Yohana 10

Eghetuubhaani ke moriishi omuhöriicho

1Yesu akëëndërëra ghosiikëra akabhugha, “Mahëënë ˆnekabhabhoorera, omooto wowoose uno ataaghusöha mo‑kehita ke mowaara o changʼöndu, amare n‑ahande aghusöhëra, uyo n‑omwibhi wiiki n‑erinyangara. 2Amare uno aghusöha gho kohetera mo‑kehita ke mowaara, uyo niwe omoriishi o changʼöndu. 3Omochongi o mowaara nahaamoshokorera ekehita na changʼöndu nchehooghu eriiraka reeche. Omoriishi nahaachebherekera changʼöndu cheeche kwo mariina ghaabho na ghochikangata ghuye anche. 4Aramara ghochehoroki anche changʼöndu cheeche choose, nahaachikangata ambërë, nacho chehamuntambana gho kubha ncheeche eriiraka reeche. 5Changʼöndu chetaaghotora komuntambana omughëni, amare nchekomungʼösa gho kubha cheteeche eriiraka reeche.” 6Yesu ꞉naabhabhooriire abhaato bhaare gho ghetuubhaani, amare ibho bhataamënyiri ghano are arabhabhoorera.

7Mbe, Yesu akabhabhoorera wiiki akabhugha, “Mahëënë ˆnekabhabhoorera, eni neeni ekehita ghe changʼöndu. 8Bhoose bhano ꞉bhaankangatiri kubha abhariishi bha changʼöndu, mbaare abhiibhi na amanyangara, amare changʼöndu chetabhatëghëëriire.#10:8 Yesu hano, nabhaghambiri abhakangati bhoose, bhano bhataaghotereera abhaato bha Ryobha, gho kobhakörëra amabhe, na ghwitabharera ebheghiro bhe kwibhönëra obhwëra. Mööhi Esekyeri 34:1–6. 9Eni neeni eghisëku kiyo. Wowoose uno aghusöha mo‑mowaara kohetera ghokoone naghotooribhu, wiiki naghusöha na kohoroka, na ghuye a‑keriisho. 10Omwibhi nahaacha a‑mowaara kubha ibhe changʼöndu, na ghochiita na ghochisari. Amare eni niichiri kubha bhabhe no obhuhöru, wiiki bhabhe nabho kwo bhwaru.

11“Eni n‑omoriishi omuhöriicho.#10:11 Mööhi Sabhuri 23. Omoriishi omuhöriicho nakobhoruusi obhuhöru bhooche gho ghiri e changʼöndu cheeche. 12Omooto uno akorehu taanyi omoriishi, wiiki changʼöndu taanyi cheeche. Aribha ararighi asuuche eraacha, nakungʼösa na ghotigha changʼöndu echeene chiri. Mbe, asuuche nehachighööta echimu, ne echende neghochisanchani. 13Omooto uyo nakungʼösa gho kubha, iwe n‑omooto o mareho, taaghochetereera changʼöndu chiyo.

14“Eni n‑omoriishi omuhöriicho. Necheeche bhoheene changʼöndu cheene, nacho nchenyeche, 15kinya bhuno Taata anyeche eni, na neeni nemweche. Na neeni nekobhoruusi obhuhöru bhoone, gho ghiri e changʼöndu cheene. 16Eni neenyi na changʼöndu echende chino chetaanyi che mo‑mowaara uno, choose nekwëndëru nechirëëtë. Changʼöndu chiyo choose nchekorimënya eriiraka reene. Gho nchëra iyo, ndeekubha erikinda rimu, no omoriishi umu.

17“Taata nansiighiri gho kubha nekoruusi obhuhöru bhoone, kubha neramara nebhwimoki wiiki. 18Taanyi‑ho omooto uno aghotora kuuhöka obhuhöru bhoone. Eni neenyi no obhotoro bho kobhoruusi obhuhöru bhoone, wiiki eni neenyi no obhotoro bho kobhwimoki wiiki obhuhöru bhoone. Hangʼu nibhu Taata ꞉andagheriiri ghuköra.”

19Hano bhooghwire amangʼana ghayo, Abhayahuuti bhakaheteerana wiiki mo‑maghamba. 20Abhaaru ghate yaabho bhakabhugha, “Uno naanyi no omusambu wiiki m‑mochuuru. Ghwake mokomutëghëërëra?” 21Amare abhande bhakahakaana bharabhugha, “Amangʼana ghayo ghataakoru mo‑mooto uno anyi no omusambu. Kana, omusambu noghotora ghughëri omohuku arighi?”

