Jẹnẹsisi 19
19
Isi Nke Mmitenẹi
Njọ Ndị Sodọm
1Ogẹn ẹnyasị kẹ ndị mmọn-ozi ẹbụọ ahụn gi ru Sodọm; Lọtụ nọdị alị ọnụ-mgbọn obodo ahụn — ebẹhụ wẹ nọ e zu. Ogẹn Lọtụ gi hụn wẹ, ọ nọ lihi ọtọ jẹnmẹ d'e kunrun wẹ; o hulụa, kele wẹ, 2sị wẹ, “Ndị di-nwọnni m, dodo ni, banhangụ nị iwe odibo ụnụ d'a ranhịn uhinhinni, ụnụ a chanbelụa ụkụ ụnụ; eki fọn ụnụ a zọ ụzọ jẹnmẹ ebe ụnụ jẹnkọ; eki fọn ụnụ a zọ ụzọ jẹnmẹ ebe ụnụ jẹnkọ.” Wẹ nọ sị a, “Mba, ẹnyi k'a ranhịn ogbe ebeni.” 3Kanị, ọ rịọkẹnmẹ wẹ; wẹ nọ kweri sọnmẹ ẹ shi iwe ẹ. Ọ nọ mẹmẹni wẹ ihiẹn-oriri hi ogbe, mẹmẹdẹni wẹ brẹdi yisti rịlẹni ozigbo-ozigbo. Wẹ nọ ri.
4Kanị, nị wẹ d'a ranhịn, ikẹnnyẹ ile rị Sodọm nọ fihunmẹ iwe Lọtụ, kẹ ikorọbịa kẹ ndị ẹgẹdi, onwọnni onyẹ pụn'a. 5Wẹ nọ hịma Lọtụ, sị a, “Elebe kẹ ikẹnnyẹ ndị nẹi bịa ẹnyasịnị d'a hụn ị rị? Wepụha wẹ nị ẹnyi mẹ mgba wẹ.”
6Lọtụ nọ pụha d'e kunrun ikẹnnyẹ ndị ahụn, gụnma enwẹn ẹ ye ezi; 7sị wẹ, “Dodo ni umunẹ m, emẹlẹ ni ihiẹnni jọgbu enwẹn ẹ! 8Lee ni ẹnya, m nwọn ịgbagba ẹbụọ hụn kelẹni marịn ikẹnnyẹ; dodo ni, nị m wepụhanị ụnụ wẹ, ụnụ e gi wẹ mẹ ihiẹn sụọnị ụnụ. Ka emẹlẹ ni ikẹnnyẹ ndịnị ihiẹn ọwụlẹ, makẹni ẹka m kẹ wẹ rị ebe o mẹni iwe m kẹ wẹ rị.” 9Kanị, wẹ nọ sị, “Pụnị ẹnyi ụzọ! Ledẹ ni abịamabịa nwẹn k'ọ rị nwan a gwa ẹnyi ihiẹn ẹnyi k'e mẹ! Ẹnyi mẹ i ihiẹn ẹnyi k'e mẹ i kikẹnni, nke i a ka nke wẹ njọ!” Ya wẹ nọ numẹ Lọtụ ikẹn-ikẹn, kẹ ya kẹ ẹkwe, a chọ nị wẹ nukpọpụ a.
10Kanị ikẹnnyẹ ẹbụọ ndị ahụn rị imẹ ụlọ nọ tịnpụha ẹka, dọ Lọtụ ye mmụlọ, gụnma ụzọ. 11Ya wẹ nọ mẹ ẹnya kpuchanrịn ikẹnnyẹ ndị ahụn ile rị ọnụmụzọ ishi, kẹ ndị uku kẹ ndị nta, amarịnzịnị wẹ ebe ọnụmụzọ ahụn rị.
