Luku 14

Jisọsu l'eme onye ẹhu l'eme t'o mehu

1Ọ bya erwua mbọku ọtuta-ume lanụ, Jisọsu jee ori nri l'ibe nwoke lanụ, nọ l'ishi lẹ ndu Fárisii, whẹ l'egekwa iya who ngge. 2Ọo ya bụ, nwoke lanụ ọbu nchachamanụ l'eme byawa bya akfụru iya l'iwhu. 3Jisọsu bya ekfuru yeru ndu o-zhi-iwu mẹe ndu Fárisii sụ whẹ: “?A sụnuru-a t'e mejee onye ẹhu l'eme t'o mehu mbọku ọtuta-ume, t'a sụru t'e be emejeshi iwhe dụ nno?”

4Whẹ te ekfu okfu. Ọ bya eduta iya bya emee ya o mehu, dufu iya ọ tụgburu lashia. 5Jisọsu sụ whẹ: “?Ndẹe gụnu ha l'ẹhu l'ẹhu onye ọwhu nwa iya nwoke, ọdua l'ọo oke-eswi iya l'a-daba l'iduma mbọku ọtuta-ume t'onye ọwhu ọbu ba agbakebe ẹgwegwa je apafụta iya?”

6Whẹ ta ama gẹ whẹ l'e-ye ọnu l'okfu ono.

Owozeta onwonye alị

7Ọ bya anmaarụ ndu ono, e kuru lẹ nri ono ẹtu g'ọ whụleruwho gẹ whẹ họta-geeru oshi ndu nweru ẹnya, sụgabe-gee onwowhe. Ọ nmaarụ whẹ ẹtu sụ whẹ: 8“Mbọku bụ lẹ madzụ kuru ghu l'eriri ẹswa-nwanyị, be ejekwa je anmakoru lẹ nggada ndu nweru ẹnya, a nọnyadaawho o nweru onye ọdo ka ghu onwe ẹnya, e kukwaruwho l'eriri ono. 9Onye ono, tụkoru gụ l'iya ku oku ono l'a-byakwa bya asụ ghu: ‘Gbashiadanu l'oshi ono tẹ nwoke-e nọdu!’ Gụ agbẹe nteke ono nyịgobe gude iwhere je anọ-zeta l'oshi ndu ẹnya whẹ lwarụ. 10Ọle nteke e kujeru ghu oku, jeje anọ-zeta l'oshi ndu ọwhu ẹnya lwarụ nke ọwhu bụkwanu nteke onye kuru unu oku byarụ ya asụ ghu: ‘Ọnya-a, gbashi bya anọdu l'oshi ọwa ka ree;’ ọo ya bụ a kwabẹ ghu ugvu l'edzudzu-ọha ono, gụ lẹ whẹ nọ lẹ nri. 11O noo l'onye bụ onye l'ekuli onwiya eli, bẹ l'ee-kuzeta, onye l'ekuzeta onwiya bẹ l'ee-kuli eli.”

12Ọ sụkwawho nwoke ono, kuru iya lẹ nri: “Nteke l'iiku ndu madzụ oku nri, ọdua l'eeri oge i kude whẹ, be ekukwa ọnya ghu whẹ, ti ku unwune ghu whẹ, ti ku abụbu ghu whẹ, ti ku ndu obutobu ghu whẹ, nweru iwhe. Iwhe meru tii ku whẹ bụ lẹ whẹ l'e-kulata ghu, ya agbẹe dụ ge-woo l'ọo ụgwo iwhe ghu bẹ whẹ l'akfụ ghu. 13Iwhe l'iimejechia bụ, nteke i shiru nri mẹ l'eeri oge, gụ ekujechia ndu ụkpa mẹe ndu l'ete edzua oke mẹe ndu ngvụru mẹe ndu l'atsọ ishi. 14Ọo ya bụ l'ẹhu-ụtso bụ nke ghu nkele whẹ ta afụdu kfụa ghu ụgwo iya. Nteke Chileke l'a-kfụ ghu ụgwo iya bụ nteke ndu marụ nke Chileke l'e-shi l'ọnwu teta nọdu ndzụ.”

Ẹtu ndu l'eku lẹ nri

(Mát. 22:1-10)

15Onye lanụ l'ime ndu whẹ l'iya nọ lẹ nri ono nụa ya, ọ sụ iya: “Iwhe ẹhu l'aa-tsọbukwanua onye ono, l'e-ri nri l'ẹka Chileke bụ eze.”

16Jisọsu sụ iya: “O nweru nwoke lanụ kwakọbejeru ọkwa-eze ẹbyii. Ọ bya ekukoo igweligwe madzụ. 17Oge ori iwhe ono gbabelewho, o zhia nwozhi iya t'o je ekua ndu ono, e kuru lẹ nri ono, sụ whẹ tẹ whẹ bya l'iwhe lile dụkotawaa ree. 18E je ezhigee whẹ iya, gẹ whẹ ha tụko lọru ẹli ye iya. Onye nke ivurụzo sụru iya: ‘Byiko mẹ mu ta adụkwa ike abyakọta, l'o nwekwaru alị, mu zụru ọwhuu, mu l'eje tẹ mu je agbawhee ya ntaa.’ 19Onye ọwhu sụ: ‘Byiko mẹ mu ta abyakọtakwa, lẹ mu zụkwaru oke-eswi iri, ọ bụru iya bẹ mu l'eje adata ntaa tẹ mu marụ l'oojee ozhi.’ 20Onye ọwhu sụ: ‘Byiko mẹ mu ta adụkwa ike abya, lẹ mu lụkwaru nwanyị nke ọwhuu, o nokwa iwhe meru mu ta abyakọta.’

