एहुना 8

1मनदो ईसू जइतून पहाड़ अगी तोराय।

सनही अइमीराः कसूर ईसू बराव एंडातेरा

2अंगुः निंदावा ईसू भगवानराः ओड़ाःरेय सेनेडा दो मुरुक होड़कू हाँय एचेरेकू जुमावयान। हनते ईसू दुड़ुःनेनखने चेडकुःआ। 3हनमेला नियम चेडदार होड़कू अरू फरीसी होड़कू मी होड़ अइमी, मी होड़ मरद सुदाकू साब रेमतिडिया, हँकू हाँयग अइमी ईसू एचेरेकू ओर अगूतिडिया। 4अरू हाँय होड़कू तलारेकू एचे चड़ाँतिरिगखन ईसू एचेरेकू कताया, “ने गुरुजी, नाँयग अइमी बेलूर बुतारेले साब रेमकिडिया। 5नाःआ इयाकुःआ अइमीकू दिरिते तेके गोएग एंडाकू लगा भगवानराः नियमरे मोसेस हुकुमकेरा। दो आम नाँयग अइमीराः बदीरे चेले माःआनमे कतायतना?” 6ईसू अंदजावकेडखन दाःगे लगा नाःआ सवालकू होंबोरतिडिया।

मनदो ईसू हुटूकियानखन ओतरे अंगरीतेय ओजाःगेःआ। 7हँकू होनोहो होंबोराकू मेला ईसू बोः रेमतेडखने कतावाकुःआ, “अपे अते मेरेय कसूरगरा हनाँयग होड़, मड़ंग दिरिय सलाव।” 8हनते ईसू अरूय हुटूनेनखन ओतरेय ओओजाःआ।

9नाःआ अयूमतेडखन मरंगीग अते हुडिंगीग वरी जमा होड़कू मेमेड होड़ मेमेड होड़कू बोसोरयान। ईसू हंडा एकलाय बनसावनेना अरू हाँयग अइमी हंडा चनाड़ाँतेय दोहोयान। 10हनते ईसू बोः रेमतेडखन हाँय एचेरेय होंबोरतेड, “हँकू करा तोराकुःआ? तोनोंगीग आम मेरकू डंडियावगाडमे जा?”

11दो हाँय कतातेड, “ने परबू, ईंग तोनोंगीग मेरकू डंडियावगडिंगा।”

दो ईसू कतातेड, ईंग हों ओरोयिंग डंडियावतेडमेःआ। सलाव जुवाःमे अरू अलोम कसूरगे।]

ईसू चउंदीसराः मरसल हवे

12हनते ईसू होड़कू एचेरे अरूय कताया, “चउंदीसराः मरसल ईंग हवे। ईंग देहोरे वेगता हाँयग होड़ अंदरारे मेरेय सलाःता, मनदो हाँय जीव एमेता हना मरसले पवाःता।”

13फरीसी होड़कू नाःआ अयूमकेडखनकू कताया, “आम अनम बदीरे हिदइतमे एमे दो, आमराः हिदइत तोनोंगीग सताय हवे माःआन ओरोकू मनावनेना।”

14दो ईसू हँकू एचेरेय कता कुदातेरा, “ईंग करा अगीतेयिंग वेगकिया अरू करा अगीयिंग सेनता हनायिंग सुदीतना। हनालगा ईंग इनिंग बदीरे हिदइत कता उदुः होले ईंगराः हिदइत सताय होयाःता। मनदो अपे मेरपे सुसुदीतना ईंग करा अगीतेयिंग वेगकिया अरू करा अगीयिंग सेनता।

15अपे होड़कूराः ओंगोल इयापे फड़ियावगेतना। मनदो ईंग तोनोंगीग मेरिंग फड़ियावगेयतना। 16ईंग एकला मेरिंग फड़ियावगेता मनदो ईंगे वारकेरा, ईंग अपांग सुदायिंग फड़ियावगेता। हनालगा तोनोंगीगिंग फड़ियाव दो ईंगराः हना फड़ियाव सनाताय होयाःता। 17अपेराः नियमकूनराः कागदरे हों ओजाःतो इदा, बार होड़राः हिदइतते तोनोंगाः कता होड़कू बिसवासगेता। 18ईंग इनिंगते ईंग बदीरे हिदइतिंग एमेतना अरू ईंगे वारकेरा ईंग अपांग इनिंग बदीरे हिदइते एमेयता।”

19हनते हँकू ईसू एचेरेकू होंबोरतेड, “आम अपांग करे इदानिया?”

