Matthieu 2
2
Epyâl lé ócwóó ó bʉ̂r
1Yésʉs á byɛ̂l ó, Bétɛlɛhɛm, nkanǎ Yʉ́da. Yé á be ó ɨ́ jɔ̌ʼ Erôd á be njwɨ́ɨ yɨ́. Yésʉs, nyé osí byɛ̂l nɛ́ɛ: ocwóó ó bʉ̂r, bê nzě pyâl ɨ́ Yerʉ́zalɛm, duhǒ nko dʉ́o dí ejɨma yɨ́. 2Nó ó bé á to le edî bʉ̂r ó: «Mwân byɛ́l nyá, nye wó? Nye ó dí Njwɨ́ɨbʉr óYúden ebě, bɨ̌h bé á si bee twítwén wé kwá nyɨ́h, nko dʉ́o dí ejɨma yɨ́. Bɨ̌h nzé ó, lɨ́ enzě dwe nyé kûm.»
3Ɨ́ jɔ̌ʼ ngóvina Erôd á jʉ̂ʼra mpyɔ́m nyaá yɨ́, nye nzě syɛ̌l bá tɨ̂, bé e bʉr ó Yerʉ́zalɛm bɨ́bɛ̂h. 4Nó nyé á gôhlo ojwɨ́ɨ o mpáh Nzyɛ̌m bɨ́bɛ̂h le olɛ̂ʼla o métié ó kûl bʉ̂r o b'Ɨ́zraɛ̂l. Nye ntɔ̂ʼ dî métwɨ́ɨ́ ɨ́ lɔ̌b Mʉ̂r Nzyɛ̌m á lœm múló mé jwɨ́ɨ nyá, ó nye gʉ́ŋaa gúmó yé á jala ó, nye byɛ́lɨɨ yɨ́. 5Bé e né ó: «Yé óbe ó Bétɛlɛhɛm, nkanǎ Yʉ́da. Lɔ̌b tɨ̂ʼ ó ngwíha milɔ̌b á cɛma yɨ́. Nye á cɛma ó:
6“Gua, Bétɛlɛhɛm, nkanǎ Yʉ́da, gó abuú twâʼwo
ɨ́ bím bínkana bí dí ejwɨ́ɨ ɨ́ Yʉ́da bí,
ebě, ɨ́ mbɛ̌r bʉ̂r gô ó ngá pyâl njwɨ́ɨbʉr ngá pála bínteme byâm, Ɨ́zraɛ̂l nyá.”»
7Nó ó Erôd á nze jébe ocwóó baá ɨ́ mesǒ, bé nkʉ̂ gʉ́a lɛ́ɛ nyé jɔʼ twítwén waá á taare enyɨ̂n ɨ́ jʉ́o yɨ́. 8Nó nyé á nze lómo bé Bétɛlɛhɛm. Nye ó: «Tóʼ gâ. Bɨ̌n e tó le egwá byamlě súm mwân waá dí yɨ́. Jɔʼ bɨ́n ókœb nyé yɨ́, bɨ̌n e nzé lɛ́ɛ mê. Jáŋá mɛm ntémé ótó dwe nyé kûm.»
9Jɔʼ bé á sil ejóʼo lwǐb mé njwɨ́ɨ yɨ́, bê nzě tô. Bé kǎ bee ó, twítwén bé á pa bee nko dʉ́o dí ejɨma yɨ́ nyá, mû lɨ́ esámle, nʉa ésóʼ é nzɨ́, tó tyɛ̂b kʉ́ gúmó mwân á be yɨ́. 10Jɔʼ bé á bee twítwén yɨ́, bé ntɔ̂ʼ buú soho. 11Bé ntɔ̂ʼ nî tʉ́ŋlʉ̌ mbɛ̌r, beɔɔ mwân, bé e nyɔ̌ŋ wé Maria, bê nzě bɨʼɔɔ mébóó mɔ́ɔ́ sí, lɨ́ edweŋɔɔ nyé kûm. Píe tɨ̂, bê nzě kɛɛ métʉ́m mɔ́ɔ́, ntɔ̂ʼ dweŋɔɔ nyé bisá bé á nze e byé bí: gʉ̂l, otú ó dúu le lɔbína. 12Píe tɨ̂, Nzyɛ̌m nzě cɨ̂l bé ɨ́ nzɨ̌ bilíma ó, bé ayɨ́ báʼǎ búla, tô kwá mé Erôd. Bé á to kumo kwár nyɔ́ɔ́ ó, kǎ cɨɔɔ ɨ́ nzɨ̌ swîh.
