Matyo 9
9
Yeso gli gho àglaba
(Mak 2:1-12; Luk 5:17-26)
1Afwɔ à sa ndada mpiʼ Yeso nyii efwɔ ekpe gɛ̀rɛ̀ kpɛ̀n ngɔɔ achim anjid angli ze, efwɔ abɛ mɔ. 2Bɔ deʼ zeʼe nè gho àglaba deʼ, me beʼe edɔm ekwaʼa. Èndzobo chɛ Yeso à zɔ ebɛrɛtaa yɛ angɔ à me le ngɛ, Yeso gâ ebe gho àglaba wɛ kpe, “Ŋwɔ ngu, klini etaa mfyɛ, e shi dzɛrɛ abwa bɔɔbɔɔ njɛ” 3Éngɛ bàtee atsɛrɛ deʼ sa ga àmɔ̀ àmɔ̀ kpe, “Egho wunɔ wa ndwàʼ Ngwe.” 4Yeso nɛɛ ebwa angɔ à ma zhuŋu ngɛ, gɛ̀rɛ̀ gà ebe angɔ kpe, “Mbɔn na zhuŋu abwa bɔɔbɔɔ kpe ayɛ? 5E we a me zamma, é ga kpe ‘E dzɛrɛ abwa bɔɔbɔɔ njɛ’ kà é ga kpe ‘Tam ekere zhiri?’ 6Mmɛ wa ngo tee endɔn apɛpɛ kpe Ŋwɔ Gho we le ekama a chwâ é dzɛrɛ abwa bɔɔbɔɔ.” Éngɛ engɔ ga ebe gho àglaba wɛ kpe, “Tam ekere, nu ekwaʼa ngwɛ gɛ̀rɛ̀ ngɔɔ a ndɔ” 7Egho wɛ tam ekere gɛ̀rɛ̀ ngɔɔ a ndɔ. 8Èndzobo chɛ abɔ byɛ â zɔ ebwa wɛ à gli ngɛ, èklɔ̀ bere angɔ e sa yɛrɛ zodo Ngwe ene m̀pè ekama yɛ e me ndɛʼ ebe bɔ ngɛ.
Yeso zɔʼ Matyo kpe è kìrì angbe
(Mak 2:13-17; Luk 5:27-32)
9Aŋu Yeso à nyɛrɛ afwɔ yɛ ma zhiri à ngɔ̀ɔ ngɛ, engɔ zɔ gho deʼ wɛ ekumu ngɔ à mwɔ Matyo ngɛ. Engɔ à na àshuru aŋwɛ me tsɔmɔ afwɔ afwɛʼ mɔ. Yeso gâ ebe engɔ kpe, “Kiri angu.” Matyo tam ekere gɛ̀rɛ̀ kìrì engɔ 10Aŋu Yeso à ma nde efwɔ ndɔ Matyo ngɛ, bàfɔ aŋwɛ tsɛrɛ akɛkɛ mane bɔ abwa bɔɔbɔɔ zeʼe sa nde nè Yeso mane bɔ bɛɛrɛ abwa mɔ. 11Èndzobo chɛ bɔ Farisii deʼ à zɔ ebwa wunɔ ngɛ, angɔ biiri ebe bɔ bɛɛrɛ abwa ngɔ kpe, “Àtee abwa ngɔn na nde nè bàfɔ aŋwɛ mane bɔ abwa bɔɔbɔɔ kpe ayɛ?” 12Yeso zo aŋu angɔ à ma ga ngɛ gɛ̀rɛ̀ gii kpe, “Abɔ byɛ e ne ma gwɔn bo ngɛ ke ma ke ǹgàkyè bo, bɛʼngɛ à tye angɔ byɛ e ma gwɔn ngɛ e ma ke ǹgàkyè. 13Ngɔɔ biiri nɛɛ ǹji ene ebwa wɛ aŋwɛʼrɛ Ngwe me ga kpe ‘Mmɛ na ke ma abɔ byɛ e ma le eklasɔn ngɛ ne mwɔ abɔ byɛ e ma ndɛ̀ʼ me etɔ̧ɔrɔ ene nyɛmɛrɛ ngɛ bo.’ ” Yeso zhiiri kpe, “Mmɛ à ke me zeʼe é zɔʼ bɔ ǹchwɔ̀ bo bɛʼngɛ mmɛ ne zeʼe é zeʼ bɔ bɔɔbɔɔ.”
