Luka 20

Weke na a vəl vatwa a Yesuw aà mege duwa pampam a?

Mata 21:23-27; Markus 11:27-33

1A pat duwa ka, Yesuw a riŋ a dzeŋge a guma ŋgar i ga Mbulum batsah ŋana. A tsik a ter a bazlam ŋgwal ŋana. I təv ana a riŋ a tsik a ya ka, gà Əbay gà ɓəzla mandəva kuɗa a Mbulum nda gà ɓəzla medzeŋge məpala ahəm Mbulum nda gà bàba gà mburma ana ta kwere a gà Yahuda ya, tə daha a təv ŋgar, 2tə tsam ahər, ta gwaɗar: «Tsik a mər kwaŋ. Ki ge a duwa kamala taŋa ya ana, nda ndzəɗa weke? Weke na a slərra kər, a vəlak ndzəɗa ŋa dze ya?» 3Yesuw a gwaɗa a tar aaka: «Iye tekeɗe, i wiz aà kurum a duwa ilik mbaŋa te. Tsikwimiŋ dukw ilik. 4Weke na a slərra Yuhana aà metsìlwìɓè à mburma a yam a? Wànà Mbulum a, na a slər ahər ŋgat a, tsəna, mburma ya?» 5I dəba ŋa ya, gà mburma ata tə dza akaba bazlam ika magər tar, ta gwaɗaba: «Na kù gwaɗakwar kinehe ka: <Mbulum na a slər ahər ŋgat a> ka, a gweɗekwe a: <Dite aàla na kə̀ gəsum bazlam ŋgar tsiye?> 6Ama na kù gwaɗakwar asa: <Gà mburma na tə slər ahər ŋgat a> ka, a ge a ba tsa asa. Aɗaba gà asiŋ gà mburma ɗa i magər kwa hinne tə dzala Yuhana ka, mala məma à guma Mbulum ndzer, ta kelewa a kwa nda kur.» 7Gərəŋ gərəŋ a mà a tar dər. I dəba ŋa ya, ta gwaɗar aaka: «Mì sər tsa.» 8Yesuw a gwaɗa a tar: «Yawwa, iye tekeɗe ka, i tsik a kurum a wur ana a slərra iye, a viliŋ ndzəɗa aà megeye gà dukw aaha tserdze ya ɓav tsa mbeete.»

Bazlam minew gà ɓəzla makàslà gà dizl ɗaf duwa hinne

Mata 21:33-46; Markus 12:1-12

9I dəba ŋa ya, Yesuw a dza ba aà metsìkè guma ŋgar ndaka bazlam minew a gà mburma ata. A gwaɗa a tar: «Wele duwa a sàs gùvàh. A dzava aɗəm dizl ɗaf hinne. I dəba ŋa ya, wele ata a da a kwite ŋa a təv ŋa, a ndze a riŋ hinne. Gùvàh dizl ɗaf ŋgar ata à mìtehiŋa. A dza aɗəm gà mburma aà məfə̀rà ahər, dite aləka ta vəlar dukw gùvàh ŋgar əŋgal na aka màra ya.*fa* 10Tits a təv ana dizl ɗaf ata a nah a ka, wele ata a sləraha mburma a təv gà ɓəzla megemir ŋa, dite ka, tə̀ dzàraha dukw gùvàh ŋgar ata kuɗa. Aləka wele ata a daha, ta ŋgatar tsara ka, ta gə̀zl lehhè lele. Tə dalawa ŋgat, a mbəɗ gər a ma, ze ahər sìkwèɗ, duwa ihər tsa. 11I dəba ŋa ya asa, mala dizl ɗaf ata a sləraha mìsle ŋgiɗ. Aləka wele ata a daha, ta ŋgatar kataya asa ka, ta ger matawak, ta gə̀zl ŋgat, tə dalawa ŋgat mbaŋa. 12Ama mala dizl ɗaf ata a sləraha mìsle ŋgiɗ məmakər ŋa asa. Wele ata a daha i ŋgar ka, ta gayar mbəlak hinne, dite tə dalawa sarra mbaŋa asa. 13Aləka i dəba ŋa ya, mala dizl ɗaf ata a dzala, a gwa: <Dite i ge a ana, meme na kinehe ya? Ŋgulum i slirehe a kəla gà aaha mandərkwasla ŋa ya asa dzekwiŋ. Bəla ŋgat ka, ta gìser a zìrìwe te ya.> 14Aləka kəla ata a daha a təv gà mburma ata, ta ŋgatar tsara ka, ta gwaɗaba ika magər tar: <Naha ka, kəla ana dizl ɗaf aaha a ta mitser a mba ya. Kə̀ɗakwa iɗəm a, dite dizl ɗaf aaha ma ne biy kwa.> 15Tə daha, tə lamayarra i fataya tsihtsih, dite tə daha, ta kəɗ ŋgat fit a biye.»

