Maʼtɛ́as 9
9
Yə́sus ayóómɛ kɛgɔd kɛ́ mɔɔd
(Mə́l 2.1-12; Lóʼk 5.17-25)
1Yə́sus aáság kiiʼkini kobag a kɛʼkɔ́m agoyaag kə́mmú nsɛ́ɛ́ ɛ noom yɛ́ɛy káag a Kaʼpɛlɛnáyum, pálɛ́ɛg yəəŋ. 2Pɔɔd pə́yíím pásɛŋ kɛgɔd a pɛʼkwág əgiim na kɛ́lɛ́ kɛnɔ kɛ́ Yə́sus ayɛ́ɛ. Ná Yə́sus yɛɛ́dála wɔnɔ́ ná pɔɔd póob páyáág oʼto na nyɔ́lɛ́, yɛɛ́dɛánɛ ɔnɔ́ na kɛgɔd kɛ́ɛg: «Mɛ mɔɔ́n, nóm ɔʼtɛ́m áaá, mbə́gulísin mabɛ́ mááŋ.» 3Ná palɛŋ pɛcɛm pə́mmú páyóób náan, pə́ə́bə́ə́ kəə́lúluu kɔ a ntɛ́m yɔɔbɔn a kaadɛ, pɔ́nɔ́: «Táá mɔɔd nyóonɛ aáfánan Táán ə́#9.3 Kɛ́lɛ náan a kálaʼtaʼ ɛ Ləf 24.16 !» 4Yə́sus yɛɛ́lɛ́ŋ nkə kɛ́ pɔɔd póob páyɛ́ɛ afɛga a ntɛ́m yɔɔbɔn a kaadɛ, náa ɔnɔ́ na pɔ́lɛ́: «A igə aa polɛɛ́ na mafɛgaʼ má mabɛ́ náan a ntɛ́m yaaŋan ə́? 5Na kodɛ́anɛ na kɛgɔd kɛ́ mɔɔd lɛ́: “Mbə́gulísin mabɛ́ mááŋ,” na komodɛ́anɛ lɛ́: “Tɛ́ɛ́mɛn, táŋána,” kɛ́yaán áa kɛ́lɛɛ́ kɛfɛ́fɛ́n lɛ́ mɔɔd ə́səə əə́? 6Oo yi! Ndəbuúloodi anɛ́ɛ́n lɛ́ mɛ Mɔɔ́n o mɔɔd nkóódi toɛn tóonɛ lɛ́ ndísin mɔɔd mabɛ́ a nsí yɛ́ɛnɛ.» Aáság kaágasɛ ná kɛgɔd kɛ́ɛg kɛ́lɛɛ́, ɔnɔ́ na kɛ́lɛ́: «Tɛ́ɛ́mɛn aá, siəd pɛʼkwág pɛáŋ, úúli a noádɛʼ noáŋ áaá!» 7Kɛgɔd ŋwaád, kɛányáŋɛn pɛʼkwág piə́ŋ əguúli. 8Ná kiʼtúú kɛ́ pɔɔd kɛ́ kɛ́yɛ́ɛ kɔ áay kɛ́ɛ́dála náan, wɛɛ́y wááság kubuúgumin. Páyɛ́ɛ agɛɛ́ʼkɛn nugəm na Táán, a toɛn tóod tó amɛ́ʼkɛn na pɔɔd.
