Matyù 11
11
Ngàŋə ntwuumə̀ nɨ Jònə ngàŋə̀ àŋâ àkẅiirə̀ nchyə à lə̀ twuumə̀nə
(Luk 7.18-35)
1Nkwùə̀ nɨ Yěsû à lə̀ myàanə̀nə a nɨ təətə̀ ɨ̀zùŋə̀ ndzùmə̀ ɨ̀pe pa ntsòbə̀ ɨpaa, à lə̀ tyiʼə̀ nfurə̀ ndèrə̀ a nɨ nèrə̀ mɨ̀nwùə̀ nkɨ nshwəŋə̀ ànwùə̀ Nẅùə̀ amwuə mɨ̀mbòmpə mɨ ɨ̀laʼà nɨ mɨ paatə̀nə alyiʼə ghu. 2Nkwùə̀ nɨ Jònə ngàŋə̀ àŋâ àkẅiirə̀ nchyə à lə̀ pənə a ndâ ɨ̀tsaŋə̀ ndzuʼù mɨ̀nwùə̀ mɨ̀tsùmə̀ nɨ Kristù à lə̀ mənə ngɨ̀rə̀ la, à lə̀ tsàa ɨ̀zùŋə̀ ndzùmə̀ ɨ̀pe ambo Yěsû 3lo pobə̂ pyiitə̀ e lo, “Ghò lə ẅùə̀ wa nɨ à pənə tô la, kə̀ pəə mbyabə̀ a ghù nyàanə?”
4Yěsû a kẅùə̀ ambo pobə lo, “Nɨ̀ ghə̀ shwəŋə̀ ànwùə̀ nɨ nɨ̀ zuʼnə kə̀ ndzəənə̀ ambo Jònə lo 5pɨ̀fə̀ zəənə̀ ɨlyiʼə, pɨ̀koŋə̀ a ɨ̀shyə̂ lòo ngyìinə̀, mɨ̀mbɨ̀ŋmə̀ mɨ ngàŋə àkɨ̀kẅinə laanə̀, pɨ̀kɨ̀mbuʼu mɨtugrə zuʼù ɨ̀nwùə̀, pɨ̀kwuə̀ pɨ ɨ̀shyə̂ zhwuumə̀, nkɨ nchwìitə̀ ntwuumə̀ ghù ɨ̀shìʼnə̀ wa ambo pɨ̀ghàŋə pɨ àfumə̀. 6Mborə̀ ɨ̀ chyə̂ ambo ŋònə̀ wa nɨ ka à pə mɨnkə̀ e a ŋònə̀ nɨ m̀bənə ẅèrə la.”
7Tsaʼnə ɨ̀zùŋə̀ ndzùmə̀ Jònə pa lə̀ mənə ndèrə̀, Yěsû à lə̀ pìʼnə̀ a nɨ shwəŋə̀ ambo àpùŋə̀ pə̀ənə̀ mbə̀ʼə Jònə lo, “Nɨ̀ lə̀ furə̀ ndèrə̀ alyiʼə waakə gha la a nɨ zəənə̀ àkə? A àkɨ̀kàʼà nɨ fèrə̀ à wə̀ nnə̀ʼə̀? 8Nɨ̀ lanə nfurə̀ ndèrə̀ la a nɨ zəənə̀ àkə? A nɨ zəənə̀ a ŋònə̀ nɨ à ẅînə ɨtsəʼə nɨ̀fò a mbɨ̀ŋmə̀ ze? Nɨ̀ zəənə̀, pànə̀ nɨ pobə pa ngẅî mbuurə̀ ɨtsəʼə pèrə pə pa nchyə̂ la a ntoʼò. 9Nɨ̀ lə̀ tyiʼə̀ nfurə̀ ndèrə̀ la a nɨ zəənə̀ àkə? A nɨ zəənə̀ a ngàŋə̀ ntwuumə̀ Nẅùə̀? Ee, ǹshwəŋə̀ a wɨghə lo, nɨ̀ lə̀ zəənə̀ la ŋònə̀ nɨ à tsàarə̀nə a ngàŋə̀ ntwuumə̀ Nẅùə̀. 10Lə̌ ze wa nɨ pɨ lə̀ ŋwàʼnə̀nə mbə̀ʼə e lo,
‘Mbɨ tsàa ngàŋə̀ ntwuumə̀ mə̀ a mbyə̀ ghò,
zhyə̀ nɨ à ghǎ ghə̀ tsùŋə̀ àlàŋə a mbyə̀ ghò.’
