋgi kie qa Qotei pailyqam a na emqas.”
23Onaqa Yesus na Marta minjej, “Ino jaja a olo subq na tigelqas.” 24Onaqa Marta na kamba minjej, “E qalie, diŋo batiamqa tamo uŋgasari kalil naŋgi subq na tigelabqa ijo jaja dego ombla tigelqab.” 25Onaqa Yesus na minjej, “E segi subq na tigelo qa utru. E segi ŋambile sqajqa utru. Tamo a e qa aqa areqalo siŋgilatosim moiqas di uŋgum. A ŋambile sqas. 26Tamo kalil ŋambile sosib e qa naŋgo areqalo siŋgilateqnub qaji naŋgi olo bunu moiqasai. Naŋgi ŋambile gaigai sqab. O Marta, ni ijo anjam di qusim ino areqaloq di siŋgilatonum e?”
27Onaqa Marta na Yesus minjej, “Od, Tamo Koba. E qalieonum, ni Kristus, Qotei aqa Ŋiri. Ni qujai Qotei na nami qariŋmonaqa mandamq aiem qaji. Deqa e ni qa ijo areqalo siŋgilatonum.”
Yesus a Lasarus qa are ugeiyonaqa akamej
28Marta a anjam degsi marsiqa olo puluosi aisiq aqa nawi Maria metonaq aqa areq bonaq ombla sasalosibqa minjej, “Qalie Tamo Koba Yesus a bqo. A endi unu. A ni qa marqo.” 29Onaqa Maria a Marta aqa anjam di qusiqa tigeloqujatosiq Yesus unqa gilej. 30Yesus a qure miligiq aiosaisoqnej. A Marta wo gamq di anjam mareb sawaq di soqnej. 31Sonaqa Juda tamo uŋgasari Maria ombla aqa talq dia are latetoqneb qaji naŋgi Maria a tigeloqujatosiq tal uratosiq gileqnaqa unsib are qaleb, “A Lasarus aqa subq dia akamtqajqa gileqnu.” Naŋgi degsi are qalsib tigelosib Maria dauryosib gileb.
32Maria a gilsiq sawa Yesus soqnej qaji di brantosiqa Yesus unsiqa aqa areq di siŋga pulutosiqa minjej, “O Tamo Koba, ni nami endi so qamu ijo jaja a moiosai qamu.”
33Onaqa Yesus a Juda tamo uŋgasari Maria dauryosib beb qaji naŋgi Maria ombla akamoqneb di unsiqa naŋgi qa are ugeiyonaqa nenemnjrej, 34“Niŋgi Lasarus qabia subq ateb?” Onaqa naŋgi na minjeb, “O Tamo Koba, ni bosim aqa sub une.” 35Degsi minjnabqa Yesus a dego akamej. 36A akamonaqa Juda naŋgi di unsibqa mareb, “Niŋgi uniye. Yesus a Lasarus tulaŋ qalaqalaiyoqnej deqa akamqo.” 37Onaqa Juda tamo qudei naŋgi Yesus qa yomuosib mareb, “Yesus a nami tamo ŋam qandimo boletnjroqnej. A kiyaqa Lasarus boletosai? Amqa a moiqasai.”
Yesus a Lasarus subq na tigeltej
38Onaqa Yesus a naŋgo yomu anjam di qusiqa are gulubeiyonaqa walwelosiq Lasarus aqa subq gilej. Sub di mana miligiq di bogeb. Lasarus nami subq atsib meniŋ kobaquja na sub me getenteb. 39Deqa Yesus na minjrej, “Meniŋ kobaquja di taqal atiye.” Onaqa tamo moiej qaji aqa nawi Marta a na Yesus minjej, “O Tamo Koba, a nami moiej bati qolqe gilqo. Iga meniŋ taqal atqom di aqa qusa quleqwas.” 40Onaqa Yesus na kamba minjej, “E nami mermonum, ni e qa ino areqalo siŋgilatqam di ni Qotei aqa siŋgila unqam.” 41Degsi minjnaqa naŋgi meniŋ kobaquja di taqal atnabqa Yesus a laŋ goge tarosiqa Qotei endegsi pailyej, “O Abu, ni ijo pail endi quonum deqa e ni qa tulaŋ areboleboleibqo. 42E qalieonum, ni gaigai ijo pail queqnum. Ariya e tamo uŋgasari ijo areq endia tigelejunub qaji naŋgi qa are qalsim deqa e ni pailmonum. Amqa naŋgi qalieqab, ni na e qariŋbonam mandamq aiem.”