Abhaato bhaaru ˆbhakamwanga Yesu

22Mbe, rekahika eriibhagha re nyangi e Bhayahuuti re kohiita ghwighora Erisëngërö iyo Yerusareemu. Eriibhagha riyo ndeere re nyighita. 23Yesu naare araghënda mo‑riigho re Risëngërö, ahaghiro hano ꞉haare harabherekeru, Eriibhuru re Seremaani. 24Abhayahuuti abhamu bhakamwinaareri, bhakamobhoori bhakabhugha, “Kana, noghotunyaaki mo‑metema ghiito mbagha nyingake? Aribha iye niiye Kirisito, notobhoorere haheero.” 25Amare Yesu akabhagharokeri akabhugha, “Eni nimariri kobhabhoorera, amare inyu mokwanga ghonkumi. Ebhiraghe bhino neghuköra gho changuru che Taata, nibhyo bheghungambëra kubha eni n‑niwe. 26Amare mokwanga ghonkumi gho kubha inyu motaanyi changʼöndu cheene. 27Changʼöndu cheene nchehooghu eriiraka reene. Eni necheeche bhoheene, nacho cheghuntambana. 28Eni neghochiha obhuhöru bho miishe ghyose, koru chetaakobhora naabha. Wiiki taanyi‑ho omooto uno aghotora ghochisara koru mo‑mabhökö ghaane. 29Taata waane uno aheere changʼöndu chiyo m‑mokoro ghokera bhoose. Mbe, taanyi‑ho omooto uno aghotora ghochisara mo‑mabhökö ghaache. 30Eni na Taata m‑bhamu toonyi.”

31Mbe, Abhayahuuti abhamu hano bhooghwire ghayo, bhaghasëëma wiiki kwimoki amabhohe, kubha bhamurase na komwita Yesu. 32Amare iwe akabhabhoorera akabhugha, “Nëbhëërëkiri ebhiraghe bhyaru ebhichömu, bhino ꞉niiköriri gho changuru che Taata. N‑ngʼana ke mo‑ghayo ino eghughëri mwëndë kundasa na amabhohe?” 33Abhayahuuti bhaghagharokeri bhakabhugha, “Totaakwënda ghokurasa na amabhohe gho ghiri e ghuköra amachömu, amare n‑gho kubha nokwirëngʼaani ne Eryobha. Iye n‑omooto hangʼu, amare noghwiköri kubha Eryobha!” 34Yesu akabhagharokeri akabhugha, “Kana, tyandëkuru mo‑bhitabhu bheenyu bhe meghiro kubha Eryobha ꞉ndeebhughiri, ‘Inyu n‑emisambu?’#10:34 Mööhi Sabhuri 82:6. 35Ngaandëkuru mo‑Mandëkö Amatööbhiyu kubha abhaato bhano bhasongʼaaniri angʼana e Ryobha, Eryobha ꞉ndeebhaghambiri kubha n‑emisambu. Na niitu ntweche kubha ghano ghaandëkuru mo‑Mandëkö Amatööbhiyu m‑mahëënë chaasiko choose. 36Kana, ngwake mokobhugha eni neghwiköri Eryobha hano nekobhugha, ‘Eni n‑Omoona o Ryobha?’ Taata niwe anyahwire na ghontoma mo‑se. 37Aribha nteeghuköra emeremo ghe Taata ghino aghoghiköra, mbe, motankumi. 38Amare aribha neghuköra emeremo ghino Taata aghoghiköra, koru nangabha motaaghonkumi eni, moghekumi emeremo ghiyo. Gho nchëra iyo, niho mokumënya kubha Taata naanyi moose yaane, na neeni neenyi moose yaache.” 39Niho Abhayahuuti abhande hano bhooghwire ghayo, bhaghatabhara wiiki komughööta Yesu, amare akabhatabhaabhuka mo‑mabhökö ghaabho.

40Mbe, Yesu aghaye wiiki amwambuko e rooche ro Yorotaani, akahika hano Yohana are arabhatiisera abhaato hayo ekimbërë, aghiikara iyo chaasiko insuuhu. 41Abhaato bhaaru bhakamusëëta, bharabhugha, “Yohana taaköriri ekyërëkërëri koru kimu, amare amangʼana ghoose ghano Yohana ꞉asiikiire ighoro e Yesu ngaare gha hëënë.” 42Mbe, abhaato bhaaru bhano ꞉bhaare hayo bhakamokumi Yesu.

നിലവിൽ തിരഞ്ഞെടുത്തിരിക്കുന്നു:

Yohana 10: ntk

ഹൈലൈറ്റ് ചെയ്യുക

പങ്ക് വെക്കു

പകർത്തുക