Luk 23
23
Yecu acï Bɛ̈ɛ̈i në Pilato Nɔm
(Math 27:1-2,11-14; Mak 15:1-5; Jɔn 18:28-38)
1Na wën, ke kɔc wën cï guëër ë ke jɔt röt, ku bïïkï ë Pilato nɔm. 2Ku jɔkï gaany an, “Wo ë raanë yök, ee jurda thöi nɔm, ee kɔc pɛ̈n luɔi yïn kek Kaithar athölbö, ku ye lueel nɔn ee yen Kërtho melik.”
3Go Pilato thiëëc an, “Ye melik de Judai?”
Go bɛ̈ɛ̈r an, “Yeka, kë cï lueelë.”
4Go Pilato lɛ̈k bänydït ke ka ke Nhialic ku kuut ke kɔc an, “Acïn awäny cä yök tëde ëraanë.”
5Gokï ŋak nɔm awär man awën, luelkï an, “Ee kɔc riir nïïm, ë wëët ee yen kɔc wɛ̈ɛ̈t ë paan ë Judai ëbɛ̈n, gɔl ë Galili, aɣet cï eenë.”
Yecu acï Yiɛ̈n Ɣerod
6Na wën, aacï Pilato ye piŋ, ke jɔ luɔp nɔn ee yen raan ë Galili. 7Ku të cï en e ŋic nɔn nu yen ë ciɛɛŋ de Ɣerodic, ke jɔ tuöc Ɣerod, luɔi tɔ̈u en ë Jeruthalem ee aköölkë yen Ɣerod. 8Na wën, aacï Ɣerod Yecu tïŋ, ke jɔ piɔ̈u miɛt aläl, aaye kɔɔr ë yepiɔ̈u ëcaŋɣɔn luɔi bï en e tïŋ, luɔi cï en kajuëc piŋ në këde, ku aŋäth luɔi bï en këgök bï looi tïŋ. 9Go thiëëc ë wël juëc, go ciën kë cï bɛ̈ɛ̈r. 10Ku kääc bänydït ke ka ke Nhialic ku kɔc ee löŋ gɔ̈ɔ̈r, ke gɔɔnykï arëët. 11Na wën, ke dhälkï guöp, yen Ɣerod kekë remdɛn ë tɔŋ, ku jɔkï geet guöp, agokï yiɛ̈n kɔ̈u lupɔ cï lɔ riauriau, ku jɔkï bɛ pɔ̈k nɔm Pilato. 12Go Ɣerod kekë Pilato gokï jɔ mat kapäc ëkööl manë guöp: wään aake de ater në röt.
Yecu acï Kuöm Thuɔɔu
(Math 27:15-26; Mak 15:6-15; Jɔn 18:39–19:16)
13Na wën, ke Pilato cɔl bänydït ke ka ke Nhialic, ku cɔɔl bäny ceŋ piny ayï kɔc kedhie an, bïk guëër, 14ku lëk keek an, “Raanë acäk bɛ̈ɛ̈i tëde yɛn an, ee raan ë kɔc thöi nïïm: ku tiëŋkï, acä luɔp ë wenïïm, ku acïn kërɛɛc cä yök tëde raanë në ka gaany wek en. 15Acakaa Ɣerod aya, acïn kë cï yök, acï bɛ pɔ̈k nɔm wook, ku tiëŋkï, acïn kë cï looi kë duëër en röŋ ke thuɔɔu. 16Abä jɔ dui tei, ku ja pɔ̈l. 17(Aa ye raan tök luöny keek ëkööl ë Dhuëëŋ de Winythok.)
18Gokï cööt ë röl tök an, “Nyaaiyë raanë, ku luönyë wook Barabath.” 19(Barabath ee raan cï tääu ë alooc yic në baŋ de tɔŋ cï yiɛ̈n miric ë pänydïtë, ku në baŋ de näŋ de raan.)
20Go Pilato bɛ jam ke keek, akɔɔr luɔi bï en Yecu lony. 21Gokï cööt luelkï an, “Piäätë, piäätë!”
