ପ୍ରେରିତ 7
7
ସ୍ତିପାନ୍ତି ପ୍ରଚାର୍
1ୱିଜେରିଙ୍ଗ୍ ପେରି ଜାଜକ ସ୍ତିପାନତିଙ୍ଗ୍ ୱେନ୍ବାତାନ୍, “ଇକା ଇନିକା ସତ୍ ?”
2ସ୍ତିପାନ୍ ଇର୍ହାନ୍, ଏ ନା ତଡ଼ାନ୍କୁ ନି ବୁବାର୍, ୱେନ୍ଡ୍ରୁ ! ମା ଡକ୍ରାଦାଦା ଅବ୍ରାହାମ ହାରୋଣଦୁ ବାସାଦେଙ୍ଗ୍ ସନି ଆଗ୍ଡ଼ି ଗୌରବ୍ତି ମାପୁରୁ ମେସପଟାମିଆଦୁ ତରାୟ୍ଆଜି, 3ମି ଇଲୁତିଲୋକୁ ମାରି ଦେସ୍ ଡ଼ିସ୍ସି ନାନ୍ ଏମେ ଦେସ୍ ତର୍ନା, ଆବେ ସାଙ୍ଗ୍ଆ । 4ଆବେଟ୍ ୱାନ୍ ୱାନି କଲଦୀୟ ଦେସ୍ ଡ଼ିସ୍ସି ହାରୋଣତୁ ବାସାଦେଙ୍ଗ୍ ସର୍ହାନ୍ । ଅବ୍ରାହାମତି ବୁବାସି ସାତି ୱେନ୍କା ମିର୍ ଇଲେଇ ଆମା ଦେସ୍ତୁ ବାସାଜିନିଦେର୍, ମାପୁରୁ ୱାନିଙ୍ଗ୍ ଆୟା ଦେସ୍ତୁ ତାତାନ୍ । 5ମାପୁରୁ ନାସ୍ତିୱାଲେ ଅବ୍ରାହାମତି ଇୟା ଦେସ୍ତୁ ଇନି ଦନ୍, ଇୟାୱାଜା ଜେ କାଣ୍ତେକ୍ ମୁରା ବୁମି ବା ସିଏନ୍ ମାର୍ହାନ୍ । ମାତର୍ ମାପୁରୁ ପାର୍ମାଣ୍ କିତାମାର୍ହାନ୍, ଅବ୍ରାହାମ୍ତିଙ୍ଗ୍ ଇୟା ଦେସ୍ ସିନାନ୍ ମାରି ଇକା ୱାନି ନି ୱାନି କୁଟୁମ୍ତି ନିଜେତିକା ଆଜି ତେବାନାତ୍ । ମାପୁରୁ ଆୟା ପାର୍ମାଣ୍ କିନିୱାଲେ ଅବ୍ରାହାମ୍ତିଙ୍ଗ୍ କଡ଼କକ୍ରା ଆଏନ୍ ମାର୍ହାନ୍ । 6ନାସ୍ତିୱାଲେ ମାପୁରୁ ୱାନିଙ୍ଗ୍ ଇୟା ମାଟା ଇର୍ହାନ୍ ! ମି କୁଟୁମ୍ତିକାର୍ ଦାସ୍ତି ୱାଜା ଆଇ ଦେସ୍ତୁ ବାସାନାର୍ ମାରି ସାରିସ ବାର୍ସେକ୍ ସାନ୍ଦି କାଷ୍ଟୁ ପୟ୍ନାର୍ । 7ମାତର୍ ମାପୁରୁ ଇର୍ହାନ୍, ୱାର୍ ଏମେୱାରି ସେବା କିନାର୍, ନାନ୍ ଆୟା ଲୋକା ବିସାର୍ କିନାପ୍, ୱେନ୍କା ମି କୁଟୁମ୍ତିକାର୍ ଆୟା ଦେସ୍ତାନ୍ ସନା ୱାନାର୍ ମାରି ଇୟା ବାଡିଦୁ ନା ପାର୍ତନା କିନାର୍ । 