I dəba ŋa ya kuɗa, Yesuw a gwaɗa a tar aaka asa: «Dite na kataya dze ana, mala dizl ɗaf aaha a ge a ana, meme na nda gà mburma ata ya, na aləka aka təv ana aka daha ya?» 16Ama a gwaɗa a tar: «A dehe a ka, a bets a iɗəm gà ɓəzla megemir dizl ɗaf ŋgar ata ya fit, dite à dze aɗəm a gà mìsle ŋgiɗ awiya ŋa asa.»

Ama gà mburma ata tə tsaraka bazlam ŋgar ata kataya ka, ta gwaɗar aaka: «Gà dukw ata tserdze ya ka, a ge a ba diydiy tsidze.» 17Yesuw a tsaraka bazlam tar ata kataya ka, a fə̀r aà tar, a gwaɗa a tar: «Dzalum aka dukw ana mewetse ŋa a riŋ i wakita ya, a gwa dze ana, meme? Aɗaba a gwa ka:

<Kur ata gà ɓəzla mazlazla ga tə zla,

ti yà iɗəm a dala ya ka,

tsaatsa ŋgwal kur te ibam.

Na a ne madəŋ kur ivaɗ ka, taŋa.>*fb*

18Wur ana aka dəɗ aka kur ata ya ka,

ŋgə̀slàf à ses a ikaba ŋgat a fit.

Ama na kur ata aka dəɗ aka wura ka,

a ŋgesl a ŋgat slìrets slìrets asa mbaŋa.»

Mandza hadam a batsah Əbay gà Ruma

Mata 22:15-22; Markus 12:13-17

19I fataya tsara ka, gà ɓəzla medzeŋge məpala ahəm Mbulum, nda gà Əbay gà ɓəzla mandəva kuɗa a Mbulum duwa, tə daha, ti yaha vatwa aà magəsa Yesuw, aɗaba tə sər ka, a fàfəl ndaka bazlam minew ata ka, agəra tar. Ama magəɗa gà mburma ana mayahaba gər ŋa i təv Yesuw a, a ge a tar. 20I dəba ŋa ya, tə dza ba aà mayaha manəsa bazlam i təv Yesuw a. Tə slər gà ɓəzla məbànàra bazlam aà mburma i gər a, a təv ŋgar. Gà mburma ata ka, ta ge aba kamala ana tar ka, gà ɓəzla ndzer ŋa ya. Dite ka, ta gə̀saraha ahəm aà are, nda mewize ahər duwa. A sàs a tar məvəla ŋgat ahər mala sik Əbay ana a kwere a ahəɗ gà Ruma ya. 21Tə daha, ta wiz ahər bazlam, ta gwaɗar: «Əbay, mì sər kər ka, mala ndzer ŋa. Ki ge a magəɗa a dukw ana gà mburma ti dzele a ya tsa. Ku mege tar gà ŋgwal ŋa ika miɗ mburma tekeɗe, ama kər ihər ki ɗif a à vatwa Mbulum ka, nda ndzer ŋa. 22Aɗaba taŋa, tsik a mər məpala ahəm Mbulum kwa kwaŋ, dze ana, wànà aka vəl vatwa aà mandza hadam a batsah Əbay gà Ruma ana a kwere a kwa ya, tsəna, aka vəl tsiye?» 23Ama Yesuw a sər a taraha aka dukw ana tə dzala i gər tar a tsara. A gwaɗa a tar: 24«Pètwimiŋ à kur siŋgwe kwaŋ.» Gà mburma ata tə daha, ta patar dər. A gwaɗa a tar: «Naha dze ana, foto weke, na ika siŋgwe aaha nda gà zləm ŋgar a?» Ta gwaɗar aaka: «Biy batsah Əbay gà Ruma ata ndeɗiŋa ya.» 25Yesuw a gwaɗa a tar: «Yawwa, dukw ana biy batsah Əbay gà Ruma ya ka, vəlumar dukw ŋgar. Ama dukw ana biy Mbulum a ka, vəlum taŋa a Mbulum mbaŋa.» 26Tə samata ka, ti sle aà meŋgete a bakal i təv ŋgar a tsa, agəra bazlam ata a tsik a tar ika miɗ mburma tserdze ya. Aɗaba bazlam ana a tsik a tar a ka, a za biy tar ana tə dzala i gər tar a fit. Ta gəs mifèfiler aaka asa tsa.

