Luk 23

E nu Yeso zeʼe ebe Paylet

(Mat 26:59-66; Mak 14:55-64; Eyɔ 18:19-24)

23 1Ǹtìmi gimkpaʼ à tam ekere è nu Yeso zeʼ ebe Paylet, 2klada sa ge abwa andɔɔ enji engɔ kpe; “Mbyɛɛ à bere egho wunɔ è ma tsɔŋɔ eto bɔ bɔ, mà ga ebe angɔ kpe angɔ ka aŋwɛ ebe Kaasa nɛrɛ, gɛ̀rɛ̀ ma ga kpe mbè mɔmbwo na Ǹtɔmzhwaʼa gɛ̀rɛ̀ mwɔ m̀fɔ̀.” 3Paylet biiri ebe engɔ kpe, “Ngwo na m̀fɔ̀ bɔ Juu?” Yeso gíì kpe, “Aŋu ngwo ga ngɛ” 4Éngɛ Paylet ga ebe m̀fɔ̀rɔ̀ zhiri mane ebaŋabɔ wɛ kpe, “Mmɛ ke zɔ ǹji deʼ é zhudu egho wunɔ bo”. 5Bɛʼngɛ angɔ twaʼra amɔ ene ekama kpe, “Abwa yɛ engɔ ma tee ngɛ ya ngo tsɔŋɔ eto bɔ gimkpaʼ a Judeya. Engɔ à klada a Galilii, è wu è shi anɔ a Jerusalɛm.”

E sàa Yeso ebe Hɛrɔd

6Èndzobo chɛ Paylet à zo ebwa wunɔ ngɛ, è biiri kpe, “Egho wunɔ na gho Galilii?” 7Èndzobo chɛ engɔ à nɛ̀ɛ kpe Yeso ne zeʼ efwɔ abɛɛ abɛ enji Hɛrɔd ngɛ, engɔ sàa Yeso ebe Hɛrɔd wɛ à mwɔ a Jerusalɛm èndzobo chɛ ngɛ. 8Hɛrɔd à ne gɛnɛ amɔ é zɔ Yeso mbɔʼnga engɔ à shi tsoro mà zo mbɔʼ Yeso gɛ̀rɛ̀ mà ke é zɔ engɔ bli egha tsɛrɛ, mà zhùŋù à kɔ̀ʼ kpe Yeso wa ngo le ebwa zodo zodo deʼ. 9Éngɛ Hɛrɔd biiri abwa akɛkɛ ebe Yeso, bɛʼngɛ è ne pana bo. 10M̀fɔ̀rɔ̀ zhiri mane bàtee atsɛrɛ gli tamma embè è gè abwa akɛkɛ enji Yeso. 11Hɛrɔd mane bɔ ebiri mɔ sèrè Yeso lè engɔ shi na ala bli deʼ nɔ, éngɛ e nɔɔ engɔ ene ǹdi m̀fɔ̀, è wu sàa engɔ ebe Paylet. 12Anji ŋwaʼ yɛ Paylet mane Hɛrɔd bara asɔrɔ na aŋu angɔ à me dye mwɔ bɔ m̀pɛ̀ʼ ngɛ.

E nu etsɛrɛ kpe Yeso ku

(Mat 26:59-66; Mak 14:55-64; Eyɔ 18:19-24)

13Paylet à zɔʼ m̀fɔ̀rɔ̀ zhiri, eto mane bɔ 14è ga ebe angɔ kpe, “Mbɔn a nu egho wunɔ zeʼ ena kpe è wa tsɔŋɔ eto bɔ, enjitsɔ mmɛ shi wee ebwa mɔmbwo efàarà ndzɔn, mmɛ ke zɔ ebwa deʼ wɛ engɔ me go ene abwa yɛ mbɔn me ge enji engɔ ngɛ bo. 15Hɛrɔd à gɛrɛ ke zɔ engɔ me go ebwa deʼ bo, mbɔʼnga engɔ à wu sàa engɔ achim ebe bɔ kpe, ‘Egho wunɔ ke le ebwa bɔɔbɔɔ deʼ tyè e zhudu engɔ bo.’ 16Éngɛ mmɛ wa ngo wuru engɔ gɛ̀rɛ̀ sàa engɔ.” À na de shi anji antara fɔɔ ekere gimkpaʼ Paylet ma pwèerè ghodzɔm ŋwaʼ egha angɔ. 17#23:17 Eŋwɛʼrɛ sam deʼ ke ge mpweʼe 17 bo. 18Ebaŋabɔ gimkpaʼ flaba ga eghɛʼ kpe, “Zhudu engɔ! Pweere Barabas, sàa engɔ endyɛɛ” 19A ne ge Barabas a ndɔdzɔm mbɔʼnga engɔ à ti m̀bùʼ efwɔ abɛ gɛ̀rɛ̀ zhudu gho efwɔ antiri abɛ yɛ. 20Paylet à na ke pwèerè Yeso sàa, éngɛ engɔ wu buʼ ebwo ebe ebaŋabɔ. 21Bɛʼngɛ angɔ wu flàbà ga kpe, “Kɔmɔ engɔ! Kɔmɔ engɔ!” 22Paylet wu ga ebe angɔ akyɛ nùrù tɛd kpe, “Bɛʼngɛ ne ebwa bɔɔbɔɔ we engɔ me le? Mmɛ ke zɔ ebwa deʼ wɛ engɔ me le tyè e zhudu engɔ ngɛ bo! Mmɛ wa ngo wuru engɔ pwèere engɔ sàa.” 23Bɛʼngɛ angɔ fɔɔ embè ma flaba eghɛʼghɛʼ kpe e kɔmmɔ Yeso, éngɛ è ngudu zo ebe angɔ. 24Éngɛ Paylet tsɛrɛ esɛʼ ato Yeso aŋu angɔ à ma ke ngɛ. 25Engɔ à pweere egho wɛ angɔ me ke ngɛ, engɔ wɛ â me ge a dzɔm mbɔʼ m̀bùʼ mane aŋu à zhudu gho ngɛ. Engɔ gɛrɛ ndɛʼ Yeso ebe angɔ kpe e le aŋu angɔ me doʼo ngɛ.

