Jẹnẹsisi 31
31
Isi Nke Mmanaị Kwasị Ọgụn
Jekọpụ A Gbapụnị Labanị
1Jekọpụ a nụ nị ụmụ-ikẹnnyẹ Labanị rị a sị, “Jekọpụ e werichanrịn ihiẹn ile nẹdi ẹnyi nwọn; ẹka nẹdi ẹnyi k'ọ nọ nwọn ihiẹn ndịnị ile o nwọn.” 2Jekọpụ e lepụhazị nị Labanị e gbehutọgụọ ẹka o te gi e sọn ẹ.
3Ya kẹ Osolobuẹ nọ sị Jekọpụ, “Lakin alị ndị nẹdi i wẹ; laburu ndị nke i; m k'a nọyen'i.”
4Ya Jekọpụ nọ zi wẹ d'a kpọha Rechẹlụ lẹ Lia, nị wẹ bịa ọfịa ebẹhụ ọ rị e lepụ anụ a ẹnya. 5Ọ nị sị wẹ, “A hụngụọ m'a nị nẹdi ụnụ arịzị e mẹ m k'o mẹ m mbụ, kanị Chuku hụn nẹdi m e fe nọyeni m anọyeni.
6“Ụnụ a marịngụọ nị e gigụọ m ndụn ile m nwọn rụnnị nẹdi ọnụ ọrụn; 7kanị nẹdi ụnụ e mẹgbuọlẹ m, mgbe iri k'o gbehutọpụ ihiẹn o te k'a kụ m, kanị Osolobuẹ anịnị a rụ m ẹhụ. 8Ọ sịhụ, ‘Ndị ile tụ ẹkịrịka k'a wụ ụgwọ ọrụn ị’, ihiẹn-uriri ile a mụma ndị tụ ẹkịrịka; ọ sịzị nwan, ‘Ndị vin ugbẹnrẹn k'a wụ ụgwọ ọrụn ị’, ogẹn ahụn ihiẹn-uriri ile a mụma ụmụ vin ugbẹnrẹn. 9Osolobuẹ e gigụọ ẹrịra napụ nẹdi ụnụ ihiẹn-uriri ẹ, we wẹ ye m.
10“Ogẹn anụ gi a gba, o nwọn nrọ m rọ, m nọ hụn nị mkpịn ndị rị a gbasọnmẹ anụ ndịnị wụsọnmẹ ndị vin ugbẹnrẹn lẹ ndị tụ ẹkịrịka mọbụ ntụpọ. 11Imẹ nrọ ahụn, mmọn-ozi Osolobuẹ nọ hị m, ‘Jekọpụ!’ M nọ za, ‘Elee m ebeni!’ 12Ọ nị sị m, ‘Lee ẹnya n'ị hụn nị mkpịn ile rị a gba anụ ndịnị wụ ndị vin ugbẹnrẹn lẹ ndị tụ ẹkịrịka mọbụ ntụpọ, makẹni a hụngụọ m ihiẹn ile Labanị rị e mẹ i. 13Mmẹ wụ Chuku, hụn bịa d'e kunrun i alị Bẹtẹlụ, ebẹhụ i nọ bu ọmụma tumẹ, hu udẹn-olivu ye elu ẹ, nọ ebẹhụ kwe m nkwa. Gha nwan alịnị pụ ozigbo; lakin alị ị.’ ”
14Ya Rechẹlụ lẹ Lia nọ sị Jekọpụ, “O nwọnzidẹ nwan ihiẹn nẹdi ẹnyi k'e ru ẹnyi ẹka ra? 15O werigụọ nị ẹnyi nwan kẹ abịamabịa? Ẹlẹdẹ orire sụọ k'o re ẹnyi, o rigụọdẹ ihiẹn wẹ gi ṅọnrin ẹnyi. 16Ẹghẹẹ, akụ-lẹ-ụba ile hụn Chuku napụ nẹdi ẹnyi wụ nke ẹnyi lẹ ụmụ ẹnyi; mẹ nwan ihiẹn ọwụlẹ Chuku sị ị mẹ.”
17Ya Jekọpụ nọ bu ụmụ a lẹ inyẹnmẹ ẹ che elu anyịnyan-mkpukpuke, 18wechanrịn ihiẹn-uriri ẹ ile che ihun, burukwama ihiẹn ile o nwọnhẹn imẹ alị Padan-aram n'ọ hụn ụzọ laburu Aziki nẹdi ẹ imẹ alị Kenaanị. 19Ogẹn Labanị gi jẹnmẹgụ d'a kọ atụnrụn a ẹṅẹnrẹn, Rechẹlụ nọ zunrun mmọn ndị nẹdi ẹ lẹ ezi-lẹ-ụlọ a a rụa. 20Jekọpụ nị mẹ Labanị onyẹ Aram ẹro: ọ gwanị Labanị n'ọ lakọ alakọ.