Yə́sus yɛɛ́dɔ́ŋɔn Maʼtɛ́as lɛ́ ə́muyə́ən
(Mə́l 2.13-17; Lóʼk 5.27-32)
9Wɔnɔ́ ná Yə́sus ayɛ́ɛ agosan, yɛɛ́bóan mɔɔd nyummú niiŋ lɛ́ Maʼtɛ́as, undəndínə́ə́n a oʼkɔɔ wə́ə́ŋ ó pigólí lɛ́ ayɛ́ɛ əgugud a kɛnɔ kɛ́ nɛwáagɛʼ. Ayɛ́modɔ́ŋɔn, ɔnɔ́ na nyɔ́lɛ́: «Wɛ, mɛ́ɛn wínjə́ən.» Maʼtɛ́as aáság koság kodɛ́ɛmɛn əgumuyə́ən. 10Páyɛ́ɛ́n a nó Maʼtɛ́as. Páyɛ́ɛ agonɛ́ɛnɛ kɔ na paaʼkan pə́ə́ŋ, kɛnɔ kɛáság kiim əyə́əg síɛ́ɛ́d lɛ́ na Pagɔ́mmanɛʼ mag, na pɔɔd tɛn pá ɔlaa wɔ́ɔ́bɔn ódɛʼkɛ́lɛɛ́ ɔŋŋɛʼ a əngis á pɔɔd. Pɔ́lɛ́ póob piim páyɛ́ɛ agonɛ́ɛnɛ ondáŋ na Yə́sus. 11Ná Pafalɛsɛyɛ́ɛŋ pɛ́ɛ́dála lɛ́ alɛ agonɛ́ɛnɛ ondáŋ na mbod ɛ pɔɔd yɛ́ɛy, pííŋíən na paaʼkan pə́ə́ŋ pɔ́nɔ́ əə: «A igə aa kɛlág kɛáŋan kɛ́lɛɛ́ agonɛ́ɛnɛ ondáŋ na Pagɔ́mmanɛʼ mag, na pɔɔd tɛn pá ɔlaa wɔ́ɔ́bɔn ódɛɔ́gɔ ɔŋŋɛʼ a əngis á pɔɔd əə́?» 12Yə́sus ayóób nkə kɛ́ɛg kɛ́ pɔɔd páyɛ́ɛ agosɔyɔ. Náa ɔnɔ́ na pɔ́lɛ́: «Pɔɔd pá pálɛɛ́ panasáŋ, fiɛ́d na mɔdɔdɔɔ póʼkóodi njaan na uʼkóʼtonon. Pá pálɛɛ́ abany aa pálɛɛ́ na njaan na nyɔ́lɛ́. 13Todáan anɛ́ɛ́n əgiiyə tɔgɛ́ɛ́ tó Táán tóonɛ tó yiísə́ə́ ɔnɔ́: “Nkə kɛ́ ndɛɛ́ anyɔ́ŋɛn na pəŋi kɛ́lɛ lɛ́ póɛn na ntɛ́m ɛlaŋ. Adɛ́njaŋ ponyam aa ndɛɛ́ anyɔ́ŋɛn lɛ́ ná pomɛ́fɔnyan, ndóo#9.13 Kɛ́lɛ náan a kálaʼtaʼ yɛ Osə́ 6.6 ” Mɛ ntiimin a nsí yɛ́ɛnɛ a oʼto ó pá pálɛɛ́ afɛga lɛ́ pɔ́lɛ́ pálɛ sáád, póʼkóodi lɛ́ págasɛ ɔlaa. Ndóo, mbíim a oʼto ó pá pámálɛ́ŋɛ́ɛ́ lɛ́ pɔ́lɛ́ pálɛ pɛɛlɛʼ mabɛ́.»
Yə́sus yɛɛ́sɔ́yɔ kɛbán kɛ́ ə́simə́
(Mə́l 2.18-22; Lóʼk 5.33-39)
14Paaʼkan pá Sɛ́aŋ Ɔsɔgɛn pɔɔd pááság kiim aboan Yə́sus. Pə́yímuŋíən pɔ́nɔ́ na nyóon əə: «Na pəsi na Pafalɛsɛyɛ́ɛŋ tɛlɛ əgumən ə́simə́. A igə aa paaʼkan pááŋ pɔ́lɛ́ pɔ́dɛɔ́gɔ əguguminií yɛ́lɛ́ ə́?» 15Yə́sus əyíbuyúlísíni ɔnɔ́ na pɔ́lɛ́: «Ə́lə́ə́ aa poáʼkoyag kodálaá lɛ́ mɔɔd aálad kodɔn, náa pɔsɔ́sɔ́g pə́ə́ŋ pá ɔɔ́dɔ́ŋɔn a wɔɔ́n, pə́ələndin ombɔg a nɛdam, sɔ́g wɔɔbɔn nyɔ́ aálad kodɔn kɔ ə́? Ndóo! Náa, mədúg málɛ́ɛ́ kiim má sɔ́g wɔɔbɔn adɛndɛ́ɛ́ kɛɛnɛɛ́ kə́mmú kɔ na pɔ́lɛ́. A kɛnɛŋ kɛ́ɛg anɛ́ɛ́n áa pɔ́lɛ́ tɛn pálɛ́ɛ́ kuguminií ə́simə́. 16Mɔɔd ɔdɛɔ́gɔ ugusiəd kɛsom kɛ́ kilə́ə́ kɛ́ kɛwa agolɔ́g kiwoo kɛ́ kiʼtug kɛ́ kilə́ə́ na kɛ́lɛ́. Amaʼkɛɛlɛ náan, kɛsom kɛ́ kilə́ə́ kɛ́ kɛwa kɛ́ɛg kíəgəə́nyúlə kɛ́ság koman kusúidə kɛ́ɛg káag kɛ́ kiʼtug, kɛ́ság kowawag ná kiwoo kíiʼkini koyam agá. 17Pádɛ́agɛɛga tɛn maloʼ má mawa a piʼtug pɛ́ pɛsɔɛ́ŋ, ná pɛ́aman kaáʼtad, ná maloʼ miim mə́ə́sugin a nsí, pɛsɔɛ́ŋ pɛlɔ́sɔ́ɔ́n tɛn. Ndóo, aádɛ́ɛ́ kɛɛga maloʼ má mawa a pɛsɔɛ́ŋ tɛn pɛ́ pɛwa. Náan moom muim mólɛ nyáŋ nyáŋ.»