E kɔmmɔ Yeso

(Mat 27:32-44; Mak 15:21-32; Eyɔ 19:17-27)

26Bɔ ebiri à gbèe Yeso nyɛrɛ aŋu. Aŋu â ma ngɔɔ ngɛ, angɔ sɔ nè gho Sirɛn deʼ wɛ ekumu ngɔ à ma Shimun, wɛ à me zeʼ efwɔ abɛ Sirɛn ma nyii efwɔ abɛ ngɛ. Angɔ tiri engɔ ndɛ̀ʼ azɔd baʼra yɛ ebe engɔ kpe è beʼ è kìrì Yeso. 27Ebaŋabɔ kɛ́ à ne tyɛ enɔrɔ achim engɔ, âye deʼ â na abwaʼ angɔ byɛ â ma zhiri à ku̧u gɛ̀rɛ̀ ma zɔŋɔrɔ mbɔʼ engɔ ngɛ. 28Yeso ghɛɛbɛ amɔ ga ebe angɔ kpe, “Âye Jerusalɛm! Mbɔn ke ku̧u angu bo, bɛʼngɛ mbɔn ku̧u eto mbɔn mane bwɔ mbɔn 29Enji ba zeʼ byɛ bɔ ma sa ga kpe, ‘Ǹchwɔ̀ na âye byɛ â ne le bwɔ bo ngɛ, âye byɛ â de ne le ebûm bo ngɛ mane angɔ byɛ â ne ndɛʼ eban ebe bwɔ bo ngɛ.’ 30Ezɔnɔ yà mwɔ èndzobo chɛ bɔ ma ngo ga ebe agu kɛ́ kpe ‘Chwaʼ tù akwa njɛɛ’ gɛ̀rɛ̀ ga ebe agu kpara kpe ‘kooro angbɛɛ!’ 31Mala e me né fwɛʼ m̀pèrè abwa tsɔnɔ ekwa azɔd ju, e yà shi mwɔ ene endzobo e shi zɔmɔ ngɛ?” 32Â gɛrɛ ne bwɛ anɔm tsɛrɛ fyee byɛ â mwɔ bɔ dzɔm ngɛ é zhudu nè Yeso. 33Èndzobo chɛ angɔ à bwɛn ene afwɔ deʼ yɛ â ma zɔʼrɔ kpe, “Akɔʼato” ngɛ angɔ à kɔmmɔ Yeso aŋu mane àjii fyee byɛ, ebi abɛɛ abwo ande, êwè abɛɛ abwo mɔ̀. 34Yeso ga kpe, “Àtɛ, dzɛrɛ abwa bɔɔbɔɔ angɔ mbɔʼnga angɔ ke nɛɛ ebwa wɛ e ma le ngɛ bo.” Angɔ à ndwa antsántsá é gɛ̀bbɛ̀ ǹdi Yeso abwaʼ amɔ. 35Bɔ â ne tamma aŋu ma kede aŋu eto ebe ebɛbɔ à ma sèrè à tsɔʼɔ Yeso ngɛ. Â na ga kpe, “Engɔ à pwèere abɔ tsɛrɛ, è gɛrɛ pwèerè amɔ enjitsɔ mala engɔ mwɔ Ǹtɔmzhwaʼa yɛ Ngwe à shi chi ngɛ!” 36Bɔ ebiri â gɛrɛ sèrè tsɔʼɔ engɔ. Angɔ à kwaʼ ngɔɔ ebe engɔ gɛ̀rɛ̀ ndɛ̀ʼ atwa mɔm ebe engɔ 37ga kpe, “Mala ngwo mwɔ m̀fɔ̀ bɔ Juu ngwo pwèerè awɛ!” 38Â ne ŋwɛʼrɛ kɔmɔ ene azɔd baʼra yɛ edɔm ato engɔ ngɛ kpe, “Ewùnɔ na m̀fɔ̀ bɔ Juu.” 39Egho dzɔm bi wɛ â me kɔmmɔ engɔ nè Yeso ngɛ gɛrɛ sa sèrè à tsɔʼɔ engɔ ga kpe, “Ngwo ke ma Ǹtɔmzhwaʼa bo? Pweere awɛ gɛ̀rɛ̀ pwèerè angbɛɛ ba.” 40Egho dzɔm wè bwe ebe engɔ gà kpe, “Ngwo ke ma bumu Ngwe bo? Ngwo we le m̀pè enyii ŋwaʼ nè engɔ. 41Ebɔ enyii ye koʼro mbɔʼnga ntsɔ na nu ma ala yɛ ntsɔ me koʼro é nu ene ebwa wɛ ntsɔ à fwɛʼ ngɛ, bɛʼngɛ engɔ ke go ebwa deʼ bo.” 42Engɔ shi gà ebe Yeso kpe, “Yeso endzobo ngwo ma mwɔ efwɔ ebwa m̀fɔ̀ ngwɛ ngɛ, zhuŋu angu!” 43Yeso ga ebe engɔ kpe, “Éŋwaʼa mmɛ tɔ̧̀ɔrɔ awɛ ànchwɔ̀ kpe ngwo wa ngo mwɔ nè mmɛ à Paradays.”