दो ईसू हँकू एचेरेय कतातेरा, “अपे ईंग मेरपे सुदींगतना, अरू ईंग अपांग हों मेरपे सुदीयतान। ईंगपे सुदीकेः दो ईंग अपांग होँपे सुदीकेःआ।” 20नाःआ कता भगवानराः ओड़ाःरे दसिना बकसा धरीरे ईसू चेचेडा। मनदो हाँय एचे साबेयराः बेला मेर होयागान, हनालगा तोनोंगीग मेरकू साबगडीग।

21हनते ईसू हँकू एचेरे अरूय कतातेड, “ईंग सलाव जुवाःतनिंग अरू अपे ईंगपे ञामता। ईंग सलाःतना हना अगी ओरोपे वेग अवेनेना अरू कनासूर कसूररेपे गोएग एंडा जुवाःता।”

22नाःआ अयूमकेडखन एहूदाकूरिकुःआ मूक होड़कू होंबोरतेड, “नाँय कतायतना, ईंग सलाःतना, हना अगी ओरोपे वेग अवेनेना, दो नाँय अनँयग आँयगते गुजुः लगाय ओंगलेतना जा?”

23हनते ईसू अरूय कताया, “अपे नानाः ओतरिकुःआ होड़कू हवे अरू ईंग सेरमोरीग हवे। अपे नाःआ चउंदीसरिकुःआ होड़कू हवे अरू ईंग ना लवे। 24अपे ईंगपे अयूम! ईंग हवे#8:24 एचे उडुंग 3:14 रे भगवान अनँयग बदीरेय कतायतना, ईंग हवे, माःआन।, माःआनिंग कतातेरा हना कता अपे मेरपे बिसवासगे दो कसूर अरू गारबारतेपे गोएग जुवाःता। हनालगा ईंग मड़ंगरे अपे एचेरेयिंग कतातेरा, कनासूर कसूररेपे गोएग एंडा जुवाःता।”

25दो हँकू हाँय एचेरेकू होंबोरतेड, “आम इये हवे?”

दो ईसू कतातेड, “ईंग मड़ंग वरीते अपे एचेरेयिंग कता अगूयतना, हना नुँहू होयिंग कतायतना। 26अपे बदीरे मुरुक कताय लगा अरू फड़ियावगे लगा इदा। मनदो ईंगे वारकेरा हाँय सताय इदानिया अरू ईंग हाँय अतेयिंग अयूमकेरा हनानाः कताकून चउंदीसरिकुःआ होड़कू एचेरेयिंग कतायतना।”

27ईसू आँयग अपांग बदीरेय कताया, हना कता हँकू मेरकू बुझाव अवेगान। 28हनते ईसू कतातेड, “अपे मनुवारीग बेटात कुरूसरेपे देगगेय दो अपे सुदीगोडता हनाँय इनिंग हवे, माःआन अरू ईंग इनिंगते तोनोंगाः मेरिंग एचेयता। मनदो ईंगरीग अपांग भगवान चेडगींगता हनानाःयिंग कता उदुःता। 29ईंगे वारकेरा, हाँय ईंग सुदा इदानिया। हाँय मंजूरवाता हना बुता सगर सइटिंग बुतागोड ञवनता। हनालगा हाँय ईंग, एकला मेरेय अड़ाःगींगता।” 30ईसू नाःआ कताय कनकता मेला मुरुक होड़कू हाँय एचेरेकू बिसवासतेरा।

