Matius 4
4
Phia sikini nubungeri Yesus mipto yubu nebogha
(Markus 1:12-13; Lukas 4:1-13)
1Undo uro yabiogpa, Allah Yame Walingeri Yesus enero poa pai aldesag pabiog. Pabiog nena, “Phia sikini nubungeri mipna miplul,” aro pai aldesag pabiog. 2Aldesag aneko poa piogpa, Yesus ae inipna teng nhon epto naualbareap, kwelekna teng nhon epto naualbareap kwaneng tenaba tero koma wamog. Tero koma wamogpa, Yesusag kwaneng yo uaog.
3Yesus kwaneng yo uaogpa, el mipnep phia nenekori yingkina Yesusag yubu lelamogti, “An Allah Elme wamlam tanena, kirik taneag, ‘Kwaneng roti talulom,’ semendi tululam,” seog.
4Wene seogpa, Yesusti phia anekoag ambarelamogti, “Allahri Yubu momeag wamlangena, ‘Nimi wamnep nena, kwaneng roti tendi mo kamag wamnep kom. Aghana yubu ni Allahri pamag agha lanalamlange toman agha nimi kamag wamnep,’ aro mome toro pibog,” seog.#Ulangan - Sariktoba 8:3
5Wene seogpa, phia sikini nubunge nenekori Yesus poa Allahri, “O'om as,” aro weptop as Yerusalem pabiog. Allahri mem ae imag tubag pailingkina lebogti, 6yubu lelamogti, “Anna Allah Elme wamlam tanena, lopna agha yingkilulam. Allahri yubu toro pairop momeag wamlangena,
‘Allahri an wali wapmenne sembe eldi arukna imagnang malaikat arukahileri pogsilul.
Sindi sae sang yangaro epkeikpa,
kirikti andi yan kuksubaghelul kom,’
aro mome toro pairopne wamla.#Sepna 91:11-12 Ane sembe lopna agha yingkilulam,” aro phia sikini nenekori Yesusag ambarog.
7Wene seogpa Yesusti yubu lelamogti, “Allahri yubu mome toro pairopne nen nhon wamlange, ‘A'un Saelba Uhiropne Allahag mipna mipseng kom,’ aro mome toro pibog,” seog.#Ulangan - Sariktoba 6:16
8Wene seogpa, phia sikini nubunge nenekori nen Yesus poa lebogti, main we sirikne nhonag poa waelbaog. Poa waelbaogti, phia anekori mog so'oag nimi ni saelba uhirop nimiap, sin umag wamek nimiap, tup taneba sinag uropneap, “Tiplengkalulam,” aro lag nembarog.
9Lag nembarogti, Yesusag yubu lelamogti, “Nia mangkina tiplengkalamne ni an ngai tanep. Ot andi nanag omekto u amupto kipnemen tanena, nari an saeag nembanun,” seog.
10Wene seogpa, Yesusti phia sikini nubunge nenekoag, “Satanas an kolop tae! Tam nene sembe Allahri yubu mome toro pairopne wamlange,
‘A'un Saelba Uhiropne Allah aghabog omekto u amupto kiplapmundi,
eldi awe mo toro omeklamlulom,’
aro mome toro pibog,” seog.#Ulangan - Sariktoba 6:13
11Wene seogpa, phia sikini nubunge nenekori Yesus laplobi agha piogpa, Allah arukna imagnang malaikat yingkina Yesus yepto paiamek.
Yesusti mog so'o Galilea nimiag alniro Allah yubu ambarelamsiogha
(Markus 1:14-15; Lukas 4:14-15)
12Yesusti ka'ebaogpa, “Yohanes sae salero kop aeag tobongkibonga wamla,” aro lebek yubu ka'ebaogti, Galilea so'oag sip piog. 13El Nazaret laplobi agha mag Galilea longorop mag abolag as Kapernaum piogti, ua ulamog. As Kapernaum aneko Zebulon nimiap Naftali nimiapti so'oag wamog.