Lọtụ A Hụn isi
12Ya kẹ ikẹnnyẹ ẹbụọ ahụn wụ ndị mmọn-ozi nọ sị Lọtụ, “O nwọnzi onyẹ ọzọ i nwọn imẹ obodoni? Rịkẹ ndị-ịgọ ị ikẹnnyẹ mọbụ ụmụ-ikẹnnyẹ mọbụ ụmụ-ikpoho mọbụ onyẹ ọwụlẹ i nwọn imẹ obodoni? Werichanrịn wẹ ile n'i gha alịnị pụ — 13nị ẹnyi e d'e tikpọ alịnị, makẹni eje-ihiẹn rị a kpọ imẹ alịnị a karịọlẹ ẹka ebe Osolobuẹ rị! Osolobuẹ zi nwan ẹnyi d'e tikpọ a.” 14Ya Lọtụ nọ jẹn d'e kunrun ndị-ịgọ a hụn badọn ụmụ a ikpoho, sị wẹ, “Ozigbo ni, gha nị alịnị gbapụ, makẹni Osolobuẹ e d'e tikpọ alịnị!” Kanị ndị ịgọ a weri ẹ nị egu k'ọ rị e gu.
15Ogẹn eki gi fọn, ndị mmọn-ozi ahụn nọ hụhụma Lọtụ, a sị a, “Ozigbo, weri nwunyẹ i lẹ ụmụ ị ikpoho ẹbụọnị rị ebeni pụ; ụnụ apụnị, afụnfụn lalanị alịnị k'e bu ụnụ ri.” 16Kanị Lọtụ hụ a lọkpụn; ya ikẹnnyẹ hụ nọ zu ẹka ye Lọtụ lẹ nwunyẹ ẹ lẹ mmụ a ikpoho ẹbụọ, dọkpụnpụ wẹ alị hụ, makẹni Osolobuẹ chọ n'o mẹni ẹ omikẹn; 17E wepụhagụ wẹ wẹ imẹ obodo, mmọn-ozi ohu nọ sị wẹ, “Gbama nị ọsọ, makẹ isi ụnụ gha a tọ a! Elekwọlẹ ni ẹnya azụụn mọbụ kụsị ebe ọwụlẹ imẹ alị-aradannị! Ka gbashi ni elu òke, amamgbe isi ụnụ a tọ a!”
18Lọtụ sị, “Mba nụ, Di-nwọnni m; dodo, 19y'e mẹgụọnị odibo i ọhụnma; y'e mẹgụọnị m okẹn omikẹn ebe ị nọ zụọpụha ndụn m — kanị, asakọkwọ m ẹka gbashi elu òke ndị ahụn; egun rị a tụ m, amamgbe eje-ihiẹnni e kunrun m m gini d'e ru ebẹhụ, a nwụntọ m imẹ ẹ! 20Lee ẹ, alịnị mẹ ẹkẹrẹ rị ebeni hụghọ nsue w'a gbashi; hụnnị ashịanị nwan ẹfọ; nị m gbashi ẹ nwan, ẹlẹ alị mẹ ẹkẹrẹ rọ? Nị m gbashi ebẹhụ kẹni m hụn isi wanahịn!” 21Ọ nọ sị Lọtụ, “Ọ hụghọ mma, m k'e mẹzin'i ọhụnmanị, etikpọkọ m obodo ahụn ị rị e ku oku ẹ. 22Gbashi nwan ebẹhụ ozigbo-ozigbo, nị asa m ẹka mẹ ihiẹn ọwụlẹ d'e ru mgbe i rugụ alị ahụn.”
Ịya haịn wẹ gi kpọ alị ahụn “Zụa#19.22 Asụsụ Hibru, Zụa wụ alị mẹ ẹkẹrẹ..”
Kẹ Osolobuẹ Dọn Tikpọ Sodọm Lẹ Gomora
23Anwụn rị a wa kẹ Lọtụ ru Zụa; 24ya kẹ Osolobuẹ nọ gi ẹka a gha elu-igwee hu nsịn-ẹnyanwụn lẹ ọkụn kpu alị Sodọm lẹ alị Gomora nọkẹ mirin rị e zueni; 25tikpọpụ obodo ndị ahụn lẹ ẹgbẹrẹ hụ ile rị alị aradan hụ lẹ ndị ile bi imẹ obodo ndị ahụn lẹzi ihiẹn ile rị e sue alị. 26Kanị nwunyẹ Lọtụ hụn rị a azụụn nọ lee ẹnya azụụn, ọ nọ họnrin ọkpụrụkpụ nnu mawuruni.