8ୱେନ୍କା ମାପୁରୁ ଅବ୍ରାହାମତି ୱାଲେ ପାର୍ମାଣ୍ ସିନା ୱାଜା ସୁନ୍ନତ୍ ନିୟମ୍ ତିଆର୍ କିତାନ୍ । ଆବେଟ୍ ୱାନି ମାରିସି ଇସ୍ହାକ୍ତି ଜନମ୍ତି ଉଣ୍ତ୍ରି ସାତା ୱେନ୍କା ଅବ୍ରାହାମ ୱାନି ସୁନ୍ନତ କିତାନ୍; ଇସ୍ହାକ୍ ୱାନି ମାରିସି ଜାକୁବଙ୍ଗ୍ ମାରି ଜାକୁବ ୱାନି ବାର ମାରିସିରିଙ୍ଗ୍ ଅର୍ତାତ୍ ମା ଜାତିଦି ୱେଙ୍ଗିଁତି ଡକ୍ରାଦାଦାରିଙ୍ଗ୍ ସୁନ୍ନତ୍ କିତାନ୍ ।
9ଜାକୁବଦି ମାରିସିର୍ ୱାରି ତଡ଼ାନ୍ ଜୋସେପ୍ ଉଣ୍ତିଙ୍ଗ୍ ରିସାଆଜି ୱାନିଙ୍ଗ୍ ମିସର୍ ଦେସ୍ତୁ କଟିସାକର୍ ୱାଜା ପର୍ତାର୍ । ମାତର୍ ମାପୁରୁ ଜସେପ୍ତି ୱାଲେ ମାର୍ହାନ୍ । 10ମାରି ୱିଜୁ ଦୁକୁ କାସ୍ଟୁଦି ୱାଲେ ୱାନିଙ୍ଗ୍ ସାଲା କିତାନ୍ । ଏସ୍ତିୱାଲେ ଜସେପ୍ ମିସର୍ତି ରାଜା ଫାରୋଦି ଆଗ୍ଡ଼ି ୱାତାନ୍, ମାପୁରୁ ୱାନିଙ୍ଗ୍ ଦୟା ନି ବୁଦି ସିତାନ୍ ମାରି ରାଜା ଜସେପ୍ତିଙ୍ଗ୍ ଦେସ୍ତି ସାସନ୍କିନିକାନ୍ ନି ରାଜା ମେଡ଼୍ତି ପେରିକାନ୍ ୱାଜା ଆସ୍କିତାନ୍ । 11ତାନିୱେନ୍କା ୱିଜୁ ମିସର୍ ମାରି କିଣାନ୍ତୁ ଉଣିକା ପୁଟ୍ଏତାତ୍ଆକା ଲୋକୁ ନାଣ୍ତ କାସ୍ଟୁ ପୟ୍ତାର୍ । ମା ଡକ୍ରାଦାଦାରି କାଦିଦି ଉଣା ଆତାତ୍ । 12ମିସର୍ ଦେସ୍ତୁ କାଦି ମାନାତ୍ ଇଜି ୱେନ୍ଜି ଜାକୁବ ୱାନି ମାରିସିରିଙ୍ଗ୍ ଅର୍ତାତ୍ ମା ଡକ୍ରାଦାଦାରିଙ୍ଗ୍ ଆବେ ପକ୍ତାନ୍ । 13ଆବେ ୱାର୍ ରିଜା ସନି ୱାଲେ ଜୋସେପ୍ ୱାନି ତଡ଼ାନ୍କୁ ମାନୁ ନିଜେଦି ପରିଚୟ୍ ୱେର୍ତାନ୍ ମାରି ଫାରୋ ରାଜା ଜସେପ୍ତି ଇଲୁ ବିସୟ୍ତାନ୍ ନେସ୍ତାନ୍ । 14ତାନି ୱେନ୍କା ଜୋସେପ୍ ୱାନି ବୁବାସି ଜାକୁବ ନି ୱାନି ଇଲୁଦି ୱିଜେରେ ସତୁରି ପାସ୍ ଲୋକାଙ୍ଗ୍ ମିସର୍ ଦେସ୍ତୁ ୱାଦେଙ୍ଗ୍ ଇଜି କୁକ୍ତାନ୍ । 15ଜାକୁବ ମିସର୍ ଦେସ୍ତୁ ସର୍ହାନ୍, ଆବେ ୱାନ୍ ମାରି ୱାନି ମାରିସିରି ସାତାର୍ । 16ୱାରି ସାତି ମାଡ଼ା ସିକିମ୍ତୁ ଅତାର୍ ମାରି ଅବ୍ରାହାମ ହାମୋର ଲୋକା ମାଣ୍କୁ କଟିମାର୍ହି ବୁମିଦୁ ୱାରିଙ୍ଗ୍ ଅତାର୍ ମୁସ୍ତାର୍ ।