Tœ́á Egɨ̂ptɛn
13Jɔʼ ócwóó ó bʉ̂r baá, bé á be, bé mû sí tô yɨ́, nyʉ́ʉ́ éngeles mé Dâ Nzyɛ̌m ntɔ̂ʼ pyâl Yóseb ɨ́ líma. Nye e né ó: «Gbɔlwaa sí, nʉaa mwân, bé e nyɔ̌ŋ. Kpɛ́yɨ́ɨ, tóʼ sí Egɨ̂ptɛn, go e dí gʉ̂, tó pyâl ɨ́ jɔʼ mé ólɛ́ɛ e go ó, go búlaa yɨ́, ebě, Erôd mû ɨ́ cǎr ó, nyě jʉ́ ó mwán nyâ.» 14Nó ó Yóseb á nze gbɔlwa sí, nʉa mwân, bé e nyɔ̌ŋ ɨ́ pum, sɔlwa, tô sí Egɨ̂ptɛn. 15Nye ntɔ̂ʼ di gʉ̂, tó pyâl ɨ́ jɔ̌ʼ Erôd á dwe yɨ́. Bisâ byaá bíbyɛ̂h, byé á syɛ́ɛ nó ó, lɨ́ elóŋlo ékǎn Dâ Nzyɛ̌m á boo lɛ́ɛ ɨ́ nzɨ̌ mé ngwíha milɔ̌b wé, ó: Me á si jébe mwân wǎm lɨ́ enzě pɛʼ nyé sí Egɨ̂ptɛn.
16Jɔ̌ʼ Erôd á gʉ́a ó, ocwóó ó bʉ̂r baá, bé á si sâ nye mikóo yɨ́, nye ntɔ̂ʼ buú kpaa ébúʼ. Nye ntɔ̂ʼ lómo bʉ̂r ó, bé tôʼ le ejʉ̂ bwá ó bʉrʉ̂m ó Bétɛlɛhɛm le baá sí yaá bɨ́bɛ̂h, táare e bityéé, kala e duo yé á be, yé mû e mimbú mímbá yɨ́. Nye á sâ nó ó, lɨ́ edû sá ócwóó ó bʉ̂r, bé á lɛ́ɛ nye yɨ́. 17Nó ó sá ngwíha milɔ̌b Jérémie á boo lɛ́ɛ yɨ́, yé á nze syɛ́ɛ. Nye á lɛ́ɛ ó:
18“Tím, yé á si jwɨ̂ʼ, duhǒ Ramâ,
le medwê e mimbɨhla ɨ́ buo buo.
Yé ó Rakɛ̂l ó dí ejɨ bwán bé.
Nye á bé akpɛl ó, mʉr léʼaa nye, ebě, bé akǎ be.”
19Píe l'eswie mé Erôd, Yóseb dínǎ sí Egɨ̂ptɛn, nye nzě bee éngeles mé Dâ Nzyɛ̌m ɨ́ líma. 20Éngeles, nye e né ó: «Gbɔlwaa sí, nʉaa mwân, bé e nyɔ̌ŋ wé; go e swíʼ, tô sí Ɨ́zraɛ̂l, ebě, bʉr o b'á sɨsáa ó, bé jʉ́ ó mwân bá, bɨ́ dwe.» 21Yóseb nzě gbɔlwa sí, nʉa mwân, bé e nyɔ̌ŋ, ntɔ̂ʼ swîʼ, tô sí Ɨ́zraɛ̂l. 22Sâ gwár, ɨ́ jɔʼ nyé á ka jóʼo ó, Arkélaos ó b'á nʉa jwɨ́ɨ ɨ́ sí Yʉ́da píe koo sɔ́ŋ wé, Erôd yɨ́, nye ntɔ̂ʼ bil bʉ́á, nye l'akǎ kpɛl ébúla gʉ̂. Jɔʼ yaá ó Nzyɛ̌m á nze cɨ̂l nye ɨ́ nzɨ̌ bilíma ó, nye tôʼ ɨ́ sí Galilê. 23Bé ntɔ̂ʼ tô, tó di ɨ́ kwár dí ejébɔɔ ó, “Nazarɛ̂t” nyɨ́. Yé á pyâl nó ó, ebě, sá ógwíha o mílɔ̌b bé á boo cɛma yɨ́, yé nkʉ̂ syɛ́ɛ. Yê cɛmá ɨ́ Mekaná mé Nzyɛ̌m ó: “Nye ódi ó, mʉr Nazarɛ̂t.”
നിലവിൽ തിരഞ്ഞെടുത്തിരിക്കുന്നു:
Matthieu 2: ozm
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
