Mt 8

Yeso nyaʼa vɨ̀ mbaŋə̀ nɨ nyaʼə wɔ̀n əpabɨ

(Mk 1.40-45; Lk 5.12-16)

1Ənɨ Yeso nyaʼa swiʼ rɨkaŋ ɨwum we, mɨnɔ̂n bə̂d nyaʼa beenɨ əbɔʼ məd. 2Mbaŋə̀ mɔʼɔ nɨ nyaʼə wɔ̀n əpabɨ nyaʼa wò chìndɨ̀ ɨtu ɨnywɨ ɨfě ɨ bɔ, ghà ni, “Ə̀nùŋɨ̀sɨg, à mɨ ghaʼ, à we tɨ̀ à ghɨ̀ mɨ ɨnyod zeŋ.”

3Yeso nyaʼa sèm əbɔ bètɨ̀ əməd ghà ni, “Mə ghaʼ nɨ ghɨ əne. Ɨnyod, zeŋ!” Àmei əwu əwən, əpabɨ ze ə nyaʼa mì rɨ ɨgwɨ ə mbaŋə̀ ze. 4Yeso nyaʼa ghɨ̀ əne ghà ɨ bɔ ni, “Zə ni tɨ à gha əwe ənû zɔ̂ əmbɨ wə̀d mɔʼɔ, àyɨə ndə̀ wo chwi e ɨnyod əmbɨ wə̀d mbàn Ŋwìə̀, nàʼ əghɨ ə̀fà ze nɨ Mose nyaʼa sobɨ, ɨmbə̀ʼ bə̂d kyerɨ ni əpabɨ ze ə fə mì rɨ ɨgwɨ ne.”

Yeso nyaʼa vɨ̀ wə̀d ə̀fàʼì ətu ɨgwɨ mɨ̀sɔgyɨ̀

(Lk 7.1-10)

5Ənɨ Yeso nyaʼa wo nyɨ ə Kàpenàhom, ətu ɨgwɨ mɨ̀sɔgyɨ̀ ɨkɨ fibɨ̀ nyaʼa wò buʼ ɨbɔ ɨ bɔ 6ghà ni, “Masà, mɨ wə̀d ə̀fàʼì wɨə wɔ̀n ɨgun əbàʼ ɨŋga nəb. Wɨ̀ fə buʼrə. Ɨ wɨə kàŋə̀ zəə ŋgəʼ.”

7Yeso nyaʼa ghà ɨ bɔ ni, “Mə bɨrɨ wo vɨ əməd.”

8Àyɨə ətu ze ɨgwɨ mɨ̀sɔgyɨ̀ nyaʼa ghà ɨ bɔ ni, “Masà, mɨ rɨka kùʼ əmɨ ni à nyɨ ɨŋga mɨ nəb. Gha àmei ɨŋgam, mɨ wə̀d ə̀fàʼì bɨrɨ bɔtɨ i. 9Mɔ̌ bə̂, mə wɨ əton mɨ̀sɔgyɨ̀ kyeŋ, mbɨ mɨ̀sɔgyɨ̀ cherə əton num. Mə mɨ ghà əmbɨ wɨ fìbɨ̀ ni, 'Wo ə', wɨ̀ bə̀ wò. Mə mɨ ghà əmbɨ wɨ cherə ni, 'Yeʼe', wɨ̀ bə̀ yeʼe. Mə mɨ ghà əmbɨ mɨ ə̀bòʼò ni, 'Faʼ ə̀fàʼì zɔ̂', wɨ̀ bə̀ fàʼ.”

10Ənɨ Yeso nyaʼa zu ənû ze, wɨ̀ nyaʼa yiirɨ, əne ghà əmbɨ ə bə̂d mbe nɨ nyaʼə beenɨ əbɔʼ məd ni, “Mə ghà rəsìʼ ɨ nən ni chəi mə kweʼ zə wə̀d mɔʼɔ ɨŋga Izre nɨ berɨ ɨkwɨ ɨbenɨ wɔ̂. 11Mə ghà ɨ nən ni bə̂d mɨ̀nɔnɔʼ bɨrɨ yeʼe rɨ əbà ze nɨ nyùmə̀ ə jwɨ̀ rəŋgu bə̀ yeʼe rɨ əbà ze nɨ nyùmə̀ ə nyɨ ɨkòb, pè chub ɨgun ə tebrə̀ ɨŋga ənû ɨfɔ̀n rɨkaŋ ɨ jɨg mbɨ Abràham mbɨ Aizìk fɔrɨ ə Jakɔ̂b. 12Ŋwìə̀ bɨrɨ chɨ bə̂d mbe nɨ mbɨ nyaʼa tekɨ ənû ɨfɔ̀n nùŋ əmbɨ mɨ̀mə̌d màʼ ɨŋga ɨsɨ firɨ, nɨ yeʼ əsɨ nɨ bə̂d bɨrɨ sɨə zə̀ʼə̀ kud əsɔŋ.”

