မ︀တ︀်တ︀ႄး 5

တ︀ြႃးဢ︀ꩫ︀်ႈက︀ꩫ︀်ႛꩫ︀ိူဝ်ꩫ︀ွႆ︀ႈမ︀ႆ︀ႛ ꩡ︀ဝ်ႛယ︀ေꩬ︀ုꩭူဝ်း

1-2ꩡ︀ဝ်ႛယ︀ေꩬ︀ု ၸ︀ုင︀်က︀ူꩫ︀်းလ︀ူင︀်မ︀ႆ︀ႛꩭꩫ︀်က︀ီး က︀ꩫ︀်ႛꩫ︀ိူဝ်ꩫ︀ွႆ︀ႈမ︀ႆ︀ႛ ၵ︀ိုꩫ︀်ႛꩬ︀ီꩫ︀င︀်ႈဢ︀ူ။ တ︀ပ︀ေးꩡ︀ဝ်ႛၵ︀ဝ်က︀ေႃႇ မ︀ꩫ︀်းꩡ︀ဝ်ႛမ︀ႆ︀ႛမ︀ႃးꩫ︀င︀်ႈၵ︀ုမ︀်ႇက︀ꩫ︀်ႈက︀ီး မ︀ꩫ︀်းꩡ︀ဝ်ႛ ၵ︀ဝ်မ︀ႆ︀ႛ ꩬ︀ွꩫ︀်ꩬ︀င︀်ꩭႂ်ႛဢ︀ူ။

လ︀ွင︀်ႈမ︀ၢင︀်က︀လ︀ႃ

(လ︀ုက︀ႃ 6.20-23)

3မ︀ꩫ︀်းꩡ︀ဝ်ႛဝႃႈꩫ︀ႆ︀ႇ “က︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဝႃႈပ︀ိုင︀်ႈဢ︀ိင︀်ႈဢ︀ူꩫ︀ꩬ︀ီတ︀ွင︀်းꩫ︀ႆ︀ႇၵ︀ဝ် မ︀ၢင︀်က︀လ︀ႃယ︀င︀်းဢ︀ူ။

က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး မ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ꩡ︀ႃႇက︀ူꩫ︀်းၸ︀ꩫ︀်းဢ︀မ︀ႂ်းၵ︀ဝ်ꩫ︀မ︀်။

4က︀ူꩫ︀်းဢ︀ꩫ︀်ႈၵ︀ီၵ︀ုမ︀်ꩫ︀ႆ︀ႇၵ︀ဝ် မ︀ၢင︀်က︀လ︀ႃယ︀င︀်းဢ︀ူ။

ၵ︀ဝ်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛ တ︀ီလ︀ဝ်ꩭႂ်ႛꩫ︀မ︀်။

5က︀ူꩫ︀်းဢ︀ꩫ︀်ႈက︀ွမ︀်းꩫ︀ွမ︀်းꩫ︀ႆ︀ႇၵ︀ဝ် မ︀ၢင︀်က︀လ︀ႃယ︀င︀်းဢ︀ူ။

ၵ︀ဝ်ယ︀ႃႇ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛက︀တ︀ိꩭႂ်ႛဝႆ︀ႇꩫ︀ႆ︀ႇ တ︀ီꩫ︀ႆ︀ႛꩫ︀မ︀်။

6က︀ူꩫ︀်းဢ︀ꩫ︀်ႈဢ︀လ︀ၢင︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ဝႆ︀ႇꩡ︀ိက︀်ꩭူဝ်ꩫ︀ႆ︀ႇၵ︀ဝ် မ︀ၢင︀်က︀လ︀ႃယ︀င︀်းဢ︀ူ။

က︀ွပ︀်ႉပ︀ိူဝ်ႈဢ︀လ︀ၢင︀်းမ︀ꩫ︀်းꩡ︀ဝ်ႛမ︀ႆ︀ႛ ဝႆ︀ႇꩡ︀ိက︀်ꩭူဝ်ꩫ︀ႆ︀ႇꩬ︀ီ ဢ︀ꩫ︀်ႈၵ︀ဝ်ၵ︀ႂ်ႈပ︀ီꩫ︀်ႈꩫ︀ႆ︀ႇတ︀င︀်းမ︀ိူင︀်း မ︀ꩫ︀်းꩡ︀ဝ်ႛတ︀ီဢ︀ဝ်ႈပ︀ီꩫ︀်ႈꩭႂ်ႛꩫ︀မ︀်။

7က︀ူꩫ︀်းဢ︀ꩫ︀်ႈပ︀ိူꩫ︀်ႈမ︀ႆ︀ႛဢ︀ီꩫ︀ူႈꩫ︀ႆ︀ႇၵ︀ဝ် မ︀ၢင︀်က︀လ︀ႃယ︀င︀်းဢ︀ူ။

ၵ︀ဝ်မ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ တ︀ီဢ︀ီꩫ︀ူႈꩫ︀မ︀်။

8က︀ူꩫ︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩭၢက︀်ႉတ︀ေႇတ︀ေႇꩫ︀ႆ︀ႇၵ︀ဝ် မ︀ၢင︀်က︀လ︀ႃယ︀င︀်းဢ︀ူ။

ၵ︀ဝ်ယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ တ︀ီꩫ︀ႆ︀ႛꩭူပ︀်ႉꩭꩫ︀်ꩫ︀မ︀်။

9က︀ူꩫ︀်းဢ︀ꩫ︀်ႈပ︀ိူꩫ︀်ႈမ︀ႆ︀ႛ ဢ︀ဝ်ႈထုက︀်က︀ꩫ︀်ႈꩫ︀ီႈက︀ꩫ︀်ႈꩫ︀ႆ︀ႇၵ︀ဝ် မ︀ၢင︀်က︀လ︀ႃယ︀င︀်းဢ︀ူ။

ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ၵ︀ဝ်မ︀ႆ︀ႛ လ︀ုက︀်ႉမ︀ꩫ︀်းꩡ︀ဝ်ႛꩫ︀ꩬ︀ီ တ︀ီꩭွင︀်ႇꩫ︀မ︀်။

10က︀ူꩫ︀်းဢ︀ꩫ︀်ႈ လ︀ႆ︀ၢးပ︀ိူဝ်ႈထွမ︀်ၵ︀ၢမ︀်းၸ︀ြႃးပ︀ီꩫ︀်ႈꩡ︀ဝ်ႛꩬ︀ီ ပ︀ိူꩫ︀်ႈꩫ︀ိက︀်ႉꩬ︀ၢက︀်ႉꩫ︀ႆ︀ႇၵ︀ဝ် မ︀ၢင︀်က︀လ︀ႃယ︀င︀်းဢ︀ူ။

မ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ မ︀ိူင︀်းၵ︀ဝ်ꩫ︀မ︀်။

11လ︀ႆ︀ၢးပ︀ိူဝ်ႈꩬ︀ူပ︀ီꩫ︀်ႈတ︀ပ︀ေးက︀ဝ်ႈꩫ︀ႆ︀ႇꩬ︀ီ ꩬ︀ူမ︀ႆ︀ႛပ︀ိူꩫ︀်ႈꩫ︀ိက︀်ႉꩬ︀ၢက︀်ႉက︀ေးလ︀ေးင︀ႆ︀း ၵ︀ၢမ︀်းဢ︀ꩫ︀်ႈမ︀ဝ်ꩡ︀ႂ်ႈမ︀ဝ်ꩡ︀ီႈ တ︀ၢင︀်ဢ︀ပ︀ႅတ︀်ႉꩫ︀ႆ︀ႇၵ︀ဝ်ဝႃႈမ︀ႃးက︀ီး ꩬ︀ူမ︀ၢင︀်က︀လ︀ႃယ︀င︀်းဢ︀ူ။ 12မ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ꩬ︀ူးလ︀ူင︀်ꩡ︀ႃႇꩬ︀ူꩭႅမ︀်းဝႆ︀ႇယ︀ဝ်ႇꩰꩫ︀ႆ︀ႇꩬ︀ီ ꩭုမ︀်ꩡ︀ူမ︀်းက︀ꩫ︀်ႈတ︀ႃႉ။ ပ︀ရ︀ေႃးၸ︀ႅတ︀်ႉဢ︀ꩫ︀်ႈက︀ꩫ︀်ႛꩫ︀ႃႛꩬ︀ူꩫ︀ႆ︀ႇၵ︀ဝ်မ︀ႆ︀ႛက︀ေႃႇ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ꩫ︀ိက︀်ႉꩬ︀ၢက︀်ႉမ︀ႃးယ︀ဝ်ႇ။

လ︀ွင︀်ႈက︀ိူဝ်ႈꩫ︀ၵ︀ႃဢ︀ꩫ︀်ႈလ︀ႅင︀်း

(မ︀ႃက︀ု 9.50; လ︀ုက︀ႃ 14.34,35)

13ꩬ︀ူယ︀ႃႇ က︀ွꩫ︀်ႛက︀ိူဝ်ႈꩡ︀ႃႇၸ︀ꩫ︀်းက︀ူꩫ︀်းတ︀င︀်းမ︀ိူင︀်းꩫ︀က︀ꩫ︀်ႈꩫ︀မ︀်။ က︀ိူဝ်ႈꩫ︀ꩫ︀ႆ︀ႇ တ︀တ︀်ႉဢ︀ꩫ︀်ႈꩡ︀ိမ︀်းꩫ︀ႆ︀ႇꩭႆ︀ၢက︀ႃက︀ီး ဢ︀ဝ်ႈꩡ︀ိမ︀်းပ︀ွက︀်ႉမ︀ဝ်ꩫ︀ႆ︀ႇꩬ︀ီ ဢ︀ꩬ︀ုင︀်းက︀ꩬ︀င︀်က︀ေႃႇ ꩵ︀ႈယ︀င︀်းယ︀ဝ်ႇ။ င︀ႆ︀းက︀ီး ၵ︀ူꩫ︀်တ︀ၢင︀်းမ︀ႆ︀ႛပ︀ိုဝ်ၵ︀ွတ︀်ꩬ︀ီ ꩭၢင︀်းပ︀ိူꩫ︀်ႈယ︀ီပ︀်ပ︀ူꩫ︀်ႇက︀ႃꩫ︀ႆ︀ၢႈꩫ︀မ︀်။ 14ꩡ︀ႃႇလ︀ိူင︀်ႈ ꩬ︀ူယ︀ႃႇ ဢ︀ꩫ︀်ႈလ︀ႅင︀်းꩡ︀ႃႇမ︀ိူင︀်းက︀ၢင︀်ႈꩫ︀က︀ꩫ︀်ႈꩫ︀မ︀်။ ဝီင︀်းဢ︀ꩫ︀်ႈတ︀ေက︀ꩫ︀်ႛꩫ︀ိူဝ်ꩡ︀ိက︀်ꩫ︀ွႆ︀ႈဝႆ︀ႇမ︀ႆ︀ႛ ꩭိုဝ်လ︀ိုဝ်က︀ေႃႇလ︀ၢပ︀်ႉꩵ︀ႈꩫ︀ႆ︀ႛ။ 15က︀ွက︀်ၸ︀ႆ︀းမ︀ႆ︀ႛ ၸ︀ႆ︀းꩡ︀ပ︀်ꩬ︀ီ ၸ︀ႂ်က︀ေႃႇဢ︀ဝ်ႈꩡ︀ုက︀်ၸ︀ိူꩫ︀်ꩵ︀ႈꩭူမ︀်ႛဝႆ︀ႇ။ ꩭႂ်ႛပ︀ူဝ်းက︀ူꩫ︀်းꩭိူꩫ︀်းတ︀င︀်းမ︀ိူင︀်းမ︀ႆ︀ႛလ︀ႅင︀်းꩫ︀ႆ︀ႇ တ︀ီႈပ︀ိူꩫ︀်ႈꩡ︀ဝ်ႛမ︀ႆ︀ႛꩫ︀မ︀် တ︀ီဝႆ︀ႇꩫ︀ႆ︀ႇ။ 16ꩫ︀င︀်ꩫ︀ႆ︀ႇꩫ︀က︀ꩫ︀်ႈ ဢ︀ꩫ︀်ႈလ︀ႅင︀်းꩬ︀ူက︀ေႃႇ က︀ူꩫ︀်းတ︀င︀်းမ︀ိူင︀်းမ︀ႆ︀ႛ ဝႃႈꩭုင︀်ႈဢ︀ူ။ င︀ႆ︀းက︀ီးꩬ︀ိုင︀် လ︀ွင︀်ႈꩫ︀ီႈꩬ︀ူမ︀ႆ︀ႛ ပ︀ိူꩫ︀်ႈꩭꩫ︀်ꩬ︀ီ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛꩬ︀ူ ဢ︀ꩫ︀်ႈၵ︀ိင︀်းက︀ꩫ︀်ႛꩫ︀ိူဝ်က︀ၢင︀်ႈꩭၢဝ်မ︀ႆ︀ႛ ပ︀ိူꩫ︀်ႈတ︀ီယ︀ူဝ်းယ︀ွင︀်ႛက︀ꩫ︀်ႈꩫ︀မ︀်။

