創世記 8
8
大水退掉
1上帝無毋記得挪亞㧯大船所有个動物、頭牲。上帝喊風去吹大地，水就退了。 2深淵个水源㧯天頂个水門也關起來，天空个大雨乜停下來。 3水在地上緊來緊斂；一百五十日後，水就退。 4七月十七，大船停在亞拉臘山頂。 5水又繼續緊退，到十月初一，就看得到山頂。
6四十日後，挪亞打開大船个窗門， 7放一隻烏鴉出去；這隻烏鴉飛來飛去，直到水在地上燥掉。 8佢又放一隻月鴿仔出去，愛看水對地上退吂？ 9總係，因為水還浸等大地，月鴿仔尋毋到停腳个地方，就飛轉大船挪亞該位。挪亞伸手將月鴿仔接入大船來。 10佢又等七日，再一擺將月鴿仔對大船放出去。 11到臨暗仔，月鴿仔轉到佢該位，嘴啣等啄下來个新橄欖葉；恁樣，挪亞就知水退了。 12又等七日，佢又放月鴿仔出去，月鴿仔就無再飛轉來。 13挪亞六百零一歲該年正月初一，地上个水已經燥了。挪亞打開船蓋，探頭看，看到地面已經燥了。 14到二月二十七，地泥就完全燥了。
15上帝對挪亞講： 16「你㧯若𡜵娘、孻仔、心舅攏總愛對大船出去。 17㧯你共下一切有生命个動物，就係飛鳥、頭牲㧯地上个爬蟲，全部愛帶出去，使它兜在地上愛𫱔多多，大大興旺。」 18恁樣，挪亞就㧯厥𡜵娘、孻仔、心舅共下出來。 19各種各類个走獸、爬蟲、飛鳥，所有地上个動物，全部對大船出來。
挪亞獻祭
20 挪亞為上主起一座祭壇，取各樣淨浰个頭牲、飛鳥，在祭壇頂獻做燒化祭。 21上主鼻到該香氣就歡喜，心肚講：「𠊎一定毋會因為人个行為再咒詛大地；雖然人從細就心思邪惡，𠊎一定毋會像這擺將地上所有个生物再消滅。 22只愛大地存留一日，就可以委種收成；有寒熱冬夏、有日時暗晡，永遠無停。」
നിലവിൽ തിരഞ്ഞെടുത്തിരിക്കുന്നു:
創世記 8: THV12Hdb
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© The Bible Society in Taiwan, 2012
All rights reserved
© 台灣聖經公會版權所有 2012
