Luku 17

Ome iwhe-dụ-ẹji

(Mát. 18:6-7,21-22; Mak. 9:42)

1Jisọsu sụ ndu l'etso ụzo iya: “O doru ẹnya l'o nwegeeru iwhe dụ l'iche l'iche l'ee-bekochaa mee tẹ madzụ shiswee ụzo Chileke, ọle nshọkwanu onye ono, l'oo-shi l'ẹka iya. 2Ọ gọgo karụ onye ono mma nggẹ l'ọo iwhe a patarụ ẹwhuru uswe nyabẹ iya l'olu je aparụ iya chee l'eze-ẹnyimu, amamẹ l'o meru t'onye lanụ l'ime ụnwegirima-a shiswee ụzo. 3Unu kwachafụru onwunu ẹnya!

“Ọ -bụru lẹ nwanna ghu mesweru ghu, kfuru iye ya, ọ daa onwiya ụta haa ome iwhe ọbu, gụ agụaru iya nvụ. 4Nteke bụ l'o mesweru ghu ugbo ẹsaa l'ujiku lanụ, ọ byakfutakota ghu ugbo ẹsaa ono bya asụ ghu lẹ ya daakwaru onwiya ụta, gụ agụkotaru iyẹ ya nvụ.”

Ekwekwe

5Ndụ-ishi-ozhi sụ Onye-Nwe-Ọha: “Nna, menua t'anyi kabaa okweshi ike.”

6Ọ sụ whẹ “Nggẹ l'ekwekwe unu kweru nke Chileke habenu m'ọo g'ọo nwa ọrikirikwekwe akpụru mọsutadu mẹ unu adụjekwa ike sụ eze oshi sịkamayinu: ‘Whọfu onwoghu l'ẹka-a je akpọbe onwoghu l'ime eze-ẹnyimu;’ mẹ ya emee iwhe unu kfuru.

Iwhe gbarụ nwozhi l'ememe

7“T'e woru iya l'onye lanụ lẹge unu ha bẹ nweru ohu, l'akọru iya ọkoro, ọdua ọ bụru onye l'echeru iya atụru. Nteke bụ l'ohu ono shi l'ẹgu lwa, ?Ịi-sụ iya t'ọ bya anọdulekwawho ria nri? 8?Iwhe l'ii-gbechia kfuru iya ta abụdu: ‘Shiaru mu nri ẹnyashi mu ẹgwegwa, gụ eyee uwe ghu gwofutaru mu nri tẹ mu riada, tẹmenu gụbedua eria nke ghu.’ 9?L'oo-kele nwohuta ono ekele nkele o meru iwhe o zhiru iya? 10O nokwawho gẹ unubẹdua dụ. Unu megelewho iwhe e zhiru unu, unu asụ: ‘Anyi bụ ndu ozhi, l'ẹte adụa iwhe anyi bụ, ọlewho iwhe gbarụ anyi l'ememe bẹ anyi meru.’ ”

Jisọsu l'eme tẹ ụmadzu iri njọkirehu l'eme mehu

11Gẹ Jisọsu l'eje Jerúsalẹmu ono bẹ l'ọoghata l'oge Samériya yẹle Gálili. 12Ọ bahụlewho l'ọma mkpụkpu lanụ, ụmadzu iri njọkirehu l'eme wụ-kfuta iya. 13Whẹ nọdu otẹnya chia mkpu sụ: “Jisọsu! Onye-Nwe-Ọha! Whụnuaru anyi imiko!”

14Jisọsu whụa whẹ, ọ sụ whẹ: “Unu je tẹ ndu l'agbajẹ ẹja nụ Chileke lelee unu.”

Whẹ tụgbua jeshia, jenyaa l'ụzo njọkirehu ono mishihu whẹ l'ẹhu. Whẹ mehukota. 15Onye lanụ whụlewho lẹ ya mehuwaru, ọ bya adakọbe dawhushia azụ, echi mkpu aja Chileke ajaja. 16Ọ byarwulewho mgboro ọkpa Jisọsu, ọ bya adaa kpube iwhu l'alị wata iya okele ekele. Onye lanụ ono bẹ bụ onye Samériya. 17Ọo ya bụ Jisọsu sụ: “?Tọ bụnua ụmadzu iri b'e meru whẹ mehu? ?Ndẹhunu ụmadzu tete ọwhuna? 18?Tọ dụ-zhihedua onye o rwuru l'ẹhu tẹ ya dawhu azụ bya ekele ekele, gbahalẹwho onye-e, shi alị ọdo-o?” 19Jisọsu sụ nwoke ono: “Gbalihu jeshia iwhe l'iije. Ọo ekwekwe, i kweru nke Chileke meru t'ẹhu dụ ghu mma.”

