Luk 21

Etɔ̧ɔrɔ yɛ eyeti deʼ à ndɛʼ ngɛ

(Mak 12:41-44)

1Aŋu Yeso à mwɔ efwɔ ndɔngwe kɛ̀ ngɛ, è zɔ na aŋu bɔ àfɔ̀n â ma gè etɔ̧ɔrɔ amɔ efwɔ ala etɔ̧ɔrɔ Ngwe ngɛ. 2Engɔ gɛrɛ zɔ na aŋu eyeti ndzaŋa deʼ à ngɔɔ gè enini fyee efwɔ aŋu. 3Éngɛ Yeso ga kpe, “Mmɛ ga éŋwaʼa endɔn kpe eyeti ndzaŋa wunɔ we ge etɔ̧ɔrɔ fɔɔ bɔ gimkpaʼ. 4Abɔ bɔnɔ gimkpaʼ â ndɛʼ etɔ̧ɔrɔ yɛ angɔ me chidi zeʼ efwɔ àfɔ̀n amɔ ngɛ, bɛʼngɛ eyeti wunɔ, ene ndzaŋa yɛ è mwɔ ekwa engɔ ngɛ, engɔ ndɛʼ ala gimkpaʼ yɛ engɔ a me le é tsɔmɔ anyi ngɛ.”

Yeso ga mbɔʼ aŋu é ma ngo tsɔŋɔ ndɔngwe kɛ́ ngɛ

(Mat 24:1, 2; Mak 13:1, 2)

5Éngɛ bɔ bɛɛrɛ abwa ngɔ adeʼ â na ga mbɔʼ ndɔngwe kɛ̀ na aŋu e me ndèerè ene atye yɛ a me nara gɛrɛ ma ga na aŋu e me ndèerè eku byɛ bɔ ma tɔ̧ɔrɔ Ngwe anyi ngɛ. Yeso ga kpe, 6“Ela bɔnɔ gimkpaʼ mbɔn ma zɔ nɔ, endzobo ya zeʼe wɛ ka me etye ŋwaʼ nɔ, yà ne me tsɔmɔ ene afwɔ mɔ bo. E yà bɛʼɛ eŋwàʼ ŋwaʼ abwaʼ angɔ ndwa a chwâ.”

Ǹgoʼ mane enyii

(Mat 24:3-14; Mak 13:3-13)

7Éngɛ angɔ biiri kpe, “Àtee abwa, e yà mwɔ énde ngɛ endzobo tse? Na anɛ̂ ebwa ze a ma ngo gli é tee kpe endzobo a shi zeʼ tyetye abwa zɔnɔ sa nu afwɔ ngà?” 8Éngɛ Yeso ga kpe, “Mbɔn nu azɔm, mbɔn ke le kpe eto mbɔn sam bo. Bɔ akɛkɛ yà zeʼ ma tee kpe mbɔɔ na ga ene ekumu ngu, e ba ngo zeʼ gɛ̀rɛ̀ ma ndooro angɔn kpe gho ŋwàʼaŋwàʼ abwaʼ angɔ na Ǹtɔmzhwaʼa, gɛrɛ ma ga kpe anji yɛ shi zeʼ, bɛʼngɛ mbɔn ka angɔ kiri.”

