एहुना 6

पाँच हजार अते बगरा होड़कू जोम लगा ईसू एमेतेरा

(मती 14:13-21; मरकूस 6:30-44; लूका 9:10-17)

1तोनोंग दिन तयोमरे ईसू अरू आँयगरिकुःआ चेलाकू गलील छतर तोराकू। हना ततेरते हँकू गलील ञावराः हुडिंग समुंदरराः मार परोम तोराकू। (हना हुडिंग समुंदरराः एटाः ञाव दोहोना तिबिरियास।) 2ईसू बेमरियाकूय नपायतेरा हना बयाव जुवाः इयाःआ बुताकून होड़कू ञेलतेरा। हनालगा हाँय देह दूर मुरुक बगरा होड़कू ओतोंग सेना। 3अरू ईसू आँयगरिकुःआ चेलाकू सुदा पहाड़रे देगकियानखने दुड़ुःयान। 4दो एहूदाकूराः पसहा परोब निचकाःआ।

5ईसू अउग-बउगे सहियारतेड दो, मुरुक बगरा होड़कू आँयग अगी वेगतोय ञेलतेडकुःआ अरू पिलिपूस एचेरेय होंबोरतेरा, “नाःआमिन बगरा होड़कू जोम लगा करा अगीतेबू अगूय?” 6ईसू मड़ंगरे चिलाय एचेयता हना अनँयग आँयगते सुदीवाडखन पिलिपूस अंदजावगे लगा नाःआ इयाय होंबोरतिरिया।

7पिलिपूस कता कुदातेरा, “मी होड़ होड़राः आठ महिनाःआ मंजूरी हों नाःआमिन होड़कू जोम लगा मेमेड कउड़ा हों ओरो पुरावनेना।” 8ईसूरीग चेलाकू अते मी होड़ अंदरियास, सिमोन पतरसरीग बोहोत, ईसू एचेरेय कतातेड, 9“नंडा मी होड़ लँइग इदानिया। हाँय एचेरे पाँचगोटोंग जावराः रुटी अरू बारटोंग हकूकिन इदा। मनदो निनमिन अते नाःआमिन होड़कू लगा करा इया होयाःता?”

10दो ईसू कतातेड, “होड़कू एचे दुड़ुःगोडकूपे।” हंडा मुरुक बीरकून दोहोना अरू होड़कू हंडाकू दुड़ुःयान। हंडा अंदांज मनरद मरदकू पाँच हजारकू दोहोना। 11हनते ईसू रुटीय साबतेरा अरू भगवान एचेरे धनियाबादतेडखन दुड़ुःतो होड़कू लगा डुंडीग घड़ीने एचे हटिंगवातेडकुःआ। अरू हनन इया हकूकिन हों दोंगे पेरेगवामिने एचे हटिंगवातेडकुःआ।

12हँकुःआ जमा होड़कू बीयान दो ईसू आँयग चेलाकू एचेरेय कताया, “बनसावतो बटुड़ावगेपे दो हान ओरो एंडानेना।” 13जमा होड़कू जोम उरियावनेनखन तयोमरे जावराः पाँचगोटोंग रुटीराः डुंडीगतो चेलाकू बारहगोटोंग दउड़ारे रेम ठुड़ीतेडखनकू पेरेगगोतेड।

14ईसूराः बयाव जुवाः इयाःआ नाःआ बुता होड़कू ञेलतेडखनकू कताया, “सतायरे नाँयग होड़ चउंदीसरे वेग लगाय दोहोना हाँयग भगवानराः बड़रा कतायीग होड़ हवे।”

15ईसू सुदीगोतेड, होड़कू ईंग रेनहाकेडखन अँकूरीग राजा बड़ाँवगींग लगाकू ओंगलेतना, माःआन। हनालगा हाँय कगरावनेनखन पहाड़ होर एनेकला तोराय।

ईसू दनाः दाः सेरमोय सेना

(मती 14:22-27; मरकूस 6:45-52)

16हना दिन सिंगाड़ मेला चेलाकू हुडिंग समुंदर अगी अरूकू सेनेडा, 17अरू डोंगारे देगनेनखन कपरनहूम सहर होरकू सेना। हनमेला अयूबयान अरू ईसू हँकू सुदा मेरेय दोहोगान। 18गड़रा घटाते हना हुडिंग समुंदरराः दाः हलकोयगगुःआ। 19हँकू डोंगा सलाव सलाव बार कोस वरी तोराकू दो ईसू दनाः दाः सेरमो अँकू अगी वेगतो ञेलतिरिगखनकू बोरोयान। 20मनदो ईसू हँकू एचेरेय कताया, “अहापे बोर! इनिंग हवे।” 21हनते ईसू डोंगारे एचे देगगेय लगाकू सपड़ावनेना अरू ओहेन हँकूराः डोंगा सेन लगा दोहोना हंडा सोदोरयान।