လ︀ွင︀်ႈꩬ︀ွꩫ︀်က︀ျမ︀်းꩬ︀ိꩫ︀်မ︀ေႃꩬ︀ေ

17က︀ဝ်ႈမ︀ႃးမ︀ိူင︀်းက︀ၢင︀်ႈꩫ︀ႆ︀ႇ ၵ︀ꩫ︀်တ︀ႂ်းမ︀ႃးယ︀ႃႇက︀ျမ︀်းꩬ︀ိꩫ︀်မ︀ေႃꩬ︀ေꩫ︀ၵ︀ႃ တ︀ြႃးပ︀ရ︀ေႃးၸ︀ႅတ︀်ႉꩫ︀ႆ︀ႇၵ︀ဝ်က︀ျႃး။ ꩵ︀ႈꩡ︀ႂ်ႈ ပ︀ိူင︀်ႈလ︀ူင︀်။ မ︀ဝ်ယ︀ႃႇꩬ︀ေႇမ︀ဝ်က︀ႃး ꩭႂ်ႛပ︀ူဝ်းဢ︀မ︀ႂ်းၵ︀ဝ်တ︀င︀်းမ︀ိူင︀်း ပ︀ီꩫ︀်ႈမ︀ႃးတ︀ေႇတ︀ေႇꩫ︀ႆ︀ႇꩬ︀ႃး က︀ဝ်ႈမ︀ႃးꩫ︀ႆ︀ႇ။ 18ထွမ︀်တ︀ႃႉ။ က︀ဝ်ႈဝႃႈက︀ွတ︀်။ က︀မ︀်ၸ︀ႃꩫ︀ၵ︀ႃ က︀ၢင︀်ႈꩭၢဝ်ပ︀ႅက︀်ႉက︀ႃꩫ︀က︀ေႃႇ ဢ︀ꩫ︀်ႈက︀ျမ︀်းꩬ︀ိꩫ︀်မ︀ေႃꩬ︀ေမ︀ႆ︀ႛဝႃႈဝႆ︀ႇꩫ︀ႆ︀ႇၵ︀ဝ်ယ︀ႃႇ က︀ူႈဢ︀ꩫ︀်ႈဝႃႈပ︀ီꩫ︀်ႈမ︀ႃးꩫ︀မ︀်။ က︀ႃႈဢ︀မ︀ႂ်းၵ︀ဝ်မ︀ဝ်ပ︀ီꩫ︀်ႈမ︀ႃးယ︀ႃႇ တ︀ူဝ်ႈလ︀ိက︀်ႉတ︀ူဝ်ႈလ︀ိူင︀်ႈ၊ ꩡ︀မ︀်ႛဢ︀ွꩫ︀် ဢ︀ꩫ︀်ႈလ︀ိူင︀်ႈꩫ︀ႆ︀ၢႈက︀ေႃႇ ꩵ︀ႈꩫ︀ႆ︀ႛꩭႆ︀ၢ။ 19င︀ႆ︀းꩫ︀ႆ︀ႇꩬ︀ီ က︀ူဝ်ႇဢ︀ꩫ︀်ႈက︀ျမ︀်းꩬ︀ိꩫ︀်မ︀ေႃꩬ︀ေမ︀ႆ︀ႛ ၵ︀ူဝ်ႛဢ︀ွꩫ︀်လ︀ိူင︀်ႈမ︀ႆ︀ႛꩫ︀ႆ︀ၢႈၸ︀ိတ︀်ꩫ︀က︀ေႃႇယ︀ႃ ၵ︀ူဝ်ႛဢ︀ွꩫ︀်ဢ︀မ︀ႂ်း ပ︀ိူꩫ︀်ႈမ︀ႆ︀ႛꩬ︀ွꩫ︀်ဢ︀ဝ်ႈၸ︀ိတ︀်ꩫ︀က︀ေႃႇယ︀ႃ က︀ူဝ်ႇဢ︀မ︀ႂ်းယ︀ႃႇ မ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ တ︀ီပ︀ီꩫ︀်ႈဢ︀ꩫ︀်ႈၵ︀ႅꩫ︀်းဢ︀ွꩫ︀်ꩫ︀မ︀်။ ꩫ︀ႆ︀ႇꩫ︀က︀ေႃႇ ၵ︀ူဝ်ႛတ︀ြႃးဢ︀မ︀ႂ်းၸ︀ူႛꩡ︀ဝ်ႛက︀ေႃႇထွမ︀်ꩡ︀ွမ︀်းꩬ︀ီ ꩭႂ်ႛပ︀ူဝ်းပ︀ိူꩫ︀်ႈꩡ︀ွမ︀်းက︀ေႃႇ ꩬ︀ွꩫ︀်ꩭႂ်ႛက︀ီး က︀ူဝ်ႇဢ︀မ︀ႂ်းယ︀ႃႇ မ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ တ︀ီပ︀ီꩫ︀်ႈၸ︀ူႛယ︀ႂ်ꩫ︀မ︀်။ 20ထွမ︀်တ︀ႃႉ။ က︀ဝ်ႈဝႃႈက︀ွတ︀်။ ဢ︀ꩫ︀်ႈꩬ︀ူ ꩡ︀ွမ︀်းဢ︀လ︀ၢင︀်းၸ︀ြႃးပ︀ီꩫ︀်ႈꩡ︀ဝ်ႛꩫ︀ႆ︀ႇ ꩬ︀ြႃတ︀ြႃးၵ︀ဝ်ꩫ︀ၵ︀ႃ ၸ︀ႃရ︀ိꩬ︀ႄၵ︀ဝ်မ︀ႆ︀ႛ ꩬ︀ႃက︀ီးꩬ︀ိုင︀် ꩬ︀ူတ︀ီꩫ︀ႆ︀ႛၵ︀ဝ်ႛမ︀ိူင︀်းၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်။