Yə́sus ayóndɛ́gɛ mɔɔ́n ó Siəyilúus, amáyoómɛ tɛn ɔʼkɛ́ɛd nyɔ́ ayɛ́ɛ abany
(Mə́l 5.21-43; Lóʼk 8.40-56)
18Yə́sus alɛ agosɔyɔ kɔ náan na pɔ́lɛ́ a, nnom ɛ mɔɔ́n ó Yúdɛn yimmú, yaáság kaáyɛʼtɛnɛ a ɛbá yə́ə́ŋ, yaádam ídum əndu a nsí, yɔ́nɔ́ na nyɔ́lɛ́: «Mɔɔ́n waam nyɔ́ ɔʼkɛ́ɛd əə́ʼkiʼkúin əgín nɛ́gɔŋ. Náa, sɛ́gɔɔ mɛ́ɛn, ómoyábɛgɛn əgín ombɔg wááŋ a nkó, yóndɛg.» 19Yə́sus yɛɛ́dɛ́ɛ́mɛn na paaʼkan pə́ə́ŋ, pə́ə́yə́ə́n mɔɔd agɛɛn a noádɛʼ nuə́ŋ. 20Pálɛ anɛ́ɛ́n agɛɛn kɔ náan a, ɔʼkɛ́ɛd nyummú ayɛ́ɛ kɔ. Ayɛ́ɛ aáʼkɛɛlɛ pɛag pɛówád na pɛ́baan na kɛbon maŋɔ́ máamoolon másɔ́mɛg. Ayɛ́ɛ abany ɛdɛŋɛnɛʼ. Ɔʼkɛ́ɛd nyóon ayáyɛ́ʼtɛ́nɛ́ɛ́ a ngim ɛ Yə́sus, amágógɛ́lɛ́dɛ́ɛ́ a ɔmbɛb ó kilə́ə́ kiə́ŋ. 21Ɔʼkɛ́ɛd nyóon ayɛ́ɛ əgusəə kɔ a ɔʼtɛ́m wə́ə́ŋ a kaadɛ ɔnɔ́: «Mbaʼkoyag kodɔ́bɛd ɔmbɔ́ əgín kilə́ə́ kiə́ŋ, mbɔ́ɔy.» 22Yə́sus aáság kaágasɛ, aádála ɔʼkɛ́ɛd, náa ɔnɔ́ na nyɔ́lɛ́: «Íyowó! Nóm ɔʼtɛ́m áaá! Omɔ́ɔy lɛ́ omáág oʼto na mɛ!» Əgín tɛn na yiísə́ə́ náan, kobany kó ɔʼkɛ́ɛd nyóon koáság koság koman kɔ áay, kum a nsí. 23Yə́sus aáság kɛɛn əgiig a nó nnom ɛ mɔɔd yɛ́ɛy. Ná ayɛ́ɛ́n əgiig kɔ, yɛɛ́bóan kɛnɔ kɛ́lɛ náan, pɔɔd pə́əgəə́nyug, pago tudəə páago tudəə. 24Náa ɔnɔ́ na ungim: «Lónáan, póɛn! Moóngaa ombódóm nyóonɛ ɔdɛɔ́gɔ uʼkuə́n, alɛ agá a ɛnɔ.» Ná pɔɔd páyóób náan, pə́ə́bə́ə́ agá komoóŋɔnɔ. 25Ná pɛ́ɛ́mán kolónɛ kiʼtúú kɛ́ pɔɔd kɛ́ɛg kiim, Yə́sus aáság kosɔd a yoog, aádam ə́gumin ombódóm nyóon a ombɔg, aádɛ́ɛ́mɛn ŋwaád! 26Mbə́n yaáság kolam nigúu niim.