22एटाः दिन हुडिंग समुंदरराः मार परोमकू दोहोना, हँकुःआ होड़कू सुदीगोतेड नंडा मिनीटोंग डोंगा इदा अरू ईसू आँयग चेलाकू सुदा डोंगारे मेरेय देगगान, मनदो हँकू अँनकू एकलाकू सेनेडा। 23हनते परबू रुटी लगाय अरजीतेरा अरू होड़कू जोम लगाय ओवातेडकुःआ, हना ततेरराः लेसान ततेररे तोनोंग तोनोंग होड़कू तिबिरियास सहर अते डोंगाकूनरेकू वेगनेना। 24ईसू अरू आँयगरिकुःआ चेलाकू हंडा कोवाकुःआ माःआन होड़कू सुदीगोतेड दो, हँकू डोंगाकूनरे देगकियानखन ईसू ञाम ञाम कपरनहूम सहररेकू सोदोरयान।

जीवराः रुटी ईसू हवे

25हुडिंग समुंदर मार परोम होड़कू पारनेनखन कपरनहूम सहररेकू सोदोरनेना अरू ईसू सुदाकू जुमावनेन दो, हँकू हाँय एचेरेकू होंबोरतेड, “ने गुरुजी, आम नंडा तुमिसमे वेगकिया?”

26दो ईसू कतातेड, “अपे ईंगपे अयूम! अपे बयाव जुवाः इयाःआ बुतापे ञेलतेरा, हनलगा अपे मेरपे ञामिंगतना। मनदो अपे रुटीपे जोम बीनेना, हनालगापे ञामिंगतना। 27लुलिग जुवाःता हना जोम जिनिसकून लगा एकला अहापे मिहनइतगे, मनदो ओरो लुलिगनेना अरू ओरो टुटीगनेना जीव एमेयता हना जोम जिनिसकून लगा होँपे मिहनइतगे। हना दो मनुवारीग बेटात अपे लगाय एमेवापेता। हना एमे लगा अपांग भगवान हनाँय एकला हातपाते ओवाडिया।”

28हनते हँकुःआ होड़कू होंबोरतेड, “भगवान ओंगलेतना हना बुता बुता लगा अले चिलाले एचे?”

29दो ईसू कतावाडकू, “भगवान ईंगे वारकिरिंगा। हनालगा ईंग एचेरेपे बिसवासगे। ननानाः हवे भगवानराः ओंगोल इयाःआ बुता।”

30दो हँकू हाँय एचेरेकू होंबोरतेड, “दो आम चिला बयाव जुवाः इयाःआ बुताम उदुःवालेता, जेमहा अले आम एचेरेले बिसवास अवेय? 31भगवानराः कागदरे ओजाःतो इदा हनन इया, अबूरिकुःआ खुटिपरिया होड़कू टयंगाब ततेररे मनाहकू#एचे उडुंग 16:4-32 जोमतेरा;

हाँय हँकू जोम लगा सेरमो देस अते जोम जिनिसे एमेतेरा।”#सेरेंगकून 78:24,25

32दो ईसू हँकू एचेरेय कताया, “अपे ईंगपे अयूम! अपे लगा मोसेस सेरमो अते रुटी मेरेय एमेगाड। मनदो ईंगरीग अपांग भगवान अपे लगा सताय रुटी सेरमो देस अतेय एमेयता। 33सेरमो देस अते उतरावनेनखन चउंदीसरिकुःआ होड़कू लगा जीवे एमेता हनाँय हवे, भगवानराः रुटी।”

34दो हँकू कतातेड, “ने साहेब, नुँहू वरीते जनामा बेला नाःआ रुटी अले लगाम एनेमेगोड ञवन।”