Aŋu Yeso à ku ngɛ

(Mat 27:45-56; Mak 15:33-41; Eyɔ 19:28-30)

44Â ne na enyɔ̀m wum ǹchwɔ̀ fyee nɔ, akwâ à kwaʼ di efwɔ abɛ gimkpaʼ bwɛ̀n ene enyɔ̀m tɛd nchi. 45Etaranchwe kwaʼ di. Ǹdi yɛ à mwɔ efwɔ ndɔngwe kɛ̀ ngɛ san ebɛɛ fyee. 46Yeso kù̧u ekamakama gà kpe, “Àtɛ! Mmɛ ge azhwɛɛrɛ ndza eblabwo njɛ.” Engɔ nɔ ga énde ngɛ, gɛ̀rɛ̀ ku. 47Èndzobo chɛ ato ebe eko bɔ ebiri â zɔ ebwa wɛ à gli ngɛ, à ghɔ Ngwe ga kpe, “Éŋwaʼaŋwâʼ egho wunɔ à ke go ebwa deʼ bo.” 48Èndzobo chɛ ebaŋabɔ â ma ke zɔ, â zɔ ebwa wɛ â ma fɔɔ ngɛ, bɛʼngɛ aŋu bɔ gimkpaʼ â zɔ ebwa wɛ à gli ngɛ, angɔ à klo ma zhiri à jù. 49Asɔrɔ ngɔ gimkpaʼ mane âye byɛ â kiri engɔ nyɛ̀rɛ̀ zeʼ a Galilii ngɛ tamma abɛɛ tsɛrɛ mà kede abwa yɛ.

Aŋu â kpa Yeso ngɛ

(Mat 27:57-61; Mak 15:42-47; Eyɔ 19:38-42)

50Gho nchwɔnchwɔ deʼ wɛ à ma le abwa yɛ a me koʼro efàarà Ngwe ngɛ à na aŋu, ekumu ngɔ ma Yɔsɛf. Engɔ à na àsɛʼ abwa efwɔ ndɔ m̀pàrà bɔ Juu. 51Engɔ à ke me bɛrɛ nè bàsɛʼ abwa abê kpe é zhudu Yeso bo. Engɔ à na gho Juu me zeʼ efwɔ abɛ Arimatya ma kɔʼ ebwa m̀fɔ̀ Ngwe. 52Yɔsɛf wunɔ à ngɔ̀ɔ ebe Paylet è biiri akudugho Yeso. 53Engɔ à chwee akudugho yɛ ena azɔd baʼra, furu efwɔ ǹdi, è ge efwɔ eshe deʼ yɛ à me twe efwɔ ekob ngɛ. Gho deʼ à ke shi gli eshe zɔnɔ endzobo deʼ bo. 54À ne endzobo afwɛʼ, anji ku̧ru bɔ Juu ma zamma klada. 55Âye byɛ â kiri engɔ nyɛrɛ zèʼ a Galilii nè Yɔsɛf ma zeʼ achim é zɔ atoshe yɛ gɛ̀rɛ̀ zɔ na aŋu â shi akudugho ngɔ ngɛ. 56Éngɛ angɔ à klo ndèerè ngud mbì ǹchwɔ̀ mane enklila. À shi anji ku̧ru bɔ Juu angɔ ku̧ru aŋu etsɛrɛ à me tee ngɛ.

നിലവിൽ തിരഞ്ഞെടുത്തിരിക്കുന്നു:

Luk 23: nbt

ഹൈലൈറ്റ് ചെയ്യുക

പങ്ക് വെക്കു

പകർത്തുക