27Eki e fọn, Ebraham nọ zọshi ebẹhụ ọ nọ turu Osolobuẹ ihun. 28Ọ nọ lee ẹnya azụụn ahụn Sodọm lẹ Gomora lẹ alị aradan ahụn ile rị, ọ nọ hụn kẹ alị ahụn ile rị a lọ ẹnwụnrụn nọkẹ ẹnwụnrụn ẹgboko wẹ yi ọkụn.
29Ẹrịra k'o gi mẹ ni ogẹn Osolobuẹ gi tikpọ obodo ndị ahụn rịsọnmẹ alị aradan Ọdanmgbugbu Jọdanị, ebẹhụ Lọtụ jẹn d'e biri, ọ nyanhan Ebraham, gi ufiri ẹ wepụ Lọtụ imẹ ndị wẹ tikpọ.
Ebe Ndị Mụabụ Lẹ Amọnụ Gha Pụha
30Omẹgụ, Lọtụ nọ gha Zụa pụ, shi elu òke, ya lẹ ụmụ a ikpoho ẹbụọ ahụn, makẹni egun a nịn'a nọdị Zụa; e ru wẹ ebẹhụ, wẹ nọ nwan biri imẹ okporo ugu.
31Ọ nọbe, nwa ibuzọ a nọ sị hụn nta, “Nẹdi ẹnyi a kagụọ ẹgẹdi, bụ ikẹnnyẹ arịzị imẹ ụwa hụn k'e sọn ẹnyi ranhịn kẹ ịhịan ile rị imẹ ụwa e mẹ. 32Bịa nwan nị ẹnyi mẹ nẹdi ẹnyi ra manya rakarị enwẹn ẹ, nị ẹnyi hụn ụzọ du ẹ ranhịn, kẹni ẹnyi gha ẹka nẹdi ẹnyi mụ ụmụ k'e bikin ugbẹ ẹnyi.” 33Ya wẹ nọ mẹ nẹdi wẹ rakarị enwẹn ẹ manya uhinhin ahụn. Nwa a hụn kanị nọ bu ụzọ banye, du nẹdi ẹ ranhịn. Nẹdi ẹ amarịn ogẹn o gi dinẹ, ọ marịn ogẹn o gi lihi.
34Eki e fọn, hụn kanị nị sị hụn nta, “Lee ẹ, mmẹ sọn nẹdi m ranhịn imẹ uhinhin ụnyanhụn; ẹnyasị tanị, nị ẹnyi mẹzi ẹ rakarị enwẹn ẹ manya, yụ nwẹn a banye d'e du ẹ ranhịnzị, kẹni ẹnyi gha ẹka nẹdi ẹnyi mụ ụmụ k'e bikin ugbẹ ẹnyi.” 35Wẹ nọzị nwan mẹ nẹdi wẹ rakarị enwẹn ẹ manya uhinhin ahụn; hụn nta nọ jẹn, du ẹ ranhịn; kanị nẹdi wẹ amarịn ogẹn o gi dinẹ, ọ marịn ogẹn o gi lihi.
36Ẹrịra kẹ mmụ Lọtụ ẹbụbụọ dọn tụrụnị nẹdi wẹ imẹ. 37Hụn ibuzọ nọ mụ okẹnnyẹ, gụn a “Mụabụ.” Mụabụ wụ nẹdi ndị w'a kpọ ndị Mụabụ tanị. 38Hụn nta nọ mụzịkwọ okẹnnyẹ, gụn a, “Bẹn-amị.” Bẹn-amị wụ nẹdi ndị w'a kpọ ndị Amọnụ tanị.
നിലവിൽ തിരഞ്ഞെടുത്തിരിക്കുന്നു:
Jẹnẹsisi 19: ikkBI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.
