Mateo 7
7
Mai one‑ya dai weeriyahi
1 # 7:1-2 Yeso hini ati‑ya kemo, Deoso tamine‑ya hiyare, mai ihi ai nokotoni nafiya, ai ene‑ya Deoso nokotoni nafiharibonane. “Mai‑ya dai kakoriyahi. Mai dai nofiya, dai‑ya mai kakoraboneni.
2Dai ene‑nima mai ihi naboneni. Mai ihi dai nokotoni nafiya, dai ene‑ya mai nokotoni nafihareboneni. Mai ihi dai nokotoni nafira, dai ene‑ya mai nokotoni nafihariraboneni.
3Dai owa ene dai kadiki nafimariyahi. Hini dai ene dai kadiki ba‑basi nibisahi. Awa hibakori dai owa noko‑ya boka, awa ibe dai noko‑ya foyana, awa hibakori‑ya dai bikanamaterani, awa ibe dai noko‑ya foyaro.
4‘Awa hibakori tiwa noko‑ya boka, soba·onamaboneni.’ Titerani, tiwa noko‑ya awa ibe foyaro.
Mai ihi towe bide toha mai‑ya tikanawatoriyahi, tiwa ene towe ba‑basi naro.
5Towe amatini. Tiwa noko‑ka awa ibe sobatinamahi. Tiwa noko amosawamiya, mai‑ka awa hibakori sobatinamaneni. Tiwa ene amosawami bahiya, mai one‑ya tikanawatohi.
6 # 7:6 Fariseo mai tamine‑ya i‑di Yeso hiyarane. Deoso ati amosabote‑ya mai nofara, boroko mai‑nima mai na, kasaro amosa‑ya boroko mai nofara‑nima mai na, boroko mai hama‑nima mai nineni. Yome mai‑ya Deoso‑ka yama ai daaterani. Boroko mai‑ya kasaro ai daaterani. Boroko mai‑ya kasaro dai daaniya, kasaro‑ya mai tainiya, dai‑ya mai wainaboneni.” Yeso ati nemarine.
Deoso‑ya dai haanahi
7“Deoso‑ya yama dai haanahi. Yama‑ya daanebonane. Deoso dai sibaniya, dai wasibonane. Deoso sawi‑kaya dai ati tokiya, nokobi‑ya dai haaniya, nokobi‑ya seekanebonane.
8Yama‑ya mai haana, mai‑ka yama‑bone mai‑ya koboteni. Yama‑ya mai sibana, yama‑ya mai wasiteni. Nokobi‑ya mai haana, nokobi‑ya mai seekiteni.
9Tika dao iyawa‑ya haane, atabo daatiterani.
10Aba‑ya tika dao haaneya, bataromaka daatiterani.
11Dai ene kote towe toha, dai‑ka ewe‑ka yama amosa‑bone dai daateni. Deoso ene amose hinama tohe, Deoso dai haaniya, yama amosa‑ya daanebonane, ai‑ka Abi neme‑ke toheri.
12Hini tiwa‑ya tinofi‑nima mai one‑ya tinofahi. Hini tiwati koboni‑ka mai‑ya tikasomiyahi. Fara haa‑nima dai niya, Mose‑ka yama hani ati dai tokadaba, Deoso ati‑ya mai mi‑mita‑mete mai‑ka yama hani ati dai tokadabahari teni.” Yeso ati nemarine.
Deoso‑ka hawi bide toha
13“Nokobi bide‑ya dai tokiyomiyahi. Yama hirini‑ka hawi nafe, nokobi nafiteni. Hawi nafe‑ya mai dami tokiya, mai kome fawaraboneni.
14 # 7:14 “Ai abarabone‑ka hawi” yama hani ati na, Deoso tabaro hawine tamine amane. Ai abarabone‑ka hawi bide toha, nokobi bide tohateni. Hawi bide‑ya mai fa‑famaraba na mai tokateni.” Yeso ati nemarine.
Mai ihi dai awa, mai atibodi dai watabone
15“Dai noko wadahi.
‘Deoso ati‑ya mi‑mita oda amani.’ Mai one ati naboneni.
Deoso ati‑mona mai ati na, keyehe‑ya mai hirina, Satanasi ati‑ya mai kaminabisateni.
16Awa bono ai awa, ade ai watoteni. Fara‑nima mai ihi ai awa, mai‑ka hidi oni ai watotene. Bisina ade‑ya ofa yanarihi, atiwa ede‑ya fiko yanarihi teni.
17Awa bono ade amosa, boni ai kabateni. Awa bono ade amosara, boni ai kabaterani.
18Awa bono ade amosa‑ya awa bono towe yanarihi, awa bono kabara ade‑ya awa bono amosa yanarihi, teni.
19Awa bono ade amosara ai tiiniya, ai sarikiteni.
20Awa bono ai awa, awa bono ade oni ai watoteni. Fara‑nima mai ihi ai awa, mai‑ka hidi oni ai watotene.
21‘Ayo, oka hidi amatini.’ Hiniya mai ati niya,
Okobi ati‑ya mai tokadabariya, Neme‑ke ai nafi‑ka hidi kitabote tohawahe‑ya mai sawiraboneni. Okobi ati‑ya mai tokadabiya, mai sawibisaboneni.
22Neme‑ke ai nafi‑ka hidi kitabote tohawahe‑ya mai nafi okadikaboneni. Owa‑ya mai haanabone,
‘Ayo, oda‑ka hidi amatini. Oda ene kita, tiwa tamine oda hiyara, madi towe mai‑ya oda kananihi namaroni, tiwa oni oda weyenaro.’ Mai ati naboneni.
23‘Dai oyoseramaroni. Dai tokahi, dai ene amosararo.’ Onaboneni.” Yeso ati nemarine.
Yobe‑ya mai wa‑wama
24“Owati dai mitamatasahi. Owati dai tokadabiya, yama‑ya dai watoteni. Yobe‑ya ai owa wamani wato‑nima dai neni. Ai owa yama‑ya wato, yati webote mese‑ya yobe‑ya wamane,
25 # 7:24-27 Boni, faha na Yeso ai ene‑ya kadikebona tamine amane. Yeso ati ai tokadaba ai ene‑ya Yeso kadikeya, ai‑ya weeni awirebonane. Yeso ati mai tokadabara mai ihi‑ya Yeso kadikeya, mai‑ya weeni kitebonane. yobe wamani hawa toheya, faha kaki nafe, faha fowe nafe‑ya yobe wafi, boni kita kobona, yati ihi yobe abi awirane.
26Owati‑ya dai tokadabara, yama dai wato awirani. Haa‑nima dai nineni. Ai owa yama‑ya watore, siki‑ya yobe‑ya wamane,
27yobe wamani hawa toheya, faha kaki nafe, faha fowe nafe‑ya yobe wafi, boni kita kobona, yobe sone, yobe nafi abane.” Yeso ati nemarine.
28Yeso hiyari hawa toheya, mai atibodi yama‑ya dika,
“Se! Yeso yama hani ati‑ya wato nafine.
29Mose‑ka yama hani ati‑ya mai ka‑kamina, haa‑nima mai ati ni awirani. Yama hani hidi ati‑nima Yeso ati nibisane.” Mai atibodi ati namaroni.
നിലവിൽ തിരഞ്ഞെടുത്തിരിക്കുന്നു:
Mateo 7: jaaNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