11“Ǹshwəŋə̀ tyìʼə̀ nkǔŋə nkuŋə ambo pɨghə lo, amwuə pànə̀ pɨ̀tsùmə̀ nɨ pə̀ngyə̌ pyə̂nə, ka ŋònə̀ ɨ̀tse nɨ à pənə a mbyə̀ Jònə ngàŋə̀ àŋâ àkẅiirə̀ nchyə. La ŋònə̀ nɨ à kɨ̂nə ndẅùunə̀ amwuə ànwùə̀ Nɨ̀fò nɨ̀pwuurə̀ à tsàarə̀ e. 12A nɨ pìʼnə̀ nkwùə̀ nɨ Jònə ngàŋə̀ àŋâ àkẅiirə̀ nchyə à lə̀ tônə tə mbyàa tɨ̀tsòŋə̀, ànwùə̀ Nɨ̀fò nɨ̀pwuurə̀ a zuʼù mə ngəʼə̀ yɨ̀noʼnə, pànə̀ pɨ̀noʼnə zòŋnə̀ mmə ntàʼà àlàŋə a nɨ kwuunə̀ amwuə pəə nɨ ɨ̀tɨ̀ŋnə̀. 13Ntiinə ngàŋə ntwuumə̀ Nẅùə̀ ɨ̀tsùmə̀ pobə pɨ̀mbòomə lə̀ pyə̀ mə nshwəŋə̀ ànwùə̀ mbə̀ʼə ànwùə̀ Nɨ̀fò nɨ̀pwuurə̀ tə ntô mbyàa nkwùə̀ Jònə. 14Nɨ̀ tə mə nkòŋə̀ a nɨ zuʼù ntwuumə̀ ghù ntsàambyə̀, nɨ̀ zhyə̂ lo Jònə la Elijah wa nɨ pɨ lə̀ shwəŋə̀nə lo à ghǎ tô la. 15Ŋònə̀ nɨ à pənə nɨ mɨtugrə â zuʼù.
16“Mbə̀ʼə ǹdopə̀ pànə̀ pɨ tɨ̀tsòŋə̀ lə nɨ àkə? Pobə chyə̂ la tsaʼa àghòbə nɨ pobə pənə àzàanə mɨ̀tàanə mmə nfuŋə̀ pɨ̀ghɨ̀ɨnə̀ ɨ̀pobə lo,
17‘Pəə lə̀ zòbə̀ nchyə nɨ̀zoʼò ambo pɨghə la ka nɨ̀ pinə̀ a wɨghə,
pəə chi ŋŋâ nchyə nɨ̀wɨghə̀ la ka nɨ kẅiirə̀ a wɨghə.’
18“Jònə à lə̀ tô la mmə ndzwuə̀ tɨ zɨghə̀, ka kɨ mə nô e mɨ̀lùʼù, pɨ shwəŋə̀ lo, ‘À chyə̂ nɨ àzhyə̂.’ 19Moonə̀ Ŋwùə̀ a tô ndzɨghə̀ nkɨ nnô, pànə̀ pɨ̀tsùmə̀ shwəŋə̀ lo, ‘A noomənkyə̀, mbə àpaarə̀ mɨ̀lùʼù, nkɨ mbə ɨ̀swùə pɨ̀nkẅiirə̀ pɨ̀taghə̀ pobə ngàŋə ngɨ̀rə̀ ɨ̀nwùə̀ tɨ̀pòŋə̀!’ A patə mbə pə lə la, pɨ pa nzhyə̂ a ngàŋə̀ àzhìʼtə̀ la ntii àfàʼà ɨ̀shìʼnə̀ nɨ à fàʼnə.”