22Go keek bɛ yɔ̈ɔ̈k raandiäk an, “Ee käŋö, ee kërɛɛc ŋö cï raanë looi? Acïn awäny cä yök tëde yen kë duëër ye nɔ̈k: yen a bän e dui ku jɔ lony.”
23Gokï ŋak nɔm ë röl dït, ke läŋkï an, bï piäät ë tim cï rïïu nɔm kɔ̈u. Go Pilato tiaam ë rölden. 24Go löŋ teem an, bï looi acït man ë këdɛn kɔɔrkï. 25Go raan luöny keek, raan wään cï tääu ë alooc yic në baŋ de tɔŋ cï yiɛ̈n miric ku näŋ de raan, raan wën kɔɔrkï, ku jɔ Yecu yiɛ̈n keek, bïk luöi këde piɔ̈nden.
Yecu acï Piäät ë Tim cï Rïïu Nɔm Kɔ̈u
(Math 27:32-44; Mak 15:21-33; Jɔn 19:17-27)
26Na wën, athelkï ye wei, ke ke dɔm raan cɔl Thimon raan ë Kurene, ke bɔ̈ rɛɛr, gokï tim cï rïïu nɔm tääu ë yekët, bï ɣääc ë Yecu cök.
27Ku kuany cök ë kut dïït ë kɔc, ku diäär, diëër biëk kepiɔ̈ɔ̈th ku dhiëëukï. 28Go Yecu yenɔm wɛ̈l keek, ku lueel an, “Wek nyïïr ke Jeruthalem, duökï ya dhiëëu, dhiëëukï röt, ku mïthkun. 29Tiëŋkï, akööl abïk bɛ̈n, akööl bï kɔc yen aa lueel an, ‘Thieithieei ë diëër cï rol, ku madhiëth kën guɔ dhiëth, ku thin kënë kɔn thuat!’ 30#Ɣodh 10:8; Nyu 6:16. Ë aköölkë abï kɔc kurdït yɔ̈ɔ̈k an, ‘Wiëëkkï ë wonïïm!’ Ku yöökkï kur kor an, “Kuömkï wo piny!’ 31Ku na loikï kake ë tim tiɔpic, eeŋö bïk looi në tim cï riɛlic?”
32Ku ade kɔc kɔ̈k kaarou, kɔc cï kërac looi, go ke thel në yen ëtök le ke nɔ̈k. 33Na wën, aa cïk ɣet të cɔl “Apet,” ke jɔkï piäät ëtɛ̈ɛ̈n ë tim cï rïïu nɔm kɔ̈u, ku piëëtkï kɔc cï kërac looi, tök ë baŋ cuënyde, ku tök ë baŋ cam. 34#Diɛt 22:18. Na wën, ke lueel Yecu an, “Wäär, päl keek, në kuny kuc kek ke loikï.”#23:34: Këcïgäär däŋ acïnic acï Yecu lueel, “Pälë keek, Wäär! Akuckï kë loikï.”
Gokï lupɔɔke tɛ̈k röt në deeny deeny kek gɛk. 35#Diɛt 22:7. Ku kääc kɔc juëc ë ke daai. Go bäny ceŋ piny gokï geet guöp aya, luelkï an: “Acï kɔc kɔ̈k kony, tɔ kony rɔt, tën ee yen Kërtho de Nhialic, raandɛn cï lɔc!”
36 #
Diɛt 69:21. Ku get guöp ë rem de tɔŋ ayadäŋ, acïk bɛ̈n tëde yen, ku gɛ̈mkï mɔ̈n cï wac, 37ku luelkï an, “Tën ee yïn Melik de Judai, ke yï kony rɔt!”
38Ku ade jam cï gɔ̈ɔ̈r ë yenɔm nhial, në gäär de Girikii ku Roma ku Ɣeberuu an, “Kënë ee Melik de Judai.”
39Na wën, ke raan töŋ de kɔc cï piäät në yen ëtök, kɔc cï kërac looi, ke jɔ lat ë lɛ̈t rac, ku lueel an, “Na ye Kërtho, ke yï kony rɔt ku kony wook aya!”
