Jẹnẹsisi 13
13
Isi Nke Mmẹtọ
Ebram Lẹ Lọtụ E Kebe
1Ya Ebram nọ gha alị Ijiptu pụ, shi Nẹgẹvụ, ya lẹ nwunyẹ ẹ lẹ ihiẹn ile o nwọn, lẹzi Lọtụ nwa-nwẹnẹ ẹ.
2Ebram nwọn anụ-ụlọ#13.2 Ihiẹn-uriri. lẹ siliva lẹ goru ọda-ọda.
3Ọ nọ gha Nẹgẹvụ kwasọnmẹ d'e ru Bẹtẹlụ, kwaru ẹgbata Bẹtẹlụ lẹ Aị — ebahụn o tumẹ ọdụ a isi-ibuzọ, 4ebahụn ọ rụnye ukpo nchụn-ẹjan ibuzọ ọ rụn; ya ọ nọ nwan nọ ebahụn kpọku ẹfan Osolobuẹ.
5Lọtụ hụn rị e sọnhunmẹ Ebram nwọnzikwọ efin lẹ atụnrụn lẹ ewu lẹ ndị ọ kị lẹ ndị rị iwe wẹ.
6Alị hụ wẹ bi e ezuzini wẹ ẹbụọ, makẹni ihiẹn wẹ nwọn e bukẹ ọda; asazịnị wẹ ẹka bi ụzọ ohu — 7ikpe nọ semẹni ndị e duni Ebram anụ lẹ ndị e duni Lọtụ anụ. Ndị Kenaanị lẹ ndị Pẹrẹzi bizikwọ alị ahụn ogẹn hụ.
8Ebram nọ sị Lọtụ, “Ikpe y'e selẹni mmẹ lẹ yụ, y'e selẹni ndị e dun'i anụ lẹ ndị e duni m anụ, makẹni ẹnyi wụ umunẹ. 9Ẹlẹ alị wụ hụnnị ile ị rị e legha? Nị ẹnyi kebe: i shi ẹka-nni, e shi m ẹka-ekpẹn; i shi ẹka-ekpẹn, e shi m ẹka-nni.”
10Lọtụ e lee ẹnya, hụn a nị alị-aradan Jọdanị, ibe sikọ Zụa, e nwọnhẹn mirin ọhụnma-ọhụnma nọkẹ ugbo-nta Osolobuẹ, nọkẹ alị Ijiptu. (Osolobuẹ eke tikpọ alị Sodọm lẹ Gomora ogẹn ahụn.) 11Ya Lọtụ nọ hanrịn alị-aradan rị ọdanmgbugbu Jọdanị, dọn ihun nkọ ọwụwa ẹnyanwụn. Onyẹ-onyẹ imẹ wẹ ẹbụọ nọ warị ẹbụ a: 12Ebram e biri alị Kenaanị, Lọtụ nkẹ e biri obodo shịa ẹfọ rị alị-aradan, kwarị ibu ẹ jẹn d'e biri ẹhụ obodo Sodọm. 13Bụ ndị Sodọm e mẹ njọ ọda-ọda. W'e mẹ ihiẹn Osolobuẹ sị w'e emẹlẹ e mẹshi ẹ ikẹn.
14Ogẹn Lọtụ gi ghagụ ebe Ebram rị pụ, Osolobuẹ nọ sị Ebram, “Gha nwan ebahụn ị rị lehunmẹ ẹnya: lee ẹnya ẹka-nni lẹ ẹka-ekpẹn, ihun lẹ azụụn: 15M k'e we alịnị ile ị rị e legha ye yụ lẹ mmụ ị werichanrịn. 16M k'e ye i ụmụ bu ọda nọkẹ ẹjan rị alị, omẹni a sa wẹ ẹka gụn ẹjan rị alị, ya wụ nị a sa wẹ ẹka gụnmarịn ụmụ ị. 17Buli nwan, n'ị ghahunmẹchanrịn alịnị k'ọ han — usue ẹ lẹ ụshịa a, m rị e ye y'ẹ.”
18Ya Ebram nọ tọtu ụlọ a w'a kpụkpọrị, kwarị, jẹn d'e biri ebẹhụ okẹn osisi Mamre rị imẹ alị Hibrọnụ, nọ ebahụn rụnnị Osolobuẹ ukpo nchụn-ẹjan.
നിലവിൽ തിരഞ്ഞെടുത്തിരിക്കുന്നു:
Jẹnẹsisi 13: ikkBI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.
