Yohana 18
18
1Aho Yesu wamalaga kuyomba genaya wafumaga na vahemba vakwe na vavukaga kamongo Kedroni, henaho yavagiho bustani, na mwenumo wingilaga na vahemba vakwe. 2Alisi Yudasi, mugambi wakwe, nawe wahamanikaja henaho, kunguno Yesu na vahemba vakwe vivilingaga kingi henaho. 3Haho Yudasi wayisolaga mbuto ya valugaluga na vakumba va vahozya vahanya na va Vafarisayo, na wafikaga henaho, vizanile na tala na fyenge na masilanga. 4Yesu wavagi agamanikizye gose genayo gakumukwilila, wafumaga na wavawilaga, Mulimukova nani? Vamwitavukaga, Yesu muna Nazareti. 5Yesu wavawilaga, Honene mwene. 6Na Yudasi, mugambi wakwe, nawe wimaga hamohene navo. Aho wavawilaga, Honene mwene, vafwelaga kunuma na vagwaga hasi. 7Haho wavavuzaja hangi, Mulimukova nani? Navo vitavukaga, Yesu muna Nazareti. 8Yesu witavukaga, Namuwilaga inwe ati honene, ulu haho mulinkova nene muvaleke venavo 9vaje, kigele muhayo gufikile, hogwene wayombaga, Mugati na venavo veve wampaga nkamuzimizizye 10ninga umo ngʼo. Simoni Petro wavagi na lupanga na walusopolaga na wamutulaga mukumba wa muhozya muhanya na wamutinaga itwi lya mulila, na lina lya mukumba lyavagi Malko. 11Haho Yesu wamuwilaga Petro, Somekaga lupanga mwigaya! Kineneko hochene Vava wampaga nene ndeke kukinwa?
12Haho valugaluga na muteko na vakumba va Vayahudi vamudimaga Yesu na vamutungaga, 13na vamufilaga hambele kumwa Anna, homwene wavagi mukwiye wamwa Kayafa, homwene wavagi muhozya muhanya wa mwaka gwenugo. 14Alisi Kayafa wavagi mwenuyo wavapaga Vayahudi ndaka ati, yilivela munhu umo avafwile va chalo.
Na Simoni Petro wamulondaga Yesu na muhemba ungi. 15Na musumba mwenuyo wavagi amanikizivilwe na muhozya muhanya na wingilaga hamohene na Yesu mu ngomwa ya muhozya muhanya, alisi Petro wimaga ha muzigo. 16Haho muhemba uyo ungi, mwenuyo amanikizivilwe na muhozya muhanya, wafumaga na wayombaga na mulindilizi wa muzigo na wamwingizaja Petro mugati. 17Haho mukima, mulindilizi wa muzigo, alimuwila Petro, Kinahe, veve uli umo wa vahemba va 18munhu mwenuyu? Nuyo wayombaga, Nene ngʼo. Na vakumba na valugaluga vimile valiwotela moto gwa makala, hogwene vagupembaga kunguno ya mbeho; nawe Petro wavagi hamohene navo aliwotela.
19Haho muhozya muhanya wamuvuzaja Yesu kunguno ya vahemba vakwe na kunguno ya vuhembeki wakwe. 20Yesu wamwitavukaga, Nene nayombile hape hambele na liwelelo, nahembekaga nsiku zyose mu sinagogo na mwisengelo henaho Vayahudi vose valivilinga, na nkayombile muhayo mu lwiviso. 21Kuki ulimbuzya nene? Uvavuzye venavo vigilwe genayo nayombaga navo; 22lolaga, venava valimanicha genayo nayombaga. Aho wayombaga genaya umo wa vakumba, homwene wimaga bihi, wamutulaga Yesu ipi, uhaya, Veve ulimwitavuka muhozya muhanya syenisyo? 23Yesu wamwitavukaga, Ulu nayombaga sivi, usangilwe ku genaya gali mavi; alisi ulu nayombaga sisoga, kuki ulintula? 24Haho Anna wamutumizaja Yesu atungilwe kumwa Kayafa, muhozya muhanya.
25Alisi Simoni Petro wimaga henaho aliwotela. Haho vamuwilaga, Kinahe, veve naʼho uli umo wa vahemba 26vakwe? Mwenuyu wakanaga, uhaya, Nene ngʼo. Umo wa vakumba va muhozya muhanya, homwene wavagi muduguye wa mwenuyo Petro wamutinaga 27itwi, aliyomba, Nkakuwine veve mu bustani hamohene nawe? Haho Petro wakanaga hangi, na itungo lyenili ikungulume lyahilaga.
28Haho vamufumaja Yesu kumwa Kayafa na vamufilaga mu numba ya Serikali, na yavagi ndiyu; na venekili vakingilile mu numba ya Serikali, kwigela ngʼo vagilule mwiko gwavo, kigele vakovole kulya Pasaka. 29Haho Pilato wafumaga hanze kuwavo, uhaya, Mbulano ki mulileta kwigulya na munhu mwenuyu? 30Avo vitavukaga na vamuwilaga, Ulu mbe akavile muvezya tuvi mbe tukamuletile kuwako. 31Haho Pilato Wavawilaga, Mumusole na mumuyangule hanuma na 32ngʼhama yinwe. Vayahudi vamuwilaga, Iswe tukavile na luhusa kumuvulaga munhu; kigele muhayo gwamwa Yesu gufikile, hogwene wayombaga kolecha lufu ulo alafwe.
33Haho Pilato wingilaga hangi mu numba ya Serikali na wamwitanaga Yesu na wamuvuzaja, Veve uli mutemi wa Vayahudi? 34Yesu witavukaga, Veve uliyomba genaya kufuma kuwako mwenekili, ninga vangi vakuwilaga genaya kunguno yane? 35Pilato witavukaga, Kinahe, nene ndi Muyahudi? Va muchalo chako na vahozya vahanya vakuletaga kuwane; veve witagaki? 36Yesu witavukaga, Vutemi wane vukavile wa liwelelo lyenili. Ulu vutemi wane mbe wavagi wa liwelelo lyenili vakumba vane mbe valasanaga, kwigela ngʼo nafumiwe mu makono ga Vayahudi; alisi lelo vutemi wane vukavile wa henaha. 37Pilato wamuwilaga, Sisyo loleyene veve uli mutemi? Yesu witavukaga, Kitisi veve wayombaga: nene ndi mutemi. Nene navyalilwe ha cheniki, na ha cheniki nizile henaha mu liwelelo, kigele nasangilwe kunguno ya hanayene; homwene ali wa hanayene aligwigwa muzwi gwane. 38Pilato wamuwilaga, Hanayene yili ki?
Na aho wayombaga genaya wafumaga hangi ku Vayahudi na alivawila, Nene nkaguwine musango hawakwe. 39Alisi inwe muli nacho kitilwe namutungulile umo ha Pasaka; mulikova namutungulile inwe mutemi wa Vayahudi? 40Na vose vahamukaga hangi, vuhaya, Ngʼo mwenuyu, sumbwa Baraba. Nawe Baraba wavagi mudumuzi.
നിലവിൽ തിരഞ്ഞെടുത്തിരിക്കുന്നു:
Yohana 18: Nym51
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Nyamwezi New Testament © Bible Society of Tanzania, 1951.
