Матвей 4
4
Идемевсесь снартни Иисусонь совавтомс пежетьс
1Теде мейле Оймеялтось ветизе Иисусонь чаво модас Идемевсенть пельде Сонзэ снартневтеме-варчавтнеме. 2Тосо Иисус постовась#4:2 постовась – эзь ярса мездеяк ниленьгемень чить ды ниленьгемень веть. Ды вана, окойники, пек вачсь пекезэ. 3Сестэ Снартневтицясь сась ваксозонзо ды мерсь: «Бути Тон Пазонть Цёразо, эрьга кармавтыть неть кевтнень теевеме кшикс». 4Иисус мерсь каршонзо: «Сёрмадозь:
“Аволь ансяк кши вийсэ эри ломанесь,
истя жо эрьва валсонть, конань ёвты Пазось”».
5Сестэ Идемевсесь ветизе Иисусонь Пазонь кочкавт Ерусалим ошов ды стявтызе Сонзэ Пазонь кудонь тёкшос. 6Сон мерсь Иисуснэнь: «Бути Тон Пазонть Цёразо, кирнявт алов, эдь сёрмадозь:
“Пазось кармавты Эсензэ ангелтнэнень ванстомс Тонь.
Сынь кандтадызь Тонь кедест лангсо:
илязо эшкеве пильгеть кевс”».
7Иисус мерсь тензэ: «Тосо истяяк сёрмадозь: “Иля снартневтне-варчавтне Азорот, эсеть Пазот”». 8Теде мейле Идемевсесь ветизе Иисусонь пек сэрей пандо пряс, ды невтинзе Тензэ мода лангонь весе мастортнэнь сынст сюпавчисэст ды мазычисэст, 9ды мерсь Тензэ: «Весе тень Тонеть максса, пульзязь сюкониндерят монень». 10Сестэ Иисус мерсь тензэ: «Оргодть Монь эйстэ, Сатана! Эдь сёрмадозь:
“Сюконякшнок Азоронтень, эсеть Пазонтень,
ды важодтькак ансяк Сонзэ туртов”».
11Сестэ Идемевсесь кадызе Иисусонь. Сеске Иисуснэнь састь ангелт ды кармасть Тензэ лездамо.
Иисус ушоды Галилеясо Эсь важодеманзо
12Зярдо Иисус марясь Нававтыця Иоаннонь пекстамо кудос озавтомадо, сестэ Сон тусь мекев Галилеяв. 13Сон уш эзь кадово Назаретс, тусь эрямо Капернаум ошов, кона ашти Галилеянь эрьке чиресэ, Завулон марто Нафталинь буетнень мода лангсо. 14Те истя теевсь вана мекс: эрявсь топавтовомс Исайя пазмарицянть ёвтавт валтнэнень:
15«Тон, Завулононь мастор, Нафталинь мастор,
кона ашти иневедев ки лангсо,
Иордан лей томбальксэнь мастор,
лия раськенсетненьгак Галилея!
16Тунь чоподасо эриця раськесь неи ине валдо.
Нетненень, конат эрить куломань чопода масторсо,
сияжды валдо».
17Се шкастонть саезь Иисус ушодсь пачтямо Эсь кулянзо: «Менельсэнть Инязорксчизэ сась малав. Секскак кадынк пежетенк!»
Васенце тонавтницятне
18Галилеянь эрьке чирева ютамсто Иисус несь кавто лелят-ялакст: Симононь, конанень мерить Петра, ды Андрей ялаксонзо. Сынь ульнесть калонь кундыцят ды кайсесть ведьс кундамопельть. 19Иисус мерсь тенст: «Адядо мартон – Мон тейтядызь ломанень кундсицякс». 20Сынь сеске кадызь кундамопелест ды тусть мартонзо. 21Седе тов ютамсто Иисус несь лия кавто лелят-ялакст: Зеведеень цёратнень Яковонь ды Иоаннонь. Сынь Зеведей тетяст марто венчсэ витильть-петильть калонь кундамопелест. Иисус сынсткак тердинзе. 22Сыньгак сеске кадызь венченть ды тетяст ды тусть Иисус марто.
Иисусонь важодемазо ломантненень
23Иисус якась весе Галилеяванть, тонавтсь синагогатнесэ, пачтясь ломантненень паро кулянть Менельсэнть Инязорксчидензэ, шумбралгавтсь эйсэст эрьва кодамо ормадо ды моцень арасьчиде. 24Иисусто кулясь срадсь весе Сирия ёнксонть келес. Кандтнесть-ветнесть Тензэ весе сэредицятнень, эрьва кодамо ормасо ды сэредемасо майсицятнень: апаро оймеялтсо колавтнэнь, кулсицятнень, катартнэнь. Иисус весень шумбралгавтнесь. 25Сонзэ мельга мольсть пек ламо ломанть Галилея ды Кемень ош ёндо, Ерусалимстэяк, Иудеястояк ды Иордан леенть томбальдеяк.
നിലവിൽ തിരഞ്ഞെടുത്തിരിക്കുന്നു:
Матвей 4: ОВ
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Библиянь ютавтомань институтось,
Хельсинки 2006
