Matiyò 6

Jisòs yiki kum lum we ghɨ kəta hi tè gàmtè ghɨta atɨ̂n

1“Ghàn hi tôknè, kə ghàn nê hi nê gha jûŋà ha Yènfù a ndan beka ghàn khɨŋa na ghɨta hi yenâ. Ghàn shìki nì yâ, ma Bì wânù a nyə̂ bê tè fè fo jə̀ maktu wanu.”

2“Yi chwûtè na, wò ki fo a shyə ha wùt we wù gha, kə lyi gha tɨni hi tè gbè toŋa chyà ndoŋsu. Ghɨt ghe ghɨ kama nê kə ni ghɨna gbè fòktè chyâ a tu fwəh tu lumtu nì ndasu chintesu na ghɨta tahi tè kokhe ghɨna. Mu jìsà ha ghàn hamok na ghɨt mɨ ghɨ̂n hì mô ma ghɨ ti khɨti mihì maktu ghɨna.” 3Wò lyi a shyə hi fo ha wùt te wù gha, wò fo wu lum afa sun wâ wù təm nè khɨle wijə.#6.3 Ghɨ nyak yi jìs yi Gɨlìs na, Kə wò ni na kpen wa wu wo kôwì khɨli gha ye kpen wa wu wo ta nè. 4Yi chwûtè na wò ki lyê fo ya, kə nè fo hi chwùtì na ghɨta yen. Wò ki ni yâ, ma Bì wâ we wù yena gha letena ma wù nê fo maktu wa.

Jisòs yiki kum yi jə̂m

(Lûk 11.2-4)

5Ghàn shihi jə̂m, kə ghàn hi kama nê te ghɨt ale. Ghɨna fànà wi hi lòtè timi a ndâ su chintesu hi tè jə̀m, fê gbê jə̂mà a bìtu lumtu, khɨŋa na ghɨta hi chyâ yena ghɨna. Mu jìsà ha ghàn hamok na ghɨt mɨ ghɨ̂n hì mô ma ghɨna ti khɨti mihì maktu ghɨna. 6Wò hì mô hi jə̀m, wò kina luk wu letenu wo jəm ha Bì wânù we ghɨ yena wi. Wò ki jə̂m ni, ma Bì wâ we wù yena gha letena ma wù nê fo maktu wa.

7Ghàn hì mô hi jə̀m, kə ghàn hi kwote nâbi ghə jîsà fè kuntê te ghɨt ghe ghɨ khə wi Yènfù. Ghɨna nè yâ kwâktè na Yènfù ywo lò jîs yi ghɨna beka ghɨna làtè. 8Kə ghàn sina ha ghɨna beka ghàn shihi jə̀m ma Bì wânù hì khəlò shyə ghe ghàn khɨŋa. 9Ghàn hì mô hi jə̀m, ghàn jəm wu lum afan ni: ‘Bì wâhù we wù mò a nyə̂, nê ma ghɨta hi kokhe yet ya,’ 10nê ma ghɨ yen fə̂n wa, nê mbyi yinâ na yi gbi kə te wò khɨŋa kəbi yi ghəl te yi mô a nyə̂. 11Yəhi ghàh lân, ma wò yəhi ghàh tuk mù jɨ̀m. 12Lèhifo ghàh a ghàh a gha be, kəbi yi ghəl te ghàh lèhèfo nâbi nde wù ne be ha ghàh. 13Kə wò de na mômhìnì ben ha ghàh, fihi ghàh a gha be afa wùt wù be khɨŋa hi nì ha ghàh. (Beka fə̂n wa saka kə wò, a kəta kə wò jyaka nì ban yi chiki kə yu mù jɨ̀m. Àmèn.)

14“Ghàn hi lèhèfo be se ghɨta nè ha ghàn, ma Bì wânù we wù mò a nyə̂ nê boŋa lèhêfo ghàn. 15Ghàn hì lèhèfo wijə besu ghɨ̂tsù, ma Bì wânù nê tê boŋa lèhèfo jə̀ sanisu.”

Jisòs yiki kum bam yi jwo

16Ghàn shihi bam yi jwô, kə ghàn hi gûnà kə̂kà te ghɨt ghe ghɨ kama nê gha. Ghɨna shihi bam yi jwô, ghɨna hi châmnè kə̂kà shyəma ghɨta hi yenâ. Mu jìsà ha ghàn hamok na ghɨt mi ghɨ̂n shyə khɨti mihì maktu ghɨna. 17Ghàn hì mô hi bam yi jwô, ghàn hi sô kə̂k tanitu, shyakè tu wanu, 18ma ghɨta nê hi khə wi na ghàn mò ni bama yi jwô, a khə kə Bì wanù we ghɨ yena wi ma ghàn ni yâ, ma Bì wanù we ghɨ yena wi ma wù nê makti ghàn.

