Matthew 2
2
Ighaleqetaaghneng Liitkaghllaget Esghaghyaghtuqangat Jesus
1Jesus allgeghaqngan Bethlehem‑emi Judea‑melngughmi, Herod umiilgulghii. Allgellghan kingunganeng ighaleqetaaghneng liitkaghllaget asivaghmeng kaatkat Jerusalem‑emun. 2Aapqughwaaqat, “Naagu taghnughhaq allgelghii umiilgat Jews‑et? Ighaleqetaagha esghaamaaghput asivaghmelluku enkaam manigughyaghtughaqaghput.”
3Umiilgem Herod‑em nagaqughluku teggellghiighllakaq, qamagtengngwaaghlutengllu Jerusalem‑eghmiit maligulluteng. 4Tagsiqlighteghluki qamaglluki chief priest‑etlu, apeghtughikayugetlu Liilightuusaneng aaptekii, “Nani Christ‑a allgeghyaghqaawa?”
5Kiimsiqaat, “Bethlehem‑emi Judea‑melngughmi. Uuknaliqistem whaten igaqegkaqaa:
6‘Elpek Bethlehem, Judah‑melnguq,
igleghutisteyaggiitneng Judah‑m ukavantelleghpigaanghituten,
qayughllak elpeneng taginaqnguuq igleghutista,
igleghutiyaghqaq yumneng Israel‑eghmiineng.’”
7Taagken Herod‑em aksaqluku tagsiqliqii ighaleqetaaghneng liitkaghllaget, liigiknaluku qavngaq aliighyuwhaaqaatanga ighaleqetaaq. 8Taagken pikii, “Bethlehem‑emun aghulaqlusi elngaatall ivaghteggu taghnughhaq. Naalkegkufsigu ungipaasaghtughnakefsinga, whangallu manigughyaghtughlleqaqa.”
9-10Tawaten umiilgem piyisteng igleghtekat. Esghaghlaataqaat ataasiq taana ighaleqetaaq asivaghmelluku, enkaam elngaatall quyateghllakat. Maligtekaat kenlanga aghuliillghanun taghnughhaam nengan quulngani. 11Iteghluteng mangteghamun esghaqaat taghnughhaq, naangallu Mary. Segesqughquulluteng maniguqaat. Taagken aqeftaghaateng qelpeghlluki tunquqaat tunusameng: gold‑meng, frankincense‑meng, myrrh‑meng.
12Taagken Kiyaghneghem qavangukun yitkii Herod‑mun uteghnifqiita pisqelluki enkaam aglaqat nunameggnun allatgun tumetgun.
Joseph‑enkut Qimallghat Egypt‑mun
13Ighaleqetaaghneng liitkaghllaget aghulaqsata, qavangukun Atanghem yaqulgan aliighvikluku Joseph pikaa, “Makelluten taghnughhaqlu naangallu anagutikek Egypt‑mun. Tamaanlleghhaten uteghniisqellemnun kenlanga qayughllak Herod‑em ivaghtesnaqaa taghnughhaq tuqutesnaluku.”
14Enkaam unugmi tawani Joseph‑em makelluni aghulaqutkakek taghnughhaqlu naangallu Egypt‑mun. 15Tamaantekat kenlanga Herod‑em tuqullghanun.
Enkaam apeghiiqaaguq Atanghem akuzitkegkaa uuknaliqistekun whaten,
“Tuqluqaqaqa ighneqa tagisqelluku Egypt‑meng.”
Taghnughhaghneng Tuququllghat
16Herod‑em liigiksamigu ighaleqetaaghneng liitkaghllagnun puughsimaniluni sakriteghllakaq. Taagken pilluwaghtet kayagtekii Bethlehem‑emun, uvitanganunllu tuquqiisqelluki qamaglluki mekelghiighhaat allgenghhaghhaghneng, maalghugegnun ayumiqulleghtutkalghiinun kenlanga. Tamaakut taghnughhaat nakmikegkaqii qayughllak ighaleqetaaghem allgellghaneng maalghugughlleghhiik ayumiqullghek, ighaleqetaaghneng liitkaghllaget apellghitni.
17Tawaten pilleghqun uuknaliqistem Jeremiah‑am uuknaliqellgha apeghiiqaq:
18“Ramah‑mi nagaquqaat leghaghllagaataq.
Rachel‑nguftuq qiyalghii avaqutaminun,
repall ilutughsaghyaghqaaghhaagpenani,
qayughllak qamaglluteng tuqulaghaatkat.”
Joseph‑enkut Uteghnilghiit Israel‑mun
19Joseph‑enkut Egypt‑melluki Herod tuqukaq, qavangukun Atanghem yaqulgan aliighvikegkaa Joseph 20pikaa, “Makelluten taghnughhaqlu naangallu uteghniitikek Israel‑mun, qayughllak tuqutinaqsalghiit taghnughhaghmeng tuqulaghaasimaat.” 21Enkaam Joseph‑em makelluni taghnughhaqlu naangallu aglaatkakek Israel‑mun.
22-23Iwernga Joseph‑em nagaqughluku nutaghaq umiilga Judea‑m, Archelaus‑nguniluku Herod‑em ighnegha, alingegkaq tawavek aglaneghmeng. Qavangukun Kiyaghneghem ungipaatkaa Joseph Judea‑tefqaan pisqelluku, enkaam Nazareth‑mun aglaqat Galilee‑melngughmun. Tamaantekat uuknaliqistet whaten pillghat, apeghiighesqelluku, “Messiah Nazareth‑eghmiinguyaghqaaguq.”
നിലവിൽ തിരഞ്ഞെടുത്തിരിക്കുന്നു:
Matthew 2: ess
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2018, Wycliffe Bible Translators, Inc. All rights reserved.
