創世記 12
12
上帝呼召亞伯蘭
1上主對亞伯蘭講：「你愛離開你个故鄉、親族、㧯若爸个屋下，到𠊎指示你去个地方。 2𠊎愛俾你成做大國；𠊎愛賜福給你，使你大有名望；人愛因為你來得到福氣。
3祝福你个，𠊎愛賜福給佢；
咒詛你个，𠊎愛咒詛佢。
𠊎愛因為你賜福給地上个萬民。」
4 亞伯蘭七十五歲个時，照上主个指示離開哈蘭；羅得也跈等佢。 5亞伯蘭帶𡜵娘莎萊、姪仔羅得、㧯佢等在哈蘭所積存个財產、所得到个人丁向迦南出發。
佢等去到迦南以後， 6亞伯蘭經過該所在，來到示劍个摩利橡樹附近。該時迦南人還住在該位。 7上主向亞伯蘭顯現，對佢講：「𠊎愛將這垤土地賜給你个後代。」亞伯蘭就在該位為向佢顯現个上主起一座祭壇。 8佢對該位徙到伯特利東片个山區，在該位搭帳篷；西片係伯特利，東片係艾；在該位佢又為上主起一座祭壇，求喊上主个名。 9以後，亞伯蘭漸漸向南徙，到迦南个南部。
亞伯蘭到埃及
10該所在發生飢荒，情況非常嚴重。亞伯蘭就下到埃及，愛暫時住在該位。 11差毋多會到埃及个時，亞伯蘭對厥𡜵娘莎萊講：「𠊎知你係盡靚个婦人家； 12埃及人看到你，一定會講：『這係厥𡜵娘』。因為恁樣，佢等會㓾死𠊎，留下你。 13請你㧯佢等講，你係𠊎个老妹。佢等就會因為你个緣故好款待𠊎，饒𠊎个命。」 14亞伯蘭到埃及个時，埃及人就看到莎萊當靚。 15埃及王 #12:15 「埃及王」直譯係「法老」，原來就係埃及話，係指到埃及个國王。个官員看到莎萊，就去王面前讚美姖；莎萊就被人帶入王宮。 16王因為這婦人家个緣故，就好款待亞伯蘭；亞伯蘭就得到盡多个牛羊、驢仔、駱駝、奴僕㧯奴婢。
17總係，上主因為亞伯蘭个𡜵娘莎萊个緣故，使王㧯佢全家發大病受苦。 18所以王就喊亞伯蘭來，對佢講：「你做麼介恁樣對待𠊎？做麼介毋㧯𠊎講姖係若𡜵娘？ 19做麼介講姖係若老妹？害𠊎將姖帶來愛做𠊎个𡜵娘！這下你看，若𡜵娘在這，帶姖走！」 20因為恁樣，王就命令人將亞伯蘭㧯厥𡜵娘，並佢所有个一切送走。
നിലവിൽ തിരഞ്ഞെടുത്തിരിക്കുന്നു:
創世記 12: THV12Hdb
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© The Bible Society in Taiwan, 2012
All rights reserved
© 台灣聖經公會版權所有 2012
