HLA CHHUANVÂWR 8
8
1അങ്ങ്, എന്റെ അമ്മയുടെ മുലപ്പാൽ കുടിച്ച സ്വന്തം സഹോദരൻ ആയിരുന്നെങ്കിൽ!
വെളിയിൽ വച്ചു കണ്ടുമുട്ടുമ്പോഴും ഞാൻ അങ്ങയെ ചുംബിക്കുമായിരുന്നു;
ആരും എന്നെ പഴിക്കുകയില്ല.
2എന്റെ അമ്മയുടെ വീട്ടിലേക്ക്,
എന്നെ ഉദരത്തിൽ പോറ്റിയവളുടെ ഉറക്കറയിലേക്ക്
അങ്ങയെ ഞാൻ കൂട്ടിക്കൊണ്ടു പോകുമായിരുന്നു;
അങ്ങേക്കു കുടിക്കാൻ സുഗന്ധ മുന്തിരിച്ചാറും
എന്റെ മാതളപ്പഴങ്ങളുടെ ചാറും ഞാൻ തരുമായിരുന്നു.
3അവിടുത്തെ ഇടങ്കൈ എനിക്കു തലയണയായിരുന്നെങ്കിൽ!
അങ്ങയുടെ വലങ്കൈ എന്നെ പുണർന്നിരുന്നെങ്കിൽ!
മണവാളൻ
4യെരൂശലേംപുത്രിമാരേ, ഞാൻ നിങ്ങളോടു കെഞ്ചുന്നു;
പ്രേമനിർവൃതിയിൽ മുഴുകിയ എന്റെ പ്രേമഭാജനത്തെ മതിവരുംമുമ്പേ
വിളിച്ചുണർത്തരുതേ.
ഗീതം ആറ്
തോഴിമാർ
5ആത്മപ്രിയന്റെ തോളിൽ ചാരി
വിജനതയിൽനിന്നു വരുന്ന ഇവൾ ആരാണ്?
മണവാളൻ
മാതളനാരകത്തിന്റെ ചുവട്ടിൽ വച്ച് ഞാൻ നിന്നെ ഉണർത്തി;
അവിടെവച്ചാണല്ലോ, നിന്നെ പെറ്റവൾക്ക് ഈറ്റുനോവ് ആരംഭിച്ചത്;
അവിടെവച്ചാണല്ലോ നിന്റെ അമ്മ നിന്നെ പ്രസവിച്ചത്;
6ഹൃദയത്തിൽ ഒരു മുദ്രയായും ഭുജത്തിൽ ഒരു അടയാളമായും നീ എന്നെ ധരിച്ചാലും;
പ്രേമം മൃത്യുപോലെ ശക്തം;
ജാരശങ്ക ശവക്കുഴിപോലെ ക്രൂരം;
ജ്വലിക്കുന്ന അഗ്നിപോലെ അതും ആളിക്കത്തുന്നു.
7സാഗരങ്ങൾ ഒത്തുചേർന്നാലും പ്രേമാഗ്നി കെടുത്താൻ സാധ്യമല്ല.
പ്രളയത്തിനും അതു മുക്കിക്കെടുത്താൻ കഴിയുകയില്ല.
പ്രേമത്തിനുവേണ്ടി കുടുംബസ്വത്തു മുഴുവൻ കൊടുത്താലും
അതു തുച്ഛമായിരിക്കും.
മണവാട്ടിയുടെ സഹോദരന്മാർ
8നമുക്ക് ഒരു കുഞ്ഞുപെങ്ങളുണ്ട്;
അവളുടെ മാറിടം വളർന്നിട്ടില്ല;
അവൾക്കു വിവാഹാലോചന വരുമ്പോൾ നാം എന്തു ചെയ്യും?
9അവൾ ഒരു മതിൽ ആയിരുന്നെങ്കിൽ,
മീതെ വെള്ളികൊണ്ട് ഒരു ഗോപുരം പണിയാമായിരുന്നു;
വാതിൽ ആയിരുന്നെങ്കിൽ,
ദേവദാരുപ്പലകകൊണ്ട് കതകു പണിയാമായിരുന്നു.
മണവാട്ടി
10അന്നു ഞാൻ ഒരു മതിൽ ആയിരുന്നു;
എന്റെ സ്തനങ്ങൾ അതിന്റെ ഗോപുരങ്ങളും ആയിരുന്നു.
അപ്പോൾ പ്രിയന്റെ ദൃഷ്‍ടിയിൽ ഞാൻ സംതൃപ്തി നല്‌കുന്നവളായിരുന്നു.
മണവാളൻ
11ശലോമോന് ബാൽഹാമോനിൽ ഒരു മുന്തിരിത്തോട്ടം ഉണ്ടായിരുന്നു;
അദ്ദേഹം ആ തോട്ടം കാവൽക്കാരെ ഏല്പിച്ചു.
ഓരോരുത്തനും ആയിരം വെള്ളിനാണയം
വീതം പാട്ടം കൊടുക്കേണ്ടിയിരുന്നു.
12എന്റെ മുന്തിരിത്തോപ്പ്, എന്റെ സ്വന്തം തോട്ടം എനിക്കുവേണ്ടിയുള്ളതാണ്.
അല്ലയോ ശലോമോനേ, അങ്ങേക്ക് ആയിരവും
കാവല്‌ക്കാർക്കു ഇരുനൂറും വേണമെങ്കിൽ തരാം.
13ഉദ്യാനത്തിൽ വസിക്കുന്നവളേ, എന്റെ തോഴന്മാർ നിന്റെ സ്വരത്തിനു കാതോർക്കുന്നു;
നിന്റെ ശബ്ദം ഞാൻ കേൾക്കട്ടെ.
മണവാട്ടി
14പ്രിയതമാ, സുഗന്ധസസ്യങ്ങൾ വളരുന്ന മലയിലെ മാൻകുട്ടിയെപ്പോലെയും
കലമാൻകിടാവിനെപ്പോലെയും എന്റെ അടുക്കലേക്കു കുതിച്ചുവരിക.
നിലവിൽ തിരഞ്ഞെടുത്തിരിക്കുന്നു:
HLA CHHUANVÂWR 8: malclBSI
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Malayalam C.L. Bible, - സത്യവേദപുസ്തകം C.L.
Copyright © 2016 by The Bible Society of India
Used by permission. All rights reserved worldwide.