35हनते ईसू हँकू एचेरेय कता उदुःतेरा, “जीवराः रुटी ईंग हवे। ईंग एचेरेय वेगता, हाँय कहियो रंगेगतो ओरोय दोहोनेना अरू ईंग एचेरेय बिसवासगेता हाँय, कहियो ततंगतो ओरोय दोहोनेना। 36मनदो ईंग अपे एचेरेयिंग कतातेरा, अपे ईंगपे ञेलकेरा। हनारे हों मेरपे बिसवासगींगतना। 37ईंग इनिंगराः ओंगोल इया एचेय लगा सेरमो देस अते मेरिंग वेगगना। मनदो ईंगे वारकिरिंगा हाँयराः ओंगोल इया बुता पुरावगे लगायिंग वेगकिया। 38हनालगा अपांग भगवान ईंग एचेरेय जिमाःकेडकुःआ हँकुःआ होड़कू ईंग एचेरेकू वेगता अरू हँकू तोनोंग बेला मेरिंग कुदाकूता। 39ईंगे वारकेरा हाँयराः ओंगोल ननानाः हवे; हाँय ईंग एचेरेय जिमाःकेडकुःआ हँकुःआ होड़कू अते तोनोंगीग होड़ ओरोयिंग केड़ेतेडकुःआ, मनदो टुटीग दिनराः फड़ियावरे हँकूयिंग जियाव रेमकूता। 40ईंगरीग अपांगराः ओंगोल नाःआ हवे। बेटातकू ञेलता अरू हाँय एचेरेकू बिसवासगेता, हँकुःआ होड़कू ओरो टुटीगनेना हना जीवकू पवाःता अरू हँकू ईंग टुटीगगुःराः दिनरेयिंग जियाव रेमकूता।”

41ईसू नाःआते गुनहोन मड़ंगरेय कतातेरा, सेरमो देस अते उतरावकिया हना रुटी, ईंग हवे। हनालगा एहूदाकू हाँय बदीरेकू कुरबुराःआ। 42अरू हँकू कतातेड, “नाँय उसूपरीग बेटात ईसू हवे जा? हाँयरिकिनाः एंगा-अपाकिन हों सुसुदीतनाबू। दो नाँय करा उड़ीय कता अवेयता, ईंग सेरमो देस अतेय उतराव वेगकिया, माःआन?”

43दो ईसू कतातेड, “अपे अँननपे अहापे कुरबुराव होड़ेंग। 44ईंगे वारकेरा, ईंगरीग अपांग तोनोंगीग होड़ मेरेय रगेय दो, हाँयग होड़ ईंग एचेरे ओरोय वेगनेना अरू ईंग एचेरेय वेगता हाँयग होड़ टुटीगगुःराः दिनरे ईंग जियाव रेमगेयता। 45भगवानराः बड़रा कता होड़कूराः कागदरे नाःआ इया ओजाःतो इदा,

भगवान हँकुःआ जमा होड़कूय चेडकूता।#एस 54:13

अपांग भगवानतेकू अयुमेता अरूकू चिडुःता हँकू, ईंग एचेरेकू वेगता। 46तोनोंगीग होड़ अपांग मेरकू ञेलगरिया। मनदो ईंग भगवान अगीतेयिंग वेगकिया, अरू ईंग इनिंग एकला अपांगिंग ञेलकेरा।

47अपे ईंगपे अयूम! बिसवासगेताय हाँयग होड़, ओरो टुटीगनेना हना जीवे पवाःता। 48ओरो टुटीगनेना हना जीव एमेयता हना रुटी ईंग हवे। 49अपेरिकुःआ खुटिपरिया होड़कू टयंगाब ततेरे मनाहकू जोमतेरा, मनदो हनारे होंकू गोएगयना। 50मनदो नाःआ रुटी सेरमो अते उतराव वेगकिया हना रुटी हवे अरू नाःआ रुटीय जोमता हाँयग होड़ ओरोय गोएगनेना। 51सेरमो देस अते उतरावकिया, हना जीवराः रुटी इनिंग हवे। तोनोंगीग नाःआ रुटीय जोम दो, हाँय कहियो ओरोय गोएगनेना। अरू चउंदीसरिकुःआ होड़कू जियाः लगायिंग एमेयता, हना रुटी ईंगराः मास हवे।”

52हनते एहूदाकू अँननकू अँकू अड़ा-चउकीनेनखनकू कताया, “नाँयग होड़ अनँयग मास करा उड़ी अबू जोम लगाय एमेयता?”