21Ọ nị weri ihiẹn ile o nwọn gbapụ — fetu Iyi Yufretisi, dọn ihun ẹgbẹrẹ Gilẹdị hụn rị elu òke.
Labanị A Chụrụ Jekọpụ, Osolobuẹ E Buche Ọnụ
22Hụn mẹ ẹ akpọhịn ẹtọ, wẹ nọ gwa Labanị nị Jekọpụ a gbapụgụọ. 23Ya ọ nọ weri umunẹ ẹ, gi akpọhịn ẹsa chụ Jekọpụ, kunrun ẹ alị Gilẹdị hụn rị elu òke. 24Imẹ abalị, Osolobuẹ nị bịa imẹ nrọ d'e kunrun Labanị, onyẹ Aram; sị a, “Asịkwọlẹ Jekọpụ ihiẹn ọwụlẹ, kẹ mma kẹ njọ!”
25Jekọpụ wẹ e rugụọ alị Gilẹdị hụn rị elu òke, ziẹngụ, nị Labanị lẹ umunẹ ẹ d'e kunrun ẹ; wẹ nwẹn nọ ziẹnzi ebẹhụ. 26Labanị nọ sị a, “Kị wụ ihiẹnni i mẹ? Y'e mẹ m ẹro, kịrị ụmụ m ikpoho lama nọkẹ ndị wẹ nwụnrụn imẹ agha? 27Kị haịn i gi mẹ m ẹro gi nzuzue gbapụ? Kị haịn i gilẹni gwa m? Nkẹ m'e gi ẹbụ lẹ oriri du i ụla, kpọye ẹ ụbọ lẹ ẹgede-chakachaka. 28Y'a nịdẹni m susu ụmụ-ụmụ m lẹ ụmụ m ọnụ gi sị wẹ o-hẹn-eki? Omumẹ onyẹ-nzuzu k'i mẹ ihiẹnni. 29M k'a s'ẹka rụ ị ẹhụ; kanị, Chuku Aziki nẹdi i gwa m oku imẹ uhinhin, sị m, ‘Asịkwọlẹ Jekọpụ ihiẹn ọwụlẹ — kẹ mma kẹ njọ!’
30“A marịnghọ m n'ị gbapụ makẹni iwe nẹdi i rị a da ị; kanị, k'ị zunrunzini mmọn m?”
31Ya Jekọpụ nọ sị Labanị, “Egun rị a tụ m; m ro n'i k'e gi ikẹn napụ m ụmụ-ị-ikpoho. 32Kanị, ị hụn mmọn ị ẹka onyẹ ọwụlẹ rị ebeni, wẹ gbu onyẹ ahụn! Nọ nwan idẹnya umunẹ ẹnyi ndịnị lele kẹ o nwọn ihiẹn i m gi; omẹni o nwọnghọ, y'e weri ẹ.” Kanị, Jekọpụ amarịn nị Rechẹlụ e zunrungụọ mmọn ndị hụ.
33Ya Labanị nọ banyesọnmẹ ọdụ Jekọpụ lẹ ọdụ Lia lẹ ọdụ ikpoho ẹbụọ ahụn rị iwe ụmụ a ẹbụbụọ d'a chọ mmọn ndị hụ, kanị ọ hụnnị wẹ. Ọ gha ọdụ Lia pụha, banye ọdụ Rechẹlụ. 34Rechẹlụ e weriọlẹ nwan mmọn ndị ahụn che imẹ ihiẹn w'e gi a nọdị elu anyịnyan-mkpukpuke. Ọ nọ nọdịkwasị wẹ. Labanị a gwalọchanrịn ihiẹn ile rị ọdụ ahụn — onwọnni ihiẹn ọ hụn. 35Rechẹlụ nọ sị nẹdi ẹ, “Baba, dodo ekpelẹ nị elihinini m'i ọtọ; m rị a hụn ogẹn m.” Ẹrịra kẹ Labanị dọn chọ mmọn ndị ahụn, ọ hụnnị wẹ.
36Olulu nọ bu Jekọpụ, ọ nọ du Labanị kpemẹ, “Elee eje-ihiẹn kẹ m mẹ? Kịnị wụ njọ m hụn i gi ufiri ẹ chụkọ m ọkụn-ọkụn? 37Y'a gwalọchanrịngụọ nwan ihiẹn m ile, kịnị k'ị hụn nwan wụ nke i? Wepụha a nwan ihun ndị nke i lẹ ndị nke m kẹni wẹ hannị ẹnyi eṅẹn!