Mewize bazlam gà məməta ana ta mbilere a i biye ya

Mata 22:23-33,46; Markus 12:18-27,34

27I dəba ŋa ya, gà asiŋ gà *Saduki duwa tə dara a təv Yesuw a, aà mewize ihər bazlam a. Ama tar ka, gà mburma ana ta gwa ka, gà məməta ti sle aà mimbilere a i biye ya asa tsiye. Tə daha, 28ta gwaɗar: «Əbay mər, Musa a gwa i təv məpala ahəm Mbulum a ka: <Na wur ana a riŋ nda gà daala ihər, aka mət ze mewe ahər kəla ka, damər ŋgar ma zla daala ata madakwa ŋa. Dite ta wa kəla. Kəla ata mə̀ mà à gwala tsir ŋgar a bəra.>*fc* 29Aɗaba gà wele duwa a riŋ nda gà damər ŋgar təsəla ka, malkwara ŋana a zla daala. Aləka wele ata a mət ka, ze mewe ahər kəla. 30Mimbe gər ŋgar a zazəɗ à məkəs ata madakwa ŋa ya. Aləka wele ata ibam, a mət ka, ze mewe ahər kəla mbaŋa. 31Məmakər ŋana a zazəɗ dər asa. Aləka a mət mbaŋa asa ka, ze mewe ahər kəla asa. Kamala taŋa ya, tar ata təsəla ya, tə zazaɗa à madakwa məkəs ata tserdze ka, ta mata fit ze maŋgata ahər kəla. 32I dəba ŋa ya, məkəs ata tekeɗe, a mət asa mbaŋa. 33Taŋa dze ana, aləka i təv ana gà məməta ata ta mbilere a i biye ya ana, məkəs ata a ne a ana, biy weke ilik a? Aɗaba gà mburma ata nda gà damər təsəla ya ka, tàa lama ahər fit a?»

34Ama Yesuw a gwaɗa a tar aaka: «Bazlam mazla məkəs ka, biy gà mburma ana kinehe ika gər ahəɗ a. 35Ama gà mburma ana Mbulum a pala tar, ti ta mbilere a i biye ya, dite ti ti ndze a ika gər ahəɗ ana awiya ŋa a dere a ika miɗ a ka, ti dzele a bazlam mazla ba nda gà məkəs tsa. 36Aɗaba tar ka, ta mete a asa tsa. Ti ndze a ka, kamala gà gawla Mbulum a. Tàa ne gà ɓəza Mbulum, aɗaba tàa mbəlara i məməta ya aka ndəv. 37Ama kà sərakwa dər, gà məməta ta mbilere a i biye ya ka, aà bazlam Musa ana a tsik akahər ata ya. I huɗ bazlam ana a mà dər, meme na Mbulum a fàfəlarra i huɗ bagur adak ana dzaydzay ŋa ya. A ɗe dər, a gwa: Mbulum Abəraham, Mbulum Izak, Mbulum Zakup.*fd* 38A tsik taŋa ka, a gà mburma ana tar riŋ ti ndze a aà bəra hiywe ya, ku mege tàa mata tekeɗe ya. Aɗaba Mbulum ka, biy gà mburma ana tar riŋ ti ndze a aà bəra hiywe ya, tsəka, biy gà məməta tsa. Aɗaba gà mburma ŋgar tserdze ti ndze a aà bəra hiywe ika miɗ ŋgar ka, agəra ŋgat.»