17“ମାପୁରୁ ଅବ୍ରାହାମ୍ତିଙ୍ଗ୍ ଏମେ ପାର୍ମାଣ୍ କିତାମାର୍ହାନ୍, ଆକା ସତ୍ ଆଜି ମିସର୍ ଦେସ୍ତୁ ମା ଲୋକୁ ସଂକିୟା ନାଣ୍ତ ଆତାର୍ । 18ୱେନ୍କା ଜୋସେପ୍ତି ବିସୟ୍ତାନ୍ ନେସେଇ ମାର୍ହି ଅରେନ୍ ରାଜା ମିସର୍ ଦେସ୍ତୁ ସାସନ୍ କିତାନ୍ । 19ୱାନ୍ ମା ଡକ୍ରାଦାଦାରିଙ୍ଗ୍ ନାଣ୍ତ କାସ୍ଟୁ ସିତାନ୍, ୱାରି ଜନମ୍ଆତି ଇସ୍ରି କଡ଼ରିଙ୍ଗ୍ କାତ୍ତେଙ୍ଗ୍ ଇଜି ୱାରିଙ୍ଗ୍ ଆତ୍ରେ ପକ୍ତେଙ୍ଗ୍ ଇଜି ଆଦେସ୍ କିତାନ୍ । 20ଇୟା ସମୟ୍ତୁ ମୋସା ଜନମ୍ ଆତାନ୍ । ୱାନ୍ ମାପୁରୁ ଆଗ୍ଡ଼ି ମାର୍ହାନ୍ ଅରେନ୍ ନେଗ୍ରି କଡ଼ ପିଲା । ଇନ୍ଡ୍ର ମୁଣ୍ତ୍ରି ଲେଜ୍କୁ ସାନ୍ଦି ୱାନ୍ ଜାତୁନ୍ ଅଆୟ୍ ଆତାନ୍, 21ମାରି ଏସ୍ତିୱାଲେ ୱାନିଙ୍ଗ୍ ଆତ୍ରେ ପୋକ୍ତାର୍, ଫାରୋ ରାଜାଦି ଗାଡ଼୍ସି ୱାନିଙ୍ଗ୍ ପୟ୍ଜି ନିଜେଦି କଡ଼ ୱାଜା ପସା କିତାତ୍ । 22ମୋସା ମିସର୍ ଦେସ୍ତି ୱିଜୁ ବୁଦିଦୁ ସିକିୟା ପୟ୍ତାନ୍, ୱାନି ମାଟା ମାରି ପାଣିଦୁ ଅରେନ୍ ପେରି ଲୋକୁ ୱାଜା ୱେଙ୍ଗିଁତାନ୍ ।”
23“ମସାଦି ବାର୍ସୁ ଏସ୍ତିୱାଲେ ସାଲିସ୍ ବାର୍ସେକ୍ ଆତାତ୍, ୱାନ୍ ୱାନି ଇସ୍ରାଏଲ୍ତି ତଡ଼ାନ୍କୁ ଉଣ୍ତିଙ୍ଗ୍ ଏଣ୍ତେସ୍ ବ୍ୟବହାର୍ କିଆୟ୍ଆଜିନାତ୍, ଆକା ନେସ୍ତେଙ୍ଗ୍ ବଦା କିତାନ୍ । 24ୱାରି ଲୋଇ ଅରେନ୍ ୱାନିଙ୍ଗ୍, ଅରେନ୍ ମିସର୍ ଦେସ୍ତିକାନ୍ ଜାଟିକିନିକା ସୁଡ଼୍ଜି, ମସା ୱାନିଙ୍ଗ୍ ରକିୟା କିଦେଙ୍ଗ୍ ଇଜି ମିସର୍ତି ୱାନିଙ୍ଗ୍ ବାଦ୍ଲୁ ଅସି ଡାକ୍ସି ସାପିସ୍କିତାନ୍ । 