9Mbɔn ke sa bumu aŋu mbɔn ma ngo zo mbɔʼ ebiri mane abwa bɔɔbɔɔ yɛ à ma ngo gli ngɛ bo. M̀pèrè abwa tsɔnɔ ya de gli, bɛʼngɛ e shi ne me tee kpe engudu a sa zamma bwɛn bo. 10Engɔ fɔɔ embè sa ga kpe Abɛ ya ngo sa ngwe nè abɛ, m̀fɔ̀rɔ̀ gɛrɛ sa ngwe nè m̀fɔ̀rɔ̀. 11Éngɛ chwâ ya ngo binni ghɛʼ, nchwɔrɔ mane eŋwan ba ngo mwɔ akwâ gimkpaʼ, abwa zɔnɔ gimkpaʼ ya ngo fàa bɔ. Enɛ̂ m̀pèrempèrè ba ngo zeʼ ezob. 12Endzobo ya de sa zeʼe wɛ abwa zɔnɔ ma ngo nu afwɔ ngɛ, e ba ngo bere angɔn gɛ̀rɛ̀ nyii angɔn, e ba yà nu angɔn ngɔɔ sɛʼ efwɔ ndɔ tsàʼrà Ngwe bɔ Juu, gɛ̀rɛ̀ ma gè angɔn a dzɔm, e yà bwɛ angɔn zeʼe efàarà m̀fɔ̀rɔ̀ zhiri mane abɔ kɛ́ tsɛrɛ efwɔ abɛ ene ekumu ngu. 13Ewunɔ yà mwɔ afwɔ endɔn é gà ebe bɔ mbɔʼ mmɛ. 14Mbɔn ndeere ńtara ntsɔn dye endzobo sa zeʼe, ne le kpe mbɔn sa nyii angɔn kpe mbɔn ba ngo ga kpe ayɛ bo. 15Mmɛ mɔmbwo yà ndɛʼ m̀pèrè aga deʼ mane m̀pèrè azɔm deʼ endɔn wɛ gho deʼ abwaʼ bɔ m̀pɛ̀ʼ mbɔn ne me né yà fɛ̀ɛrɛ kà kobo abwa yɛ mbɔn shi ga ngɛ bo. 16Ka de mwɔ me èngwa mbɔn, bwɔngwa mbɔn, bɔ ekla mbɔn mane asɔrɔ ndzɔn ya bwɛ angɔn gè eblabwo bɔ m̀pɛ̀ʼ, e ba ngo zhudu abɔ deʼ abwaʼ ndzɔn. 17Bɔ gimkpaʼ yà gwè angɔn mbɔʼ ekumu ngu. 18Éngɛ tsɛʼ ebwa deʼ ma ngo gli ekwa ngɔn bo, ka nyɔ-ato deʼ ndzɔn ŋwaʼ e yà ka nyɔɔ. 19Mbɔn klini etaa shi mbɔn ba ngo pwèerè akwâ ndzɔn.

Yeso ga aŋu é ma ngo tsɔŋɔ Jerusalɛm ngɛ

(Mat 24:15-21; Mak 13:14-19)

20“Èndzobo chɛ mbɔn ma ngo zɔ bɔ ebiri shi kɛɛrɛ abɛ Jerusalɛm sɔ ngɛ, éngɛ mbɔn ba ngo nɛɛ kpe a sa zamma tsɔŋɔ abɛ Jerusalɛm. 21Éngɛ abɔ byɛ e mwɔ abɛ Judeya ngɛ, e dɔrɔ ngɔɔ namma edɔm agu, angɔ byɛ abɛ ngɛ nyɔɔrɔ, angɔ byɛ ese ngɛ ke wu nyii efwɔ abɛ bo. 22Éngɛ enji byɛ ba ngo mwɔ na enji nyii é le kpe ebwa wɛ aŋwɛʼrɛ Ngwe à shi ga ngɛ gli éŋwaʼa. 23Efwɔ enji bɔnɔ abwa yà me kama ebe ayebum mane aye byɛ e me le bwɔ bwad ngɛ. Ǹgoʼ kamakam ya ngo zeʼ efwɔ chwâ zɔnɔ, éngɛ Ngwe gɛrɛ ma ngo ge enyii mɔ ene ekyɛ zɔnɔ. 24E ba ngo zhudu abɔ deʼ ene abyeŋwɔ, éngɛ e ba ngo bwɛ adeʼ na bɔ dzɔm nɔ ngɔɔ efwɔ ebɛ tsɛrɛ. Éngɛ ebɛbɔ ba ngo dzɛ̀ddɛ̀ abɛ Jerusalɛm karadidi bwɛrɛ efwɔ èndzobo chɛ endzobo Ngwe ma koʼo ngɛ.”