39Gà asiŋ gà ɓəzla medzeŋge məpala ahəm Mbulum ana a riŋ i fataya, tə tsaraka kataya ka, ta gwaɗar aaka: «Kataya, kàa tsik ka, lele ndzer Əbay.» 40I dəba ŋa ya, ku weke aka wiz ahər duwa ilik asa tsa, ta ge magəɗa.

*Kiristi a pat aba ana, i gwala weke ya?

Mata 22:41-46; Markus 12:35-37

41Yesuw a gwaɗa a tar i dəba bazlam ŋgar ata ya asa: «Meme na ta gweɗe a, Kiristi ka, mala məmbàlà à mburma ana Mbulum a gwa, i slir a kurumaha a ya ka, gwala Dawda asa ya? 42Aɗaba Dawda nda gər ŋgar a gwa i wakita dimis mazàmbàɗà à Mbulum a ivaɗ ka:

<Mbulum a gwaɗa a Batsah ga ŋa:

Ndza aka tsèke ahər mezime gà,

43haa a təv ana Yàa dza gà ɓəzla gùvəl yak

aà huɗ sik yak dzekwiŋ a.>*fe*

44Ama Dawda ka, a zalar <Batsah ga ŋa> seyiŋ ka, dite meme na ta gweɗe a ka, kəla ŋgar asa ya?»

Mege metsehe nda təv gà ɓəzla medzeŋge

məpala ahəm Mbulum ana nda pàrsa ya

Mata 23:1-36; Markus 12:38-40

45I təv ana gà mburma ata tserdze ya, tar riŋ i təv Yesuw, tì dze a zləm a guma ŋgar a ka, a gwaɗa a gà ɓəzla mazazama ŋgat: 46«Gwim metsehe nda təv gà ɓəzla medzeŋge məpala ahəm Mbulum. Aɗaba gà mìsle ŋgiɗ iɗəm, tì sìweye a nda gà andiw zùbəl ŋa ka, ta waya məpàtà dər à ba tar aka miɗ mburma ɗekɗek. Gwim metsehe nda təv gà taŋa a sàs a tar ka, ta ge a tar wusa i liwiŋ mburma ka, say nda mazàmbàɗà à tar ɗekɗek a. Tàa da a gà ga mahàmà a Mbulum ka, ti yahawa i tar ka, say təv mendze ana ŋgwal ŋa ya, aà mendze dər aka miɗ mburma, dite ka, mburma ta fə̀r aà tar lele. Tàa ndze a təv mazəma ɗaf a liwiŋ mburma tekeɗe, say ti yehe a ka, təv mendze ana ŋgwal ŋa ya asa mbaŋa. 47Tì dzik a gà duwa aà gà madakwa gà məkəs a, nda haram. Dite ta heme a a Mbulum ika miɗ mburma kuɗa ka, vìrìɗìɗɗe, kərga tar ka, gà ŋgwal ŋa, tsaatsa pàrsa. Gà taŋa ka, seriye tar a ta ge a ka, mawùràba ŋa ndeyndey na i təv Mbulum a.»

നിലവിൽ തിരഞ്ഞെടുത്തിരിക്കുന്നു:

Luka 20: gnd

ഹൈലൈറ്റ് ചെയ്യുക

പങ്ക് വെക്കു

പകർത്തുക