25ୱାନ୍ ଅଡ଼୍ବିତା ମାର୍ହାନ୍, ୱାନି ନିଜେ ଲୋକୁ ନେସ୍ନାର୍ ଜେ, ତଡ଼ାନ୍କାଙ୍ଗ୍ ମୁକ୍ଡ଼ା କିଦେଙ୍ଗ୍ ଇଜି ମାପୁରୁ ୱାନିଙ୍ଗ୍ ବ୍ୟବ୍ହାର୍ କିଜିନାନ୍; ମାତର୍ ୱାର୍ ଆକା ବୁଜାଏତାର୍ । 26ମାର୍ନାଣ୍ତିଙ୍ଗ୍ ରିଏର୍ ଇସ୍ରାଏଲ୍ ଦେସ୍ତିକାର୍ ଜାଟିକିନିକା ସୁଡ଼ୁତାନ୍ ମାରି ୱାରି ଲୋଇ ସାନ୍ତି କିଦେଙ୍ଗ୍ ସେସ୍ଟା କିତାନ୍ । ୱାନ୍ ଇର୍ହାନ୍, ୱେନ୍ଣ୍ତ୍ରୁ, ମିର୍ ରିଇଦେର୍ ତୋ ଇସ୍ରାଏଲ୍ ଦେସ୍ତି ତଡ଼ାନ୍କୁ । ଏନ୍ଦା ଇୟାୱାଜା ଜାଟି କିଜିନିଦେର୍ ? 27ମାତର୍ ଏମେକାନ୍ ଆଇୱାନିଙ୍ଗ୍ ଜାଟି କିଜି ମାର୍ହାନ୍, ୱାନ୍ ମସେଙ୍ଗ୍ ପେଲେ କିଜି ୱେନ୍ବାତାନ୍, ମା ନେତାର୍ରି ମୁସ୍କୁ ନିଙ୍ଗିଁ ଏନ୍ ସାସନ୍କିନିକାନ୍ ନି ବିସାର୍ କିନିକାନ୍ କିତାମାନାନ୍ ? 28ଇଏନ୍ ଏଣ୍ତେସ୍ ମିସର୍ ଦେସ୍ତି ଲୋକ୍ତିଙ୍ଗ୍ ସାୟାମାର୍ଗାଡାକ୍ତି, ନାଙ୍ଗିଁ ଇନିକା ଆୟାୱାଜା ଡାକ୍ତେଙ୍ଗ୍ଁ ବଦା କିନି ? 29ମୋସା ଇକା ୱେନ୍ଜି ମିସର୍ ଦେସ୍ତାନ୍ ଉରକ୍ତାନ୍ ମାରି ମିଦିୟୋନଦୁ ବାସା କିତାନ୍ । ଆବେନ୍ ୱାନି ରିଏର୍ କଡ଼ର୍ ମାର୍ହାର୍ ।”
30“ସାଲିସ୍ ବାର୍ସେକ୍ ସର୍ଇ ୱେନ୍କା ସିନୟ ଗରନ୍ ଲାକ୍ତୁ ଉଣ୍ତ୍ରି କାସ୍ସିମାନି ଦୁପା ସିସୁ ଲୋଇ ମାପୁରୁଦି ଉନ୍ଡ୍ରି ଦୁତ୍ ମସେଙ୍ଗ୍ ତରାଇଆତାତ୍ । 31ମୋସା ଇକା ସୁଡ଼୍ଜି ନାଣ୍ତ କାବା ଆତାନ୍, ମାରି ଅଡ଼ପ୍ ନେଗେନ୍କିଜି ସୁଡ଼୍ଦେଙ୍ଗ୍ ଇଜି ଦୁପାଦି ଲାକ୍ତୁ ସର୍ହାନ୍ । ମାତର୍ ୱାନ୍ ପ୍ରବୁଦି ବଲ୍ ୱେର୍ଆନ୍, 32ନାନ୍ ମି ଡକ୍ରାଦାଦା ଅବ୍ରାହାମ, ଇସ୍ହାକ୍ ମାରି ଜାକୁବଦି ମାପୁରୁ । ମୋସା ତିଲାଜି ତିରଗ୍ଜି ବେସ୍ତେଙ୍ଗ୍ ସାସ୍ କିଏତାନ୍ । 33ପ୍ରବୁ ୱାନିଙ୍ଗ୍ ଇର୍ହାନ୍, ନି ଜୁତା କୁତ୍ଆ, ଇରିଙ୍ଗ୍ ନିନ୍ ଏମେମାନୁ ନିର୍ହିମାନି, ଆକା ପବିତ୍ର ବୁମି ।” 