Mɨ̀mbòmpə mɨ ɨ̀laʼà mɨ̀ẅùunə nɨ ka mɨ lə̀ pyiimə̀ e ntwuumə̀ ghù ɨ̀shìʼnə̀ wa
(Luk 10.13-15)
20Yěsû à lə̀ tyiʼə̀ mbìʼnə̀ a nɨ saʼà pànə̀ nɨ pobə lə̀ pənə amwuə mɨ̀mbòmpə mɨ ɨ̀laʼà myə̀ nɨ à lə̀ ghɨ̀rə̀nə mɨ̀nwùə̀ mɨ yerə̀nə yerə̀nə ghu la, ntiinə ka pobə lə̀ pə̀ŋə̀ a ghobə mɨ̀ntɨŋmə̀ ɨ̀mobə myàʼtə̀ a tɨ̀pòŋə̀ ɨghobə. 21À lə̀ saʼà a ghobə nshwəŋə̀ lo, “Ngəʼə̀ yɨ̀noʼnə ɨ̀ chyə̂ ambo ghò mbǎ Kòrazìnə̀! Ngəʼə̀ yɨ̀noʼnə ɨ̀ chyə̂ ambo ghò mbǎ Betsedà! Ntiinə mɨ̀nwùə̀ mɨ yerə̀nə yerə̀nə mə nɨ pɨ ghɨ̀rə̀nə ambo pɨghə lə pɨ pəla ngɨ̀rə̀ la ambo Tayə̀ ghobə Sidònə̀, yi pobə lə̀ kwaa mə mbə̀ŋə̀ mɨ̀ntɨŋmə̀ ɨ̀mobə ngẅî ɨ̀lùŋə̀ nɨ̀wɨghə̀ nkɨ nfùʼù ɨ̀twuə̀ ɨ̀pobə nɨ àpwuə̀. 22La ǹshwəŋə̀ tyìʼə̀ nkǔŋə nkuŋə ambo pɨghə lo à ghǎ pə njyə̂ ntsoʼtə̀ mɨ̀sàʼa, Nẅùə̀ â koorə̀ mɨ̀lɨŋə̀ mɨ pànə̀ pɨ Tayə̀ ghobə Sidònə̀ ntsàarə̀ a wɨghə! 23La ambo ghò, Kàpenòmə̀! Wə̀ tə pyə̀ ŋŋaŋə̀ mbɨ̀ŋmə̀ o nkoʼò mbyàa pə a nɨ̀pwuurə̀ yi pɨ̌ shwuʼkə̀ o tsàa amwuə pàŋə̀ ɨ̀shyə̂. Ntiinə mɨ̀nwùə̀ mɨ̀yerə̀nə yerə̀nə nɨ pɨ lə̀ ghɨ̀rə̀nə ambo ghò la pɨ lə̀ pəla ngɨ̀rə̀ la a àlaʼà Sodòmə̀ yi ka pɨ lə̀ pyaatə̀ e a zèrə. 24La ǹshwəŋə̀ tyìʼə̀ nkǔŋə nkuŋə ambo pɨghə lo, à ghǎ pə njyə̂ ntsoʼtə̀ mɨ̀sàʼa, Nẅùə̀ â koorə̀ mɨ̀lɨŋə̀ mɨ pànə̀ pɨ Sodòmə̀ ntsàarə̀ ɨ̀mɨghə.”
Yěsû a shwəŋə̀ lo nɨ̀ tô ambo ze mbə̀ʼə zhwùutə̀
25Yěsû a tyiʼə̀ nshwəŋə̀ nkwùə̀ ghu lo, “Ŋ̀ŋâ a mɨyàa ambo ghò Tǎ Ndòʼnə̀mbyə̂ a nɨ̀pwuurə̀ pobə ɨ̀shyə̂, ntiinə wə̀ lə̀əmə̀nə ɨ̀nwùə̀ pèrə pə ambo pànə̀ nɨ pobə pənə nɨ àzhìʼtə̀ nkɨ nzhyə̂ mɨ̀nwùə̀, la ntyiʼə̀ nnèrə̀ a mèrə ambo kɨyii àghòbə. 26Ee, Tǎ, a ndwuumə̀ nɨ a pòŋə̀nə ambo ghò lo wə̀ ghɨ̀rə̀.
27“Tǎ ɨwəə à ŋâ mə ɨ̀nwùə̀ ɨ̀tsùmə̀ ambo mɨ̀ŋə̀. Ka ŋònə̀ ɨ̀tse a zhyə̂ e a Moonə̀ ndàŋə̀ e Tǎ, ka ŋònə̀ ɨ̀tse a zhyə̂ e a Tǎ ndàŋə̀ e a moonə̀ pobə pànə̀ pa pyə̀ nɨ Moonə̀ à tsoʼò mə nnèrə̀ ɨ̀pɨ̀ŋmə̀ e ambo pobə la.
28“Nɨ̀ tô ambo mɨ̀ŋə̀, pɨghə pa pyə̀ nɨ nɨ̀ kaanə̀nə mbìʼì àpìʼì yè lìrə̀nə, mbɨ ŋâ a wɨghə nɨ àzhwùutə̀. 29Nɨ̀ kẅiirə̀ àkəʼə̀ mə̀ ngẅî a loŋə pɨghə ndzùŋə̀ a mbòomə mə̀, ntiinə m̀botə̀nə nkɨ nshwuʼkə̀ mbɨ̀ŋmə̀ mə̀ a ɨ̀shyə̂; mɨ̀ntɨŋmə̀ ɨ̀mɨghə̌ fiitə̀. 30Ntiinə àkəʼə̀ mə̀ zə a zàŋə̀, àpìʼì mə̀ nɨ mbɨ ŋâ ambo pɨghə a kɨ ndzàŋə̀.”
നിലവിൽ തിരഞ്ഞെടുത്തിരിക്കുന്നു:
Matyù 11: pny
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2017, Cameroon Association for Bible Translation and Literacy