13Yeso nyaʼa sɨ ghà əmbɨ ətu ɨgwɨ mɨ̀sɔgyɨ̀ ze ni, “Sɨ wò e. E wə̀d ə̀fàʼì bɨrɨ bɔtɨ i ɨchî nɨ à benɨ.” Wə̀d ə̀fàʼì ətu ɨgwɨ mɨ̀sɔgyɨ̀ ze nyaʼa bɔtɨ i əwu əwən.

Yeso nyaʼa vɨ̀ bə̂d mɨ̀nɔnɔʼ

(Mk 1.29-34; Lk 4.38-41)

14Ənɨ Yeso nyaʼa wò nyɨ ɨŋga nəb Pità, wɨ̀ nyaʼa zə nyɔ̂ Pità nɨ nyaʼa ɨgun əbàʼ mbɨ ɨfə. 15Ənɨ wɨ̀ nyaʼa bètɨ̀ əbɔ əməd, ɨfə we nyaʼa sàŋ əməd. Əne wɨ̀ nyaʼa nɔ̀ʼ, kə̀b əghɨjɨg nàʼ ɨ bɔ.

16À nyaʼa ɨkwirɨ kwirɨ əni ze, bə̂d nyaʼa nɨŋ bə̂d mɨ̀nɔnɔʼ nɨ ɨzwî rɨbɔ̀ŋ nyaʼa ɨŋga mɨ̀mə̌d wò əsɨ Yeso. Wɨ̀ nyaʼa chɨ̀ ɨzwî rɨbɔ̀ŋ mbe àmei ənɨ ɨŋgam. Wɨ̀ nyaʼa bə̀ vɨ̀ bə̂d əwɔn mɨjìm mbe nɨ mbɨ nyaʼa yeʼe mbɨ mbɨwən. 17Ənû zɔ̂ ə nyaʼa ghɨ̀ əne ɨmbə̀ʼ ənû ze nɨ wə̀d ɨ̀kə̀n Ŋwìə̀ Aizayà nyaʼa ghǎ, ə jwɨ̀ ənɨ rəsìʼ ni, “Wɨ̀ nyaʼa chɨ̀ mba ɨnɔʼɔ bə̀ vɨ̀ mba ɨwɔn jìm.”

Ənû ɨmbə̀ʼ ə bə̂d mbe nɨ nyaʼa ben ni mbə bɨrɨ beenɨ əbɔʼ Yeso

(Lk 9.57-62)

18Ənɨ Yeso nyaʼa zə mɨnɔ̂n bə̂d mbe nɨ nyaʼa kad əməd, wɨ̀ nyaʼa ghà əmbɨ mbi mə̀mə̀ə̀nɨ̀-ɨnû ni mbɨ baanɨ wò ɨnjin ə sà ze. 19Ənɨ wɨ̀ nyaʼa gha əne, əchwiə̀ rɨ̀kə̌ mɔʼɔ nyaʼa wò əsɨ məd pè gha ɨ bɔ ni, “Əchwiə̀-ɨnû, mə bɨrɨ beenɨ əbɔʼ ne ɨsɨ jìm mbe nɨ àwɔ̀ ə wò əŋgu.”

20Yeso nyaʼa ghà ɨ bɔ ni, “Kyerɨ ni mɨ̀seŋə ə berɨ tə rɨbɨgɨ, tɨnən bə̀ berɨ tə kàn, àyɨə chəi Wan Wə̀d berɨ əsɨ nɨ nuŋ e ətu əŋgu.”

21Ə̀mə̀ə̀nɨ̀-ɨnû cherə nyaʼa ghà ɨ bɔ ni, “Masà, sɨ mə̀ be wò tweŋ mɨ mbǎʼ.”

22Yeso nyaʼa ghà ɨ bɔ ni, “Beenɨ əbɔʼ num, sàŋ ɨvɨ bə̂d tweŋ mbə ɨvɨ bə̂d.”