34ମିସର୍ ଦେସ୍ତୁ ନାନ୍ ନା ଲୋକାଙ୍ଗ୍ ନାଣ୍ତ ଦୁକୁକାସ୍ଟୁ ସୁଡ଼ୁତାମାନା । ନାନ୍ ୱାରି ଆଡ଼୍ବାନିକା ୱେର୍ଆମାନା ମାରି ୱାରିଙ୍ଗ୍ ଦାସ୍ପାଣିଦାନ୍ ରକିୟା କିଦେଙ୍ଗ୍ ରେତା ୱାତାମାନା । ଇଲେଇ ରାଦୁ, ନାନ୍ ମିଙ୍ଗିଁ ମିସର୍ ଦେସ୍ତୁ ପକ୍ନା ।
35“ମୋସା ଇସ୍ରାଏଲ୍ ଲୋକା ମାଣାନ୍ ଡ଼ିସାୟ୍ଆତା ମାର୍ହାନ୍ । ପେରି ନେତାର୍ ୱେନ୍ବାତାର୍, ମା ମୁସ୍କୁ ନିଙ୍ଗିଁ ଏନ୍ ସାସନ୍କିନିକାନ୍ ନି ବିସାର୍କିନିକାନ୍ କିତାନ୍ ? ମାତର୍ ମାପୁରୁ ଆୟା ମୋସେଙ୍ଗ୍ କାସ୍ନି ଦୁପା ଲାକ୍ତୁ ତରାୟ୍ଆତି ମାର୍ହି ଦୁତ୍ତି ସାକାଦାନ୍ ଲୋକା ମୁସ୍କୁ ସାସନ୍ କିଦେଙ୍ଗ୍ ମାରି ୱାରିଙ୍ଗ୍ ମୁକୁଡ଼ା କିଦେଙ୍ଗ୍ ଇଜି ପକ୍ତାନ୍ । 36ୱାନ୍ ମିସର୍ ଦେସ୍ତୁ ମାରି ନେତ୍ରେ ସାମ୍ଦୁର୍ତୁ ନାଣ୍ତ କାବାଆନି ପାଣି କିଜି ଲୋକାଙ୍ଗ୍ ମିସର୍ ଦେସ୍ତାନ୍ ସପ୍ସି ତାତାନ୍, ସାଲିସ୍ ବାର୍ସେକ୍ ସାନ୍ଦି ବାଲି ବୁମିଦୁ ୱାରିଙ୍ଗ୍ ସାରି ତର୍ସି ଅତାନ୍ । 37ମୋସା ନିଜେ ଇସ୍ରାଏଲ୍ ଦେସ୍ତି ଲୋକାଙ୍ଗ୍ ଇର୍ହାମାର୍ହାନ୍, ମାପୁରୁ ନାଙ୍ଗିଁ ଏଣ୍ତେସ୍ ପକ୍ତାମାର୍ହାନ୍, ଆୟାୱାଜା ମି ଲାକ୍ତୁ ଅରେନ୍ ବାବବାଦିଙ୍ଗ୍ ପକ୍ନାନ୍ ୱାନ୍ ମି ନିଜେ ତଡ଼ାନ୍କା ଲୋଇରାନ୍ ଅରେନ୍ ଆନାନ୍ । 38ଆୟା ମୋସା ବାଲି ବୁମିଦୁ ଉଣ୍ତାତିମାର୍ହି ଇସ୍ରାଏଲ୍ତି ଲୋକାୱାଲେ ଅର୍ସେ ମାର୍ହାନ୍ । ୱାନ୍ ସିନୟ ଗରନ୍ତୁ ମା ଡକ୍ରାଦାଦାରି ୱାଲେ ମାରି ୱାରି ୱାଲେ ମାଟା ଇର୍ହିମାନି ମୁସ୍କୁପୁର୍ତି ଦୁତ୍ତି ୱାଲେ ମାର୍ହାନ୍ ମାରି ମା ଲାକ୍ତୁ ଇନ୍ଣ୍ତ୍ରେଙ୍ଗ୍ ଇଜି ୱାନ୍ ମାପୁରୁଦି ମାଣ୍କୁ ଜିବନ୍ତି ବାକ୍ୟ ଆସ୍ତାନ୍ ।”
