Jọnu 14

Ọo Jisọsu bụ ụzo, e shi alakfu Nna

1Jisọsu sụ whẹ: “Tẹ unu ba ayọkwa ọshi l'ime obu unu. Unu woru onwunu ye Chileke l'ẹka, unu ewokwaruwho onwunu ye mụbe Jisọsu l'ẹka. 2L'ibe Nna mu bẹ ụlo ebubu ha l'igweligwe. Nggẹ l'ọ tọ dụ nno ?ndẹhunu gẹ mu g'eme sụ unu lẹ mu l'eje tẹ mu je emechaaru unu ẹka, unu l'a-nọ? 3Mu -jelewho je emechageleruwho unu ẹka ọbu, bẹ mu l'a-bya ọdo bya ekuta unu dokube onwomu, nke ọwhu bụ ẹka mu nọ, unu anọdukwa iya whọ. 4Unu mawarụ ẹka mu l'ala, unu makwarụwho ụzo, mu shi ala.”

5Tọ́mosu sụ iya: “Onye-Nwe-Ọha mẹ anyi ta amakwa ẹka ọbu, l'ịila ọbu. ?Ndẹhunu g'anyi meru marụ ụzo, e shi ala ẹka ọbu?”

6Jisọsu sụ iya: “Ọo mu l'onwomu bụ ụzo ono, ọ bụru mu bụ ọkpobe-okfu ono, ọ bụkwaru mu whọ bụ ndzụ ono. Ọ tọ dụdu onye l'abyakfuta Nna l'ẹte abụa l'ẹka mụbe Jisọsu bẹ onye ọbu l'e-shi. 7Unu -mazhiwaru mbẹdua bẹ unu l'a-makwawhọ Nna mu. Ọle wata ntaa tụgburu bẹ unu mawarụ Nna, unu whụakwa iya.”

8Fílipu sụ iya: “Onye-Nwe-Ọha, goshinu anyi Nna ọbu nggẹ obu nmakfuru anyi anmakfuru.”

9Jisọsu sụ iya: “Fílipu, eshi nkeshi-a bẹ mu l'unu shi nọduta t'ị ma mu. Onye whụru mbẹdua whụakwaru Nna; ?ndẹhunu g'e meru ị sụ tẹ mu goshi unu Nna ọbu? 10?T'i kwetadu lẹ mbẹdua nọ Nna l'ime, Nna nọdu mu l'ime? Okfu, mu l'anọje ekfuru unu ta abụkwa l'ike ẹka mu bẹ mu l'egudeje ekfu iya. Ọo Nna mu ono, bu mu l'ime bẹ l'eshije mu l'ime eje ozhi. 11Ọlewho t'unu kweta lẹ mu nọ Nna mu l'ime, Nna mu nọdu mbẹdua l'ime, ọ dụanu t'unu kwobe iswi iwhe mu l'emeshikaa kweta iwhe mu l'ekfu. ?Unu nụwaru iya? 12Iwhe mu l'ekfuleruwho unu bụ lẹ: iwhe bụ onye nọ mụbe Jisọsu l'ẹka l'a-dụkwawho ike mee iwhe mu l'emekaa. Onye ọbu l'a-kabakwaanụ ome ọwhu ka ọwa shii. O noo lẹ mbẹdua l'alakfuwa Nna mu. 13Sụa, iwhe bụ-zhia iwhe unu gudezhiwaa ẹwha mu sụ tẹ Nna mu meeru unu bẹ mu l'e-mekotaru unu. Ọ kwanụ iya bụ nke ọwhu l'ee-shi lẹ Nwa whụa ọdu-biribiri nke Nna. 14Ọ -dụ-zhia iwhe unu gudezhiwa ẹwha mu sụ tẹ mu meeru unu bẹ mu l'e-meru unu iwhe ọbu.

Jisọsu l'ekwe ụkwa Ume-Dụ-Nsọ

15“Sụa, ọ -bụru l'unu yeru mụbe Jisọsu obu, t'unu mekotaje iwhe bụ iwhe mu tụru unu l'iwu t'unu mee. 16Mu l'e-kfuru Nna t'o wotaru unu Onye Ọgbata ọdo, l'a-nọduwaro swiru unu jeye lẹ tututu-mịmimi. 17Onye Ọgbata ono, Nna l'a-nụ unu bụ Ume-Dụ-Nsọ bụ iya bụ Ume nke ire-lanụ, mbụ onye ndiwhe l'ẹte abyaa l'a-nata nkele whẹ ta awhụjedu iya, whẹ ta ama iya. Obekwanu l'unubẹdua marụ iya. O noo nkele o bu ebu l'ime unu. O jekwawho l'a-nọdugburu l'ime unu.