21“Ọo ya bụ, nwozhi ono bya akọoru onye-nwe-iya-nụ iwhe ono. Nwoke ono nwe uwhu gude ẹhu-eghughu sụ nwozhi iya ono: ‘Ngwa gbagbụru ẹgwegwa lụfu jeje etsoru oji g'oji ha lẹ mkpụkpu-a, gụ etsoru iwhe bụ-zhia echi-ụzo, je etsoru iya rwukoo ndu ụkpa mẹe ndu l'ete edzua oke mẹe ndu l'atsọ ishi mẹe ndu ngvụru.’

22“E megee nwozhi ono bya asụ iya: ‘Nna, iwhe i sụru t'e mee b'e meekwaru, ọle a ta anọ-chishigekwa oshi lile.

23“Onye-nwe-nwozhi ono sụ iya: ‘Ngwa tụgburu je etsoru ụzo g'ụzo ha mẹe ẹswara-ụzo e shi eje l'ẹgu je akpakọo madzụ nggẹ ibe mu ji eji. 24Iwhe mu l'eme tẹ mu karụ unu bụ l'o tọ dụdu ndu ọwhu, e kuhawaru lẹ nri ono, dụ onye ọwhu bya l'a-kpa ọnu lẹ nri mu t'ọ ka mma l'ọo onye lanụ.’ ”

Iwhe l'oorije onye l'etso ụzo Jisọsu

(Mát. 10:37-38)

25Nteke ono b'a ha l'igweligwe etso Jisọsu. Ọ bya aghachi sụ whẹ: 26“Onye l'abyakfuta mu nụ, onye ọbu te eye mụbe Jisọsu obu amamẹ g'o yeru ne lẹ nna nwụru iya nụ, mbụ onye ọbu te eyee mu obu amamẹ g'o yeru nyee ya mẹe ụnwu iya mẹe unwune iya nke nwoke mẹe unwune nke nwanyị, mbụkwa je akpaa lẹ ndzụ iya, onye ono ta abyakwa l'e-tsokota mu. 27Iwhe bụ onye l'ete evutaa oswebe ọnwu nke ẹka iya vuru etso mụbe Jisọsu ta abyakwa l'e-tsokota mu.

28“Sụa, ?ndẹe onye ono lẹ g'unu ha, l'arị nke ọtu ụlo-eli t'onye ọbu be evuada ụzo nọduada anọdu gbakọo iwhe l'oo-ri iya, marụ ya nwedunu okpoga l'e-dzu iya. 29Onye ọbu e -mee ya nno, o gvugelewho ukfu-ụlo ono, tọ dụhe ike tuchia ụlo ono, ndu whụjeru iya nụ whẹ ajadẹ iye ewenu sụ: 30‘Kaa ọwhu jeru lẹ ya l'atụ ụlo tọ dụhe ike tụ-gee ya.’

31“Tẹ ?ndẹe onye eze ono, l'a-gbashi jekfushia onye eze ibe iya ọgu, ya eje evuada ụzo nọdu chịada idzu sụ: ‘?Ọo onye marụ ọo ụkporo ụnu ndu ojọgu l'ụnu ise bẹ mu l'a-chị ejekfu onye ọwhu gude ụkporo ụnu ndu ojọgu labọ l'ụnu iri abyakfuta mu ọgu?’ 32Nteke l'ọo dụa, onye ọwhu nọdukwaduro l'ụzo otẹnya, ya ahọta madzụ zhi tẹ whẹ je aryọo ya t'e doshia okfu. 33Ọo ya bụ l'ọ tọ dụkwa g'unu ha bya l'a-bụ onye l'etso ụzo mu gbahaa l'onye ono swefukotaru ẹnya l'iwhe lile o nwe enwe.

Únú tsuhuru etsuhu

(Mát. 5:13; Mak. 9:50)

34“Únú bụ iwhe dụ ree, ọle nteke únú tsọnyaaru únú-únú t'ọ tsọhe iya ?ọo gụnu bẹ l'ee-gude mebaa ya t'ọ ghọkwa-zhia tsọje únú-únú ọdo? 35Ọ tọ dụhekwanu m'ọo ree t'e ye iya l'alị, ọdua l'ọo l'ikpọzu. Ọo awụshi bẹ l'aa-wụshi iya l'etezhi.

“Onye ụzo-nchị dụ t'ọ nụa ya.”

നിലവിൽ തിരഞ്ഞെടുത്തിരിക്കുന്നു:

Luku 14: Ezaa

ഹൈലൈറ്റ് ചെയ്യുക

പങ്ക് വെക്കു

പകർത്തുക