Aŋu Ŋwɔ Gho ma ngo zeʼe ngɛ

(Mat 24:29-31; Mak 13:24-27)

25“Ńchwe, eta mane ńtɔrɔta ba ngo tee enɛ̂. Ebɛ gimkpaʼ edɔm chwâ ba mwɔ efwɔ eju gɛrɛ ma bumu aŋu ndim ma kùmù mane awawa wɛ e ma gli zeʼ efwɔ ebɔrɔndim kɛ́ ngɛ 26Bɔ ba ngo fum ene èklɔ̀ aŋu angɔ ma ngo tsɔmɔ sa kɔʼɔ abwa yɛ à ma ngɔɔ ma gli edɔm chwâ gimkpaʼ ngɛ, éngɛ ekama yɛ e mwɔ ezob ngɛ ya ngo njiʼri amɔ 27Éngɛ Ŋwɔ Gho wa ngo dɔʼ ma gli à zeʼe efwɔ m̀bɛ̀ʼ nè ekama yɛ e me klɔ mane enɛŋɛrɛkɛ. 28Èndzobo chɛ mbɔn ma ngɔɔ zɔ abwa zɔnɔ klada sa gli ngɛ, mbɔn tam ekere gɛ̀rɛ̀ beʼ eto mbɔn mbɔʼnga etyê Ngwe ngɔn a sa zamma zeʼ.”

Ebwa é bɛɛrɛ ene azɔd akla

(Mat 24:32-35; Mak 13:28-31)

29Éngɛ Yeso ga nklama timi fɔnɔ ebe angɔ kpe, “Mbɔn zhuŋu mbɔʼ azɔd akla mane ezɔd abê. 30Èndzobo chɛ mbɔn zɔ kpe afu angɔ a sa tsɔʼrɔ ngɛ, mbɔn nɛɛ kpe enimi m̀bò a sa zamma é zeʼ. 31Ene aghɛʼnji ŋwaʼ zɔnɔ, èndzobo chɛ mbɔn zɔ abwa zɔnɔ sa gli ngɛ mbɔn nɛɛ kpe ebwa m̀fɔ̀ Ngwe a sa zamma é zeʼ. 32Mmɛ ga éŋwaʼa endɔn kpe mbɔn nɛɛ kpe ekyɛ zɔnɔ ya sa fɔɔ nɔ abwa zɔnɔ shi gli. 33Ezob mane chwâ yà fɔɔ bɛʼngɛ ega ngu wa ngo tyè ekyɛ ŋwaʼ. 34Mbɔn nu azɔm, mbɔn ke sa nyiimi endzobo ndzɔn gimkpaʼ ene entara kà sa zhiri ŋwɔ mɔm bo. Mbɔn ke sa nyii akwa ndzɔn ene abwa edɔm ese bo. Mala mbɔn le engɛ̂, anji yɛ ya ngo jɛ bere angɔn 35ne etɛʼrɛ nɔ. Anji zɔnɔ ya ngo zeʼ ebe bɔ gimkpaʼ akwâ gimkpaʼ edɔm chwâ. 36Mbɔn ndeere angɔn gɛ̀rɛ̀ sa tsàʼrà Ngwe akyɛ gimkpaʼ kpe mbɔn le ekama fɔɔ abwa zɔnɔ mbɔʼtye mbɔn ma ngo tam efàarà Ŋwɔ Gho.” 37Yeso à nu enji byɛ ma tee abwa efwɔ ndɔngwe kɛ̀. Etiʼi a na de sa di, engɔ ngɔɔ ese, è ko edɔm egu wɛ à ma zɔʼrɔ kpe egu Olifs ngɛ. 38Enchwenchwe twɛn gimkpaʼ, bɔ gimkpaʼ â na ngɔ̀ɔ efwɔ ndɔngwe kɛ̀ é zhuru ebe engɔ.

നിലവിൽ തിരഞ്ഞെടുത്തിരിക്കുന്നു:

Luk 21: nbt

ഹൈലൈറ്റ് ചെയ്യുക

പങ്ക് വെക്കു

പകർത്തുക