Ebiiri mbɔʼ ǹchwɔ̀rɔ atsaʼra Ngwe
(Mak 2:18-22; Luk 5:33-39)
14Éngɛ bɔ bɛɛrɛ abwa Eyɔɔ Andɛʼndim zeʼe ebe Yeso gɛ̀rɛ̀ biiri kpe, “Ayɛ me le mbyɛɛ mane bɔ Farisii ma doʼ à tsɔmɔ ene chwɔ atsaʼra Ngwe bɛʼngɛ bɔ bɛɛrɛ abwa mbyɛ ne ma tsɔmɔ ene chwɔ atsaʼra Ngwe ekyɛ deʼ bo?” 15Yeso gíì kpe, “Ngwo we zhuŋu kpe àgɔn egho wɛ me le ebwa nu-aye ngɛ ba ngo tsɔmɔ ene chwɔ atsaʼra Ngwe èndzobo chɛ engɔ ma aŋu ngɛ? Keʼ nɔ! Bɛʼngɛ anji ye e ma ngo nu anɔmaye nyɛrɛ abwaʼ angɔ ngɛ, angɔ gɛrɛ shi sa tsɔmɔ ene chwɔ atsaʼra Ngwe. 16Tsɛ̀ʼ gho deʼ ma nu aparandi fe é ndee ǹdi sam anyi bo, enga aparandi fe ya de sa zɛɛrɛ, a ya ngo le ebla ǹdi sam wu klɔ ghɛʼ. 17Nkirinkin gho ke ma nu mɔm jù gɛ efwɔ agla sam yɛ e me ndeere ene gôb nyɛm ngɛ bo, enga engɔ ge engɛ̂, shi agla ya pɔ̀m, mɔm tu agla gɛrɛ bɔɔ. Ankɔmɔ éngɛ ge mɔm jù efwɔ agla fe, agla mane mɔm ya ngo me tsɔmɔ anchwɔnchwɔ.”
Yeso Zhwɛɛmɛ ŋwɔaye wɛ à shi ku ngɛ gɛ̀rɛ̀ gli aye aŋwan
(Mak 5:21-43; Luk 8:40-56)
18Aŋu Yeso à ma ga abwa zɔnɔ ngɛ, gho kɛ̀ bɔ Juu deʼ zeʼ ebe engɔ gunu etongu mɔ efàarà ngɔ ga kpe, “Ŋwɔaye ngu shi kwa à kuku, mmɛ bùʼ ebwo zeʼ tɛʼ ebwo mbyɛ ekwa ngɔ shi engɔ wa zhwɛmɛ” 19Éngɛ Yeso tam ekere gɛ̀rɛ̀ kìrì engɔ. Bɔ bɛɛrɛ abwa ngɔ à gɛrɛ ngɔɔ nè engɔ. 20Sa klikɔ̀ʼ aye deʼ wɛ à shi zɔ ǹgoʼ ene eta wɛ à ma kla ekwa ngɔ ghɛʼ efwɔ enɔ̂m wum ǹchwɔ̀ fyee ngɛ zeʼ ekuchim Yeso, gɛ̀rɛ̀ mɔ̀mɔ̀ adzɔ ǹdi ngɔ 21mbɔʼnga engɔ à ga efwɔ etaa mɔ kpe, “Mala mmɛ mɔmɔ tyetye ǹdi ngɔ, shi mmɛ wa bwada” 22Yeso ghɛɛbɛ amɔ, zɔ ngɔ, gɛ̀rɛ̀ ga kpe, “Ŋwɔaye ngu, klini etaa! Ebɛrɛtaa njɛ shi le ngwo bwada.” Ekyɛ ŋwaʼ ekwa aye wɛ bwada 23Èndzobo chɛ, Yeso ngɔ̀ɔ a ndɔ gho kɛ̀ wɛ gɛ̀rɛ̀ zɔ abɔ byɛ à ma kwɔrɔ atsa ewu mane ebaŋagho wɛ à me koo akwâ ene agamma ngɛ, 24Yeso gɛrɛ ga kpe, “Bɔ gimkpaʼ ngɔɔ ese! Aŋwɔ wɛ ke shi ku bo, è na bwɛrɛbwɛrɛ!” Éngɛ angɔ bɔ gimkpaʼ klada sa tsɔʼɔ Yeso. 25Aŋu à saa bɔ gimkpaʼ ese ngɛ, Yeso gɛrɛ nyii efwɔ atwɔndɔ ŋwɔaye wɛ, klini abwo ngɔ, engɔ gɛrɛ tam ekere. 26Ekɔn mbɔʼ ebwa wunɔ sɛ̂ʼ efwɔ abɛɛ abɛ yɛ gimkpaʼ.
