Yohana 12
12
1Nsiku mkaga hambele na Pasaka Yesu wizaga ku Betania uko wavagiko Lazaro homwene wamuhembukaja ku lufu. 2Haho vamuvezezaja chakulya cha mhindi kwenuko na Marta wavavonekaja, na Lazaro wavagi umo mugati na venavo vikalaga hamohene nawe hakulila. 3Na Maria wasolaga ratli yimo ya maguta masoga muno ga narada, na ga mupango muhanya, na wagavilaga magulu gamwa Yesu na wagapyagulilizaja magulu gakwe na nzwili zyakwe; na numba yokalaga na vumotu wa maguta. 4Alisi Yudasi Iskariote, umo wa vahemba vakwe, homwene alamugambe, wayombaga, 5Kuki maguta genaya gakaguzivilwe ku denari magana 6adatu na kuvapa vapina? Alisi akayombile genaya kunguno wavalavagwa vapina, sumbwa kunguno wavagi mwivi, na kunguno wagusombaga mufuko gwa mapesa na wivaga ku genayo gatulilwemo. 7Yesu wayombaga, Umuleke, kigele agatule ku lusiku lwa kuzikwa kwane. 8Kwisi vapina muli navo hanahana, alisi mukavile na nene hanahana.
9Haho mbuto nhanya ya Vayahudi vamanikaja, ati aliko vizaga, ngʼo kunguno yamwa Yesu duhu, sumbwa kigele vamuvone Lazaro homwene wamuhembukaja ku lufu. 10Na vahozya vahanya valomaga ndaka ya kumuvulaga Lazaro mwene, 11kunguno Vayahudi vingi vajagako kunguno yakwe na vamusanizaja. 12Hawangaluke aho mbuto nhanya ya vanhu hovene vizile ku sikukulu vigagwa ati Yesu izile ku Yerusalema, 13vagasolaga matambi ga mitende na vafumaga kumusanganila na vahamukaga, Hosana, adosiwe luvango homwene aliza mu lina lya Guku, mutemi wa Israeli. 14Alisi Yesu wakavonaga kana ka mpunda na wikalaga 15kwigulya nako, kitisi yitonilwe, Ukogohe ngʼo mwanike wa Sioni, lolaga mutemi wako alizaho adamilile ku kana ka mpunda. 16Genaya vahemba vakwe vavagi vakamanikizye hambele; alisi aho Yesu wakumukivagwa vizukilaga ati genaya gatonilwe kunguno yakwe, na ati vamuvezezaja genaya. 17Haho mbuto ya vanhu hovene vavage hamohene nawe aho wamwitanile Lazaro afume mu kivimbi na wamuhembukaja, vasangilagwa kunguno yakwe. 18Kunguno yeniyi vanhu vingi vajaga kumusanganila kunguno vigagwa ati waguvezaja mugaka gwenugu. 19Haho Vafarisayo vayombaga hamohene, Mwavona! mukavile kugada kinhu, lolagi, va liwelelo lyose valimulonda.
