Kejadian 6
6
Manusia tamba jahat
6:1-8
1Orang-orang su mulai tamba banyak kas penu sluru bumi. Dong pu anana prempuan juga lahir. 2Waktu itu anana laki-laki yang asal dari Allah#6:2 anana laki-laki yang asal dari Allah ‒ Bahasa Ibrani: Allah pu anana laki-laki. Ada yang bilang kalo dong tu Set pu anana cucu. Ada juga yang bilang kalo dong tu anana raja. Tapi mungkin skali, dong tu bukan manusia tapi Allah pu anana bua dari surga macam malaikat begitu. dong liat kalo manusia pu anana prempuan ni dong bagus-bagus skali. Jadi, dong ambil anana prempuan tu untuk jadi dong pu istri. Dong ambil sapa saja yang dong suka. 3Trus TUHAN bilang begini, “Sa pu Roh yang kas hidup manusia, De trakan tinggal di manusia lama-lama. Karna manusia itu dara deng daging saja. De pu hidup nanti hanya sampe 120 taun saja.”
4Waktu dulu tu orang-orang tinggi besar macam raksasa begitu dong ada di bumi ini. Itu waktu, anana laki-laki yang asal dari Allah ni dong kawin deng manusia pu anana prempuan. Dari dong ni yang orang-orang tinggi besar ini lahir. Orang-orang tinggi besar ini ada di jaman itu deng jaman stela itu juga. Orang-orang tinggi besar ini dong paling jago baru paling dapa knal skali dulu.#Bilangan 13:33
5Waktu TUHAN liat begini, manusia pu jahat su tamba para skali di bumi ini. Manusia dong pu hati deng pikiran ni tinggal pikir yang jahat-jahat saja trus.#Matius 24:37; Lukas 17:26; 1 Petrus 3:20 6Itu bikin TUHAN De pu hati sedi skali liat begitu. De mnyesal skali su bikin baru taru manusia di bumi. 7Jadi, TUHAN bilang begini, “Sa mo kas hilang manusia-manusia yang Sa su bikin dari bumi ini, deng binatang-binatang darat, binatang-binatang yang mrayap, sama burung-burung di udara juga. Sa mnyesal skali su bikin dong smua.” 8Tapi Nuh de ni yang TUHAN snang.
Nuh pu crita
6:9-22
9Ini crita tentang Nuh deng de pu kluarga.
Nuh itu orang benar. Dari smua orang yang hidup waktu itu, hanya Nuh sendiri yang hidup ikut yang Allah mau. De baku teman dekat skali deng Allah. 10Nuh de pu anana ada tiga. Dong pu nama Sem, Yafet, deng Ham.
11Begini Allah liat kalo orang-orang pu klakuan su rusak para, baru apa saja yang jahat su tamba banyak di bumi. 12Waktu Allah cek bumi, De liat, memang bumi ni su rusak para gara-gara manusia dong pu hidup yang jahat itu.
13Jadi, Allah bilang ke Nuh,
“Sa mo sapu bersi smua yang hidup di dunia ini, karna dong su bikin bumi penu deng hal-hal jahat. Jadi, Sa nanti sapu bersi dong smua lapis deng bumi pu smua-smua. 14Jadi, ko bikin untuk ko, kapal paling besar skali dari kayu yang kuat. Baru tutup de pu cla-cla pake aspal cair dari luar deng dari dalam. Di bagian dalam ko bikin ruang sendiri-sendiri. 15Ini de pu panjang deng lebar kapal bentuk kotak besar itu: Kapal de pu panjang 133 meter, de pu lebar 22 meter, de pu tinggi 13 meter. 16Ko bikin kapal pu tutup atas, tapi kas jarak 44 sentimeter di atas de pu dinding kapal. Bikin de tiga tingkat. Baru pasang pintu satu di bagian samping kapal.
17Dengar ini! Sa mo kas datang banjir besar skali kas tutup bumi ini smua. Supaya smua yang hidup di bawa langit, yang ada di bumi ni nanti mati. 18Tapi ko, nanti Sa mo ikat janji deng ko. Ko harus masuk ke dalam kapal itu, ko deng ko pu istri sama ko pu anana deng dong pu istri-istri. 19Dari smua yang hidup, dari smua binatang-binatang ini, ko harus bawa satu pasang, jantan deng betina, bawa dong masuk ke kapal itu sama-sama. Bikin begitu supaya dong bisa tetap hidup sama-sama deng ko. 20Dari macam-macam burung, juga smua jenis binatang yang mrayap di tana, deng dari smua binatang-binatang yang ada di darat. Dong smua nanti datang satu-satu pasang ke ko, supaya dong bisa tetap hidup. 21Trus, ko juga bawa smua yang kam bisa makan. Ko kumpul itu smua, supaya nanti kam smua ada makanan.”
22Habis dengar itu Nuh de bikin itu smua sama sperti yang Allah su printa dia.#Ibrani 11:7
നിലവിൽ തിരഞ്ഞെടുത്തിരിക്കുന്നു:
Kejadian 6: MPapua
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2023 (Active), Wycliffe Bible Translators, Inc. All rights reserved.