14Yesus aneko piogti, wamog andarina, Allahri yubu silimu tiptopne Yesayari mome toro pibogne sunsunup taog. Mome toro pibogha sunsunup taog nena,
15“Zebulon nimiri so'oap Naftali nimiri so'oap
yabirop mag Yordan kauro pinep ina,
mag nubu uro longorop maghag pirop ina aneko
Yahudi kom nimi Galilea so'oag wamnep so'o sembe lemnuan.
16Nimi inibin urobag wamang nimi tanekori tibin wareroba nubunge ibang!
Sin tebaneba peramag uropti, inibinag urop mog so'oag nimi tanekoag
tibin wareropne sinag warero tingip tal,”
aro mome toro pibog.#Yesaya 9:1-2
17Galilea so'oag yingkina wamog sum agha Yesusti yubu alniro ambarelamsiogti, “Imagne ponekori mog so'oag nimi saelbamsilula peram tal. Ane sembe a'undi seneragto ulamlomne lipsimundi, Allahri senenne salero ulamlulom,” aro ambatsiog.
Yesusti ikan orop nimi tombare yopto embahiogha
(Markus 1:16-20; Lukas 5:1-11)
18Yesus mag Galilea longorop mag nubunge abol toman palamogti tilamogpa, nimi phende Simon si nhon Petrus engeropne ponekoap, ilipsae Andreasap tibogahiog. Sin abeneko ikan orop nang wamdekti, ikan orop nangdi ulamekne sunsunum uro ikan lip tangtop ag mag sinag toboglamdekpa tibogahiog. 19Tibogahiogti Yesusti sinag yubu lelamogti, “Na amik nelabanururom. Wene a'un ikan aghag lilamsirom saog uro amik sum babe yepsineba, a'undi nimi ero nanag poa yalamsururomba yahut,” seog.
20Wene seogpa, ta'ap sen koma sindinge ikan lip tangtop ag laplobi agha Yesusag nelebarek.
21Neleplamdekpa Yesus nen olog ko'oro pina tilamogpa, Zebedeus elmabo Yakobusap, elkae Yohanesap tibogahiog. Sin sikiniap kabongag wamekti, ikan lip tangtop ag o'oro wetnel tolamekpa tibogahiog. Tibogahiogti sin phende abeneko babe yopto embahiog. 22Yopsiogha ka'ebarekti, ta'ap sen koma sikiniap, kabong anekoap laplobi agha Yesusag nelebarek.
Yesusti Allah yubu ambatto naiktop nimi whelamsiogha
(Lukas 6:17-19)
23Yesus Galilea mog so'oag wamek as ni kanero palamogti, Yahudi nimiri Allah yubu lero winirop aeag wa'ina yubu walinge Allahri yubu sia lero nimi saelba uhiroba sembe nimi amoro ambatto tongolamsiog. Yubu walinge ambarelamsiogpa, naiktop nimi sin nimi taneko nusamag wamekpa, naikna telamsiogne babe, nimi nongag kikipto kauploa uhiropne babe ni wali nenelamsiog. 24Nimi tanekori, “Yesusti naiktop nimi wali nenelamsil,” arop yubu eneko sabo talamogpa, mog so'o Siria niag wamek nimi ka'elamekti, naiktop nimi maikno elag poa yalamsiek. Nimi naikna nhon sao, nhon sao ulamsiogpa, seklero ulamek nimi wali nenelamsiog. Nimi kulomag phia yonge ua ulamsiog nimiap, nong konkonoro kikiplamek nimiap, lebe arop kom nimiap payalamsiekpa, sin ni taneko Yesusti wali nenelamsiog. 25Undo unulamogpa, nimi maikno elag neleplamek. Galilea so'oag agha yalamekpa, as soro kalurop as Dekapolis agha babe, as Yerusalema babe, Yudea so'oag agha babe, yabirop mag Yordan kauro tara siba babe elag nelepto yalamek.
നിലവിൽ തിരഞ്ഞെടുത്തിരിക്കുന്നു:
Matius 4: kklKOS
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 (Active), Wycliffe Bible Translators, Inc. All rights reserved.