53दो ईसू हँकू एचेरेय कताया, “अपे ईंगपे अयूम! अपे मनुवारीग बेटातराः मास मेरपे जोम अरू हाँयराः बलंगी मेरपे ञूय, दो अपे सगर सइट वरी ओरोपे जियाव अवेनेना।#6:53 नाःआरे ईसू परबू भोज जोम बदीरेय कतातेरा 54ईंग एचेरे बिसवासकेडखन ईंगराः मासे जोमता अरू ईंगराः बलंगीय ञूयता, हनाँयग होड़ ओरो टुटीगनेना जीवे पवाःता। अरू टुटीगगुःराः दिनरे ईंग हाँयिंग जियाव रेमगेयता। 55ईंगराः देह सताय जोम जिनिस हवे अरू ईंगराः बलंगी सताय ञूय जिनिस हवे। 56ईंगराः देहे जोमगोडता अरू ईंगराः बलंगीय ञूयता हाँयग होड़ ईंग सुदा मिनीय दोहोनता अरू ईंग हों हाँय सुदा। 57जीयत इदानिया ईंग अपांग ईंगे वारकेरा अरू हाँय अते ईंग जीयत इदानिंगा। हनलगा ईंगे जोमता हाँयग होड़ ईंग अगीते जिनियतेय दोहोनता। 58नाःआ रुटी सेरमो देस अते उतरावकिया हना रुटी हवे। अपेरिकुःआ खुटिपरिया होड़कू मनाहकू जोमा, हनारे होंकू गोएगयना, मनदो नाःआ रुटीय जोमता हाँयग होड़ सगर सइट जूग वरी जीयते दोहोनता।” 59नाःआ कताकून ईसू कपरनहूम सहरराः अरजी ओड़ाःरे होड़कूय चेड मेलाय कतातेरा।

60ईसूरिकुःआ चेलाकू अते मुरुक बगरा होड़कू नाःआ कताकून अयूमतेडखनकू कताया, “नाःआ कता ओरोबू अयूम पसाव अवेतेरा। दो इये मनाव अवेनता?”

ओरो टुटीगनेना हना जीवराः सरवन

61ईसूरिकुःआ चेलाकू अँननकू अँकू कुरबुराःआ, हना सुदीतेडखन ईसू हँकू एचेरेय होंबोरतेरा, “नाःआ कता अते अपेराः जीव हुडिंगयना जा? 62अपे मनुवारीग बेटात सेरमो देस अगी देगतोपे ञेलेय दो करजुःतापे? 63भगवानराः सुद बिरुवा जीवे एमेता, मनदो मनुवाकू अते कहिसाः मेर होयाःता। ईंग कतातेरा हना सरवन भगवानराः सुद बिरुवा अगीतेयिंग कतातेरा अरू हनानाः कता अपे लगा जीव एमेयता।”

64ईसू मनाड़ंगतेय सुदीकेरा, ईंग एचेरे इये इये मेरकू बिसवासगेता अरू इये ईंगे एचे साबिंगता, माःआन। हनालगा हाँय कतातेरा, अपे अते अदोम होड़कू ईंग एचेरे मेरपे बिसवासगेतना, माःआन। 65दो ईसू अरूय कताया, “ननानाः लगा ईंग अपे एचेरेयिंग कतातेरा, अपांग मेरेय मयावाय दो तोनोंगीग होड़ ईंग एचेरे ओरोय वेग अवेनेना।”

पतरसराः बिसवास

66हना तयोमरे ईसूरिकुःआ मुरुक बगरा चेलाकू हाँय अड़ाःतेडखनकू कुदायान।

67दो ईसू आँयगरिकुःआ बारहगोटोंग मूक चेलाकू एचेरेय कताया, “अपे हों ईंग अड़ाः एंडाकिडिंगखन सेन लगापे ओंगलेतना जा?”

68दो सिमोन पतरस कता कुदातेरा, “ने परबू, अले इये एचेरेले सेन? ओरो टुटीगनेना हना जीवराः सरवन दो अनम एचेरे इदा। 69अले आम एचेरे बिसवासकेडखनले सुदीगोतेडा भगवानरीग सुद होड़ अनम हवे, माःआन।”

70दो ईसू कतातेड, “ईंग इनिंगते अपे बारहो होड़कूयिंग सुनावकेडपेःआ। हनारे हों अपे अते मी होड़ कलउरीग होड़ हवे।” 71(ईसू बारहो मूक चेलाकू अते मी होड़ सिमोन इसकरियोतीरीग बेटात जूदा बदीरेय कतातेरा। अरू हाँय तयोमरे ईसूय एचे साबतिरिया)।

നിലവിൽ തിരഞ്ഞെടുത്തിരിക്കുന്നു:

एहुना 6: kfp

ഹൈലൈറ്റ് ചെയ്യുക

പങ്ക് വെക്കു

പകർത്തുക