39ମାତର୍ ମା ଡକ୍ରାଦାଦାର୍ ୱାନିଙ୍ଗ୍ ମାନାଏତାର୍; ୱାର୍ ୱାନିଙ୍ଗ୍ ପେଲେକିଜି ମିସର୍ ଦେସ୍ତୁ ଡ଼େସି ସନ୍ଡ଼୍ରେଙ୍ଗ୍ ମନ୍ବଦାକିତାର୍ । 40ଆୟାଉଣ୍ତିଙ୍ଗ୍ ୱାର୍ ହାରୋଣତିଙ୍ଗ୍ ଇର୍ହାର୍, ଇଲେଇ ମାଙ୍ଗିଁ ସାରି ତର୍ସି ଅତେଙ୍ଗ୍ ଇଜି ଏସ ଦିୟାମ୍କୁ ତିଆର୍ କିଜ ସିଦା । ମାଙ୍ଗିଁ ମିସର୍ ଦେସ୍ତାନ୍ ସପ୍ତି ତାତିମାନି ଆୟା ମୋସା ଜେ ଏମେ ସର୍ହାନ୍, ଆକା ମାପ୍ ନେସ୍ଏପ୍ । 41ଆୟା ସମୟ୍ତୁ ଆବେ ୱାର୍ ଉଣ୍ତ୍ରି ଗାଡ଼ାଲ୍ତି ବମା ତିଆର୍ କିତାର୍ ମାରି ତାନି ଉଦେସ୍ତାନ୍ ପୁଜା କିଜି ବଲି ସିତାର୍ । ମାରି ନିଜେ ତିଆର୍ କିତିମାନି ଆୟା ମୁର୍ତିଦିଙ୍ଗ୍ ମାନାଦେଙ୍ଗ୍ ଇଜି ଉଣ୍ତ୍ରି ବଜି ତିଆର୍ କିତାର୍ । 42ଆବେଟ୍ ମାପୁରୁ ୱାରିମାଣାନ୍ ଏରିତାନ୍ ମାରି ୱାରିଙ୍ଗ୍ ବାଦଡ଼୍ତି ସୁକେଙ୍ଗାଁଙ୍ଗ୍ ସେବା କିଦେଙ୍ଗ୍ ଇଜି ଡ଼ିସ୍ତାସିତାନ୍ । ଇୟା ବିସୟ୍ତାନ୍ ବାବବାଦିରି ବଇଦୁ ରାସାତାମାନାତ୍ :
“ଏ ଇସ୍ରାଏଲ୍ କୁଟୁମ୍ !
ବାଲିବୁମିଦୁ ସାଲିସ୍ ବାର୍ସେକ୍ ସାନ୍ଦି
ମିର୍ ନା ଉଣ୍ତିଙ୍ଗ୍ ଜାତୁ ପୁଜା ସିଇତି ମାର୍ହିଦେର୍ନୋ ।
43ମାତର୍ ମିର୍ ପାର୍ତନା କିଦେଙ୍ଗ୍ ଇଜି ଏମେ ବମା ୱିଜୁ ତିଆର୍ କିତିମାର୍ହିଦେର୍,
ଆୟା ମାଲେକ୍ତି ଗୁଡ଼ା ମାରି ସୁକା ଦିୟାମ୍ ରମ୍ଫାତି ବମାଦିଙ୍ଗ୍ ପିଣ୍ତିତିଦେର୍ ।
ଆୟାଉଣ୍ତିଙ୍ଗ୍ ନାନ୍ ମିଙ୍ଗିଁ ବାବିଲନ୍ତି ଆୟାପାଡ଼ି ପକ୍ନାପ୍ ।”
44ବାଲିବୁମିଦୁ ମା ଡକ୍ରାଦାଦାରି ୱାଲେ ମାପୁରୁଦି ତେବାନିକା ଗୁଡ଼ା ମାର୍ହାତ୍ । ମାପୁରୁ ମୋସେଙ୍ଗ୍ ଏଣ୍ତେସ୍ ତିଆର୍ କିଦେଙ୍ଗ୍ ଇର୍ହାମାର୍ହାନ୍ ମାରି ମୋସାଦିଙ୍ଗ୍ ଏମେ ସାରି ତର୍ତାମାର୍ହାନ୍, ଇକା ଆୟାୱାଜା ତିଆର୍ ଆତାମାର୍ହାତ୍ । 