38“A nọgụọ m ẹka ị ọrọgbọ ahụa ọgụn: imẹ ekwọntuni kẹ atụnrụn ị kẹ ewu i; ewerituni m ebulu ọwụlẹ imẹ ihiẹn-uriri i; 39ebulụatuni ni m'ị ozun anụ ị ọwụlẹ nị eje-anụ tagbu ẹ; hụn nkẹ m'e gi bulụan'ị ya, e gi m nke m nọkin ẹnya a. Kẹ wẹ zunrun ẹ ebe eki rị elu-o kẹ wẹ zunrun ẹ imẹ abalị-o, ẹka m kẹ ị nọ a chọ a. 40Ogẹn ahụn ile, efinnaị anwụn a malịlọ m ẹhụ; imẹ abalị oyi a tụ m ntan, tụ m imọn; onwọnni ogẹn ụran gi e buru m. 41Ẹrịra k'o mẹ m ọrọgbọ ahụa ọgụnnị m nọ iwe i. M gi ahụa mmẹnọ fe i kẹni m lụrụ ụmụ ị ikpoho ẹbụọ, m nọzị gi ahụa isin fe i kẹni i gi ihiẹn-uriri i kwamanị m, kanị y'e mẹgbu m — gbehutọ ụgwọ ị te k'a kụ m mgbe iri! 42Omẹni ẹlẹ hụn Chuku hụn nẹdi m e fe nọyeni m — Chuku Ebraham, Chuku hụn Aziki nẹdi m a tụ egun ẹ, o te nwọnni ihiẹn nkẹ y'e ye m! Chuku a hụngụọ afụnfụn ile m rị a ta lẹ okẹn ọrụn m ile, ya haịn o gi jụgbọ ị hụn uhinhin.”
43Ya Labanị nọ sị Jekọpụ, “Ikpoho ndịnị wụ ụmụ m; ụmụ ndịnị yụ nị wẹ wị wụ ụmụ m; ihiẹn-uririni ile wụ nke m; ihiẹn ile ị rị a hụn ebeni wụ nke m. Kanị, kị m'e mẹ nwan banyeni ụmụ m ndịnị lẹ ụmụ ndịnị wẹ mụ? 44M chọ nwan nị mmẹ lẹ yụ kwetarị nkwa: ịya k'a wụrụ ọshẹri ẹgbata mmẹ lẹ yụ.”
45Ya Jekọpụ nọ bu ọmụma tumẹ. 46Jekọpụ nị sị ndị nke ẹ, “Kpọnkikomẹ ni ọmụma”, ya wẹ nọ buhẹsọnmẹ ọmụma, dọnshi ọmụma ndị ahụn elu; wẹ azụụn ẹbụbụọ hụ nọ nọ ebẹhụ rigbama ihiẹn-oriri wẹ gi e kwetarị nkwa. 47Ya Labanị nọ kpọ ebahụn “Jẹga-Sahaduta”, Jekọpụ a kpọ a “Galidi” — ẹfan ẹbụbụọnị wụ “Elumelu Shịa-ẹri”.
48Ya Labanị nọ sị, “Elumelu ọmụmanị wụ ọshẹri hụn rị ẹgbata mmẹ lẹ yụ tannị.” Ya haịn wẹ gi kpọ a Galidi. 49W'a kpọzịkwọ elumelu ọmụma hụ Mizpa, makẹni Labanị sị, “Osolobuẹ ya lemẹ mmẹ lẹ yụ ogẹn onyẹ-onyẹ e gi jẹnmẹgụ nke ẹ. 50I mẹja ụmụ m ndịnị ị rị a lụ mọbụ lụrụ ndị ọzọ cheni wẹ — nyanhankwọ nị Chuku wụ ọshẹri, ọsụọn'a n'o nwọnzini onyẹ ọzọ rị a hụnnị ẹnyi.”
51Ya Labanị nọ sị Jekọpụ, “Lee elumelu ọmụmanị lẹ ọmụma hụnnị m tumẹ hụn rị ẹgbata mmẹ lẹ yụ. 52Elumelu ọmụmanị lẹ hụnnị m tumẹ wụ ọshẹri nị mmẹ nwẹn aghafekọ elumelu ọmụmanị bịa ebe ị rị d'a chọ ị njọ; yụ nwẹn aghafekọ elumelu ọmụmanị lẹ hụnnị m tumẹ bịa ebe m rị d'a chọ m njọ. 53Chuku Ebraham lẹ mmọn Nahọ lẹ mmọn nẹdi wẹ, uwẹ k'a hannị ẹnyi eṅẹn.” Ya Jekọpụ nọ gi ẹfan Onyẹ hụ Aziki nẹdi ẹ a tụ egun ẹ, ẹfan Osolobuẹ, kwe nkwa; 54ọ nọ nọ ebẹhụ imẹ alị Gilẹdị rị elu òke chụn ẹjan, kpọ ndị nke ẹ oriri. E rigụ wẹ, wẹ nọ ranhịn elu ugu ebẹhụ. 55Eki e fọn ụzọ-ọtụntụn, Labanị nọ lihi, susu ụmụ-ụmụ a lẹ ụmụ a ikpoho ọnụ, gọzi wẹ. Ọ nọ la wẹ tọ, lama.
നിലവിൽ തിരഞ്ഞെടുത്തിരിക്കുന്നു:
Jẹnẹsisi 31: ikkBI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.