43Yesus a degsi Qotei pailyosiq koboonaqa a tulaŋ koba maosiq marej, “O Lasarus, ni subq dena tigelosim au.” 44Degsi marnaqa tamo moiej qaji a subq dena tigelosiq oqedej. Aqa siŋga ti baŋ ti nami gara na dalaeb. Aqa ulatamu dego gara na qoseb. Deqa Yesus na minjrej, “Aqa gara di pambloŋyib walwelosim gilem.”
Juda tamo kokba naŋgi koroosib Yesus qalib moiqajqa maroqneb
45Bati deqa Juda tamo uŋgasari Maria aqa talq dia are latetoqneb qaji naŋgi Yesus aqa siŋgila di unsibqa naŋgo ambleq di tamo gargekoba naŋgi Yesus qa naŋgo areqalo siŋgilateb. 46Ariya naŋgi qudei Farisi naŋgoq gilsib kumbra Yesus yej qaji deqa sainjreb. 47Sainjrnab qusibqa atra tamo kokba ti Juda tamo kokba ti metnjrnab naŋgo areq bosib koba na koroosib mareb, “Iga kierqom? Yesus a maŋwa gargekoba yeleŋeqnu. 48Iga a uratonam degsi kumbra yoqnqas di tamo uŋgasari kalil naŋgi a qa naŋgo areqalo siŋgilatqab. Yim Rom naŋgi bosib gago atra tal niñaqyosib iga dego kobotgoiqab.”
49Wausau deqa tamo bei aqa ñam Kaiafas a Juda naŋgo atra tamo gate soqnej. Deqa a naŋgo ambleq di tigelosiqa minjrej, “Niŋgi tulaŋ nanarionub. Anjam laŋa laŋa mareqnub. 50Niŋgi are qaliye. Tamo qujai a tamo uŋgasari kalil qa moiqas di kere. Amqa iga kalil padalqasai.”
51Kaiafas aqa segi areqalo na anjam di marosai. A wausau deqa atra tamo gate soqnej deqa a Qotei aqa medabu osiqa anjam di marej. Yesus a Juda naŋgi qa moiqas anjam di ubtsiq marej. 52Bole, Yesus a Juda naŋgi segi qa moiqasai. Qotei aqa aŋgro kalil sawa bei beiq di unub qaji naŋgi qa ti moiqas. Moisim naŋgi kalil koroinjrimqa naŋgi aqa segi tamo uŋgasari sqab. Kaiafas a anjam di ubtsiq marej.
53Ariya bati deqa Juda tamo kokba naŋgi Yesus qalib moiqajqa anjam gereiyoqneb. 54Onaqa Yesus a di qalieosiq deqa a Juda naŋgo ambleq di walwelosaioqnej. A segitosiqa qure kiñala bei wadau sawa jojom deq gilsiqa aqa aŋgro naŋgi koba na dia soqneb. Qure di aqa ñam Efraim.
55Onaqa Juda naŋgo yori bati koba jojomej. Qotei a nami Israel naŋgi Isip sawaq dia padalqa laqnabqa eleŋosiq aqaryainjrej deqa are qalqajqa yori bati jojomonaqa Juda tamo uŋgasari tulaŋ gargekoba naŋgo qure qureq dena tigelosib yori bati di unqajqa deqa Jerusalem beb. Juda naŋgo kumbra agiende. Yori bati di brantosaisoqnimqa naŋgi Jerusalem bosib naŋgo segi jejamu yansosib yori bati tariŋqab. Deqa naŋgi Jerusalem beb. 56Ariya naŋgi Jerusalem bosib Yesus qa ŋamoqneb. Deqa naŋgi atra tal miligiq bosib segi segi maroqneb, “Niŋgi kiersib are qalonub? Yesus a yori bati unqajqa Jerusalem bqas kio sai kio?” 57Naŋgi degsib maroqneb. Di kiyaqa? Atra tamo kokba ti Farisi ti naŋgi na tamo uŋgasari naŋgi nami endegsib minjreb, “Tamo bei a Yesus qabi soqnimqa unsim bosim iga mergem. Yim iga Yesus ojsim tonto talq waiyqom.”
നിലവിൽ തിരഞ്ഞെടുത്തിരിക്കുന്നു:
Jon 11: bojNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2013, Wycliffe Bible Translators, Inc. All rights reserved.