45ୱେନ୍କା ମା ଡକ୍ରାଦାଦାରି ଲୋକା ବୁବାସିରି ମାଣ୍କୁ ପୟ୍ତିମାର୍ହି ଆୟା ଗୁଡ଼ାଦିଙ୍ଗ୍ ଜିହୋସିୟଦି ୱାଲେ ପିଣ୍ତ୍ଜି ଅସି ସର୍ହାର୍ ମାରି ମାପୁରୁଦି ମାଣାନ୍ ପେରାୟ୍ ଆତିମାର୍ଇ ଆଇ ଦେସ୍ ଅଦିକାର୍ କିତାର୍ । ଦାଉଦ ରାଜାଦି ସମୟ ସାନ୍ଦି ଆବେ ତେବାତାତ୍ । 46ୱାନ୍ ମାପୁରୁଦିମାଣାନ୍ ଦୟା ପୟ୍ଜି ଜାକୁବଦି ମାପୁରୁଦି ଉଣ୍ତିଙ୍ଗ୍ ଉଣ୍ତ୍ରି ତେବାନି ମନ୍ଦିର୍ ତିଆର୍ କିଦେଙ୍ଗ୍ ୱାନି ସାରି ବଦାକିତାମାର୍ହାନ୍ । 47ମାତର୍ ୱେନ୍କା ଆୟା ତେବାନି ଇଲୁ ତିଆର୍ କିତାନ୍ ସଲମନ୍ ।
48ମାତର୍ ୱିଜେରିଙ୍ଗ୍ ପେରି ମାପୁରୁ ଲୋକାମାଣାନ୍ ତିଆର୍ ଆତି ଇଲ୍କାଙ୍ଗ୍ ବାସାଏନ୍ । ଇୟା ବିସୟ୍ତାନ୍ ବାବବାଦି ରାସ୍ତାମାନାନ୍;
49“ପ୍ରବୁ ଇନାନ୍, ମୁସ୍କୁପୁର୍ ନା ବାସ୍ନି ଗାଦି
ମାରି ଦୁନିଆ ନା ପାଦାମ୍ ଇଡ୍ନି ବାଡି ମିର୍
ନା ଉଣ୍ତିଙ୍ଗ୍ ଏଣ୍ତେସ୍ ନାନି ଇଲୁ ତିଆର୍ କିନିଦେର୍ ?
ନା ରମ୍ନି ଉଣ୍ତିଙ୍ଗ୍ ବାଡି ଏମେ ?
50ଇୟାୱିଜୁ ବିସୟ୍ ଇନିକା ନାନ୍ ନିଜେ ତିଆର୍ କିଏ ନୋ ?”
51ସ୍ତିପାନ୍ ମାରି ଇର୍ହାନ୍, “ମିର୍ ଏସା ମାନାଇକାର୍ । ମି ଜିବନ୍ ଏସା ତାଗ୍ଇକା । ମାପୁରୁଦି ବାକ୍ୟ ଉଣ୍ତିଙ୍ଗ୍ ମିର୍ ଏସା ବଇରା ! ମିର୍ ଟିକ୍ ମି ପୁର୍ବେଦିଡକ୍ରାରି ୱାଜା : ମିର୍ ୱିଜୁୱାଲେ ପବିତ୍ର ଆତ୍ମାଦି ବିରୁଦ୍ କିଜିନିଦେର୍ ! 52ମି ପୁର୍ବେଦିଡକ୍ରାଦାଦାରି ମାଣାନ୍ ପେରାୟ୍ ଆଇ ମାନି ଏମେ ବାବବାଦି ମାନାନ୍ ନୋ ? ମାପୁରୁଦି ଏମେ କାବୁର୍ସିନିକାର୍ ବେସି ଆଗ୍ଡ଼ି ୱାରି ଦାର୍ମୁଦି ଦାସ୍ତି ୱାନି ବିସୟ୍ତାନ୍ ଇର୍ହାମାର୍ହାର୍, ମି ଡକ୍ରାଦାଦାର୍ ୱାରିଙ୍ଗ୍ ଡାକ୍ତାର୍ । 53ଇଲେଇ ମିର୍ ୱାନି ଉଣ୍ତିଙ୍ଗ୍ ବିସ୍ବାସ୍ତୁ ଆରାକିଜି ୱାନିଙ୍ଗ୍ ଡାକ୍ତିମାନିଦେର୍ । ମିର୍ ମୁସ୍କୁପୁର୍ତି ଦୁତ୍କା ମାଣାନ୍ ସିତିମାନି ମାପୁରୁଦି ନିୟମ୍ ୱିଜୁ ପୟ୍ତିମାନିଦେର୍ ମାତର୍ ଆକା ମାନାଇଦେର୍ ।”