Nteke Chileke l'e-goshi l'ọo ya bụ eze

(Mát. 24:23-28,37-41)

20Ndu Fárisii jị Jisọsu sụ: “?Ọ hụnu nteke ole bẹ Chileke l'e-goshi l'ọo ya bụ eze ọbu?” Ọ sụ whẹ: “Chileke -bya l'egoshi l'ọo ya bụ eze bẹ l'oo-to mekwa iya nke ọwhu l'aa-whụ iya l'ẹnya. 21Ọdua l'ọo t'a sụ: Lee ya l'ẹka-a, ọdua l'ọ whụ iya! O noo lẹ Chileke bụakwa eze ọbu l'ẹka unu nọ ntaa.”

22Ọ sụ ndu l'etso ụzo iya: “Oge nọwho abya nteke l'ọo-dụje unu nggẹ l'ọ dụ g'e shi unu nọonu m'ọo ujiku lanụ l'ẹka Abụbu-Ndiwhe bụ eze, ọle unu ta anọdu iya. 23O nweru ndu ọwhu l'a-sụ unu: Unu lekwa iya l'ẹka whọ, ọdua t'unu lee ya l'ẹka-a. Unu be ejekwa, unu te etsohunuru whẹ. 24O noo l'ọo gẹ ebemu-igwe l'emeje whoo l'akpamigwe, shi l'ishi lanụ lọjaa je asụ l'ishi iya ọwhu bụ gẹ Abụbu-Ndiwhe l'e-me mbọku l'ọo-bya. 25Ọle o vufutaje ụzo jeeda iwhe-ọtsulanu ha l'igweligwe lẹge ọ gbarụ iya, tẹmenu ndu ọgbo elenu-a ajịkakwa iya whọ. 26Ọo g'ọ dụ l'ọgbo Nowa whẹ lẹ bụ gẹ l'ọo-dụ nteke Abụbu-Ndiwhe l'a-bya. 27Nteke ono bẹ whẹ nọdu eri angụ; alụwhe nwanyị; ekee ụnwanyi ji jeye mbọku Nowa whẹ bahụru l'eze ụgbo, ọ kụru. Utso bya agbaa rigbushia ndu ọwhu gẹ whẹ hakọta. 28O nokwawho g'ọ dụ l'ọgbo nke Lọtu. Whẹ l'eri angụ agba nghọ ere, emebekaa iwhe l'alị, atụshi ụlo. 29Obenu mbọku Lọtu lụfuru lẹ Sódomu, ore whuruwhuru ọku yẹle nshị-egbe shi l'igweli chịa g'ọo mini bya ekegbushikota ndu Sódomu gẹ whẹ ha. 30O noo gẹ l'ọo-dụ mbọku Abụbu-Ndiwhe l'e-he.

31“Mbọku ono rwulewho, t'onye nọ l'ọkpoku iya, iwhe iya dụ l'ụlo, be ejekwa iya egwofuta. T'onye ọwhu nọ l'ẹgu be ejehekwa ọla l'uwhu. 32Nyata g'ọ nwụru nyee Lọtu. 33Iwhe bụ onye l'eme tẹ ndzụ iya bụru iya urwu lẹ mgboko-o l'e-tuwhakwa ọkpobe ndzụ iya. Iwhe bụ onye tuwharu ndzụ iya lẹ mgboko-o bẹ l'a-nọdu ndzụ tututu-mịmimi.” 34Jisọsu sụkwa whẹ whọ: “Iwhe mu l'ekfuleruwho unu bụ l'ẹnyashi mbọku ono bẹ unwoke labọ l'a-zẹe l'okpo lanụ, e zhikota onye lanụ haa onye ọwhu. 35Ụnwanyi labọ l'a-nọ atsụ nri, a bya ezhikota onye lanụ haa onye ọwhu. 36Ụmadzu labọ l'a-nọdu l'ẹgu, e zhikota onye lanụ, onye ọwhu akwaa.”

37Ndu l'etso ụzo iya sụ: “Onye-Nwe-Ọha ?ọo l'awee bẹ iwhe ono l'e-me?”

Ọ sụ whẹ: “Ọo ẹka odzu daburu, o noo ẹka udele l'e-dzukobeje.”

നിലവിൽ തിരഞ്ഞെടുത്തിരിക്കുന്നു:

Luku 17: Ezaa

ഹൈലൈറ്റ് ചെയ്യുക

പങ്ക് വെക്കു

പകർത്തുക