ဢ︀ꩬ︀ၢက︀်ႉက︀ူꩫ︀်းပ︀ီဢ︀ဝ်ႈတ︀ႆ︀ၢႈ

21က︀ျမ︀်းꩬ︀ိꩫ︀်မ︀ေႃꩬ︀ေမ︀ႆ︀ႛ “ဢ︀ꩬ︀ၢက︀်ႉက︀ူꩫ︀်းပ︀ီဢ︀ဝ်ႈတ︀ႆ︀ၢႈ။ ဢ︀ဝ်ႈတ︀ႆ︀ၢႈက︀ီး က︀ူဝ်ႇဢ︀မ︀ႂ်းမ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛတ︀ီပ︀ႅတ︀်ႉတ︀ြႃးꩫ︀မ︀်” ꩫ︀ꩬ︀ီ က︀ူꩫ︀်းမ︀ိူဝ်ႈꩫ︀ꩫ︀်ႇꩫ︀ႆ︀ႇၵ︀ဝ်မ︀ႆ︀ႛ ၸ︀ြႃးပ︀ီꩫ︀်ႈꩡ︀ဝ်ႛဝႃႈဝႆ︀ႇꩫ︀ႆ︀ႇ ꩬ︀ူꩫ︀ႆ︀ႛꩥ︀ိꩫ︀်းယ︀ဝ်ႇ။ 22ꩫ︀ႆ︀ႇꩫ︀က︀ေႃႇ က︀ဝ်ႈဝႃႈက︀ွတ︀်။ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ က︀ူဝ်ႇဢ︀ꩫ︀်ႈပ︀ီႈꩫ︀ွင︀်ႇၸ︀ူႛꩡ︀ဝ်ႛမ︀ႆ︀ႛ တ︀ေႃးꩬ︀ႃးꩫ︀ႆ︀ႇမ︀ႆ︀ႛꩫ︀ႆ︀ၢႈက︀ေႃႇ တ︀ီပ︀ႅတ︀်ႉတ︀ြႃးꩫ︀မ︀်။ က︀ူဝ်ႇဢ︀ꩫ︀်ႈပ︀ိူꩫ︀်ႈမ︀ႆ︀ႛ ပ︀ၢဝ်ꩰတ︀ူꩰꩫ︀ꩬ︀ီဝႃႈꩫ︀ႆ︀ႇမ︀ႆ︀ႛယ︀ႃႇ ၵ︀ႆ︀ႇမ︀ဝ်က︀ႃးယ︀ုင︀်းတ︀ြႃးမ︀ႆ︀ႛ တ︀ီပ︀ႅတ︀်ႉတ︀ြႃးꩫ︀မ︀်။ က︀ူဝ်ႇဢ︀ꩫ︀်ႈပ︀ိူꩫ︀်ႈမ︀ႆ︀ႛ တ︀ၢꩫ︀်ႛꩬ︀ယ︀ုက︀်ႉမ︀ႆ︀ႛယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛ တ︀ီပ︀ွႆ︀တ︀ူက︀်င︀ႃးလ︀ႆ︀ၢးꩫ︀မ︀်။ 23င︀ႆ︀းꩫ︀ႆ︀ႇꩬ︀ီ မ︀ိူဝ်ႈꩬ︀ူ ၵ︀ီင︀်ၵ︀ႅက︀်မ︀ႆ︀ႛ ၵ︀ွင︀်လ︀ူတ︀ၢင︀်ꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ တ︀ီပ︀ုက︀်ႉꩡ︀ူဝ်ꩫ︀ႆ︀ႇ က︀ူဝ်ႇဢ︀ꩫ︀်ႈꩬ︀ူမ︀ႆ︀ႛ ꩡ︀ႂ်ႈမ︀ဝ်ꩬ︀ိင︀်ႛမ︀ႆ︀ႛ ဢ︀ွက︀်ꩡ︀ႂ်ႈမ︀ႃးက︀ီး 24ၵ︀ွင︀်လ︀ူꩬ︀ူ ပ︀ၢင︀်ႈꩫ︀ႃႛၵ︀ီင︀်ၵ︀ႅက︀်မ︀ႆ︀ႛတ︀မ︀်းဝႆ︀ႇꩬ︀ီ ၵ︀တ︀်ႉၵ︀ႅင︀်းမ︀ꩫ︀်းမ︀ႆ︀ႛက︀ႃတ︀ႃႉ။ တ︀င︀်းမ︀ꩫ︀်းဢ︀ဝ်ႈထုက︀်က︀ꩫ︀်ႈပ︀ွက︀်ႉယ︀ဝ်ႇက︀ီးꩬ︀ိုင︀် ပ︀ွက︀်ႉမ︀ႃးꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ၵ︀ွင︀်လ︀ူꩬ︀ူ ပ︀ုက︀်ႉꩡ︀ူဝ်တ︀ႃႉ။ 25ꩬ︀င︀်ဝႃႈꩬ︀ူမ︀ႆ︀ႛ ပ︀ိူꩫ︀်ႈမ︀ႃးꩡ︀ွႆ︀းတ︀ြႃးက︀ီး မ︀ိူဝ်ႈꩵ︀ႈပ︀ႆ︀ထိုင︀်ယ︀ုင︀်းꩫ︀ႆ︀ႇ ꩭီတ︀်ဢ︀ၵ︀ႅက︀်ႉဢ︀ၵ︀ျႃꩬ︀ီ တ︀င︀်းမ︀ꩫ︀်းဢ︀ဝ်ႈꩫ︀ီႈက︀ꩫ︀်ႈပ︀ွက︀်ႉတ︀ႃႉ။ ယ︀ုင︀်းမ︀ႆ︀ႛထိုင︀်က︀ႃက︀ီး ꩬ︀ူမ︀ႆ︀ႛတ︀ီဢ︀ၢပ︀်ႉꩫ︀ႂ်းမ︀ိုဝ်းꩡ︀ဝ်ႛတ︀ြႃးꩫ︀မ︀်။ ꩡ︀ဝ်ႛတ︀ြႃးက︀ေႃႇ ꩬ︀ူမ︀ႆ︀ႛ ဢ︀ၢပ︀်ႉꩫ︀ႂ်းမ︀ိုဝ်းꩭၢꩫ︀်ၵ︀ဝ်ꩬ︀ီ တ︀ီꩬ︀ႂ်ထွင︀်ꩫ︀မ︀်။ 26က︀ဝ်ႈဝႃႈက︀ွတ︀်။ က︀ႃႈတ︀ၢမ︀်ဢ︀ပ︀ႅတ︀်ႉꩬ︀ႆ︀ၢႛမ︀ဝ်ယ︀ဝ်ႇယ︀ႃႇ ꩬ︀ူဝႃႈဢ︀ူꩫ︀ႂ်းထွင︀်မ︀ႆ︀ႛꩫ︀မ︀်။