Yə́sus ayóómɛ powongwóg pábaan
27Ná Yə́sus yɛɛ́dɛ́ɛ́mɛn agɛɛn, powongwóg pábaan pááság kumuyə́ən, pə́əgiim pə́muʼkíŋə pɔ́nɔ́: «Wɛ Mɔɔ́n o Tə́fid! Siəd maan na pəsi o!» 28Yə́sus aáság kɛɛn, amɛ́ɛn əgiig a noádɛʼ. Kɔ́gɔ́ɔg, powongwóg póob pááság kiim pááyɛʼtɛnɛ a ɛbá yə́ə́ŋ. Náa ɔnɔ́ na pɔ́lɛ́: «Pumə́líʼtíníí lɛ́ ndɛ ogɛɛlɛ nkə kɛ́ɛg kɛ́ poányɔ́ŋɛn a?» Náa pɔ́nɔ́ na nyɔ́lɛ́: «Ɛɛ́ɛ óo Sə́dúk, timə́líʼtíníí.» 29Yə́sus aáság kobodɔ́bɔ a əngis, náa ɔnɔ́: «Táán áboyɛ́ʼkɛn nkə kɛ́ pumə́muŋíən a nɛag nɛ́ poágɛ́nɛ́ɛ́ oʼto na nyɔ́lɛ́.» 30Əngis yɔ́ɔ́bɔn yááság koság komóaŋ, pə́ə́bə́ə́ kodɛ́ʼtɛganan. Yə́sus ayɛ́bosɔ́yɔn na toɛn, ɔnɔ́: «Ntɛnjóób lɛ́ poádɛánɛ na mɔɔd nkə kɛ́ɛnɛ kɛ́ kɛ́másánɛ́ɛ́!» 31Náa, páaman kolon, páyɛ́ɛ agɛɛn əgín na niiŋ nɛ́ Yə́sus a unuʼ, pə́əgiim pálɔɛgɛ nigúu niim.
Yə́sus ayóómɛ mummug
(Lóʼk 11.14-15)
32Ná powongwóg póob páyɛ́ɛ páʼkɛɛn, pááság kiimin Yə́sus na mummug, lɛ́ uŋun wó ɔmbɛ́ óyɛ́ɛ na nyɔ́lɛ́. 33Yə́sus yɛɛ́ŋɛ́ŋ uŋun wó ɔmbɛ́ wóow, mɔɔd əə́bə́ə́ kosɔyɔ. Ungim nyɔ́ ayɛ́ɛ a kiʼtúú kɛ́ pɔɔd kɛ́ɛg yiígə́g. Páyɛ́ɛ agosɔyɔ pɔ́nɔ́ əə: «Wóonɛ ombod oʼ! Pɛ́go, pɛ́go, tɛdɛ́ʼtála yoom wɔnɔ́ yɛ́ɛnɛ yáagaáyɛ́ɛlɛ a nigúu nɛ́ Ɛ́sɛlayɛl!» 34Kɛbán kímuʼ, Pafalɛsɛyɛ́ɛŋ pɔ́lɛ́ páyɛ́ɛ agá agosɔyɔ pɔ́nɔ́: «Nkúm ɛ məŋun má mabɛ́ aa ɛmoyɛ́ʼkɛ́nɛ́nɛ́ɛ́ toɛn tóod tó alɛɛ́ agoŋɛ́ŋŋaŋ məŋun má mabɛ́ na tólɛ́.»
Maan míísíəd Yə́sus na kiʼtúú kɛ́ pɔɔd
(Mə́l 6.6, 6.34; Lóʼk 10.2)
35Yə́sus ayɛ́ɛ əgiim ádáŋana a moyaa mó əʼkúu muim na a pabálɛ́ɛg piim, aágɛɛ́ʼkɛnan pɔɔd ndə́b a puog poɔ́bɔn pó pɛɔ́sɔ́gɔ́lɔ́n, aálɔɛgɛ Tɔsɔm Tólaŋ tó a Nɛlaamɛʼ nɛ́ a mɔɛn, aágoómanɛ mabámbany miim, na pɛnɛ́m piim. 36Náan aa maan mə́yímusíəd na kiʼtúú kɛ́ pɔɔd kɛ́ɛg kɛ́ ayɛ́ɛ agodɛ́ʼtɛg. Maan mə́yímusíəd na pɔ́lɛ́ lɛ́ páyɛ́ɛ pəə́lísə́ə́n, pɔdɔmɔ́ɔ́n wɔnɔ́ todóm tó tódɛɔ́gɔ na sə́dúg#9.36 Kɛ́lɛ náan a kálaʼtaʼ yɛ Ɔmb 27.17; na a ɛ 1Puʼk 22.17 37Náa ɔnɔ́ na paaʼkan pə́ə́ŋ: «Pigólí pɛ́ nibug pɛ́lɛ piíŋ a pɔlɛ́m, náa pəgud kɔ pɔ́dɛɔ́gɔ piíŋ. 38Poɔ́sɔ́gɔlɔn mɔɔd o moom lɛ́ yíim ádom pɔɔd a nibug niə́ŋ agaáyɛn náan.»
നിലവിൽ തിരഞ്ഞെടുത്തിരിക്കുന്നു:
Maʼtɛ́as 9: yatDBL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Wycliffe Bible Translators Inc, 2015