Jisòs yiki kum ghak ye yi mô a nyə̂

(Lûk 12.33-34)

19“Kə ghàn hi lêmà ghak yani yi ngɨŋi a chyə afân. A mô wu luk we sekuseku mô hi kut a mwə̀ mù tɨ̂n, ma mùlè bef, ma ghɨt a chwoŋana mô hi fè khɨm a ndâ yâ hi chwôŋ.” 20Ghàn hi bɨlà lêmà ghak yani a nyə̂. A mô wu luk sekuseku bu hi kut a shyə afû, mwə̀ mù tɨ̂n bu hi bàŋ, ghɨt a chwoŋana nê hi bu hi khɨma ndâ hi lye chwoŋ. 21Ghaki wûtì mô kəbi afa, təm yi wuni hi mô kə afû.

(Lûk 11.34-36)

22“Se wûtà mò kəbi te lâm a wun wu wùn. Se gha shìki mô a jûŋ, ma wun wa nê hi mô nì bani. 23Biyani, ma se gha hì bu a jûŋ, ma wò nê hi gbê kə a fùtɨ̂n à yì fîn nì wun wa wù jɨ̀m. Yi chwûtè na se gha shìki fo wi bani nâ hakoh, ma wò nê hi mô nâ atɨ̂n à yì fin yi be!”

Jisòs yiki na ghɨta wi hi tè kokhe Fùyèn fê kokhe wu kâ

(Lûk 16.13; 12.22-31)

24“Wùt wi hi tè mò wut wù fètana ha ghɨt à bà. Yi shìki mô ni, ma wù nê hi bânà wùlè kôŋà wùlè; faŋ ni, ma wù nê hi ngumle wùlè Kehe wùlè. Wò wi hi fèt ha Yènfù fê fêtà kəbi ha ka.” 25“Mu wu hì jîsà ha ghàn chin na, kə ghàn hi kwâktè kum nì chyə yani. Kə wùt ha ghàn nê hi kwâktè na yi nè yə gha agha, yi nè nyo ghə agha makə yi nè mâkà ghə a yi wùn agha. A wò jis na yohnà wûtì chyà wi mwə̀ mù yə̂mù agha, wun wu wûtù chyâ wi njusu agha?” 26Ghàn yen kə nâ nyɨ̀m muna mù fela chyâ a nyə ni. Mù yome wijə mwə̀ mù yə̂mù, kpê wi, lêmà wijə shyə a wu tân, biyani nâbi we wù mò a nyə̂ yəhe kə yi yəhî munù. Ba ghàn kokne chyâlò nyɨ̀mû agha? 27Wùt wi hi dàbhì yu wunu wu kpu nâ hakoh beka wù kwàktè chyâhè mbyî 28“À hì mô kum njusu, təm ghana hi fumhe ghàn ni njwo ghə? Ghàn yen lê te wəlânù ləma kwoka a ghə̀n, fê bwùsà. Wu tà timi hì fêtà shyə nâbi hi taha sùnju hi màk.” 29Mu jìsà ha ghàn na, nâ fə̀n Sòlomùn nì ghak yê wù ndùku kəta nâ yì jɨ̀m tà timi hì lafa tânà te a bwùs atɨ̂n à wu bwùs afân. 30Yènfù shìki mô hi labhe wu wəlâ ni a ghə̀n lan ni, tuku mô hi yu yi bîs na təm à nyok, ma fu nê labhi nâ ghàn yàni agha? Ghàn bìtè yole ghə a ghàn yi samhî ha Yènfù ni?

31Te yi mô ni, kə təm ghana hi fo ngə̂k bufa nâ, ‘Ghàh nè yə ghə, ghàh nè nyo ghə, ghàh nè mâkà ghə agha?’ 32À nyiŋa à ghɨt ghe ghɨna khə wi Yènfù yi bàm yi mwə̀ afân, biyani Bì wânù a nyə̂ khəlò na ghàn khɨŋa lò mwə̀ munâ. 33Gha shyə mò na ghàn bɨlà lem təm ghana ha Yènfù ma ghàn hi chyə chilichili te ghɨt ghe ghɨ chyə a Yènfù yi dèt yi làŋ ma fu nê fo kpenhi mwə̀ muna mù jɨ̀m ha ghàn. 34Ni, kə təm ghana hi fumhe ghàn kum tuk wu bisu beka yi bis bè kpene kə nì gha wuni. Nâbi wùni tuku kətalò ngə̂k yi kpene kə nì tuk wu tɨnu, a fə̂n wa saka kə wò a kəta kə wò jyaka, nì bân yi chiki kə yu mù jɨ̀m. (Àmèn).

നിലവിൽ തിരഞ്ഞെടുത്തിരിക്കുന്നു:

Matiyò 6: bmv

ഹൈലൈറ്റ് ചെയ്യുക

പങ്ക് വെക്കു

പകർത്തുക