इबराहीमरिकुःआ सताय लइंकू

31ईसू एचेरेकू बिसवासतेरा हँकुःआ एहूदाकू एचेरे ईसू कताया, “अपे ईंगराः कता बिसवास घड़ीनपे मनाःतना दो सनातायरे अपे ईंगरिकुःआ चेलाकू हवे। 32अपे सतायपे सुदी दो हना सताय अपे अजइतपेता।”

33हनते हँकू कतातेड, “अले इबराहीमरिकुःआ नइड़-बाँसकू इदानलेःआ अरू अले तोनोंगीगरीग बेगारी होड़ मेरले बड़ाँवगान। दो आम करा इयाम कतायतना, अपे अजइत जुवाःतापे, माःआन?”

34दो ईसू कतातेड, “ईंगपे अयूम, कसूरगेता हाँयग होड़ कसूरराः बोझारे बझावतो इदानिया। 35अरू तोनोंगीग बेगारी होड़ सगर दिन मालिक ओड़ाःरे मेरेय दोहोनता। मनदो मालिकरीग बेटात अपात सुदा सगर दिने दोहोनता। 36दो बेटात अपेय अजइतगोड दो सनातायरेपे अजइत जुवाःता। 37ईंग सुदीयतना अपे इबराहीमरिकुःआ नइड़-बाँस होड़कू इदानपेःआ। मनदो ईंगराः कता अपे मेरपे मनेवातना। हनालगा अपे ईंग ञेड एंडागींग लगापे ओंगलेतना। 38ईंग अपांग एचेरेयिंग ञेलतेरा, हनानाःयिंग कतायतना अरू अपे अपेरीग अपांग एचेरेपे ञेलतेरा, हनानाःपे एचेता।”

39दो हँकू हाँय एचेरेकू कता कुदातेरा, “अले इबराहीमरिकुःआ नइड़-बाँस होड़कू इदानलेःआ।”

दो ईसू कतातेड, “अपे इबराहीमरिकुःआ नइड़-बाँसपे दोहोकुः दो इबराहीम एचेया हनन इया अपे होँपे एचेकेःआ। 40ईंग भगवान अते अयूमकेडखन सताय कता अपे एचेरेयिंग उदुःतेरा। मनदो अपे नुँहू ईंग ञेड एंडागींग लगापे ओंगलेतना। हना इया इबराहीम मेरेय एचेगाड। 41अरू अपे अँननपे अपांगराः बुता इयापे एचेयता।”

दो हँकू कतातेड, “अले दो अतिंग जुमावतो लइंकू ना लवे। मनदो भनगवान हमा अलेरीग मिनीटोंग अपांग इदानिया।”

कलउरिकुःआ लइंकू

42हनते ईसू हँकू एचेरेय कताया, “ईंग भगवान अगीतेयिंग वेगकिया अरू ईंग इनिंग ओंगोलते मेरिंग वेगगना, मनदो हनाँय ईंगे वारकेरा। भगवान अपेरीग अपांगे दोहोकुः दो अपे ईंग सुदा अलार-दुलारतेपे दोहोकुःआ। 43अपे ईंगराः कता मेरपे अयुमेता। हनालगा ईंगराः कता अपे मेरपे बुझाव अवेनता। 44कलउ अपेरीग अपांग हवे अरू हाँयराः ओंगोल इया एचेय लगापे चहाःता। हाँय मनाड़ंग वरीते होड़कूय ञेड गोएगता अरू तोनोंग इयाःआ सताय हाँय एचेरे कोवानेःआ। हनालगा हाँय भगवानराः सताय सरवने हिनइस-बिनइसवाता। हाँय लबरा इदानिया अरू जमा बरानाः लबरा हनाँय अगीते उडुंगगुःता। हनालगा हाँय अनँयगराः लूर-नेवन इया लबरा बड़राय कतागोड ञवनता। 45ईंग सताय बड़रायिंग कतायता होले अपे ईंग एचेरे मेरपे बिसवासगेता। 46तोनोंगीग ईंगराः कसूरपे एचे उदुः अवेयता जा? ईंग सतायिंग कतायतना दो चिला लगा अपे ईंग एचेरे मेरपे बिसवासगेतना? 47भगवानरीगे दोहोनता हाँयग होड़ भगवानराः कताय मनाःता। अपे भगवानरिकुःआ होड़कू ना लवे। हनालगा अपे ईंगराः कता मेरपे मनाःता।”

