Luka 17

Sibi

(Mat 18.6-7, 21-22; Mar 9.42)

1Jesu a li kwa balutiwa ba hae, “Lika ze wiseza batu mwa sibi li tamehile ku ba teñi, kono bumai bu ku ya li tisa! 2Ne i ka ba hande ha n'a ka tamelelwa licwe-tuna mwa mulala mi a nepelwa mwa liwate, bakeñisa ku kenya nihaili a li muñwi feela wa ba banyinyani bao mwa sibi. 3#Mat 18.15 Mu tokomele!

“Haiba mwanahenu a fosa, u mu kalimele, mi haiba a inyaza, u mu swalele. 4Haiba a ku foseza hasupile zazi li li liñwi, mi ka nako ni nako a nz'a t'o inyaza, u swanezi ku mu swalela.”

Tumelo

5Baapositola ba li ku Mulena, “Hulisa tumelo ya luna, i be ye tuna.”

6Mulena a alaba, a li, “Ha ne i ka ba kuli mu na ni tumelo ye fita fa peu ya masitete kwa butuna, ne mu ka kona ku bulelela kota ye ya feiga kuli, ‘Kumuha, u y'o itoma mwa liwate,’ mi ne i ka eza cwalo.

Swanelo ya mubeleki

7“A lu hupuleñi kuli yo muñwi wa mina u na ni mubeleki ya lima, kamba ya lisa lingu. H'a fita ku zwa kwa masimu, kana u ka li ku yena, ‘Akufa, u t'o ca lico za hao?’ 8Batili! U ta li ku yena, ‘Ni lukiseze mulalelo, mi u itame mwa teka, u ni litele ha ni sa ca ni ku nwa. Ha ni se ni felize kihona ni wena u ta ca ni ku nwa.’ 9Kikuli u ka itumela ku mubeleki kakuli u ezize z'a n'a laezwi, nji? 10Ku cwalo ni ku mina. Ha mu eza ze mu swanezi ku eza kaufela, mu bulele, mu li, ‘Lu batanga feela. Lu ezize swanelo ya luna, ki peto.’ ”

Jesu u folisa ba mbingwa ba lishumi

11Jesu ha n'a ya kwa Jerusalema, a fita mwahal'a Samaria ni Galilea. 12N'a ya mwa munzi o muñwi ha s'a katanyezwa ki ba mbingwa ba lishumi. Ba yema kwahulenyana. 13Ba huweleza, ba li, “Jesu, Muñ'a luna, u lu tomohele pilu!”

14 # Malivi 14.1-32 Jesu a ba bona, mi a li ku bona, “Mu ye ku muprisita, a y'o mi tatuba.” Ha ba li mwa nzila, ba fola. 15Yo muñwi wa bona h'a bona kuli u folisizwe, a kuta a lumbeka Mulimu ka linzwi le li pahami. 16A t'o ikwiseza fafasi kwa mahutu a Jesu a nz'a itumela ku yena. Mutu yo, ne li Musamaria. 17Jesu kih'a bulela, a li, “Kana i ne si ba lishumi ba ba folisizwe, nji? Cwale ba bañwi ba supile ka ba babeli ba kai? 18Kikabakalañi ha ku kutile muzwahule yo feela ku t'o itumela ku Mulimu?” 19Cwale Jesu a li ku yena, “Nanuha, u zamaye. Tumelo ya hao i ku folisize.”

Ku taha kwa Mubuso

(Mat 24.23-29, 37-41)

20Bafalisi ba bañwi ba buza Jesu, ba li, “Mubuso wa Mulimu u ka taha lili?” A ba alaba, a li, “Mubuso wa Mulimu ha u na ku taha ka liponiso ze ta bonwa. 21Ha ku na ya ka li, ‘A mu bone, ki wo kwanu!’ kamba ‘Ki wale kwani!’ Kakuli Mubuso wa Mulimu u mwahal'a mina.”

22Cwale a li kwa balutiwa ba hae, “Nako ya ta fo mu ka lakaza ku bona zazi li li liñwi la ka, na, Mwan'a Mutu, kono ha mu na ku li bona. 23Ba ta mi bulelela kuli, ‘Mu talime kwale!’ kamba ‘Mu talime kwanu!’ Kono mu si ke mwa ya, kapa ku matela kwateñi. 24Sina lumonyi lwa pula ha lu monyeha ku zwa kwa makalelo mane ku isa kwa mafelelezo a lihalimu, ku ta ba cwalo ni ku na, Mwan'a Mutu, lizazi le ni ka taha ka lona. 25Kono pili, ni swanezi ku nyanda hahulu, mane ni haniwe ki batu ba nako ye. 26#Sim 6.5-8 Se si ezahalile ka nako ya Nuwe ki sona se si ta ezahala ni ka nako ya ka, na, Mwan'a Mutu. 27#Sim 7.6-24 Batu kaufela ne ba nze ba ca, ba nwa, banna ne ba nyala, mi basali ba nyaliwa, ku fitela zazi leo Nuwe a kena mwa Aleka. Muunda o mutuna wa fita, mi wa ba bulaya kaufela. 28#Sim 18.20—19.25 Ku ta ba sina mo ne ku inezi ka nako ya Lota. Batu ne ba ca, ba nwa, ba leka ni ku lekisa, ne ba cala ni ku yaha. 29Lona lizazi l'a zwa Lota mwa Sodoma, kwa nela mulilo ni sulufula, mi ba shwa kaufela. 30Ku ta ba cwalo lizazi le ni ta bonahala, na, Mwan'a Mutu.

31 # Mat 24.17-18; Mar 13.15-16 “Ka lizazi leo, mutu ya fa situwa a si ke a tuluka kuli a y'o nga libyana mwa ndu ya hae. Kamukwaocwalo, ya kwa masimu a si ke a kutela kwa hae. 32#Sim 19.26 Mu hupule musal'a Lota! 33#Mat 10.39; 16.25; Mar 8.35; Luk 9.24; Joa 12.25 Mutu kaufela ya ka lata ku sileleza bupilo bwa hae, u ta sinyehelwa ki bona, mi ya ka sinyehelwa ki bupilo bwa hae, u ta bu pilisa. 34Na mi bulelela kuli bona busihu bo, kwa batu ba babeli ba ba lobezi fa mumbeta, ku ta ngiwa yo muñwi, yo muñwi a siiwe. 35Kwa basali ba babeli ba ba sita hamoho, ku ta ngiwa yo muñwi, yo muñwi a siiwe. 36Kwa batu ba babeli ba ba mwa simu, ku ta ngiwa yo muñwi, yo muñwi a siiwe.”

37Balutiwa ba hae ba mu buza, ba li, “Mulena, i ta ba kakai?”

Jesu a li ku bona, “Fo ku na ni situpu ki fona fo ku ta kubukanela manoñu.”

നിലവിൽ തിരഞ്ഞെടുത്തിരിക്കുന്നു:

Luka 17: Lozi09

ഹൈലൈറ്റ് ചെയ്യുക

പങ്ക് വെക്കു

പകർത്തുക