Yeso nyaʼa təmnɨ əfim

(Mk 4.35-41; Lk 8.22-25)

23Ənɨ Yeso nyaʼa wo nyɨ əbaŋ ɨgyɨ̀, mə̀mə̀ə̀nɨ̀-ɨnû ɨməd nyaʼa wò nyɨ əbɔʼ məd. 24Mbɨ nɨ zə, əfim ə kǎ kǎ ə mɔʼɔ nyaʼa sàʼ kɔ che ɨgwɨ ə sà ze, əne ghɨ̀ əbaŋ ze ə kə̀b nim əton mɨnib. Ənɨ zɨə nyaʼə ghɨ̀ əne, Yeso wɨə nyaʼə gwen i. 25Mə̀mə̀ə̀nɨ̀-ɨnû mbe nyaʼa wò nɔ̀ əməd, ghà ɨ bɔ ni, “Chɨ əwa rəŋgəʼ, kyɨ Ə̀nùŋɨ̀sɨg! Tɨ̀ yɨ əni ɨchù ɨvɨ!”

26Yeso nyaʼa wììrɨ̀ əmbɨ mɨ̀mə̌d ni, “Ə ɨbenɨ ə kàŋ kə! Mbə kɨə bɔə ye ə?” Wɨ̀ nyaʼa ghà əne, nɔ̀ʼ ghàm əbɔʼ əfim ze bə̀ fɔrɨ əbɔʼ ə sà ze, əne ɨsɨ nyaʼa bɔd rɨ gwèèd.

27Mbaŋə̀ te nyaʼa yiirɨ əne biirɨ ni, “À kɨə kaŋ ɨkwɨ wə̀d wi wɔ̂, nɨ ka àbei əfim mbɨ mɨnib nɨə nɔ̀ʼə̀ swiʼə ə zuunɨ əməd ə?”

Yeso nyaʼa vɨ̀ mbaŋə̀ rɨ̀be nɨ ɨzwî rɨbɔ̀ŋ nyaʼa ɨŋga mɨ̀mə̌d

(Mk 5.1-20; Lk 8.26-39)

28Ənɨ Yeso nyaʼa pe ɨnjin ə sà ze, əne yɨ ɨŋga əbà əbeŋ ze rɨ ə Gàdarà, mbaŋə̀ rɨ̀be nɨ ɨzwî rɨbɔ̀ŋ nyaʼa ɨŋga mɨ̀mə̌d, nyaʼa jwɨ̀ rɨŋga mɨ̀sì nɨ mbɨ chəb ɨŋga ɨwɔ̌, wò kɔɔrɨ əməd. Mbɨ nyaʼa tɔə kwàʼ rɨŋgəʼ. Əze ə nyaʼa ghɨ̀ ni tɨ bə̂d yen ə ɨnə̂njɨ̀ we. 29Ənɨ ɨzwî rɨbɔ̀ŋ mbe nyaʼa zə ə Yeso, mbɨ nyaʼə kyeŋə ghàə̀ ni, “Àwɔ̀ Wan Ŋwìə̀, à berɨ ənû ə ye nɨ ghɨ̀ mbɨ na ə? À wa yeʼe əgha ɨ chə əwa bɔŋ nyùmə̀ sɨə kùʼ ə?”

30Ɨnɔ̂n mɨ̀kuŋə mɔʼɔ nyaʼə jɨgə ɨban əsɨ ze. 31Əne ɨzwî rɨbɔ̀ŋ mbe nyaʼa buʼ ɨbɔ əmbɨ Yeso ni, “À mɨ chɨ̀ əwa, à chà tɨ̀ wò nyɨ ɨŋga mɨ̀kuŋə mbə.”

32Yeso nyaʼa ghà əmbɨ mɨ̀mə̌d ni, “Mbə̀ wo nyɨ!” Əne mbɨ nyaʼa jwɨ̀ wò nyɨ ɨŋga mɨ̀kuŋə mbe. Ɨnɔ̂n mɨ̀kuŋə we jìm nyaʼa sù ɨbom bam wò feŋ ɨŋga ə sà ze, kwɨrɨ. 33Bə̂d mbe nɨ nyaʼə nə̀ŋgɨ mɨ̀kuŋə mbe nyaʼa nòrə̀ wò ɨŋga əsɨ ze, pè ghà ɨnû jìm bə̀ ghà ənû ze nɨ nyaʼa ghɨ ənɨ ə bə̂d mbe nɨ ɨzwî rɨbɔ̀ŋ mbe nyaʼa ɨŋga mɨ̀mə̌d. 34Bə̂d mɨ̀jìm rɨŋga əsɨ ze nyaʼa zu əne, jwɨ̀ wò kɔɔrɨ ə Yeso. Ənɨ mbɨ nyaʼa zə əməd, mbɨ nyaʼa buʼ ɨbɔ ɨ bɔ ni wɨ̀ jwɨ rɨŋga ə əbà əbeŋ.

നിലവിൽ തിരഞ്ഞെടുത്തിരിക്കുന്നു:

Mt 8: mgo

ഹൈലൈറ്റ് ചെയ്യുക

പങ്ക് വെക്കു

പകർത്തുക