မ︀ေးပ︀ိူꩫ︀်ႈမ︀ႆ︀ႛပ︀ီၸ︀ိတ︀်

27က︀ျမ︀်းꩬ︀ိꩫ︀်မ︀ေႃꩬ︀ေမ︀ႆ︀ႛ “မ︀ေးပ︀ိူꩫ︀်ႈမ︀ႆ︀ႛပ︀ီၸ︀ိတ︀်” ꩫ︀ꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛဝႃႈဝႆ︀ႇꩫ︀ႆ︀ႇ ꩬ︀ူတ︀ွင︀်းဢ︀ူ။ 28ꩫ︀ႆ︀ႇꩫ︀က︀ေႃႇ က︀ဝ်ႈဝႃႈက︀ွတ︀်။ ၸ︀ႂ်ꩫ︀က︀ေႃႇ ၸ︀ူႛယ︀ိင︀်းက︀ူဝ်ႇလ︀ိူင︀်ႈမ︀ႆ︀ႛꩫ︀ူႈꩬ︀ီ ꩭူဝ်ꩡ︀ႂ်ႈဢ︀ꩫ︀်ႈၵ︀ႂ်ႈၸ︀ိတ︀်ꩫ︀ႆ︀ႇ ဢ︀ွက︀်မ︀ႃးက︀ီး ꩫ︀ႂ်းꩡ︀ႂ်ႈမ︀ႆ︀ႛ တ︀င︀်းမ︀ေဢ︀မ︀ႂ်းၸ︀ိတ︀်ယ︀ဝ်ႇ။ 29လ︀ႆ︀ၢးပ︀ိူဝ်ႈꩭွေတ︀ႃႈပ︀ႃႛၵ︀ႃꩬ︀ူꩬ︀ီ ꩬ︀ူၸ︀ိတ︀်က︀ီး ꩭွေတ︀ႃႈဢ︀မ︀ႂ်း က︀ွက︀်ꩬ︀ီ ပ︀ိုဝ်ၵ︀ွတ︀်တ︀ႃႉ။ တ︀ႃႇတ︀င︀်းတ︀ူဝ်ႈက︀ုမ︀်ꩬ︀ီ တ︀ီတ︀ူက︀်င︀ႃးလ︀ႆ︀ၢးယ︀ႃႇ တ︀ႃႈပ︀ႃႛလ︀ိူင︀်ႈမ︀ဝ်ယ︀င︀်းꩬ︀ီဢ︀ူꩫ︀ႆ︀ႇၵ︀ႅꩫ︀်းꩫ︀ီႈဢ︀ူ။ 30ꩫ︀င︀်ꩫ︀ႆ︀ႇꩫ︀က︀ꩫ︀်ႈ လ︀ႆ︀ၢးပ︀ိူဝ်ႈမ︀ိုဝ်းပ︀ႃႛၵ︀ႃꩬ︀ူꩬ︀ီ ꩬ︀ူၸ︀ိတ︀်က︀ီး မ︀ိုဝ်းဢ︀မ︀ႂ်းတ︀ႅပ︀်ꩬ︀ီ ပ︀ိုဝ်ၵ︀ွတ︀်တ︀ႃႉ။ တ︀ႃႇတ︀င︀်းတ︀ူဝ်ႈက︀ုမ︀်ꩬ︀ီ တ︀ီတ︀ူက︀်င︀ႃးလ︀ႆ︀ၢးယ︀ႃႇ မ︀ိုဝ်းပ︀ႃႛလ︀ိူင︀်ႈꩭၢင︀်ႇꩬ︀ီဢ︀ူꩫ︀ႆ︀ႇ ၵ︀ႅꩫ︀်းꩫ︀ီႈဢ︀ူ။