Yeso le bàfò aghɔɔ fyee e sa zɔ akwâ
27Yeso nyɛrɛ afwɔ yɛ, aŋu engɔ à gɛrɛ ma zhiri à ngɔ̀ɔ ngɛ, bàfò aghɔɔ deʼ èfyee klada sa kìrì engɔ. Angɔ flaba ga kpe, “Ŋwɔ Devid le eklasɔn ene mbyɛɛ” 28Èndzobo chɛ Yeso à nyii efwɔ ndɔ ngɛ, bàfò aghɔɔ fyee byɛ zeʼe ebe engɔ, engɔ gɛrɛ biiri ebe angɔ kpe, “Mbɔn be le ebɛrɛ kpe mmɛ we né gli angɔn?” Angɔ gii kpe, “Ɔ̧̀ɔɔ Masakɛ!” 29Éngɛ Yeso mɔmɔ aghɔɔ angɔ ga kpe, “Shi e gli éngɛ nkirinkin aŋu mbɔn me bɛrɛ ngɛ!” 30Angɔ wu klada sa zɔ akwâ. Yeso gbeʼre eto angɔ ekama ga kpe, “Mbɔn ke ga ebwa wunɔ ebe gho deʼ bo!” 31Bɛʼngɛ angɔ à nyɛrɛ gɛ̀rɛ̀ sɛ̀ʼ ekɔn wunɔ mbɔʼ Yeso nɔ efwɔ akwâ gimkpaʼ efwɔ abɛɛ abɛ yɛ.
Yeso le eganyì deʼ è sa ga
32Aŋu anɔm byɛ à shi ngɔɔ ngɛ, bɔ deʼ nu gho deʼ zeʼe ebe Yeso. Egho wɛ à ke me né ga bo mbɔʼnga à me le azhwɛɛrɛ bɔɔbɔɔ. 33Yeso fli azhwɛɛrɛ bɔɔbɔɔ saa ese, egho wɛ gɛrɛ klada sa ga. Ebaŋabɔ à kɔ̂n ma ga kpe, “oh mbyɛɛ de ke shi zɔ m̀pè ebwa zɔnɔ efwɔ chwâ Israel ekyɛ deʼ bo” 34Bɛʼngɛ bɔ Farisii ga kpe, “Na m̀fɔ̀ ezhwɛɛrɛ bɔɔbɔɔ à me ndɛʼɛ ekama ebe Yeso é fli ezhwɛɛrɛ bɔɔbɔɔ saa ese.”
Yeso le eklasɔn ene bɔ
35Yeso à kɛɛrɛ sɔ ma zhiri à gamma ebe bɔ efwɔ entiri abɛ kɛkɛ mane efwɔ ebɛ kparakpara. Engɔ à tee abwa efwɔ ndɔrɔ tsaʼra Ngwe bɔ Juu, sɛ̀ɛrɛ̀ ekɔn ǹchwɔ̀ mbɔʼ ebwa m̀fɔ̀ Ngwe. Engɔ à gɛrɛ gli bɔ ene m̀pèrè eŋwan gimkpaʼ mane engɔ byɛ e mwɔ ene nyɛm ekwa ngɛ. 36Aŋu engɔ à zɔ enɔrɔ bɔ ngɛ, etaa ngɔ shwe ene eklasɔn ene angɔ, mbɔʼnga angɔ à ne efwɔ enyii ketsɛʼ ǹkpède na ǹglɔ̀rɔ̀ ketsɛʼ ǹkɔʼ nɔ 37Éngɛ engɔ ga ebe bɔ bɛɛrɛ abwa mɔ kpe, “Eku dza be ghɛʼ, bɛʼngɛ bɔ afwɛʼ be kpɛɛ. 38Éngɛ tsaʼra Ngwe, engɔ yɛ mwɔ Masakɛ ene eku dza bɔnɔ ngɛ kpe engɔ saa bɔ afwɛʼ shi é dza ela ngɔ.”
നിലവിൽ തിരഞ്ഞെടുത്തിരിക്കുന്നു:
Matyo 9: nbt
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2022, CABTAL