20Alisi mugati na venavo hovene valinile kwisenga ha sikukulu vavagi Vagriki vamo. 21Venavo vajaga kumwa Filipo, muna Betsaida ya Galilaya, na vamulombaga, vuhaya, Guku, iswe tulikova kumuvona Yesu. 22Filipo wajaga kukamuwila Andrea, na Andrea na Filipo vajaga kukamuwila Yesu. 23Yesu wavitavukaga, uhaya, Itungo lyafikile Mwana wa Munhu akumukiwe. 24Yalole, yalole ndimuwila inwe, ulu mbiyu ya ngano yikagwilile mu vulongo na yikafwile yilidila yenekili yinene, alisi ulu yilifwa yilifyambya fisumo fingi. 25Homwene aliyitogwa myuye yakwe aliyizimizya, na homwene aliyigaya myuye yakwe mu liwelelo lyenili akuyilindila kusika ha vuzuvuku wa hanahana. 26Ulu umo alintumamila andonde, na uko nene ndiko kwenuko kwene mutumami wane akuviko; na ulu umo alintumamila nene, 27Vava akumukuzya mwenuyu. Lelo myuye yane yilitingina, na nayombe kinahe? Vava undindile hambele na itungo lyenili? 28Alisi kunguno yeniyi nafikile hʼitungo lyenili. Vava, ulikumuche lina lyako! Haho muzwi gwizaga kufuma ilunde, Nalikumukaja na nkulikumucha hangi. 29Aho vanhu vingi hovene vimile bihi vayigagwa, vayombaga, Yagilima, vangi vayombaga, Malaika wayombaga nawe. 30Yesu witavukaga, uhaya, Muzwi gwenugu gukizile kunguno yane, sumbwa kunguno yinwe. 31Lelo vuyangulwa wa liwelelo lyenili vuliho, lelo mutwale wa liwelelo lyenili akutagilwa hanze. 32Na nene ulu ndasungwe higulya na nsi ndavadute vose kuwane. 33Alisi genaya wayombaga kolecha lufu ki alafwe. 34Mbuto ya vanhu vamwitavukaga, Iswe twigilwe mu ngʼhama ati Kristo akudilaho kusika hanahana, lumehoki uliyomba ati Mwana wa Munhu asungwe higulya? Nani mwenuyu 35Mwana wa Munhu? Yesu wavawilaga, Katungo kado lumole lutali luliho mugati ninwe. Musimizage itungo lyenilo muli nalo lumole, kwigela ngʼo giti yimudime; na homwene alisimiza mu giti akamanikizye uko alija. 36Itungo lyenili muli nalo lumole mulusanizye lumole, kigele muve vana va lumole. Genaya Yesu wayombaga na wajaga na wivisaga hambele navo.
37Alisi nulu wayivezaja migaka mingi hambele navo 38vakamusanizizye, kigele muhayo gwa mufumbuzi Yesaya gwigele hogwene wayombaga,
Guku, nani wayisanizaja mhola yiswe,
Na kukono kwamwa Guku kwafumbulilwe kumwa nani?
39Kunguno yeniyi vakakovolile kusanizya, kwisi hangi Yesaya wayombile,
40Wagahofuzizye minso gavo na wagulambizye moyo gwavo,
Kwigela ngʼo vavone na minso, na vamaniche na moyo,
Na vapiluke moyo,
Na nene navapizye.
41Genaya Yesaya wayombile kunguno waluvonaga lukumo lwamwa Kristo na wayombaga kunguno yakwe. 42Alisi ahene vingi mugati na vanhu vamusanizizye, alisi kunguno ya Vafarisayo vakazumilizizye, kwigela 43ngʼo valugalilwe sinagogo; kwisi valutogagwa lukumo lwa vanhu kukila lukumo lwa Mulungu.
44Yesu wahamukaga, uhaya, Homwene alinsanizya nene, akavile kunsanizya nene, sumbwa uyo wantumizizye nene. 45Na homwene alimbona nene, alimuvona uyo wantumizizye. 46Nene nizile mu liwelelo kitisi lumole, kigele uyo alinsanizya aleke kwikala mu giti. 47Na ulu umo aliyigwa mihayo yane na kuyilindila ngʼo, mwenuyu nene kumuyangula ngʼo, kwisi nkizile kuliyangula liwelelo, sumbwa nalipizye liwelelo. 48Homwene alinikana na akavile kuyanukula mihayo yane, ali nawe muyanguzi. Muhayo gwenugo nayombile gulamuyangule ha lusiku lwa mhelo. 49Kwisi nene nkayombile kufuma kuwane, sumbwa Vava homwene wantumizizye wandagilaga genaya nayombe na nahaye. Na ndimanicha ati mukumo gwakwe guli vuzuvuku wa hanahana. 50Sisyo yeniyi ndiyomba, ndihaya kitisi Vava wambwilaga.
നിലവിൽ തിരഞ്ഞെടുത്തിരിക്കുന്നു:
Yohana 12: Nym51
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Nyamwezi New Testament © Bible Society of Tanzania, 1951.