ၸ︀ူဝ်မ︀ေးပ︀ီၸ︀ၢက︀်ႉက︀ꩫ︀်ႈ

(မ︀တ︀်တ︀ႄး 19.9; မ︀ႃက︀ု 10.11,12; လ︀ုက︀ႃ 16.18)

31ꩡ︀ႃႇလ︀ိူင︀်ႈ “က︀ူဝ်ႇဢ︀ꩫ︀်ႈမ︀ေးၸ︀ူႛꩡ︀ဝ်ႛမ︀ႆ︀ႛၸ︀ၢက︀်ႉꩫ︀ႆ︀ႇ ၸ︀ူႛယ︀ိင︀်းဢ︀မ︀ႂ်းမ︀ႆ︀ႛ လ︀ိက︀်ႉၸ︀ၢက︀်ႉက︀ꩫ︀်ႈ ဝႃႈꩭႂ်ႛꩫ︀မ︀်” ꩫ︀ꩬ︀ီ ꩬ︀ွꩫ︀်ဝႆ︀ႇꩫ︀ႆ︀ႇက︀ေႃႇယ︀င︀်းဢ︀ူ။ 32ꩫ︀ႆ︀ႇꩫ︀က︀ေႃႇ က︀ဝ်ႈဝႃႈက︀ွတ︀်။ ဢ︀ꩫ︀်ႈမ︀ေးၸ︀ူႛꩡ︀ဝ်ႛ ၸ︀ုꩫ︀်ႇꩬ︀ႅတ︀်ႉꩡ︀ႃက︀ႃꩫ︀ႆ︀ႇမ︀ႆ︀ႛလ︀ိူဝ်ꩬ︀ီ ꩵ︀ႈထုက︀်ၸ︀ၢက︀်ႉ။ ꩬ︀င︀်ဝႃႈ ၸ︀ၢက︀်ႉꩬ︀ီ ၸ︀ူႛယ︀ိင︀်းဢ︀မ︀ႂ်းက︀ေႃႇ ဢ︀ဝ်ႈၸ︀ူႛꩡ︀ႆ︀ၢးတ︀ၢင︀်က︀ူဝ်ႇက︀ီး ၸ︀ူႛၸ︀ူဝ်က︀ဝ်ဢ︀မ︀ႂ်းယ︀ႃႇဢ︀ꩫ︀်ႈၸ︀ူႛယ︀ိင︀်းဢ︀မ︀ႂ်းမ︀ႆ︀ႛ ꩭႂ်ႛၸ︀ိတ︀်က︀ႃမ︀ꩫ︀မ︀်။ ၸ︀ူႛꩡ︀ႆ︀ၢးဢ︀ꩫ︀်ႈဢ︀ဝ်ႈၸ︀ူႛယ︀ိင︀်းဢ︀မ︀ႂ်းက︀ေႃႇ ဢ︀ꩫ︀်ႈၸ︀ိတ︀်မ︀ေးပ︀ိူꩫ︀်ႈꩫ︀မ︀်” ꩫ︀ဝꩫ︀်ႇ။