ईसू अरू इबराहीम

48दो एहूदाकू नाःआ अयूमतेडखन ईसू एचेरेकू कताया, “आम समरिया होड़ हवे अरू आम एचेरे भूत इदा माःआनले कतायता दो हना कता सताय ना लवे जा?”

49दो ईसू कता कुदातेड, “ईंग एचेरे भूत कोवाया। मनदो ईंग इनिंग अपांग भगवाननिंग मान मरजइतता अरू अपे ईंग मेरपे मान मरजइतगींगतना। 50ईंग इनिंग एचे मान मरजइतगुः लगा मेरिंग चहाःता। मनदो ईंगराः मान मरजइते चहाःता मी होड़ इदानिया, अरू हनाँय सताय फड़ियावदार हवे। 51अपे ईंगपे अयूम! तोनोंगीग होड़ ईंगराः कता इयाय सलाः, हाँय कहियो ओरोय गोएगनेना।”

52हनते एहूदाकू कतातेरा, “नुँहू अले सुदीबाःगोतेरा, आम एचेरे भूत इदा। अबूरीग खुटिपरिया होड़ इबराहीम गोएगयना अरू भगवानराः बड़रा कता होड़कू होंकू गोएगयना। मनदो आम कतायता, तोनोंगीग होड़ ईंगराः कता इयाय सलाः दो, हाँय कहियो ओरोय गोएगनेना, माःआन। 53दो आम अबूरीग खुटिपहार होड़ इबराहीम अते हों मरंग इदानमेःआ जा? हाँय गोएगयना अरू भगवानराः बड़रा कता होड़कू होंकू गोएगयना। दो आम इये माःआनमे ओंगलुःता?”

54दो ईसू कतातेड, “ईंग इनिंगते मान मरजइतगुः दो हना कहिसाः ना लवे। ईंग अपांग ईंगे मान मरजइतता अरू हनाँय अपे कतावायता, अलेरीग भगवान, माःआन। 55अपे हाँय मेरपे सुदीगेयतना, मनदो हाँय ईंग सुदीयतना। हाँय मेरिंग सुदीयता माःआन ईंग कताकेःआ होले ईंग अँननपे इयायिंग लबराकुःआ। मनदो हाँय ईंग सुदीयतना अरू हाँयराः कता इयायिंग सलाःतना। 56अपेरीग खुटिपहार होड़ इबराहीम ईंग चउंदीसरेयिंग वेगता हना दिन ञेल लगा असरा दोहोकेडखन बहालतेय दोहोना। अरू हाँय हनाय ञेलतेरा अरूय अहाल बहालयान।”

57दो एहूदाकू कताया, “आमराः नुँहू वरी पचास बरिस मेर होयागना, अरू आम इबराहीमे ञेलतिरिया जा?”

58हनते ईसू कतातेड, “अयुमेपे! इबराहीम जनमावगुः अते मनाड़ंग वरीते ईंग इदानिंगा।” 59नाःआ अयूमकेडखन हँकू ईसू तेके गोजेय लगा दिरिकूनकू रेमतेरा। मनदो ईसू कलेकाल भगवानराः ओड़ाः अतेय बोसोर उडुंगयान।

നിലവിൽ തിരഞ്ഞെടുത്തിരിക്കുന്നു:

एहुना 8: kfp

ഹൈലൈറ്റ് ചെയ്യുക

പങ്ക് വെക്കു

പകർത്തുക