40Go raan däŋ cï piäät kekë yen bɛ̈ɛ̈r, jiëëny an, “Cï ye cak riɔ̈ɔ̈c ë Nhialic, nɔn jiɛɛm yïn wuya, ke yïn cï këtuc manë yök aya? 41Ku këtuc cuk yök wook acï tiiŋ nɔm ëgɔk, wo cï kë röŋ ke luɔida jɔ yök: ku raanë acïn kërɛɛc cï looi.” 42Ku lëk Yecu an, “Bɛ̈nydït, tak yïnɔm ë yɛn, të cï yïn lɔ ë ciɛɛŋdu yic!”
43Go Yecu yɔ̈ɔ̈k an, “Yïn yɔ̈ɔ̈k ëyic an, ee köölë ke yïn bï nu wekë yɛn ë Paraditho.”
Thon de Yecu
(Math 27:45-56; Mak 15:33-41; Jɔn 19:28-30)
44-45 #
Bɛ̈n 26:31-33. Na wën, të cït thaar kadhetem, ke mɔ̈ɔ̈th bɔ̈ ë piny nɔm ëbɛ̈n aɣet thaar ë dhoŋuan, akɔ̈l ë määr: ku jɔ lupɔ dïït de Luaŋdït yic rɛɛt ë ciɛɛlic. 46#Diɛt 31:5. Na wën, ke Yecu cöt ë röl dït, lueel an “Wäär, wëikï a tääu keek ë yïcin!” Ku të cï en wëlkë lueel, ke jɔ thöök.
47Na wën, ke bɛ̈ny de tɔŋ kabɔt, të cï en kë cï tïc tïŋ, ke lec Nhialic, lueel an, “Raanë ee raan piɛthpiɔ̈u ë yic!”
48Ku kuut ke kɔc kedhie, kɔc wën cï guëër bïk bɛ̈n daai ee kënë, të cï kek kë cï looi tïŋ, ke ke dhuny kenïïm, ku biäkkï kepiɔ̈ɔ̈th. 49#Luk 8:2,3. Go kɔc ŋic en kedhie ku diëër wään ë ye kuany cök në Galili, gokï kɔ̈ɔ̈c tëmec, ku dɛɛikï në kakë.
Täu Tɔ̈ɔ̈uwë Yecu
(Math 27:57-61; Mak 15:42-47; Jɔn 19:38-42)
50Na wën, dï, ke raan cɔl Jothep, raan nu ë löŋ de röördït yiic, ku ye raan piɛth ku piɛth ë löŋ, 51(raan kën löŋden gam ayï luɔidɛn cïk looi), ee raan ë Arimathia, pänydïït töŋ de Judai, ku yenguöp aŋäth ciɛɛŋ de Nhialic: 52ë lɔ tëde Pilato en ee raanë, le ku lip guöp de Yecu. 53Go bɛ̈ɛ̈i piny, ku deer ë lupɔ linɔn, ku jɔ tääu ë raŋic, raŋ cï wec ë kuur lɔ giliu yic, raŋ cïn raan cï kɔn tɔ̈ɔ̈u thïn. 54Ku aaye kööl ë guiɛɛk, ku cï kööl ë Thabath thiɔ̈k.
55Na wën, ke diëër wään cï bɛ̈n bei ë Galili në yen ëtök, ke kuanykï cök, ke ke jɔ raŋ tïŋ, ku tïŋkï täu cï guöpde tɔ̈ɔ̈u. 56#Bɛ̈n 20:10; Nyöŋ 5:14. Gokï kenïïm dhuny, lek wɛ̈ɛ̈l cï ŋïrëŋïr guik ku miök.
Gokï lɔ̈ŋ ëkööl ë Thabath cït man cï e lueel ë löŋic.
നിലവിൽ തിരഞ്ഞെടുത്തിരിക്കുന്നു:
Luk 23: dip-JPB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The Bible in Jieeng de Padang © The Bible Society in South Sudan, 2011.