ပ︀ီတ︀ိူင︀်

33ယ︀ဝ်ႇက︀ီး မ︀ꩫ︀်းꩡ︀ဝ်ႛက︀ၢပ︀်ꩬ︀ီဝႃႈꩫ︀ႆ︀ႇ “က︀တ︀ိꩬ︀ႅတ︀်ႉꩡ︀ႃပ︀ီၸ︀ေႛ။ ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ တ︀ိူင︀်ဝႆ︀ႇက︀ီး ꩫ︀င︀်ဢ︀ꩫ︀်ႈတ︀ိူင︀်ဝႆ︀ႇꩫ︀က︀ꩫ︀်ႈꩭီတ︀်တ︀ႃႉ” ꩫ︀ꩬ︀ီ ꩬ︀ွꩫ︀်ဝႆ︀ႇꩫ︀ႆ︀ႇမ︀ႆ︀ႛက︀ေႃႇ ꩬ︀ူꩫ︀ႆ︀ႛꩥ︀ိꩫ︀်းယ︀ဝ်ႇ။ 34ꩫ︀ႆ︀ႇꩫ︀က︀ေႃႇ က︀ဝ်ႈဝႃႈက︀ွတ︀်။ မ︀ိူဝ်ႈꩬ︀ူꩭႂ်ႛက︀တ︀ိꩫ︀ႆ︀ႇ ပ︀ီတ︀ိူင︀်ပ︀ိူင︀်ႈလ︀ူင︀်။ က︀ၢင︀်ႈꩭၢဝ်မ︀ႆ︀ႛက︀ေႃႇ ပ︀ီတ︀ိူင︀်။ က︀ၢင︀်ႈꩭၢဝ်ယ︀ႃႇ ပ︀လ︀ၢင︀်ၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်။ 35လ︀င︀်ꩫ︀ိꩫ︀်ႈမ︀ႆ︀ႛက︀ေႃႇ ပ︀ီတ︀ိူင︀်။ လ︀င︀်ꩫ︀ိꩫ︀်ႈယ︀ႃႇ တ︀ီႈတ︀မ︀်းတ︀ိꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀်။ ဝီင︀်းယ︀ေရ︀ုꩬ︀လ︀ိမ︀်မ︀ႆ︀ႛက︀ေႃႇ ပ︀ီတ︀ိူင︀်။ ဝီင︀်းဢ︀မ︀ႂ်းယ︀ႃႇ ဝီင︀်းၸ︀ြႃးပ︀ီꩫ︀်ႈꩡ︀ဝ်ႛ ၸ︀ူႛပ︀ီꩫ︀်ႈꩡ︀ဝ်ႛꩭူဝ်ၵ︀မ︀်းဢ︀ꩫ︀်ႈယ︀ႂ်မ︀ႅတ︀်ႉꩫ︀မ︀်။ 36ဢ︀ဝ်ႈက︀ုမ︀်ꩭူဝ်ၸ︀ူႛꩡ︀ဝ်ႛက︀ေႃႇ ပ︀ီတ︀ိူင︀်။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩬ︀ူယ︀ႃႇ ၵ︀ူꩫ︀်ꩭူဝ်ꩬ︀ူꩬ︀ီꩫ︀်ႛလ︀ိူင︀်ႈမ︀ႆ︀ႛꩫ︀ႆ︀ၢႈက︀ေႃႇ ဢ︀ဝ်ႈꩭွက︀်၊ ဢ︀ဝ်ႈꩫ︀မ︀်ႈꩵ︀ႈꩫ︀ႆ︀ႛ။ 37ꩡ︀ႂ်ႈက︀ီးꩡ︀ႂ်ႈဢ︀ူ။ မ︀ဝ်ꩡ︀ႂ်ႈက︀ီးꩵ︀ႈꩡ︀ႂ်ႈꩫ︀ꩫ︀ႆ︀ၢႈဝႃႈတ︀ႃႉ။ ဢ︀မ︀ႂ်းမ︀ႆ︀ႛလ︀ိူဝ်ꩬ︀ီဝႃႈက︀ီး ၵ︀ၢမ︀်းဢ︀မ︀ႂ်းယ︀ႃႇ ဢ︀ꩫ︀်ႈလ︀ုက︀်ႉၵ︀ုꩫ︀်ꩬ︀ူင︀်မ︀ႆ︀ႛမ︀ႃးꩫ︀မ︀်။

ပ︀ီတ︀ွပ︀်ꩬ︀ူꩫ︀်ႇက︀ꩫ︀်ႈ

(လ︀ုက︀ႃ 6.29,30)

38က︀ျမ︀်းꩬ︀ိꩫ︀်မ︀ေႃꩬ︀ေမ︀ႆ︀ႛ “ꩡ︀ႃႇၵ︀ိဝ်ႛက︀ီးဢ︀ဝ်ႈၵ︀ိဝ်ႛ၊ ꩡ︀ႃႇတ︀ႃႈက︀ီးဢ︀ဝ်ႈတ︀ႃႈ ဝႃႈꩬ︀ႆ︀ၢႛဢ︀ူ” ꩫ︀ꩬ︀ီ ꩬ︀ွꩫ︀်ဝႆ︀ႇꩫ︀ႆ︀ႇက︀ေႃႇ ꩬ︀ူꩫ︀ႆ︀ႛꩥ︀ိꩫ︀်းယ︀ဝ်ႇ။ 39ꩫ︀ႆ︀ႇꩫ︀က︀ေႃႇ က︀ဝ်ႈဝႃႈက︀ွတ︀်။ ꩬ︀ူမ︀ႆ︀ႛပ︀ိူꩫ︀်ႈၸ︀ိတ︀်မ︀ႃးက︀ီး ပ︀ီတ︀ွပ︀်ꩬ︀ူꩫ︀်ႇပ︀ွက︀်ႉ။ က︀ႅမ︀်ႛပ︀ႃႛၵ︀ႃꩬ︀ူမ︀ႆ︀ႛ ပ︀ိူꩫ︀်ႈတ︀ၢပ︀်က︀ီး က︀ႅမ︀်ႛပ︀ႃႛꩬ︀ႆ︀ၢႇက︀ေႃႇတ︀ုင︀်းဢ︀ိက︀်ꩭႂ်ႛတ︀ႃႉ။ 40ပ︀ိူꩫ︀်ႈၵ︀ႂ်ႈꩫ︀ႆ︀ႛꩬ︀ိူဝ်ႛꩬ︀ူꩬ︀ီ မ︀ႃးထိုင︀်တ︀ြႃးက︀ီး ꩬ︀ိူဝ်ႛလ︀ူင︀်က︀ေႃႇလ︀ွꩫ︀်ႛꩭႂ်ႛတ︀ႃႉ။ 41ꩬ︀ူမ︀ႆ︀ႛပ︀ိူꩫ︀်ႈတ︀ီက︀်ꩫ︀ိပ︀်ꩬ︀ီ ၵ︀ꩫ︀်မ︀ႅင︀်လ︀ိူင︀်ႈꩭႂ်ႛပ︀ၢက︀်ႉပ︀ူက︀်ႉၵ︀ိူင︀်ႈၵ︀ဝ်က︀ီး ꩬ︀ွင︀်မ︀ႅင︀်ပ︀ၢက︀်ႉက︀ႃꩭႂ်ႛတ︀ႃႉ။ 42က︀ူဝ်ႇဢ︀ꩫ︀်ႈယ︀ွꩫ︀်းမ︀ႆ︀ႛꩭႂ်ႛတ︀ႃႉ။ က︀ူဝ်ႇဢ︀ꩫ︀်ႈၵ︀ႂ်ႈက︀ူႛမ︀ႆ︀ႛက︀ေႃႇ က︀ူႛꩭႂ်ႛတ︀ႃႉ။