ସ୍ତିପାନ୍ତି ସାନିକା
54ପେରିମିଟିଙ୍ଗ୍ତି ନେତାର୍ ସ୍ତିପାନ୍ତି ମାଟା ୱେନ୍ଜି ନାଣ୍ତ ରିସା ଆତାର୍, ୱାନି ଉଣ୍ତିଙ୍ଗ୍ ରିସାଦାନ୍ ପାଲ୍କୁ କାତ୍ରେ କିତାର୍ । 55ମାତର୍ ସ୍ତିପାନ୍ ପବିତ୍ର ଆତ୍ମାଦୁ ପୁରାଆଜି ମୁସ୍କୁପୁର୍ ତରିନ୍ ସୁଡ଼ୁତାନ୍ ମାରି ମାପୁରୁଦି ଗୌରବ୍ ନି ଜିସୁଙ୍ଗୁଁ ମାପୁରୁଦି ଉଣେରି ତରିନ୍ ନିନି ମାନିକା ସୁଡ଼ୁତାନ୍ । 56ୱାନ୍ ଇର୍ହାନ୍, “ସୁଡ଼ୁଦୁ, ନାନ୍ ମୁସ୍କୁପୁର୍ ରେଆତିକା ମାରି ମନୁସ୍ୟପୁତ୍ରଙ୍ଗ୍ ମାପୁରୁଦି ଉଣେରି ତରିନ୍ ନିନି ମାନିକା ସୁଡ଼ୁଜିନା !”
57ଆଉଲି ଆଜି ପେରିମିଟିଙ୍ଗ୍ତି ନେତାର୍ ଇୟା ମାଟା ୱେନ୍ଇ ଉଣ୍ତିଙ୍ଗ୍ ଗିତଣିଦୁ କିକୁ କେରପ୍ତାର୍ । ୱେନ୍କା ୱାର୍ ଏକ୍ଜୁଟ୍ ଆଜି ୱାନି ତରିନ୍ ମାଟ୍ସି ୱାତାର୍ । 58ଗାଡ଼୍ ଆତ୍ରେ ୱାନିଙ୍ଗ୍ ରେଲ୍ଜି ଅସି, ୱାନି ମୁସ୍କୁ କାଲ୍କୁ ପକ୍ସି ଡାକ୍ତାର୍ । ମିସ୍ ସାକିସିନିକାର୍ ସାଉଲ୍ ଦର୍ତି ଅରେନ୍ ମୁରୁଲିଦି ଲାକ୍ତୁ ୱାରି ଆଙ୍ଗିଁପାସିୟା ୱିଜୁ ଡ଼ିସ୍ତା ସର୍ହାମାର୍ହାର୍ । 59ୱାର୍ ସ୍ତିପାନ୍ତି ମୁସ୍କୁ କାଲ୍କୁ ଡାକ୍ନି ସମୟ୍ତୁ ୱାନ୍ ପ୍ରବୁଙ୍ଗ୍ ପାର୍ତନା କିଜି ଇର୍ହାନ୍, “ପ୍ରବୁ ଜିସୁ ନା ଆତ୍ମାଦିଙ୍ଗ୍ ମାନାଆ !” 60ୱାନ୍ ମେଣ୍ତେଙ୍ଗ୍ ଗଟ୍କିଜି ନାଣ୍ତ ଆଉଲିଦାନ୍ ଇର୍ହାନ୍, “ପ୍ରବୁ ! ଇୟାୱାରି ବିରଦ୍ତାନ୍ ଇୟା ପାପ୍ ଏତ୍ କିମା ।” ଇକା ଇଜି ୱାନ୍ ପୁଣ୍ତା ଡ଼ିସ୍ସି ସାତାନ୍ ।
നിലവിൽ തിരഞ്ഞെടുത്തിരിക്കുന്നു:
ପ୍ରେରିତ 7: NTKoo20
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