18“Mu ta ahakwa unu t'unu dajẹ ndamere nwa nwogbee, mu l'a-byakfutakwaa unu. 19Mbụ m'o wuduakwaru nwanshị ntaa ndu mgboko-o eje awhụbahee mu ọdo, ọle unubẹdua l'a-whụ mu. Eshi-ọwhu mu nọdu-a ndzụ bẹ unubẹdua l'a-nọdukwawho ndzụ. 20Ọo mbọku ono bẹ unu l'a-ma lẹ mu nọdu Nna mu l'ime, unubẹdua nọdukwanu mbẹdua l'ime, mu nọdukwawho unu l'ime.

21“Ọo onye marụ iwu, mu tụru, eme iya ememe bẹ bụ onye yeru mu obu. Onye yeru mu obu, Nna mu eyekwawho onye-ọ obu; mbẹdua eyekwawho onye-ọ obu; mu egoshigezhia onye ọbu onwomu.”

22Júdasu l'abụkwaa Júdasu Isukáriyọtu sụ iya: “Onye-Nwe-Ọha, ?ndẹe gẹ l'ii-shi goshi anyi onwoghu; to chidua ndiwhe bẹ l'ii-goshi onwoghu?”

23Jisọsu sụ iya: “Onye yeru mu obu l'a-nọje eme iwhe mu kfuru. Nna mu l'e-yekwa onye ono obu. Mu lẹ Nna mu alwakfuta onye ọbu, anyi l'iya eburu eburu. 24Onye l'ete eyee mu obu te emekwa okfu mu. Unu manụrua l'okfu unu l'anụ ta abụkwa okfu mu. Ọ kwa okfu Nna ono, bụ iya zhiru mu tẹ mu bya.

25“Mu kfukotaakwaru unu iwhe lile-e ntaa, mu l'unu nọdukwadu. 26Ọle ọo Onye Ọgbata ono bụ iya bụ Ume-Dụ-Nsọ, mbụ Onye ono, Nna l'e-shi mu l'ẹka zhitaru unu bẹ l'ezhikota unu iwhe lile, ya emekwaawho t'unu nyatajẹ iwhe lile, mu kfuhawaru unu.

27“Sụa, mu hawarụ unu ẹhu-ọdu-guu. Ọo ẹhu-ọdu-guu nkemu bẹ mu l'anụ unu. Ọ tọ bụkwa ẹgube ẹhu-ọdu-guu ọwhu ndu mgboko l'anụje bẹ mu l'anụ unu. T'obu ba awajẹkwa unu mini. Unu ba atsụjekwa egvu. 28Unu nụnurua nteke mu sụru unu: ‘Lẹ mu l'alakwaa, ọle mu l'a-lwakfutakwaa unu ọdo.’ Nggẹ l'ọo iwhe l'unu yeru mu obu mẹ unu aswakwaa ẹswa nkele mu l'alakfu Nna. O noo lẹ Nna ono ka mbẹdua shii. 29Ntaa bẹ mu tụkookwaru iwhe g'iwhe ha tụjashiaru unu nteke l'ọo tọo nwụdee. Ọo ya bụkwanu nke ọwhu unu l'e-kweta nteke ọ nwụderu. 30Mu te ekfuhekwaru unu okfu anọ ọdu ntaa, o noo nkele onye ishi, l'achị ndu mgboko l'abyawaa, ọle ọ tọ dụdu iwhe l'ọodu ike emebata mu. 31Iwhe meru mu l'emeje iwhe Nna zhiru mu tẹ mu mee bụ nggẹ ndu mgboko owhu amakwanụru lẹ mu yeru Nna mu obu.”

O kfugee nno sụ whẹ: “Unu gbalihu t'anyi lụfu l'ẹka-a.”

നിലവിൽ തിരഞ്ഞെടുത്തിരിക്കുന്നു:

Jọnu 14: Ezaa

ഹൈലൈറ്റ് ചെയ്യുക

പങ്ക് വെക്കു

പകർത്തുക