လ︀ꩫ︀်ꩬ︀ူမ︀ႆ︀ႛꩭၢက︀်ႉတ︀ႃႉ

(လ︀ုက︀ႃ 6.27,28,32-36)

43က︀ျမ︀်းꩬ︀ိꩫ︀်မ︀ေႃꩬ︀ေမ︀ႆ︀ႛ “ပ︀ီႈꩫ︀ွင︀်ႇမ︀ႆ︀ႛꩭၢက︀်ႉꩬ︀ီ လ︀ꩫ︀်ꩬ︀ူမ︀ႆ︀ႛꩡ︀င︀်းတ︀ႃႉ” ꩫ︀ꩬ︀ီ ꩬ︀ွꩫ︀်ဝႆ︀ႇꩫ︀ႆ︀ႇက︀ေႃႇ ꩬ︀ူꩫ︀ႆ︀ႛꩥ︀ိꩫ︀်းယ︀ဝ်ႇ။ 44ꩫ︀ႆ︀ႇꩫ︀က︀ေႃႇ က︀ဝ်ႈဝႃႈက︀ွတ︀်။ လ︀ꩫ︀်ꩬ︀ူမ︀ႆ︀ႛꩭၢက︀်ႉတ︀ႃႉ။ ꩬ︀ူမ︀ႆ︀ႛပ︀ိူꩫ︀်ႈꩫ︀ိက︀်ႉꩬ︀ၢက︀်ႉက︀ီး က︀ူဝ်ႇဢ︀မ︀ႂ်းမ︀ႆ︀ႛ ယ︀ွꩫ︀်းꩬ︀ူးꩭႂ်ႛတ︀ႃႉ။ 45င︀ႆ︀းက︀ီး ꩬ︀ူပ︀ီꩫ︀်ႈလ︀ုက︀်ႉပ︀ူဝ်ꩡ︀ဝ်ႛက︀ၢင︀်ႈꩭၢဝ်ꩬ︀ူဢ︀ူ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ပ︀ူဝ်ꩡ︀ဝ်ႛက︀ၢင︀်ႈꩭၢဝ်ယ︀ႃႇ က︀ူꩫ︀်းꩬ︀ိုဝ်ႈတ︀ူဝ် က︀ူꩫ︀်းꩭႆ︀ၢႇမ︀ဝ်ဝႃႈ တ︀င︀်းမ︀ိူင︀်းမ︀ႆ︀ႛ ၸ︀ူꩫ︀်ဢ︀ဝ်ႈတ︀ူက︀်ꩭႂ်ႛ၊ ၸ︀ႃႇဢ︀ဝ်ႈꩫ︀ႅတ︀်ꩭႂ်ႛꩬ︀ီꩫ︀မ︀်။ 46က︀ူဝ်ႇဢ︀ꩫ︀်ႈꩬ︀ူမ︀ႆ︀ႛꩭၢက︀်ႉမ︀ႆ︀ႛꩫ︀ႆ︀ၢႈꩬ︀ိုင︀် ꩬ︀ူꩭၢက︀်ႉက︀ီး ꩬ︀ူမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛ ဢ︀က︀ိဝ်းꩵ︀ႈပ︀ူင︀်ႈꩭႂ်ႛ။ တ︀ိူက︀်ႉၵ︀ႆ︀ႇꩫ︀ႆ︀ၢႈယ︀ႃႇ ၸ︀ူႛက︀ီပ︀်ၵ︀ွꩫ︀်ꩫ︀ႆ︀ႇၵ︀ဝ်ꩫ︀ႆ︀ၢႈက︀ေႃႇꩭီတ︀်ဢ︀ူ။ 47ꩡ︀ႃႇလ︀ိူင︀်ႈ ꩬ︀ူတ︀င︀်းပ︀ီႈꩫ︀ွင︀်ႇၸ︀ူႛꩡ︀ဝ်ႛꩫ︀ႆ︀ၢႈꩬ︀င︀် လ︀ွေႛက︀ꩫ︀်ႈက︀ီး က︀ꩬ︀င︀်က︀ေႃႇꩵ︀ႈလ︀ၢက︀်။ ꩭီတ︀်င︀ႆ︀းꩫ︀ႆ︀ၢႈယ︀ႃႇ က︀ူꩫ︀်ႈဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ မ︀ဝ်တ︀ွင︀်းꩫ︀ႆ︀ႇၵ︀ဝ်ꩫ︀ႆ︀ၢႈက︀ေႃႇꩭီတ︀်ဢ︀ူ။ 48င︀ႆ︀းꩫ︀ႆ︀ႇꩬ︀ီ ꩫ︀င︀်ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛꩬ︀ူ ꩫ︀ီႈမ︀ႅတ︀်ႉတ︀ီမ︀်ႈက︀ုမ︀်ꩫ︀က︀ꩫ︀်ႈ ꩬ︀ူက︀ေႃႇꩡ︀ႂ်ႈတ︀ီမ︀်ႈက︀ုမ︀်က︀ꩫ︀်ႈတ︀ႃႉ။

നിലവിൽ തിരഞ്ഞെടുത്തിരിക്കുന്നു:

မ︀တ︀်တ︀ႄး 5: kht

ഹൈലൈറ്റ് ചെയ്യുക

പങ്ക് വെക്കു

പകർത്തുക

നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക

Khamti Shan നെക്കുറിച്ച് കൂടുതലറിയുക

မ︀တ︀်တ︀ႄး 5

Popular Bible Verses from
မ︀တ︀်တ︀ႄး 5

കേൾക്കുക မ︀တ︀်တ︀ႄး 5

വേദപുസ്തകം:

Khamti

പതിപ്പ്: Khamti Shan - kht